པཎ་ཆེན་མཆོག་ལྷ་བ།
གྲུབ་མཐའ། དགེ་ལུགས་པ།
འཁྲུངས་འདས། མི་གསལ།
པཎ་ཆེན་མཆོག་ལྷ་བ་ནི། པཎ་ཆེན་བསོད་ནམས་གྲགས་པའི་ཆོས་འབྱུང་ཡིད་ཀྱི་མཛེས་རྒྱན་ལས། པཎ་ཆེན་མཆོག་ལྷ་བ་ནི་ཤངས་སུ་ས་བྱར་སྐུ་འཁྲུངས། མཁྱེན་རབ་པ་དཔོན་སློབ་གཉིས་དང་། རྗེ་དགེ་འདུན་གྲུབ་ཡབ་སྲས་བསྟེན་ནས་གསུང་རབ་ལ་སྦྱངས་པས་མཁས་པར་གྱུར། དང་པོར་དགེ་འཕེལ་དང་། དེ་ནས་རྭ་སྟོད་དུ་བཤད་པ་མཛད་པས། རབ་འབྱམས་པ་ལེགས་པ་བཟང་པོ་དང་ནམ་མཁའ་དཔལ་བཟང་གཉིས། རབ་འབྱམས་པ་སངས་རྒྱས་དང་ནམ་མཁའ་དཔལ་བཟང་གཉིས། སློབ་དཔོན་བསྟན་པའི་རྒྱལ་མཚན་དང་ལྷ་དབང་དཔལ་འབྱོར་གཉིས། དཀའ་བཅུ་པ་ཚུལ་རིན་དང་ལེགས་གྲུབ་གཉིས། དཀའ་བཅུ་པ་རྣམ་རྒྱལ་དང་སྦུ་ར་བ་གཉིས། དཀའ་བཅུ་པ་མཁྱེན་རབ་དང་བཀྲ་ཤིས་ཕུན་ཚོགས་གཉིས། མཁན་ཆེན་བཀྲ་ཤིས་ལེགས་པ་སོགས་དགེ་བཤེས་མང་དུ་ཐོན་པར་སྣང་། མཐར་གླིང་སྨད་ཆོས་རྗེར་ཕེབས་ཏེ། དགུང་ལོ་དོན་གཉིས་པ་ལྕགས་ཕོ་སྤྲེའུའི་ཚུལ་ཞུགས་ཟླ་བའི་ཚེས་བཅུ་གཉིས་ལ་སྐུ་གཤེགས། ཞེས་གསུངས་སོ། །
གསལ་བཤད། བོད་ཀྱི་པཎྚི་ཏའི་དཀར་ཆག་རབ་གསལ་མེ་ལོང་ཞེས་བྱ་བ་འདི་ནི་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ཉེར་ལྔ་བའི་མཐར་ཕྱིན་བོད་ཡིག་ཆེས་མཐོའི་འཛིན་གྲྭས་འཚོལ་སྡུད་དང་ཕྱོགས་བསྒྲིགས་བྱས་པ་ཞིག་ཡིན་ཞིང་། དེབ་འདིའི་རྩོམ་སྒྲིག་འགན་ཁུར་བ་གཤེན་མི་དང་། སྤྱང་ཡེ་ཤེས། བེ་རི་རྒྱལ་མཚན་བཅས་ཀྱིས་ཡིད་འཐད་བྱུང་ནས་མ་ཡིག་མཁོ་སྤྲོད་བྱས་པ་བཞིན་གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བར་མུ་འགོད་བྱས་པ་ཡིན།
|