༧སེ་རའི་མཁྱེན་པ་སྐུ་ཕྲེང་བཞི་བ༧བློ་བཟང་བཤད་སྒྲུབ་འཕྲིན་ལས་རྒྱ་མཚོ་མཆོག་གི་

རྣམ་ཐར་ཟུར་འདེབས།

རྐང་ཚ་འཇམ་དབྱངས་ཆོས་འཕེལ།

   སེ་རའི་མཁྱེན་པ་སྐུ་ཕྲེང་བཞི་བ་བློ་བཟང་བཤད་སྒྲུབ་འཕྲིན་ལས་རྒྱ་མཚོ་མཆོག་ནི་རབ་བྱུང་བཅུ་དྲུག་པའི་ཤིང་སྤྲེལ། སྤྱི་ལོ༡༩༤༤ལོར་མཚོ་ལྷོ་གསེར་ཆེན་རྫོང་གི་ཤ་སྦྲང་ཚོ་དྲུག་གི་ཁོངས་གཏོགས་ཆུ་སྐྱ་སྡེ་བར(ཡབ་མི་གསལ)ཡུམ་ཚག་ཝེའི་སྲས་སུ་སྐུ་འཁྲུངས། མཚན་ལ་ཚེ་རིང་དོན་གྲུབ་ཟེར། དགོང་གྲངས་གསུམ་པ་སྤྱི་ལོ༡༩༤༦ལོར་ཨ་རོལ་ལུང་རྟོགས་བསྟན་པའི་རྒྱལ་མཚན་མཆོག་གིས་སེ་རའི་མཁྱེན་པ་སྐུ་ཕྲེང་གསུམ་པའི་ཡང་སྤྲུལ་དུ་ངོས་འཛིན་གནང་། དགུང་གྲངས་ལྔ་བར་ཨ་རོལ་རྡོ་རྗེ་འཆང་གི་མདུན་ནས་རབ་བྱུང་གི་སྡོམ་པ་བཞེས་ཤིང་མཚན་ལ་བློ་བཟང་བཤད་སྒྲུབ་འཕྲིན་ལས་རྒྱ་མཚོར་གསོལ། དགུང་གྲངས་དྲུག་སོན་པ་སྤྱི་ལོ༡༩༤༩ལོར་གསེར་ཁྲིར་མངའ་གསོལ་བའི་སྟ་གོན་བྱས་ཀྱང་། རྐྱེན་ཕྲན་ཚགས་རེའི་དབང་གིས་ཁོང་ཁྲིར་འགོད་པ་ཕྱིར་འགྱངས་བྱེད་དགོས་ཐུག་སོང་ཟེར། སྐབས་དེར་ཁོང་ཚང་གི་སྐུ་བདག་ནི་རྐང་ཚ་དགོན་ཆེན་གྱི་རྒན་པ་ཕུན་ཚོགས་རེད། སེ་རའི་མཁྱེན་པ་སྐུ་ཕྲེང་གཉིས་པ་དང་གསུམ་པ། བཞི་བ་རྣམས་སྐུ་ན་ཕྲ་བའི་དུས་ནས་དགོངས་པ་ཆོས་དབྱིངས་སུ་ཐིམས་པས། སྐུ་བདག་ཕུན་ཚོགས་ནི་ཁོང་སེ་རའི་མཁྱེན་པ་སྐུ་ཕྲེང་དང་པོ་རྗེ་འཇིགས་མེད་རྒྱ་མཚོ་ཚང་དང་སྐུ་ཕྲེང་གཉིས་པ་རྗེ་འཇིགས་མེད་བློ་གྲོས་ཐུབ་བསྟན་རྒྱ་མཚོ་ཚང་།  སྐུ་ཕྲེང་གསུམ་པ་འཇིགས་མེད་ལུང་རྟོགས་བསྟན་པ་རྒྱ་མཚོ་ཚང་། སྐུ་ཕྲེང་བཞི་བ་བཅས་སྐུ་ཕྲེང་རིམ་བྱོན་བཞིའི་སྐུ་བདག་གམ་དབོན་པོ་ཁུར་མྱོང་། ལྷག་པར་སྐུ་ཕྲེང་གསུམ་པའི་ཡང་སྤྲུལ་ངོས་འཛིན་གྱི་བྱ་བའི་འགོ་མཇུག་ཆ་ཚང་གི་འགན་གཙོ་བོ་ཁུར་ཡོད་ཚོད་འདུག ཡིན་ནའང་སྐུ་ཕྲེང་འདི་བ་ཚང་དགུང་གྲངས་དྲུག་སོན་པའི་སྐབས་སུ་གསེར་ཁྲིར་མངའ་གསོལ་བར་ཕྱིར་འགྱངས་བྱེད་དགོས་ཐུག་པའི་རྐྱེན་གཙོ་བོ་ཅི་ཞིག་ཡིན་པའི་སྐོར་གྱི་ལོ་རྒྱུས་ཞིབ་ཅིང་ཕྲ་བ་གསལ་ཁ་ཐུབ་པ་ཞིག་ད་ལྟ་སུས་ཀྱང་བརྗོད་དུ་མེད། གང་ལྟར་དོན་དག་དེས་རྐྱེན་པས་ཁོང་གི་གདུལ་བྱ་དང་མཛད་པ་འཕྲིན་ལས་ལ་གེགས་ཆེན་པོ་བྱུང་།

རབ་བྱུང་བཅུ་དྲུག་པའི་ལྕགས་སྟག་སྟེ། སྤྱི་ལོ༡༩༥༠ལོར་རྐང་ཚའི་དཔོན་པོ་དཔལ་བཟང་གིས་གོང་རིམ་དང་གྲོས་བསྡུར་བྱས་མཐར་མྱུར་ཏུ་གདན་སར་འགོད་དགོས་པའི་བཀའ་ནན་མོ་ཕབ་སྟེ། ལོ་དེའི་རྒྱལ་ཟླའི་དམར་ཕྱོགས་རྫོགས་པ་གསུམ་པ་སྟེ། ཟླ་བཅུ་གཉིས་པའི་ཚེས་ཉེར་ལྔའི་ཉིན་རྐང་ཚ་དགོན་ཆེན་དགའ་ལྡན་ཆོས་འཕེལ་གླིང་དུ་གསེར་ཁྲིར་མངའ་གསོལ་བའི་མཛད་སྒོ་གཟབ་རྒྱས་ངང་སྤེལ།  གསེར་ཁྲིར་མངའ་གསོལ་བ་ནས། རྐང་ཚ་དགོན་ཆེན་གྱི་གནས་བརྟན་རྒན་པ་དབུ་མཛད(རྒྱ་ལེ)རྒྱ་མཚོའི་མདུན་དུ་ཀློག་བསླབས་ཀྱང་ཁོང་བྱིས་པ་གཞན་དང་བསྡུར་ན་རིག་པ་ཧ་ཅང་རྣོ་བས་ཚེགས་མེད་དུ་མཁྱེན། སྐབས་དེར་བྲག་དཀར་སྤྲེལ་རྫོང་ངམ། ཁོང་ཨ་རོལ་རྡོ་རྗེ་འཆང་དང་རྐང་ཚ་དགོན་ཆེན་བར་ལ་འབྲེལ་འདྲིས་ཧ་ཅང་རྒྱུག་ཆེ་སྟབས་དགོན་པའི་རྒན་པ་དང་སྐུ་བདག་སོགས་ཀྱིས་ཀྱང་ཁོང་བྲག་དཀར་སྤྲེལ་རྫོང་ལ་སློབ་གཉེར་དུ་རྫོང་དགོས་པར་དགོངས་ཏེ། དེའི་ཕྱི་ལོར་རྐང་ཚའི་དཔོན་པོ་དཔལ་བཟང་གཙོས་རྐང་ཚའི་མི་རྒན་བླ་རྒན་མང་པོས་བྲག་དཀར་སྤྲེལ་རྫོང་དུ་སྐྱེལ་མ་བྱས་ཤིང་། ཆུ་སྐྱ་སྡེ་བ་གཙོས་རྐང་ཚ་དགོན་ཆེན་གྱི་ལྷ་སྡེ་མང་པོས་བྲག་དཀར་སྤྲེལ་རྫོང་དུ་མང་ཇ་རྒྱ་ཆེན་པོ་སྐོལ། དེ་ལྟར་ཁོང་ཚང་དགུང་གྲངས་བརྒྱད་ནས་བཟུང་བྲག་དཀར་སྤྲེལ་རྫོང་དུ་ཨ་ལགས་ཁོ་ནག་སྐུ་ཕྲེང་གསུམ་པ་འཇམ་དབྱངས་ཐུབ་བསྟན་རྒྱ་མཚོ་ཚང་གི་ཞབས་ཀྱི་པདྨོ་སྤྱི་བོར་བཀུར་ཏེ་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ཞིང་། བསྡུས་གྲྭ་ནས་བཟུང་སློབ་གཉེར་རྡོ་རུས་ཐུག་པ་གནང་བས་བླ་མའི་ཐུགས་དགྱེས་པའི་མཆོད་སྤྲིན་དུ་གྱུར། སྐབས་དེ་དག་ཏུ་ཁོང་ཨ་རོལ་རྡོ་རྗེ་འཆང་གི་གསུང་བཀོད་ལྟར་རྐང་ཚ་དགོན་ཆེན་དུ་ཀུན་རིག་རྣམ་པར་སྣང་མཛད་ཀྱི་རྡུལ་མཚོན་དཀྱིལ་འཁོར་ལ་བརྟེན་པའི་སྒྲུབ་མཆོད་ཆོས་ཐོག་ཆེན་མོ་སོགས་ཀྱང་ལེགས་པར་བཙུགས། དེ་ལྟར་ཁོང་གི་ཐོས་བསམ་སྒོམ་གསུམ་གྱི་མཛད་བཟང་གསེར་གྱི་ཆོས་འཁོར་ཁམས་གསུམ་གྲོལ་བའི་དོན་དུ་ཡོངས་སུ་སྨིན་པའི་སྐབས་སུ། གདུལ་བྱ་རྟག་འཛིན་ཅན་རྣམས་ཆོས་ལ་འགོད་ཕྱིར་དགུང་གྲངས་བཅུ་གསུམ་པ། རབ་བྱུང་བཅུ་དྲུག་པའི་མེ་སྤྲེལ་ཏེ། སྤྱི་ལོ༡༩༥༦ལོའི་ཟླ་དང་པོའི་ཚེས་བཅུ་གཅིག་ཉིན་རྐང་ཚ་དགོན་ཆེན་དུ་དགོངས་པ་ཆོས་དབྱིངས་སུ་ཞི་བར་གཤེགས་སོ།།

ཁོང་སྐུ་ན་ཕྲ་བའི་དུས་ནས་སྐུ་གཤེགས་པས་རྣམ་ཐར་ཞིབ་ཅིང་རྒྱས་པ་ཞིག་ད་ལྟ་གང་དུའང་མི་བཞུགས་མོད། འདིར་རྐང་ཚ་དགོན་ཆེན་གྱི་རྒན་པ་རེ་ཟུང་ལས་ཁོང་གི་རྣམ་ཐར་ཡི་གེར་བཀོད་མེད་པའི་ངག་རྒྱུན་མགྲིན་གཅིག་པ་ཅན་དུ་མ་ཞིག་ཡི་གེར་ཕབས་པ་དགེའོ།།

                                         ཞེས༢༠༢༢ལོའི་ཟླ༦པའི་ཚེས༡༥ཉིན།