སློབ་དཔོན་རྣམ་གསུམ་ཉི་ཟླ་སྐར་གསུམ་སྟེ། ། 

ལྷན་ཅིག་མཇལ་བ་བསོད་ནམས་དཔལ་གྱི་ཞིང་། །

ཕྱི་དྲོ་མཐོ་སྒང་རང་འདེམས་རྫ་ཁོག་གླིང་ནས་སློབ་དཔོན་རྣམ་པ་གསུམ་དབུ་བཞུགས་ཐོག་སློབ་གྲྭའི་དགེ་རྒན་དང་ལས་བཟོ་བ། ཇ་མ་དང་སྒོ་སྲུང་དང་བཅས་ཁྱོན་མི་དྲུག་ཅུ་ལྷག་གུས་པའི་ཕྱག་གིས་བསུས་ཏེ་གསོལ་ཇ་དྲངས། ཐུགས་དགྱེས་པའི་ཕྱིར་རིག་རྩལ་གྱི་མཆོད་པ་ཕུལ།

འདི་ལ་དགེ་མཚན་གནད་དུ་ཆེ་བ་གསུམ་ཡོད་དེ་སློབ་དཔོན་རྣམ་གསུམ་ཞལ་འཛོམས་བྱུང་བའི་བསོད་ནམས་ཀྱི་ཆེ་བ་དང་མ་ཡུམ་སློབ་གླིང་མི་མཐུན་འགལ་རྐྱེན་སྣ་ཚོགས་ལས་རྣམ་པར་རྒྱལ་བའི་རྒྱལ་ཁའི་དགའ་སྟོན་དང་གཉིས།ང་ཚོའི་འཛིན་གྲྭའི་ཕུ་ནུ་གྱ་བདུན་མི་ལོ་བརྒྱད་ཀྱི་རིང་ལ་ན་ཚ་ལྕི་མོ་ཅི་ཡང་མ་བྱུང་བར་བདེ་འཚམས་ཀྱི་རི་མོ་རྟག་ཏུ་གསལ་ཡོད་པ་དང་གསུམ་བཅས་ཀྱི་དགའ་སྟོན་གསུམ་འཛོམས་ཤིག་ཀྱང་ཡིན་པས་རང་འཛིན་གྲྭའི་སྒྲ་སྙན་བཀྲ་ཤིས་རྒྱལ་བོ་སྟེ་སྐལ་བཟང་བཀྲ་ཤིས་དང་འཆི་མེད་རིག་འཛིན། སྐལ་བཟང་ཡོན་ཏན། ཚེ་རིང་དོན་འགྲུབ་བཅས་ནས་རྡུང་ལེན་དང་སློབ་གྲོགས་ཚང་མས་བཀྲ་ཤིས་ཆར་བ་དང་མ་ཡུམ་སློབ་གླུ་སོགས་མཉམ་ལེན་གྱིས་མ་ཡུམ་སློབ་གླིང་བཀྲ་ཤིས་དགེ་མཚན་རྟག་ཏུ་རྒྱས་ཤིང་སློབ་དཔོན་རྣམ་པའི་སྐུ་ཚེ་ཡུན་རིང་དུ་བརྟན་པའི་སྨོན་ཚིག་དང་མི་ཤིག་རྡོ་རྗེ་བྲག་གི་བརྟན་བཞུགས་ཕུལ། 

ཚེས་བརྒྱད་ཉིན་གྱི་སྔ་མོར་ཡར་ལངས་ནས་སློབ་གླིང་གི་སློབ་ཁང་དང་མལ་ཁང་དུ་སོང་ནས་སློབ་གྲྭའི་འཕེལ་རྒྱས་དང་སློབ་མའི་སྐབས་ཀྱི་འཚོ་བར་ཕྱིར་དྲན་གྱི་རྣམ་པར་ནང་སེམས་ཁེན་ཏེ་ཁ་བརྡ་བྱས།  

ད་དུང་མ་ཡུམ་སློབ་གྲྭའི་སྐབས་ཉེར་ལྔ་བའི་མཐར་ཕྱིན་མཛད་སྒོར་མཉམ་དུ་ཞུགས་ནས་སྐལ་བཟང་བཀྲ་ཤིས་གཙོས་མ་ཡུམ་སློབ་གྲྭའི་དགེ་སློབ་ཡོངས་ལ་རིག་རྩལ་གྱ་ནོམ་པ་ཞིག་ལེགས་སྐྱེས་སུ་ཕུལ་ཞིང་སློབ་བུ་པདྨ་རྒྱལ་ལགས་ལ་སློབ་གླིང་གི་སློབ་དེབ་བཅུ་དགུ་པར་དུ་བསྐྲུན་པར་ཇུས་འགོད་དང་སྒྲིག་སྦྱོར་ལ་རིན་སྐར་གང་མ་བླངས་པ་དྲིན་གཟོའི་ལེགས་སྐྱེས་ཤིག་རེད་ཅེས་གཟེངས་བསྟོད་དཔང་ཡིག་ཕུལ།

ཕྱི་དྲོ་མ་ཡུམ་སློབ་གླིང་གི་དགེ་རྒན་རྣམ་དང་ལྷན་དུ་མཛའ་བརྩེའི་སྤོ་ལོ་འགྲན་སྡུར་བྱས་ཤིང་ཕྱིར་མཉམ་འཛོམས་ཀྱི་གཞིས་སྒར་ཡོང་ནས་དགའ་སྤྲོའི་ངང་ལྷན་འཛོམས་ལོངས་སུ་སྤྱད།

ས་ཁ་ཐག་རིང་ཡང་སེམས་ཐག་ཉེ།

མཛའ་བརྩེ་དང་ཁྲེལ་གཞུང་།  དྲིན་དྲན་པའི་འདུ་ཤེས་ཀྱིས་འཚོས་བའི་ཕུ་ནུ་གྱ་བདུན་ལས་རྒྱུ་རྐྱེན་དུ་མའི་དབང་གིས་མ་འབྱོར་བ་རེ་འགའ་མཆིས་ཀྱང་།ནང་སེམས་ནས་མ་ཐོན་པའི་ཕངས་སེམས་དང་འགྱོད་གདུང་གི་སེམས་ཚོར་མོད་པོ་སྐད་འཕྲིན་ཚོམས་དང་གྲོགས་ཚོམས་སོགས་སུ་སྤེལ་བཞིན་འདུག་ལ་དཔེར་མཚོན་དུ་གཅིག་གཉིས་ཤིག་འགོད་ན།སློབ་གྲོགས་བསྟན་འཛིན་དབྱིན་གཉེན་གྱིས། དོ་ནུབ་ཀྱི་མཉམ་འཛོམས་ལ་ཞུགས་མ་ཐུབ་པ་ནི་ཕང་བ་ལ།

སློབ་གྲོགས་མེ་ནུར་གྱིས། གུས་ཤིང་དད་པའི་དགེ་རྒན་དང་།  མཛའ་ཞིང་བརྩེ་བའི་སློབ་གྲོགས།  ད་དུང་ཡིད་ལ་འཁོར་བའི་རྭ་རྒྱའི་ས་དམར་ལ་སོགས་རབ་ཏུ་དྲན།  འོན་ཀྱང་ད་ཐེངས་སྒེར་དོན་ཞིག་གིས་ལྷན་འཛོམས་དེར་ཡོང་མ་ཐུབ་པས་འགྱོད་སེམས་ཤིག་ཀྱང་འདུག    ཚང་མ་འཛོམས་པ་ཡག 

 སློབ་གྲོགས་ཚེ་རིང་དོན་འགྲུབ་ཀྱིས། ཡུལ་རྭ་རྒྱའི་ས་དམར་ཁྲོད་ནས་སྐྱིད་སྡུག་མཉམ་མྱོང་བྱས་པའི་མཛའ་གཅུག་གི་སློབ་གྲོགས་དག་དེ་རིང་ཕྱིར་མ་ཡུམ་སློབ་གྲྭའི་ཕང་བ་རུ་ལྷན་དུ་འཛོམས་ཤིང་།  སློབ་དཔོན་རྣམ་གསུམ་གཙོས་པའི་དགེ་རྒན་བཀའ་དྲིན་ཅན་དག་ལ་མཇལ་རྒྱུའི་སྐལ་བཟང་མངོན་དུ་གྱུར་ཡོད་པ་ཇི་འདྲའི་ལས་སྐལ་ལྡན་ཨང་།   རང་ཉིད་ལས་དོན་གང་མང་གི་རྐྱེན་དབང་གིས་ཡུལ་དངོས་ལ་འགྲོ་མ་ཐུབ་པས་སེམས་པ་ཤིན་ཏུ་གནོང་། ཁྱེད་ཅག་ལས་ལམ་དཀར་ཞིང་བསམ་དོན་འགྲུབ་པར་སྨོན། ། ཞེས་པ་སོགས་མང་དུ་བྱུང་ཡོད། 

མགོ་བཀྲ་ཤིས་ལྷན་འཛོམས་དཔལ་གྱིས་དྲངས།། 

མཇུག་བདེ་ལེགས་དོན་གྲུབ་ཡུལ་དུ་འབྱོར།།