རྭ་རྒྱའི་མཐར་ཕྱིན་སློབ་མ་འོས་སྦྱོར། 

སྨན་པ་ཤེས་རབ་རྒྱ་མཚོ་ལགས་ནི་1978ལོར་མདོ་སྨད་ཁྲི་ཀ་འཕྲང་དམར་གྲོང་རྡལ་དུ་སྐྱེས།  ལོ་གསུམ་གྱི་སྟེང་ཁོའི་ཨ་མ་མི་ཡུལ་དང་གཏན་དུ་བྲལ་བས་ཨ་མྱེས་དང་ཨ་ཕྱི་ཟུང་གིས་ཉེ་བར་བསྐྱངས་ཏེ་ནར་སོན།

  1993ལོར་ཁྲི་ཀ་རྫོང་འཕྲང་དམར་སེར་ཀྱཱ་དགོན་གྱི་རྩ་བའི་བླ་མ་ཨ་ཁུ་བློ་ལྡན་རྒྱ་མཚོའི་དྲུང་ནས་རབ་ཏུ་བྱུང་སྟེ། དགེ་བའི་བཤེས་གཉེན་ཆེན་པོ་ལྷ་རམས་པ་བློ་བཟང་མཐར་ཕྱིན་གྱི་དྲུང་ནས་ཡི་གེ་སྦྱོར་ཀློག་གཙོ་བྱས་ཏེ་དགོན་དེ་གའི་ཆོ་ག་ཆོས་སྦྱོད་དང་འདོན་རྟ་དབྱངས་གསུམ་བཅས་ལ་སྦྱང་བ་མཛད།

  1996ལོར་མདོ་སྨད་ཀྱི་ཆོས་སྡེ་ཆེན་པོ་སྐུ་འབུམ་བྱམས་པ་གླིང་དུ་དགེ་བཤེས་བསྟན་པ་ཡར་འཕེལ་དང་དགེ་བའི་བཤེས་གཉེན་ཆེན་པོ་བློ་བཟང་རྡོ་རྗེ་གཉིས་བསམ་སྦྱོར་ཚུལ་བཞིན་དུ་བསྟེན་ཏེ་ཐོས་བསམ་སློབ་གཉེར་གནང་།

  1998ལོར་ཟི་ལིང་གི་དུས་གསུམ་ཉི་འོད་གླིང་དུ་རྩིས་འཁོར་དང་དེང་རབས་ཚན་རྩལ་སྐོར་ལ་སློབ་སྦྱོང་བྱས།

   2000ལོར་གངས་ལྗོངས་ཤེས་རིག་ནོར་བུའི་སློབ་གླིང་དུ་ཞུགས་ཏེ་སློབ་དཔོན་ཆེན་མོ་བཛྲ་ཚུལ་ཁྲིམས་རྒྱ་མཚོ་ལགས་གཙོས་རྒན་ལྡོང་ཡོན་ཏན་རྒྱ་མཚོ་དང་རྒན་གྲགས་པ་བཟང་བོ།  ལྷ་སའི་སེ་རའི་བློ་བཟང་ཐོགས་མེད་ཚང་སོགས་དགེ་རྒན་མང་པོ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་སློབ་མཐར་ཕྱིན་ཅིང་། ཞོར་དུ་《ཙོང་ལ་རིང་མོའི་དགོད་སྒྲ།》དང་《ཇོ་བོའི་གཟི་བྱིན།》ཞེས་པའི་དུས་དེབ་གཉིས་ཀྱི་རྩོམ་སྒྲིག་པའི་འགན་ཡང་ཁུར་མྱོང་།   མཐར་ཕྱིན་ཆེད་རྩོམ་ལ《དཔྱིད་རླུང་།》ཞེས་པ་བརྩམས་གནང་མཛད།

   2004ལོར་མཚོ་སྔོན་ཞིང་ཆེན་མཚོ་བྱང་ཁུལ་བོད་སྨན་ཁང་དུ་ཕེབས་ཏེ་སྨན་རམས་པ་རིན་ཆེན་ལགས་ཀྱི་དྲུང་དུ་བོད་ཀྱི་གསོ་བ་རིག་པའི་གཞུང་ལུགས་དང་ལག་ལེན་དངོས་ལ་སློབ་སྦྱོང་དཔྱིས་ཕྱིན་པ་མཛད།

   2011ལོའི་ཟླ་9བར་ཀན་སུའུ་ཞིང་ཆེན་ཀན་ལྷོ་ཁུལ་རྨ་ཆུ་རྫོང་དུ་ཕེབས་ཏེ་སྨན་ཁང་ཆེས་སྤྱིར་བཏང་བ་ཞིག་གཉེར་ནས་ནད་པ་མང་བོར་སྨན་བཅོས་དང་སྨན་ཕྲུག་སློབ་མ་མང་པོ་གསོ་སྐྱོང་གནང་།      ལྷག་དོན་ཁོང་གིས་གསོ་བ་རིག་པའི་གཞུང་ལུགས་དང་ལག་ལེན་ཟུང་འབྲེལ་སྒོས་གསར་གཏོད་མཛད་པའི་《སྐྲ་སྐྱེས་བུམ་བཟང་》དང་《མཛེས་སྤྲས་བོད་སྨན་》བཅས་ལ་སྤྱི་ཚོགས་ཁྲོད་གདེངས་འཇོག་དང་དགའ་བསུ་མི་ཉུང་བ་ཐོབ།

   2018ལོར་ཀན་སུའུ་ཞིང་ཆེན་ཀན་ལྷོ་ཁུལ་རྨ་ཆུ་རྫོང་གི་ནུབ་ངོས་སུ་གནས་སྤར་ནས་དམངས་སྒོར་ཁྲི་ཉིས་སྟོང་ལྷག་གི་འགྲོ་སོང་བཏང་སྟེ་སྨན་ཁང་ཁང་མིག་བརྒྱ་དང་ལྔ་ཅུ་གཞི་རྒྱ་ཆེ་བ་ཞིག་འཛུགས་བསྐྲུན་བྱས།  ད་ལྟའང་གནས་དེ་གར་ཉི་མ་རེ་རེར་ནད་པ་ཉམ་ཐག་བརྒྱ་ཕྲག་མང་བོར་སྨན་བཅོས་བྱེད་བཞིན་པའི་སྐབས་ལགས་སོ།།

གསལ་བཤད།  
གཟའ་འཁོར་རེའི་ནང་དུ་གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བར་ཆེད་དུ་སློབ་གླིང་འདིའི་ཕུལ་བྱུང་མཐར་ཕྱིན་སློབ་མ་རེ་འོས་སྦྱོར་བྱེད་འཆར་ཡོད་པས། མཐར་ཕྱིན་འཛིན་གྲྭ་སོ་སོའི་སྤྱི་ཚོགས་སྟེང་གཟེངས་ཐོན་གྱི་མཐར་ཕྱིན་སློབ་མ་དག་སློབ་ཚོགས་གཞུང་ལས་ཁང་དུ་འོས་སྦྱོར་གནང་རོགས་ཞུ། 

 སློབ་ཚོགས་གཞུང་ལས་ཁང་གི་ཁ་པར།

 15109745084
གཙོ་སྒྲུབ་ལས་ཁུངས། གངས་ལྗོངས་ཤེས་རིག་ནོར་བུའི་སློབ་གླིང་གི་ཐོན་མིའི་སློབ་ཚོགས་གཞུང་ལས་ཁང་།