སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོའི་འབེལ་གཏམ་ཁག་བརྒྱད་པ། 

         འཇིག་རྟེན་པའི་ཡང་དག་པའི་ལྟ་བ།

     མང་བོ་ཞིག་གིས་ང་ཚོ་འཇིག་རྟེན་ཁྱིམ་པ་བ་ཡིན་ཞིང་ཁ་ལ་བཟའ་རྒྱུ་དང་རྒྱབ་ལ་གྱོན་རྒྱུ་སོགས་འཚོ་ཚིས་དོན་དུ་གཉེར་དགོས་པས།   རྒྱུ་འབྲས་དྲང་སྙོམས་དང་གཞན་ཕན་གཙོ་བོ།  ལན་ལ་མི་རེ་བ།  ཕྱོགས་སུ་མ་ལྷུང་བ།   རིས་སུ་མ་ཆད་པ།  ཚུལ་ཁྲིམས་སྲུང་བ།  བཟོད་པ་སྒོམ་པ།  སྲོག་བླུ་ཚེ་ཐར།  མཆོད་འབུལ་སྦྱིན་གཏོང་སོགས་དམ་པ་ལྷ་ཆོས་དང་མཐུན་པ་རྐྱང་རྐྱང་བྱས་ནས་སྡོད་ཐབས་མེད་དེ།   འཇིག་རྟེན་ནི་འགྲན་རྩོད་ཀྱི་དོ་ར་ཞིག་ཡིན་པས་ང་རྒྱལ་ཁྱོད་ཕམ་རྩོད་དགོས།  ཕར་ཕན་བཏགས་ན་ཚུར་གནོད་སྐྱེལ་བའི་མི་ཐ་ཤལ་བར་གནོད་ལན་གནོད་ཀྱིས་མ་འཇལ་ན་སྡར་མའི་རྟགས་ཡིན།   ང་ནི་དགའ་སྐྱོ་ཆགས་སྡང་གིས་གྲུབ་པའི་འགྲོ་བ་མི་ཚོར་བས་བསྡུས་པ་ཞིག་ཡིན་པས།  ཉེ་རིང་ཆགས་སྡང་གཉིས་བྲལ་གྱི་བེམ་གཟུགས་ལྟ་བུ་ཞིག་བྱེད་མི་འདོད་པའམ་བྱེད་ཐབས་མེད་པ།   མི་ཆོག་མི་རུང་བའི་ཁྲིམས་མང་བོ་ཞིག་བསྲུངས་ནས་མི་ཚེ་སྡུག་ལ་སྦྱོར་བ་ལས་གུ་ཡངས་བག་ཕེབས་ཀྱི་འཚོ་བ་ཞིག་རོལ་དགོས་པ།  དེ་ལྟར་རོལ་མ་ཐུབ་ན་མི་ལུས་ཐོབ་པ་དོན་མེད་ཡིན་པ།    སྲོག་བླུ་ཚེ་ཐར་དང་མཆོད་འབུལ་སྦྱིན་གཏོང་སོགས་ནི་དཔལ་འབྱོར་གྱོང་གུད་གཏོང་བྱེད་ཙམ་སྟེ།  ང་ཚོ་ཡར་རྒྱས་སུ་མ་སོང་བའི་འགག་རྩའང་འདི་འདྲའི་རིགས་ལ་ཐུག་ཡོད་ཚུལ་སོགས་གོ་རྟོགས་སད་སད་དང་རྣམ་དཔྱོད་ཡོད་མདོག་མདོག་གིས་བཤད་ཅིང་འབྲིའོ།   །

       འདི་ནི་རིག་པ་ནར་མ་སོན་ཅིང་བདེན་པའི་རང་ཞལ་འཚོལ་ཚུལ་མ་ཤེས་པ།   ཡར་རྒྱས་ཀྱི་གོ་དོན་མ་རྟོགས་ཤིང་མི་ཚེའི་སྙིང་བོ་ངོས་མ་ཟིན་པ།  དཔའ་བོ་དང་སྡར་མའི་ཁྱད་པར་མ་ཁོར་ཞིང་རྒྱུ་འབྲས་ལ་བློ་མིག་ལྡོངས་པའི་དན་རྟགས་ཤིག་ལས་གཞན་ཅི་ཡང་མིན་ཏེ།   སྤྱོད་འཇུག་ལས།  སྡུག་བསྔལ་ཡིད་མི་བདེ་བ་དང༌།  །འཇིགས་པ་རྣམ་པ་སྣ་ཚོགས་དང༌།  །འདོད་པ་རྣམས་དང་བྲལ་བ་ནི།  །སྡིག་པ་སྤྱོད་ལས་འབྱུང་བར་འགྱུར།   །ཞེས་དང་། སྡིག་པ་བྱེད་པ་བདེ་འདོད་ཀྱང༌།  །གང་དང་གང་དུ་འགྲོ་འགྱུར་བ།  །དེ་དང་དེར་ནི་སྡིག་པ་དེས།   །སྡུག་བསྔལ་མཚོན་གྱིས་རྣམ་པར་འཇོམས།   །ཞེས་དང་།  རྗེ་ཐམས་ཅད་མཁྱེན་པས།   འཇིག་རྟེན་རྒུད་པ་ཇི་སྙེད་པ།   །དེ་ཡི་རྩ་བ་མ་རིག་སྟེ།   །ཞེས་གསུངས་པ་ལྟར།   ཚེ་འདིའི་དབང་དུ་བྱས་ན་ཡང་།  རྒུད་ཅིང་ཕོངས་པ་དང་ཡར་རྒྱས་སུ་མི་འགྲོ་བ།  སྡུག་བསྔལ་དང་དཀའ་ཁག་ཡོད་ཚད་མ་རིག་པ་སོགས་ཉོན་མོངས་སྣ་ཚོགས་བསྐྱེད་པའི་མི་དགེ་བའི་ལས་རྣམས་ལས་བྱུང་བ་ཁོ་ན་ཡིན་པའི་ཕྱིར་རོ།   །

         ཚེ་འདིར་བདེ་སྐྱིད་དང་ཡར་རྒྱས།  འདྲ་མཉམ་དང་གུ་ཡངས།  འཁྲུག་རྩོད་མེད་ཅིང་འཆམ་མཐུན་བྱེད་པ།  ཞི་བདེ་དང་འབྱོར་ཕྱུག་གི་འཚོ་བ་ཞིག་ལོངས་སུ་སྤྱོད་འདོད་ན།  མི་དགེ་བ་བཅུ་སོགས་ལ་དུག་བཞིན་དུ་འཛེམས་ཤིང་མི་ཆོས་གཙང་མ་བཅུ་དྲུག་གི་ཁྲིམས་ལ་གནས།   སྐྱབས་འགྲོའི་སྡོམ་པ་དང་།  བསྙེན་གནས་ཡན་ལག་བརྒྱད་པའི་སྡོམ་པ།  དགེ་བསྙེན་གྱི་སྡོམ་པ།  ལས་རྒྱུ་འབྲས་སོགས་འཇིག་རྟེན་པའི་ཡང་དག་པའི་ལྟ་བ་ཚུལ་བཞིན་དུ་བསྲུངས་ན།  ལེགས་ཚོགས་ཀྱི་ཕྱྭ་གཡང་དཀར་བོས་རང་འཁོར་བྱེད་ཅིང་མི་ཚེ་དོན་དང་ལྡན་པར་བྱེད་ངེས་ཏེ།  སྤྱོད་འཇུག་ལས།   ཡིད་ལ་བསམས་པའི་དགེ་བྱས་པས།  །གང་དང་གང་དུ་འགྲོ་འགྱུར་བ།  །དེ་དང་དེར་ནི་བསོད་ནམས་དེས།  །འབྲས་བུའི་ཡོན་གྱིས་མངོན་མཆོད་འགྱུར།   །ཞེས་གསུངས་པའི་ཕྱིར་རོ།   །