གངས་ལྗོངས་ཤེས་རིག་ནོར་བུའི་སློབ་གླིང་གི་འཁྲུངས་སྟོན་སྐབས་ཉེར་བརྒྱད་པ་བསུ།  སློབ་མ་རྣམས་ཀྱི་ཤིས་ཚིག་ཆེད་བཀོད། 

གང་གི་མཁྱེན་དཔྱོད་ནམ་མཁའི་ཀློང་ཡངས་ལས། ། 

 དེ་རིང་ནི་བོད་ཟླ་དགུ་བའི་ཚེས་ཉེར་གཉིས་ཏེ་མ་ཡུམ་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ཉེར་བརྒྱད་པའི་བཀྲ་ཤིས་འཁྲུངས་སྟོན་གྱི་ཉིན་མོ་རེད། ནམ་རྒྱུན་འཁྲུངས་སྟོན་བསླེབ་ལ་ཉེ་སྐབས་གནམ་གཤིས་ཅུང་འཁྱག་པོ་ཡིན་པས་ང་ཚོས་བོད་ལྭ་མཐུག་པོ་རེ་གྱོན་ནས་རང་སྦྱོང་དང་སློབ་གསེང་གི་དུས་ཚོད་མཐའ་དག་སྤྱད་དེ་སློབ་གྲྭའི་འཁྲུངས་སྟོན་ལ་གླུ་གར་གྱི་རྩེད་མོ་གྱ་ནོམ་པ་རེ་གྲ་སྒྲིག་བྱས་པ་ཡིན། ད་ལོར་ནད་ཡམས་ཀྱི་དབང་གིས་ང་ཚོ་མ་ཡུམ་སློབ་གྲྭའི་པང་ཁུག་ཏུ་མཉམ་འཛོམས་བྱུང་མ་ཐུབ་ལ། སྐུ་དྲིན་ཆེ་བའི་དགེ་རྒན་དམ་པ་རྣམས་དང་ཡང་དངོས་སུ་ཞལ་མཇལ་མ་ཐུབ་པས་སེམས་སུ་བྱ་བ་ཧ་ཅང་གལ་ཆེན་གང་ཞིག་མ་འགྲུབ་པ་ལྟར་སྟོང་སངས་པ་ཞིག་ཏུ་གྱུར །ངའི་མ་ཡུམ་སློབ་གྲྭ།  ད་ལོར་ངས་ཁྱེད་ཀྱི་འཁྲུངས་སྐར་ལ་གླུ་གར་གྱི་ལེགས་སྐྱེས་ཅི་ཡང་གྲ་སྒྲིག་ཞུ་མ་ནུས་མོད། ཡིན་ནའང་ངས་ཕ་ཡུལ་དུ་རྟག་པར་ཁྱེད་རང་གླེང་བཞིན་ཡོད། ཁྱེད་ཀྱི་སྐུ་དྲིན་གྱིས་བསྐྱངས་པའི་ཕུ་ནུ་དག་ཀྱང་རྟག་པར་དྲན་བཞིན་ཡོད། 

ཤིས་ཚིག

ཤིས་ཚིག

ངོ་མཚར་གཤོག་ཟུང་མཁའ་རུ་བསྐྱོད་པའི་དབྱངས་གསལ་སོ་གཞིའི་འཕུར་ལམ་ཡངས། ། 

མཐར་ཕྱིན་གཉིས་པས་མ་ཡུམ་སློབ་གླིང་གི་འཁྲུངས་སྐར་ལ་ཕུལ།

དགའ་བ་འབུམ་ལྡན་གངས་ལྗོངས་ནོར་བུའི་དཔལ། །

ག༵ངས་ཀྱི་རྭ་བར་འཁྲུངས་པའི་དགེ་སློང་གིས།།

༄༅།། ཤིས་ཚིག

ཞེས་གངས་ལྗོངས་ཤེས་རིག་ནོར་བུའི་གླིང་གི་སྐབས་ཉེར་བརྒྱད་པའི་འཁྲུངས་སྟོན་ཉིན་མོ་ལ་བཀྲ་ཤིས་རྟེན་འབྲེལ་གྱི་ཚུལ་དུ་འབྲིང་རིམ་འཛིན་གྲྭ་གཉིས་པའི་སློབ་བུ་ཐུབ་མཆོག་རྒྱ་མཚོས་ཕུལ།

རྩོམ་འབྲི་བ།   བྱང࿐ལྷ་དར།  མཐོ་གཉིས་གཉིས་པ། 

རིགས་ཞེན་གངས་རིའི་འཕྲོག་བྱེད་ཀྱིས། ། 

རིགས་ཕན་གངས་རིའི་རྒྱལ་མཚན་ཕུབ། ། 

རིགས་སྨྲ་གངས་རིའི་མཁས་དབང་ཚོས། ། 

རིགས་སྲས་གངས་རིའི་དཔའ་བོར་བསྔགས། ། 

ཤེས་རིག་ཤེས་ཡོན་གྱིས་ཕྱུག་པའི། ། 

ཁྲིམས་ལྡན་ཁྲིམས་གཙང་གི་སློབ་དཔོན། ། 

ལྷག་བསམ་ལྷག་པར་རབ་མཐོ་བ། ། 

སློབ་ཡུལ་སློབ་གྲྭ་འདིར་འཛོམས་སྤྲོ། ། 

རིག་འབྱུང་མ་ཡུམ་གླིང་ནས། ། 

ཡོན་ཏན་འོད་ཀྱི་གོང་བུ། ། 

གངས་ཅན་ཁ་བའི་ལྗོངས་སུ། ། 

འཚེར་བ་གཟི་བྱིན་ཆེའོ། ། 

གྲགས་པ་ཕྱོགས་ཀྱི་བུ་མོའི་རྣ་བར་སྙན། ། 

གཟུར་གནས་ལྷག་བསམ་ཅན་གྱི་དེད་དཔོན་བྱོན། ། 

སྣོད་ལྡན་སློབ་མ་ཤེས་རིག་གླིང་དུ་འཚམ། ། 

ཤེས་བྱའི་དགའ་ཚལ་འདི་ཉིད་ཨེ་མ་རྨད། ། 

དགའ་དད་མོས་པའི་གངས་ཕྲུག་གི་ཁྱུ་ཚོགས། ། 

རིག་གཞུང་མང་འདུས་ཚད་ལྡན་གྱི་གླིང་གར། ། 

མི་ཉམས་དར་ཞིང་དར་རྒྱས་ཀྱི་སྨོན་འདུན། ། 

བཀྲ་ཤིས་ཕྱྭ་གཡང་བདེ་བླག་ངང་སྩོལ་ཀྱེ། ། 

ཤིས་ཚིག་ཡིད་ཀྱི་མཆོད་སྤྲིན།

མཛོད་དགེ་འཇིགས་མེད་བརྩོན་འགྲུས། མཐོ་གཉིས་གཉིས་པ། 

དོན་གཉིས་མཐར་ཕྱིན་སྟོན་པ་རྫོགས་སངས་རྒྱས། །

ཟབ་རྒྱས་གདམས་པའི་སྲོལ་འབྱེད་ཀླུ་ཐོགས་ཞབས། །

དེ་དོན་གསལ་མཛད་འཇམ་མགོན་ཙོང་ཁ་བ། །

སྲས་དང་བརྒྱུད་པར་བཅས་ལ་སྙིང་ནས་འདུད། །

ཐོན་མི་ཨ་ནུའི་ཐུན་མིན་སློབ་གསོ་ཉིད། །

ཕྱོགས་མཐར་སྤེལ་མཁས་གངས་ཅན་མགྲིན་པའི་རྒྱན། །

ལོག་སྨྲའི་ཝ་ཚོགས་སྙིང་རྩ་འཇོམས་མཛད་པའི། །

སློབ་དཔོན་འཇིགས་མེད་རྒྱལ་མཚན་གཙུག་གིས་མཆོད། །

སྐྱེས་སྟོབས་བློ་གྲོས་རབ་མྱུར་རླུང་གཤོག་ཅན། །

ལྔ་རིག་ཤེས་བྱའི་ཆུ་གཏེར་འཇིང་དཔག་པ། །

གཞན་ཕན་རྣམ་ཐར་མགྲིན་པར་འདེགས་སྤྲོ་བའི། །

སློབ་དཔོན་ཚུལ་ཁྲིམས་རྒྱ་མཚོ་གཙུག་གིས་མཆོད། །

ལྗགས་རྡུལ་རེ་ལ་དབྱངས་ཅན་རྒྱུད་མངས་ཅན། །

འཆད་ཁྲིད་འོད་སྣང་གསལ་བའི་ལམ་སྟོན་མཁན། །

ལྔ་རིག་མཁན་པོའི་རབ་དང་ཕུལ་གྱུར་པ། །

སློབ་དཔོན་ཡོན་ཏན་རྒྱ་མཚོ་གཙུག་གིས་མཆོད། །

ཡ་བུག་འབྲུ་དྲུག་འཛིན་མའི་ལྟོ་བ་རུ། །

བློ་གསལ་བུང་བའི་གཤོག་གླུ་ལེན་ས་འདི། །

རྣམ་དཔྱོད་རྭ་ཁ་བརྡར་བའི་དཔའ་བོ་ཚོས། །

གངས་རིའི་མཁའ་ལ་ཉི་ཟླ་ཇི་བཞིན་དྲངས། །

ཨེ་མ་སྔོན་སྨོན་ཐུགས་བསྐྱེད་བཟང་བོའི་མཐུས། །

གང་འདུལ་ཐབས་མཁས་རིག་པའི་སྒྲོན་མེ་ཚོས། །

རང་སྡེ་མུན་པའི་རྒྱ་ལས་གྲོལ་བྱས་ཏེ། །

གཙུག་ལག་ཆུ་གཏེར་བྱེ་བའི་དགེ་ལེགས་བྱིན། །

མི་རིགས་བླ་སྲོག་ཉམ་ང་གསོ་བའི་ཁུར། །

འཇིགས་མེད་སྙིང་སྟོབས་ཟླ་མེད་སྤྲོ་བས་བཞེས། །

དེ་ཕྱིར་གཟུར་གནས་དཔྱོད་ལྡན་སུ་དང་གང་། །

རིས་མེས་མཁྱེན་ལྡན་ཁྱེད་ལ་སྙིང་ནས་གུས། །

གྲུབ་མཐའི་རྩོད་ཉོག་མི་ལྡན་རིས་མེད་ཅིང་། །

ས་དགེ་བཀའ་རྙིང་ཇོ་འབྲུག་བན་བོན་བཅས། །

རིག་པའི་རླུང་གཤོག་སྟངས་སྟབས་བསྒྱུར་ས་འདིར། །

རང་དགར་འདུ་ཞིང་དད་སེམས་ཁྱེད་ལ་ཤོར། །

སྙིགས་མའི་རང་མཚང་མཚོ་ལྟར་བརྡོལ་བའི་དུས། །

གཞན་ཕན་བདུད་རྩི་རླབས་ཀྱི་ཟེགས་མ་འདི། །

དུས་དང་གནས་བབས་ཅི་ཙམ་འགྱུར་ན་ཡང་། །

ཤེས་རིག་ནོར་བུའི་གླིང་ནས་འབེབས་གྱུར་ཅིག ། 

ཅེས་གངས་ལྗོངས་ཤེས་རིག་ནོར་བུའི་སློབ་གླིང་གི་འཁྲུངས་སྐར་ཉིན་དགེ་སློབ་སྟོང་གི་གྲལ་མཐའ་བ་མཛོད་དགེ་འཇིགས་མེད་བརྩོན་འགྲུས་སམ་སྒྱུ་འཕྲུལ་མར་འབོད་པ་དེས་རང་ཤག་དཔེ་མང་སྤུངས་པའི་ལྡིང་ཁང་ནས་གུས་པས་སྦྱར་བ་དགེའོ། །    ༢༠༢༢ ༡༡ ༡༥

ཉི་མ་འོད་ཟེར། མཐོ་གཉིས་གཉིས་པ། 

བླ་མའི་གཞན་ཕན་བལ་དཀར་གདམས་ངག་འཇོ། ། 

སློབ་མའི་དད་དམ་མཆོད་པས་སྲིད་གསུམ་གཡོ། ། 

བླ་སློབ་བཀྲ་ཤིས་ཐོས་བརྩོན་ངང་གིས་འགྲིག ། 

མ་ཡུམ་སློབ་གླིང་བསྟན་པ་རྒྱས་གྱུར་ཅིག ། 

ཤིས་ཚིག 

བོད་ཀྱི་མཛེས་རྒྱན་ཤེས་རིག་ནོར་བུའི་གླིང་།།

བོད་ཕྲུག་རིགས་ཞེན་དག་ནི་སྤྲོ་བའི་ཞིང་།།

བོད་མི་རྒན་པ་དག་གི་རེ་བའི་ཡུལ།།

བོད་ཀྱི་བུ་རྒོད་ཅིག་གིས་བཞེངས་པ་ལགས།།

དམའ་རིམ་གྱི་གྲལ་ཐ་བ་ལྷ་རྒྱལ་གྱིས་མ་ཡུམ་སློབ་གླིང་འཁྲུངས་སྐར་ཉིན་གུས་ཕུལ།