རྭ་རྒྱ་དགོན་པའི་དགེ་སློང་བྱམས་ཆེན་ཚང་སྐུ་གཤེགས་པ།

     ཁོང་གི་སྐུ་གཟུགས་གཞན་དང་མི་འདྲ་བའི་ཆེན་པོ་དང་བརྗིད་པོ་ཞིག་ཡོད་པས། མཚོ་ལྷོ་ཁུལ་གྱི་གྲགས་ཅན་མི་སྣའི་གྲས་སུ་བཞག་སྟེ་ཚགས་པར་སྟེང་དུ་བཀོད། སྐབས་དེར་མཐོ་ཚད་ལ་སྐར་མ་208དང་། ལྗིད་ཚད་ལ་རྒྱ་མ270ཡོད་པ་སོགས་ཀྱིས། མཚོ་སྔོན་ཞིང་ཆེན་གྱི་ཁྱད་འཕགས་བསྐྱེད་བསྲིང་མི་སྣའི་གྲས་སུ་བཞག་སྟེ་མཚོ་སྔོན་ལུས་རྩལ་ཚོགས་པར་ཞུགས་དགོས་པའི་ཡིག་ཆ་བཀྲམ།  ཁོང་ནི་ཐུགས་རྒྱུད་དྲང་ཞིང་མཚན་སྙན་གྲགས་ལ་མི་དགའ་བ་ཞིག་ཡིན་པས། ང་གྲྭ་བ་ཞིག་ལུས་རྩལ་ཚོགས་པར་ཞུགས་ནས་ཅི་བྱེད། དེ་བས་དགོན་པ་ནས་ཚོགས་ཆོས་གྲྭར་སོང་ན་དགའ། རང་གི་འདོད་པའང་དེ་ཡིན་ཞེས་དང་ལེན་མ་བྱས་ཀྱང་། སྲིད་གཞུང་གིས་དགོན་པར་གནང་བ་བཙན་ཞུས་བྱས་ཏེ་ཟི་ལིང་དུ་འགྲོ་དགོས་བྱུང་། རྫོང་དང་ཁུལ་གྱིས་སྐྱེལ་མ་བྱས་ཏེ་ཟི་ལིང་དུ་ཕེབས་པར་བསུ་བ་དང་གསོལ་སྟོན་གང་ལེགས་བྱས།

     ཞིང་ཆེན་གྱི་དཔོན་པོ་དག་གིས། མཚོ་སྔོན་ཞིང་ཆེན་ལ་མི་གྲངས་ཁྲི་བརྒྱ་ཕྲག་མང་བོ་ཞིག་ཡོད་ཀྱང་མི་སྣ་ཁྱད་པར་བ་འདི་ལྟ་བུ་ཞིག་བྱུང་མ་མྱོང་བས་བདག་སྐྱོང་གང་ལེགས་བྱེད་དགོས་ཞེས་ཆེད་དུ་གསུངས། 

 སྐབས་དེར་ཁོང་གི་སྐུ་གཟུགས་ཀྱི་མཐོ་ཚད་ལ་སྐར་མ་220་དང་ལྗིད་ཚད་ལ་རྒྱ་མ་287་ཡོད་ལ། ལྷམ་ཨང་གྲངས་57ཅན་ཞིག་དགོས་པས། སྲིད་གཞུང་གིས་ཆེད་དུ་ཁོང་ལ་གོན་པ་མི་འདྲ་བ་མང་བོ་གསར་བཟོ་བྱས། མཚོ་སྔོན་ཉིན་རེའི་ཚགས་པར་དང་བརྙན་འཕྲིན་ཁང་སོགས་བརྒྱུད་དེ་ངང་ངམ་ཤུགས་ཀྱིས་ཁོང་གི་མཚན་སྙན་འཛམ་གླིང་གི་ཡུལ་གྲུ་གང་སར་ཁྱབ་པས། ཨ་རིའི་ལུས་རྩལ་ཁྲིད་སྟོན་པ་ཞིག་གིས་གློག་འཕྲིན་བརྒྱུད་ནས་ཁོང་བསྐྱེད་བསྲིང་བྱེད་འདོད་ཀྱི་རེ་ཞུ་དང་། གྲོང་ཁྱེར་མི་འདྲ་བའི་བུད་མེད་གཟུགས་ལང་ཚོ་ཅན་དང་འབྱོར་ཕྱུག་ཅན་དག་གིས་ཐབས་ལམ་སྣ་ཚོགས་བརྒྱུད་དེ་འབྲེལ་བ་བྱས་བྱུང་བས། ཁོང་གིས་ང་ནི་སྟོན་པའི་རྗེས་འཇུག་གི་རབ་བྱུང་བ་ཞིག་ཡིན་པས། འདི་ལྟར་འཚོ་བ་རྒྱས་སྤྲོས་དང་དུས་ཚོད་ཆུད་ཟོས། རྩོལ་མེད་ཀྱི་ཟླ་ཕོག་ལེན་པ། ཉིན་རེར་འཛམ་གླིང་ཡུལ་གྲུ་མང་བོའི་མི་སྣ་ངོ་མི་ཤེས་པ་དག་དང་འཇིག་རྟེན་མཐུན་འཇུག་གི་ཁ་བརྡ་བྱས་ནས་བསྡད་ན་སྙིང་བོ་མེད་དོ་སྙམ་ནས། སེམས་ཐག་གཙང་བཅད་བྱས་ཏེ་སུ་གཅིག་གི་ཁ་ལའང་མ་ཉན་པར། ཕྱིར་རྭ་རྒྱ་དགོན་པར་ཕེབས་ཏེ་ཚོགས་ཆོས་གྲྭར་འགྲིམས་ཤིང་སློབ་གཉེར་གྱི་འཕྲོ་བསྐྱངས།

       རྗེས་སུ་ཞིང་ཆེན་སོགས་ནས་བརྡ་ཐོ་བཏང་སྟེ་ཕྱིར་ཡོང་དགོས་ཚུལ་ནན་བཤད་བྱས་མོད། ཁོང་གིས་ང་ནི་གྲྭ་བ་ཞིག་ཡིན་པས་དགོན་པར་སྡོད་དུ་ཆུགས། ངའི་མགོ་བླངས་ནའང་གྲོང་ཁྱེར་གྱི་འདུ་འཛིའི་ནང་ལ་མི་འགྲོ་ཁོ་ཐག་ཡིན་ཞེས་ཁས་ལེན་གཏན་ནས་མ་གནང་བས། རིམ་གྱིས་སྲིད་གཞུང་ལའང་ཐབས་བཀོད་མེད་པར་གྱུར།

     དེ་ལྟར་དོན་ཉུང་བྱ་ཉུང་གིས་ཚོགས་དང་ཆོས་གྲྭར་འགྲིམས་ཤིང་འཛིན་གྲྭ་དབུ་མར་བུད་སྐབས་དགེ་གཡོག་ལ་བཞུགས་པས་མཇལ་བ་ཁྲི་ཕྲག་མང་བོས་ཁོང་གི་སྐུའི་བརྗིད་ཉམས་ཁོ་ན་གླེང་ཞིང་སྤྲུལ་བའི་དགེ་སློང་ཞིག་ཏུ་འདོད་མཁན་དང་བཤད་མཁན་ཡང་མང་བོ་བྱུང་།