ཁྱོད་ཀྱིས་བོད་ཀྱི་པཎྜི་ཏ་ཤེས་སམ།

ཤེས་རབ་བསྟན་དར།

ཁྱོད་ཀྱིས་པཎྜི་ཏ་ཤེས་སམ། ཁྱོད་ཀྱིས་དྲི་བ་འདིའི་ལན་ཤེས་དགོས་ན། པཎྜི་ཏ་ཞེས་པ་ནི་ཅི་ཞིག་ཡིན་པ་དང་། རྐྱེན་གང་ཞིག་ལ་བརྟེན་ནས་བོད་དུ་བྱུང་བ་དང་། ཅིའི་ཕྱིར་བྱུང་བ་དང་། གང་འདྲ་ཞིག་བྱུང་བ་ངེས་པར་ཤེས་དགོས།

པཎྜི་ཏ་ पण्डित（paṇḍ ita）ཞེས་པའི་ཐ་སྙད་འདི་བོད་དུ་གྲགས་ཆེ་བའི་ཐ་སྙད་ཅིག་ཡིན་ལ། བོད་ཀྱི་སློབ་གཉེར་བ་དག་ཆེས་ཡིད་སྨོན་ཤོར་བའི་ཐ་སྙད་ཅིག་ཡིན། ང་ཚོས་བཀའ་བསྟན་ལས་ཡོངས་སུ་རྫོགས་པའི་པཎྜི་ཏ་ཆེན་པོ་ཞེས་དང་། རྒྱ་གར་གྱི་མཁན་པོ་པཎྜི་ཏ་ཆེན་པོ། མཁས་པའི་སྐྱེ་དགུ་པཎྜི་ཏ། རྒྱ་གར་གྱི་མཁན་པོ་མ་ཧཱ་པཎྜི་ཏ་ཞེས་པའི་ཐ་སྙད་མང་དུ་མཐོང་།

སྔོན་བྱོན་མཁས་པ་རྣམས་ཀྱིས་པཎྜི་ཏ་ཞེས་པའི་ཐ་སྙད་ནི་རྒྱ་གར་སྐད་ཡིན་པར་གསུངས་ཤིང་། པ་ཎ་ནི་ལྔ་དང་ཌི་ཏ་ནི་རིག་པ་སྟེ། གནས་ལྔ་རིག་པ་ཞེས་པའི་དོན་དུ་བཞེད། རིག་གནས་ཆེ་བ་ལྔ་མཁྱེན་པ་ལ་པཎྜི་ཏ་དང་རིག་གནས་བཅུ་བོ་མཁྱེན་པའི་མཁས་པ་ལ་མ་ཧཱ་པཎྜི་ཏ་དང་། སྣ་རེ་གཉིས་ལ་མཁས་པ་ཡིན་ན་པཎ་ཆུང་ཟེར་གསུངས།

བུ་སྟོན་ཆོས་འབྱུང་ལས། རྒྱ་བལ་ཁ་ཆེའི་པཎྜི་ཏ་ཕལ་ཆེར་བཞེད་ཀྱང་། ཞེས་བྱུང་བ་འདི་པཎྜི་ཏ་རྒྱ་གར་དུ་མ་ཟད། ཨོ་ཊི་ཡཱན་གྱི་པཎྜི་ཏ། ཟངས་གླིང་གི་པཎྜི་ཏ། བལ་བོ་དང་ཁ་ཆེ་ནའང་བྱུང་ཡོད་པ་ཤེས་ཤིང་། རྗེས་སུ་བོད་དུའང་པཎྜི་ཏར་འབོད་པ་གང་མང་ཞིག་བྱུང་ཡོད།

འོ་ན་པཎྜི་ཏ་དག་ཇི་ལྟར་བྱུང་བ་ཡིན་ནམ། ནམ་ཞིག་ལ་བྱུང་བ་ཡིན། ཇི་ལྟར་པཎྜི་ཏར་འགྱུར་དགོས་ཤེ་ན་འདི་ལ་ལན་འདེབས་པ་ཤིན་ཏུ་དཀའ། 

བུ་སྟོན་ཆོས་འབྱུང་ལས། སྦྱིན་བདག་ཛ་ལན་དྷ་རའི་རྒྱལ་བོ་ཀ་ནི་ཀས་བྱས་ཏེ། སྡུད་པ་པོ་པུརྞི་ཀ་ལ་སོགས་པ་དགྲ་བཅོམ་པ་ལྔ་བརྒྱ། བ་སུ་མི་ཏྲ་ལ་སོགས་པ་བྱང་ཆུབ་སེམས་དཔའ་ལྔ་བརྒྱ། སོ་སོ་སྐྱེ་བོའི་པཎྜི་ཏ་ཉིས་བརྒྱ་ལྔ་བཅུའམ། ཁྲི་དྲུག་སྟོང་འདུས་ནས་ཞལ་ཏོན་དུ་མཛད་དེ། བཅོ་བརྒྱད་པོ་ཐམས་ཅད་བཀར་བསྒྲུབས་སོ། ། ཞེས་གསུངས་པ་ལྟར་ན་བཀའ་སྡུད་སྐབས་ནས་པཎྜི་ཏ་ཡོད་པར་མངོན།

འོན་ཀྱང་རྒྱ་གར་ཆོས་འབྱུང་ལས། དེ་ལ་བོད་རྣམས་ལྟར་ན། དགྲ་བཅོམ་པ་ལྔ་བརྒྱ་དང་། བྱང་ཆུབ་སེམས་དཔའ་ལྔ་བརྒྱ་དང་། སོ་སོ་སྐྱེ་བོའི་པཎྜི་ཏ་ལྔ་བརྒྱ་འདུས་ནས་བསྡུས་ཟེར་ཡང་། ཐེག་ཆེན་ལུགས་ལྟར་ན་དོན་ལ་མི་འཐད་པ་མེད་མོད། འོན་ཀྱང་དུས་དེ་ཙམ་ནས་སངས་རྒྱས་པའི་མཁས་པ་ཆེན་པོ་རྣམས་ལ་བཙུན་པ་ཆེན་པོ་ཟེར་བ་མ་གཏོགས། པཎྜི་ཏའི་མིང་གིས་འབོད་པ་མེད་པས་པཎྜི་ཏ་ལྔ་བརྒྱ་ཟེར་བ་མི་ལེགས་སོ། །ཞེས་གསུངས་པ་འདིས། ནང་བའི་མཁས་པ་རྣམས་ལ་པཎྜི་ཏའི་འབོད་སྟངས་འདི་ཕྱིས་ནས་བྱུང་བར་བསྟན་ཡོད།

སྔོན་གྱི་ཡིག་ཚང་ལས། པཎྜི་ཏ་ལ་ཕྱི་ནང་གཉིས་ཀའི་པཎྜི་ཏ་ཡོད་ཅིང་། ནཱ་ལེན་དྲར་པཎྜི་ཏ་ལྔ་བརྒྱ་ཡོད་པར་བཤད་ཅིང་། དཔེར་ན། ཨརྱ་དེ་བས་མུ་སྟེགས་རྟ་དབྱངས་ཆོས་ཀྱིས་ཚར་བཅད་དེ་བསྟན་པ་ལ་བཅུག་སྟེ། པཎྜི་ཏ་ཆེན་པོར་གྱུར་ཏོ། །ཞེས་སོགས་མང་དུ་བྱུང་བས་པཎྜི་ཏ་ནི་རྒྱ་གར་དུ་ཡོངས་སུ་གྲགས་པ་ཞིག་ཡིན་པ་ཤེས། 

པཎྜི་ཏ་ཡོངས་སུ་དར་བ་དང་པཎྜི་ཏའི་ལུགས་ཀྱི་བསྟན་བཅོས་དང་། པཎྜི་ཏའི་ཆ་བྱད། པཎྜི་ཏའི་ཡི་གེ  པཎྜི་ཏའི་བྱ་བ་སོགས་བྱུང་ཡོད་དེ། དཔེར་ན། སློབ་དཔོན་ཞི་བ་ལྷའི་རྣམ་ཐར་དུ། བསླབ་བཏུས་དང་མདོ་ཀུན་ལས་བཏུས་ཁོ་བོའི་བྲང་ཁང་གི་གདུང་གསེབ་ན་པཎྜི་ཏའི་ཡི་གེ་ཕྲ་མོས་བྲིས་པ་ཞིག་ཡོད། ཅེས་བྱུང་བ་བཞིན་ནོ། །ད་དུང་པཎྜི་ཏའི་སྐྱེ་བ་ལྔ་བརྒྱར་བཞེས་པའི་རྣམ་ཐར་སྔོན་གྱི་ཡིག་ཚང་དག་ན་གསལ།

དེབ་སྔོན་ལས། དེ་ཡང་རྒྱ་གར་གྱི་ཡུལ་ན་རྗེ་བཙུན་ཀ་རོ་བ་ཞེས་བྱ་བ་རིག་པའི་གནས་རྣམ་པ་ལྔ་ལ་མཁས་པ། པཎྜི་ཏ་ལས་རྣལ་འབྱོར་བར་གྱུར་པ། བརྒྱུད་པ་དགུའི་གདམས་པ་མངའ་བ། མངོན་ཤེས་དང་ལྡན་པ་ཅིག་བཞུགས་པ་ལས། ཞེས་པ་ལྟར་ན་པཎྜི་ཏ་ནས་རྣལ་འབྱོར་བར་གྱུར་པ་ཞེས་པའི་ཚིག་འདི་ལ་དཔྱད་ན་པཎྜི་ཏ་གཞུང་ལ་སློབ་གཉེར་བྱེད་པའམ་འཆད་རྩོད་རྩོམ་གསུམ་གྱི་བྱ་བ་བྱེད་པ་ཞིག་ཡིན་པ་དོན་གྱིས་བསྟན་ཞིང་། བྱ་བ་དང་སྤྱོད་པ། ཆ་ལུགས་སོགས་ཀྱི་ཐད་ནས་ཀྱང་པཎྜི་ཏ་དང་རྣལ་འབྱོར་བ་གཉིས་ལ་ཁྱད་པར་ཕྱེས་ཡོད། ལྷག་པར་བོད་ཀྱི་མཁས་པའི་གསུང་ན་མཁས་པ་པཎྜི་ཏའི་ལུགས་ཀྱིས་སྒྲོ་འདོགས་ཕྱི་རུ་གཅོད། ལྟ་རྟོག་ཕྱི་རུ་བྱེད་དེ། རྟོག་བཅས་འཁྲུལ་བ་ཡིན་པར་འདོད་པས་ཡུལ་བཅད་པས་དེར་འཛིན་གྱི་ཤེས་པ་ལྡོག་པའོ། །ཞེས་པའི་བཤད་རྒྱུན་ཡང་ཡོད།

འགོས་ཁུག་པ་ལྷས་བཙས་རྒྱ་གར་དུ་ལན་གསུམ་བྱོན། པཎྜི་ཏ་གྲུབ་པ་བརྙེས་པ་བདུན་ཅུ་དོན་གཉིས་ལ་ཆོས་ཞུས་པའི་ལོ་རྒྱུས་ཡོད་པ་ལྟར་བོད་ཀྱི་སློབ་གཉེར་བ་དག་རྒྱ་གར་དང་ཁ་ཆེ། བལ་བོ་བཅས་སུ་པཎྜི་ཏ་དག་བསྟེན་ནས་དམ་པའི་ཆོས་བོད་ཡུལ་དུ་གདན་དྲངས་པའི་སྙིང་སྟོབས་ནི་ཧ་ལས་པ་ཞིག་ཡིན།

རྒྱ་གར་གྱི་པཎྜི་ཏ་བོད་ལ་གདན་འདྲེན་པའི་སྲོལ་ནི་ལྷ་ཐོ་ཐོ་རུ་སྙན་བཙན་སྐབས་སུ་པཎྜི་ཏ་བློ་སེམས་འཚོ་ཕེབས་ཤིང། ཐོན་མི་སམ་བྷོ་ཊ་རྒྱ་གར་ལ་ཕེབས་པའི་སྐབས་ཁོང་གིས་པཎྜི་ཏ་ལྷ་རིག་པའི་སེང་གེ་བསྟེན་ཞིང་། དམ་པའི་ཆོས་གདན་འདྲེན་པའི་སྐབས་པཎྜི་ཏ་དུ་མ་གདན་འདྲེན་བྱས། དེ་ནས་བཟུང་རྒྱ་གར་དང་བལ་བོ། ཁ་ཆེ་བཅས་པཎྜི་ཏ་མང་བོ་ཕེབས་ཤིང་། བུ་སྟོན་ཐམས་ཅད་མཁྱེན་པས་བོད་དུ་བྱོན་པའི་པཎྜི་ཏ་གོ་གསུམ་གྱི་མཚན་ཐོ་བསྒྲིགས་ཤིང་། འདིར་མ་ཆུད་པའི་པཎྜི་ཏ་བོད་དུ་བྱོན་པའི་དྲིན་ཅན་དང་། ལོ་ཙྪ་བ་རྣམས་ཀྱང་ཇི་ལྟར་རྙེད་པ་བསྣན་པར་བྱའོ། །ཞེས་གསུངས།

བོད་ཀྱི་བསྟན་བཅོས་དག་ཏུ། པཎྜི་ཏས་བཤད། ལོ་ཙཱ་བས་བསྒྱུར། རྣལ་འབྱོར་བས་བསྒོམས་པའི་བསྟན་བཅོས་ཡིན་ན་བསྟན་བཅོས་ཚད་ལྡན་ཡིན་པའི་བཤད་སྲོལ་ཡོད་པ་བཞིན་བོད་ཀྱི་བཀའ་བསྟན་མང་བོ་ཞིག་པཎྜི་ཏ་ལ་གཏུགས་ནས་བསྒྱུར་བ་ཞིག་ཡིན།

བོད་དུ་བྱོན་པའི་པཎྜི་ཏ་དེ་དག་ནི་ལོ་ཙཱ་བ་དག་གིས་ལུས་དང་སྲོག་ལ་ལྟོས་པ་མེད་པར་དཀའ་བ་བརྒྱ་ཕྲག་གིས་གདན་དྲངས་ཤིང་། ལྷག་པར་ཀླ་ཀློའི་དམག་གི་འཇིགས་པ་བྱུང་དུས་ཁ་ཆེ་པཎ་ཆེན་སོགས་བོད་དུ་ཕེབས་ནས་བོད་ཀྱི་ཆོས་དང་རིག་གནས་ལ་ཕན་པ་བླ་ན་མེད་པ་བྱུང་།

བོད་ཀྱིས་པཎྜི་ཏར་རིག་པའི་གནས་ལྔར་མཁས་པའི་མཚོན་བྱེད་དུ་འཛིན་པ་དེ་ནི་བོད་ལ་པཎྜི་ཏའི་མཚན་ཅན་གྱི་སྐྱེས་བུ་གང་མང་ཞིག་འབྱུང་བའི་རྐྱེན་གཙོ་བོ་ཞིག་རེད། ཙ་མི་པཎ་ཆེན་ནི་རྒྱ་གར་ནས་པཎ་ཆེན་གྱི་ཆོ་ལོ་ཐོབ་པ་ཞིག་ཡིན་ལ། བོད་དུ་པཎྜི་ཏའི་མཚན་ཅན་གང་མང་ཞིག་བྱུང་མོད། པཎྜི་ཏའི་ཐོག་མ་ས་སྐྱ་པཎ་ཆེན་ཡིན་པ་ཡོངས་སུ་གྲགས། དེ་ནས་ད་ལྟའི་བར་དུ་པཎྜི་ཏ་གང་མང་ཞིག་བྱུང་ཡོད།

ས་སྐྱ་པཎྜི་ཏ་ལ་པཎྜི་ཏའི་མཚན་འབྱོར་བ་མ་ཟད། པཎ་ཆེན་གྱི་མཚན་ཡང་འབྱོར་ཡོད། ཁོང་གི་སྔོན་དུ་བོད་ལ་རིག་གནས་ཆེ་བ་ལྔ་དར་མེད་དེ། སྦྱངས་པ་དག་ཀྱང་ལེགས་སྦྱར་གྱི་སྐད་ལས་སྦྱངས། ས་སྐྱ་པཎྜི་ཏ་ཀུན་དགའ་རྒྱལ་མཚན་གྱིས།(1182-1251) ཁ་ཆེ་པཎ་ཆེན་ཤཱཀྱ་ཤྲི་བྷ་དྲ（1127-1225）དང་ཁོང་གི་སློབ་མ་པཎ་ཆུང་སོགས་བསྟེན་ནས་ཐ་སྙད་རིག་གནས་ལ་སྦྱངས་ཤིང་། ཐ་སྙད་རིག་གནས་ཀྱི་བསྟན་བཅོས་བསྒྱུར་བ་དང་བརྩམས། མཁས་པ་འཇུག་པའི་སྒོ་དང་། སྡེབ་སྦྱོར་སྣ་ཚོགས་མེ་ཏོག་ཆུན་པོ་སོགས་བརྩམས་ཏེ་ཐ་སྙད་རིག་གནས་ཀྱི་སྲོལ་ཕྱེས།

སྟག་ཚང་ལོ་ཙཱ་བས། སྒྲ་དང་སྙན་ངག་སྡེབ་སྦྱོར་མངོན་བརྗོད་དང་། །ཟློས་གར་རྣམས་ལ་རིག་གནས་ཆུང་ངུ་འམ། །ཐ་སྙད་རིག་པའི་གནས་ལྔ་གྲགས་པ་རྣམས། །ཆོས་རྗེ་ས་པཎ་ཡན་ལ་མ་དར་ཞིང་། །ཐར་ལོ་ཡན་ལ་སྒྲ་མདོ་བསྒྱུར་བ་མེད། །ཅེས་གསུངས་པ་ལྟར་ས་པཎ་ཡན་ལ་སྒྲ་མདོ་སོགས་ཐ་སྙད་རིག་གནས་ཀྱི་བསྟན་བཅོས་བོད་དུ་མ་འགྱུར་ཞིང་། དེ་ནས་བཟུང་ཐར་ལོ་ཉི་མ་རྒྱལ་མཚན། ཤོང་སྟོན་རྡོ་རྗེ་རྒྱལ་མཚན། དེའི་སྐུ་མཆེད་ཤོང་སྟོན་རྡོ་རྗེ་རྒྱལ་མཚན། དེའི་སློབ་མ་དཔང་བློ་གྲོས་བརྟན་པ། ལྷ་མཐོང་ལོ་ཙཱ་བ་སོགས་ཀྱིས་སྒྲ་རིག་པའི་བསྟན་བཅོས་དུ་མ་གསར་དུ་བསྒྱུར།

དེ་དག་གིས་བོད་ལ་པཎྜི་ཏ་གང་ཞིག་འབྱུང་བའི་རྨང་གཞི་བསྐྲུན་པ་རེད། རིག་གནས་ཆེ་བ་ལྔ་ནི་སྒྲ་དང་ཚད་མ། བཟོ་དང་གསོ་བ། ནང་དོན་རིག་པ་བཅས་ཡིན་ལ། རིག་གནས་ཆུང་བ་ལྔ་རྩི་ཚུལ་ལུགས་མི་འདྲ་བ་གཉིས་ཡོད་དེ། སྔོན་ཆད་སྒྲ། སྙན་ངག་སྡེབ་སྦྱོར། མངོན་བརྗོད་ཟློས་གར་ལྔ་བརྩི་ཞིང་། ཕྱིས་སྒྲ་རིག་པ་མི་བརྩི་བར་དེའི་ཚབ་ཏུ་སྐར་རྩིས་བསྣན་ནས་རིག་གནས་བཅུར་བྱེད་དོ། །

བོད་ལ་རིག་གནས་བཅུའི་འཆད་ཉན་གྱི་རྒྱུན་བྱུང་བ་འདི་བོད་ལ་པཎྜི་ཏ་གང་མང་འབྱུང་བའི་རྐྱེན་གཙོ་བོ་ཞིག་ཏུ་གྱུར་ཡོད། བོད་ཀྱི་པཎྜི་ཏའི་གནས་ཚུལ་ལ་བལྟས་ན་ལ་ལར་སྐྱེས་བུ་དམ་པ་ག་གེ་མོ་ཞིག་གིས་པཎྜི་ཏར་བསྔགས་པ་བརྗོད་པ་ལས་པཎྜི་ཏའི་མཚན་ཐོགས་ཤིང་། ལ་ལར་སློབ་མ་རྣམས་སམ་གཞན་པའི་མཁས་པ་དག་གིས་པཎྜི་ཏར་བསྔགས་པ་ལས་མཚན་ཐོགས་པ་ཞིག་ཏུ་མངོན།

པཎྜི་ཏའི་མཚན་ཐོགས་པ་མང་ཆེ་བ་རིག་གནས་ཆེ་བ་ལྔ་ལ་པཎྜི་ཏ་ཞེས་མཚན་ཐོགས་པ་ལས། འགྲན་ཟླ་བྲལ་བའི་མཁས་པ་ཆེན་པོ་ཡིན་ཡང་པཎྜི་ཏའི་མཚན་མ་ཐོགས་པ་ཤིན་ཏུ་མང་། དེ་བས་བལྟས་ན་པཎྜི་ཏའི་མཚན་ཐོགས་པ་ལ་རིག་གནས་མང་བོ་ལ་མཁས་དགོས་པ་སྟེ། རིག་གནས་ཆེ་བ་ལྔ་མཁྱེན་པ་ལ་པཎྜི་ཏ་དང་རིག་གནས་བཅུ་བོ་མཁྱེན་པའི་མཁས་པ་ལ་མ་ཧཱ་པཎྜི་ཏ་ཞེས་པའི་གནད་དེར་བབས་འདུག

བོད་ཀྱི་པཎྜི་ཏ་དང་། མ་ཧཱ་པཎྜི་ཏ། པཎྜི་ཏ་ཆུང་བ་སོགས་ལ་ཞིབ་འཇུག་དང་སློབ་སྦྱོང་བྱེད་པ་ནི་ཤིན་ཏུ་གལ་ཆེ་བ་ཞིག་ཡིན་ནའང་། བདག་གིས་ད་ལྟའི་བར་དུ་བོད་ཀྱི་པཎྜི་ཏ་དག་ལ་ཞིབ་འཇུག་བྱས་པ་མ་མཐོང་ཞིང་། པཎྜི་ཏའི་སྐོར་དཔེ་ཆ་ཞིག་བརྩམས་པའང་མ་མཐོང་།

ད་རེས་གངས་ལྗོངས་ཤེས་རིག་ནོར་བུའི་གླིང་གི་སྐབས་ཉེར་ལྔ་བའི་མཐར་ཕྱིན་འཛིན་གྲྭའི་བོད་ཡིག་ཆེད་སྦྱོང་གི་སློབ་མ་རྣམས་ཀྱིས་ལོ་དུ་མར་བོད་ཀྱི་པཎྜི་ཏའི་རྣམ་ཐར་འཚོལ་སྡུད་དང་ཕྱོགས་བསྒྲིགས་ཀྱིས《བོད་ཀྱི་པཎྜི་ཏའི་དཀར་ཆག་རབ་གསལ་མེ་ལོང་》བསྒྲིགས་པ་མཐོང་བས་ཤིན་ཏུ་སྤྲོ་བར་གྱུར།

དེབ་འདི་སྒྲིག་མཁན་གྱི་སློབ་མ་འདི་དག་ནི་སློབ་གྲྭ་འདིར་ལོ་འགར་སློབ་གཉེར་བྱས་པའི་ན་གཞོན་འབའ་ཞིག་ཡིན་པས་ལྟ་རྒྱ་དང་མཐོང་རྒྱར་ཚད་ཡོད་པ་ཞིག་ཡིན་ལ། འདི་ལྟ་བུའི་ལས་ཆེན་པོར་འཇུག་པའི་ཉམས་མྱོང་མེད་ནའང་། སྤོབས་པ་ཆེ་ཞིང་ལས་ལ་འཇུག་ཕོད་པས་འདི་སྒྲིག་དུས་རྣམ་ཐར་དང་ལོ་རྒྱུས་མང་བོ་བཀླགས་པས་ལྟ་རྒྱ་དང་མཐོང་རྒྱ་ཇེ་ཆེར་སོང་ཞིང་། ཚིག་མཛོད་སྒྲིག་པའི་ལས་ལ་ཉམས་མྱོང་མི་དམན་པ་ཞིག་ཐོབ་འདུག

འདིའི་ནང་དུ་པཎྜི་ཏའི་མཚན་ཐོགས་པའི་བོད་ཀྱི་མཁས་པ་བརྒྱ་དང་ཉི་ཤུ་ལྷག་བཀོད་ཡོད། ད་དུང་འདིའི་ནང་དུ་མ་འདུས་པའང་ཡོད་སྲིད་མོད། འདི་ནི་ཐོག་མའི་བྱ་བ་དང་སློབ་སྦྱོང་ཞིག་ཡིན། འདི་ལ་ཞན་ཆ་དང་མ་འདང་ས་གང་མང་ཞིག་ཡོད་སྲིད་ནའང་། འདི་ད་ལྟའི་བོད་ཀྱི་ཚིག་མཛོད་ཀྱི་ཁ་སྐོང་ཞིག་ཏུ་འགྱུར་ངེས་ཤིང་། བོད་ཀྱི་པཎྜི་ཏའི་སྐོར་ལ་དཔྱད་གཞིའི་རྒྱུ་ཆ་གལ་ཆེན་ཞིག་བཏོན་པ་ཡིན་ལ། ན་གཞོན་སློབ་མ་འདི་དག་གིས་བོད་ཀྱི་རིག་གནས་ལ་ཕུལ་བའི་མཛད་རྗེས་ཤིག་ཏུའང་བརྩིར་འོས།

མཐར་ན་གཞོན་འདི་དག་གིས་《བོད་ཀྱི་པཎྜི་ཏའི་དཀར་ཆག་རབ་གསལ་མེ་ལོང་》འདི་བསྒྲིགས་པ་ལ་བསྔགས་བརྗོད་དང་རྗེས་སུ་ཡི་རང་བཅས་རིག་པའི་གཞོན་ནུ་འདི་དག་གི་རིག་གནས་ཀྱི་ལམ་ཁར་སྔར་ལས་ལྷག་བློ་གྲོས་རྒྱས་ཤིང་། རྒྱས་པ་ཙམ་དུ་མ་ཟད་གངས་ཅན་བོད་ཀྱི་རིག་གནས་ཞབས་ནས་འདེགས་པའི་འཕྲིན་ལས་མངོན་པར་རྒྱས་པར་སྨོན་པ་དང་བཅས།

ཞེས་པ་འདི་ནི་དགེ་མིང་འཛིན་པ་ཤེས་རབ་བསྟན་དར་གྱིས་རྭ་རྒྱ་བཀྲ་ཤིས་འབྱུང་གནས་མདུན་གྱི་གངས་ལྗོངས་ཤེས་རིག་ནོར་བུའི་གླིང་གི་གླིང་སྟོད་དུ་༢༠༢༡ལོའི་སློབ་གྲྭའི་འཁྲུངས་སྐར་ཉིན་བྲིས།

གསལ་བཤད། 
བོད་ཀྱི་པཎྜི་ཏའི་དཀར་ཆག་རབ་གསལ་མེ་ལོང་ཞེས་བྱ་བ་འདི་ནི་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་ཉེར་ལྔ་བའི་མཐར་ཕྱིན་བོད་ཡིག་ཆེས་མཐོའི་འཛིན་གྲྭས་འཚོལ་སྡུད་དང་ཕྱོགས་བསྒྲིགས་བྱས་པ་ཞིག་ཡིན་ཞིང་།   དེབ་འདིའི་རྩོམ་སྒྲིག་འགན་ཁུར་བ་གཤེེན་མི་དང་། སྤྱང་ཡེ་ཤེས། བེ་རི་རྒྱལ་མཚན་བཅས་ཀྱིས་ཡིད་འཐད་བྱུང་ནས་མ་ཡིག་མཁོ་སྤྲོད་བྱས་པ་བཞིན་སློབ་གླིང་གི་དྲ་བར་མུ་འགོད་བྱས་པ་ཞིག་ཡིན།