༄༅།། ལས་ཅི་བྱས་དཀར་ནག་སྤྱི་སྡོམ་མཛོད།
རྭ་རྒྱ་བ་འཇིགས་མེད་རྒྱལ་མཚན།
༄༅།། སྐྱབས་མཆོག་གསུམ་བྱིན་རླབས་སྤྲིན་བཞིན་འདུས། །
ལྷ་ཡི་དམ་དངོས་གྲུབ་ཆར་དུ་བསྙིལ། །
གྲོགས་ཆོས་སྐྱོང་མཐུ་རྩལ་གློག་བཞིན་འགྱུ། །
ཕྱག་རྩ་བའི་བླ་མར་དད་པས་འཚལ། །
དགོན་བཀྲ་ཤིས་འབྱུང་གནས་ཆོས་ཀྱི་སྡེའི། །
ཕ་བླ་མའི་གསེར་ཁྲི་སེང་གེས་གདེགས། །
ཞིང་དགེ་འདུན་བསོད་ནམས་ལྷུན་གྱིས་གྲུབ། །
ཆོས་དབྱངས་རྟ་སྙན་མོས་འགྲོ་བ་འདྲེན། །
དྲིན་ཕ་མ་བཟང་བོའི་བག་ཆགས་དང་། །
གཉེན་ཁུ་ཞང་བཟང་བོའི་གཅེས་སྐྱོང་གིས། །
སྡེ་བཟང་བོའི་ཆོས་ཀྱི་གྲལ་མཐར་ཚུད། །
ངའི་སྔོན་བསགས་ལས་སྨོན་ཨེ་མ་རྨད། །
གྲྭ་ངུར་སྨྲིག་འཛིན་པའི་བཀྲག་མདངས་འཚེར། །
འབངས་དད་སྟོབས་པད་མའི་ལོ་འདབ་རྒྱས། །
ཡུལ་ཆོས་སྲིད་འཁོར་ལོའི་རྩིབས་སྟོང་བཀྲ། །
དགོན་རུ་སྡེའི་གཡང་ཆགས་བཅུད་ཀྱིས་གཏམས། །
རྭ་རྡུལ་བྲལ་ནོར་འཛིན་སྒེག་མོ་པང་། །
རྒྱ་རིག་པའི་ཆུ་བོ་གཡས་སུ་འཁྱིལ། །
བཀྲ་ཤིས་པའི་དགེ་ལེགས་འོད་སྟོང་གིས། །
ཆོས་བདུད་རྩི་འབྱུང་གནས་རྒྱས་གྱུར་ཅིག།
སྐྲ་གནག་སྣུམ་ཁ་དོག་དཀར་གྱི་བར། །
ཕྱག་དད་པས་འཚལ་བའི་ཡུལ་གྱི་མཆོག །
དགོན་བཀྲ་ཤིས་འབྱུང་གནས་མཁྱེན་གསོལ་ལོ། །
ཕྱིས་ཅི་འབྱུང་སྐྱབས་དཔུང་སྔོན་བཞིན་མཛོད།
།
དུས་དེ་རིང་བསང་གསོལ་མཆོད་བསྟོད་ཀྱིས། །
ལས་ཅི་བྱས་དཀར་ནག་སྤྱི་སྡོམ་མཛོད། །
ཁྲིམས་ཅི་འགལ་བཀའ་ཆད་ལྕགས་སྒྲོག་སྒྲོགས། །
མི་ངན་པའི་བསམ་བློ་དགེ་ལ་སྒྱུར། །
ཀི་བསྭཽ་བསྭཽ་ཆེ་འོ་ལྷ་རྒྱལ་ལོ། །
རྭ་རྒྱ་བ་འཇིགས་མེད་རྒྱལ་མཚན་གྱིས་གང་ཤར་དུ་བྲིས། ༢༠༢༢.༥.༡༠
|