༄༅།། ནུབ་ཕྱོགས་མྱུལ་བའི་ཟིན་ཐོ་བཀླགས་པ་ལས་བྱུང་བའི་མྱོང་ཚོར་པད་དཀར་འཕྲེང་མཛེས།
བཛྲ་ཚུལ་ཁྲིམས་རྒྱ་མཚོ།
མདོ་སྡེ་བས་རིགས་ཞེས་པ་བྱེ་སྨྲ་ལྟར་མ་ཆགས་པའི་སེམས་བྱུང་དགེ་བ་ཞིག་འཇོག་པ་མ་ཡིན་པར་ཟག་མེད་སེམས་ཀྱི་ས་བོན་ཞིག་ཏུ་ཁས་ལེན་པའི་ཕྱིར་ཏེ།
རྒྱལ་སྲས་མ་ལས།
མདོ་སྡེ་བ་དག་རང་བཞིན་དུ་གནས་པའི་རིགས་ནི་ཟག་པ་མེད་པའི་སེམས་ཀྱི་ས་བོན་གྱི་ནུས་པ་ལ་འདོད།
ཅེས་གསུངས་པའི་ཕྱིར།
སེམས་ཙམ་པས་ཀུན་གཞི་མ་བཞག་ན་ཐོག་མེད་ནས་བརྒྱུད་དེ་འོངས་པའི་ནང་གི་སྐྱེ་མཆེད་དྲུག་གི་སྟེང་གི་ཟག་པ་མེད་པའི་ཡེ་ཤེས་སྐྱེ་རུང་དྲི་མ་དང་འབྲལ་རུང་གི་ས་བོན་ཐོས་སོགས་ཀྱིས་གསོས་མ་བཏབ་པ་རང་བཞིན་གནས་རིགས་ཁོ་ན་དང༌།
ཐོས་སོགས་ཀྱིས་གསོས་བཏབ་པའི་ནུས་པ་དེ་རྒྱས་འགྱུར་གྱི་རིགས་དང༌།
ཀུན་གཞི་བཞག་ན་དེའི་སྟེང་གི་དེ་འདྲའི་རིགས་གཉིས་འཇོག་གོ།
སྤྱིར་སེམས་ཅན་ཐམས་ཅད་འཚང་རྒྱ་རུང་བའམ་ངོ་བོ་ཉིད་སྐུར་འགྱུར་རུང་བ་རང་གི་རྟེན་ཆོས་སུ་འགྱུར་བའི་དྲི་མ་དང་བཅས་པའི་སེམས་ཀྱི་ཆོས་ཉིད་དེ་རང་བཞིན་གནས་རིགས་དང་། སངས་རྒྱས་ཀྱི་རིགས་གང་ཞིག འདུས་བྱས་ཀྱིས་སངས་རྒྱས་ཀྱི་སྐུར་འགྱུར་རུང་བ་སྟེ་ཐོས་བསམ་སྒོམ་པའི་རྐྱེན་གྱིས་གསོས་བཏབ་ནས་རྒྱས་པར་འགྱུར་བའི་རིགས་དེ་ལ་རྒྱས་འགྱུར་གྱི་རིགས་ཞེས་ཟེར་རོ།།
དེ་ཡང་རང་བཞིན་གནས་རིགས་ནི་གྲུབ་དུས་ཀྱི་དང༌།
རྒྱུན་གྱི་དང༌། ཐོབ་ཚུལ་གྱི་དང༌། གདགས་གཞིའི་ཁྱད་པར་བཞི་སྟེ་ཁྱད་པར་བཞི་ལྡན་དུ་བཞེད་དེ།
ཁྱོད་ཀྱི་རིགས་འདྲ་སྔ་མ་ཐོག་མ་མེད་པ་ནས་ཡོད་པ་གྲུབ་དུས་ཀྱི་ཁྱད་པར་ཏེ། སེམས་ཙམ་པའི་ལུགས་ལ་དང་བོ་ཉིད་ནས་རིགས་ངེས་པའི་དང་བོ་ལ་དེ་འདྲ་གཅིག་དགོས་སོ།།
ཁྱོད་ཀྱི་རིགས་འདྲ་གྲུབ་པ་ནས་རྒྱུན་ཆད་མ་མྱོང་བ་སྟེ་རྒྱུན་གྱི་ཁྱད་པར་དང་།
ལམ་སྒོམ་པ་སོགས་ཀྱི་རྩོལ་བར་མ་ལྟོས་པར་ཆོས་ཉིད་ཀྱིས་ནུས་པ་དེ་ཐོབ་པ་ཐོབ་ཚུལ་གྱི་ཁྱད་པར་དང་།
གདགས་གཞི་སྐྱེ་མཆེད་དྲུག་གི་ཁྱད་པར་གདགས་གཞིར་བྱས་ནས་གནས་འགྱུར་ཁྱད་པར་འབྱུང་བའི་ནུས་པ་གཅིག་རིགས་སུ་འཇོག་པས་སོ།།
ཀུན་གཞིའམ་ནང་གི་སྐྱེ་མཆེད་དྲུག་གནས་འགྱུར་རུང་གི་ནུས་པ་རིགས་ཡིན་ཏེ།
ཀུན་གཞི་གནས་གྱུར་ཆོས་སྐུ་དང༌། ཉོན་ཡིད་གནས་གྱུར་ལོངས་སྐུ་དང༌།
སྒོ་ལྔའི་རྣམ་ཤེས་གནས་གྱུར་སྤྲུལ་སྐུར་བཙུན་པས་བཞེད་པའི་ཕྱིར།
གཞན་ཡང་ཀུན་གཞི་གནས་གྱུར་མེ་ལོང་ཡེ་ཤེས་དང༌།
ཆོས་དབྱིངས་ཡེ་ཤེས་ཆོས་སྐུ་དང༌། ཉོན་ཡིད་གནས་གྱུར་མཉམ་ཉིད་ཡེ་ཤེས།
ཡིད་ཀྱི་རྣམ་ཤེས་གནས་གྱུར་སོར་རྟོགས་ཡེ་ཤེས་གཉིས་ལོངས་སྐུ།
དབང་ཤེས་ལྔ་གནས་གྱུར་བྱ་གྲུབ་ཡེ་ཤེས་དང་སྤྲུལ་སྐུར་བཞེད།
སྐྱེ་མཆེད་དྲུག་ཁོ་ནས་དབང་དུ་བྱས་ནས་ཡིད་ཤེས་གནས་གྱུར་སྤྲུལ་སྐུ་དང༌།
དབང་ཤེས་ལྔ་གནས་གྱུར་ལོངས་སྐུར་བཞེད་པའི་ཕྱིར་ན་རིགས་འདོད་ཚུལ་དེ་ལྟར་ཡིན་པའི་ཕྱིར།
ཡང་སེམས་ཙམ་པའི་ལུགས་ལ་རང་བཞིན་གནས་རིགས་ཀྱི་གདགས་གཞི་ལ་སྐྱེ་མཆེད་དྲུག་ཡོད་མེད་དང་།
སྐྱེ་མཆེད་དང་བོ་ལྔའི་སྟེང་ན་རང་བཞིན་གནས་རིགས་ཡོད་མེད།
རང་བཞིན་གནས་རིགས་ལ་ཐོག་མ་མེད་པ་ནས་རྒྱུན་མ་ཆད་པར་འོངས་པ་དགོས་མི་དགོས་ནི་སྐབས་སུ་མ་བབ་པས་འདིར་མི་དཔྱད་དོ།།
རང་ལུགས་སམ་དབུ་མ་བའི་ལུགས་ནི་ཀུན་མཁྱེན་ཕར་ཕྱིན་མཐའ་དཔྱོད་ལས།
རང་གི་ཐོབ་བྱའི་ངོ་བོ་ཉིད་སྐུར་འགྱུར་རུང་གི་ཆོས་ཉིད་དེ།
རང་བཞིན་གནས་རིགས་ཀྱི་མཚན་ཉིད་ཡིན་ཏེ། རྒྱུད་བླ་མ་ལས། དང་བོའི་སྐུ་ནི་དང་བོ་སྟེ།།
ཞེས་གསུངས་པའི་ཕྱིར། དེ་རིགས་སུ་འགྱུར་ཚུལ་ཡོད་དེ།
དེ་འཛིན་སྟངས་སུ་དམིགས་ཏེ་བསྒོམས་པས་འཕགས་པའི་ཆོས་དང་དྲི་མ་དང་བྲལ་བའི་ཆོས་སྐུར་འགྱུར་བར་དཔེ་དུ་མས་བཤད་པ་དེའི་ཕྱིར།
རྒྱུད་བླ་མ་ལས། ཡང་དག་མཐའ་ནི་འདུ་བྱས་ཀྱི།། རྣམ་པ་ཐམས་ཅད་དབེན་པ་སྟེ།།
ཉོན་མོངས་ལས་དང་རྣམ་སྨིན་དོན།། སྤྲིན་ལ་སོགས་པ་བཞིན་དུ་བརྗོད།།
ཅེས་གསུངས་པའི་ཕྱིར། དབྱེ་ན་ལམ་ལ་ཞུགས་མ་ཞུགས་གཉིས་དང༌། ཞུགས་པ་ལ་ཐེག་པ་གསུམ་གྱི་རིགས་གསུམ་ཡོད་དེ།
རྩ་བར། རྟེན་པའི་ཆོས་ཀྱི་བྱེ་བྲག་གིས།། དེ་ཡི་དབྱེ་བ་ཡོངས་སུ་བརྗོད།། ཅེས་སོ།།
ཞེས་གསུངས་པ་ལྟར་རོ།། དང་བོའི་སྐུ་ནི་དང་བོ་སྟེ།། གཉིས་པ་ཡི་ནི་ཕྱི་མ་གཉིས།།
ཞེས་པའི་དོན་ནི་རིགས་གཉིས་ཀྱི་དང་བོ་ཆོས་སྐུར་འགྱུར་བ་དང་། རྒྱས་འགྱུར་གྱི་རིགས་གཟུགས་སྐུར་འགྱུར་ཞེས་པའོ།།
ཡང་། ཡང་དག་མཐའ་ནི་འདུ་བྱས་ཀྱི།། རྣམ་པ་ཐམས་ཅད་དབེན་པ་སྟེ།།
ཉོན་མོངས་ལས་དང་རྣམ་སྨིན་དོན།། སྤྲིན་ལ་སོགས་པ་བཞིན་དུ་བརྗོད།། ཅེས་པ་ནི།
སེམས་བདེན་པས་སྟོང་བའི་དེ་བཞིན་གཤེགས་པའི་སྙིང་བོ་ཡང་དག་མཐའ་དེ་ཉིད་དྲི་བཅས་ཀྱི་དེ་བཞིན་ཉིད་ཡིན་པས།
རང་བཞིན་ལ་དྲི་མས་བསླད་པ་མ་ཞུགས་པའི་རྒྱུ་མཚན་གྱིས་རྣམ་པ་ཐམས་ཅད་དུ་དབེན་པ་ཡིན་ཡང་།
གློ་བུར་བའི་དྲི་མའི་ངོ་བོ་ཙམ་ལ་སྤྲིན་གྱིས་ནམ་མཁའ་སྒྲིབ་པ་བཞིན་དུ་སྒྲིབ་པར་བརྗོད་ཅེས་པའོ།།
དེ་ཡང་ཐོས་སོགས་ཀྱིས་གསོས་བཏབ་པའི་རང་གི་ཐོབ་བྱའི་སངས་རྒྱས་སུ་འགྱུར་རུང་གི་དངོས་པོ་དེ།
རྒྱས་འགྱུར་གྱི་རིགས་ཀྱི་མཚན་ཉིད་ཡིན་ཏེ། རྒྱུད་བླ་མ་ལས།
གཉིས་པ་ཡིས་ནི་ཕྱི་མ་གཉིས།། ཞེས་གསུངས་པའི་ཕྱིར། དབྱེ་ན།
ཡེ་ཤེས་ཆོས་སྐུར་འགྱུར་རུང་གི་སེམས་ཀྱི་ནུས་པ་དང༌།
གཟུགས་སྐུར་འགྱུར་རུང་གི་སེམས་ཀྱི་ནུས་པ་གཉིས་ཡོད་དེ། རྒྱུད་བླ་མ་ལས།
དཀོན་མཆོག་གསུམ་པོ་འདི་ཡི་རིགས།། ཐམས་ཅད་གཟིགས་པ་རྣམས་ཀྱི་ཡུལ།། དེ་ཡང་རྣམ་བཞི།
ཞེས་དང༌། གསེར་ཕྲེང་ལས། གཉིས་པ་ནི།
དེ་ལ་སྤྱིར་སེམས་ཅན་གྱི་ཤེས་རྒྱུད་ལ་ཡོན་ཏན་སྐྱེ་རུང་ཞིང་སྒྲིབ་པ་སྤང་དུ་རུང་བའི་རྒྱུ་ཙམ་ཞིག་རིགས་སུ་འཇོག་པ་དབུ་སེམས་གཉིས་ཀ་བཞེད་པ་མཐུན།
ཞེས་གསུངས་པའི་ཕྱིར་དང༌། རྣམ་བཤད་ལས་ཀྱང༌།
སེམས་ཅན་རྣམས་ཀྱི་སེམས་ཀྱི་སྟེང་ན་དྲི་མ་འབྲལ་རུང་ཞེས་སོགས་གསུངས་པའི་ཕྱིར།
སེམས་ཅན་གྱི་སེམས་རང་བཞིན་གྱིས་རྣམ་པར་དག་པ་དེ་འདྲ་ཡིན་ན།
ཅིའི་ཕྱིར་སངས་རྒྱས་དང་མི་འདྲ་ཞེ་ན།
རང་བཞིན་གྱིས་རྣམ་པར་དག་པ་ཡིན་ཡང་ཉོན་མོངས་པའི་སྦུབས་ན་གནས་པ་དེ་གློ་བུར་བ་ཡིན་པས་སེམས་ཀྱི་རང་བཞིན་ལ་མ་ཞུགས་ཚུལ་དེ་དཔེ་དགུས་བསྟན་ཏེ།
རྒྱུད་བླ་མ་ལས། ཉོན་མོངས་སྦུབས་ནང་གནས་པ་དེ།། དཔེ་དག་གིས་ནི་ཤེས་པར་བྱ།།
སངས་རྒྱས་པད་ངན་སྦྲང་རྩི་སྦྲང་མ་ལ།། སྦུན་ལ་སྙིང་པོ་མི་གཙང་ནང་ན་གསེར།།
ས་ལ་གཏེར་དང་སྨྱུག་སོགས་འབྲས་ཆུང་དང་།། གོས་ཧྲུལ་ནང་ན་རྒྱལ་བའི་སྐུ་དང་ནི།། བུད་མེད་ངན་མའི་ལྟོ་ན་མི་བདག་དང་།།
ས་ལ་རིན་ཆེན་གཟུགས་ཡོད་ཇི་ལྟ་བར།། གློ་བུར་ཉོན་མོངས་དྲི་མས་བསྒྲིབས་པ་ཡི།།
སེམས་ཅན་རྣམས་ལ་དེ་བཞིན་ཁམས་འདི་གནས།།
ཞེས་སངས་རྒྱས་ཀྱི་སྐུ་པད་མ་ངན་པའི་ནང་ན་ཡོད་པ་དང་། སྦྲང་རྩི་སྦྲང་མ་ལ་ཡོད་པ་དང་།
འབྲས་བུའི་སྦུན་པ་ལ་དབུས་ན་སྙིང་བོ་ཡོད་པ་དང་། མི་གཙང་བའི་ནང་ན་གསེར་ཡོད་པ་དང་།
དབུལ་བོའི་ཁྱིམ་གྱི་ས་ལ་རིན་པོ་ཆེའི་གཏེར་དང་།
ལྗོན་ཤིང་གི་མྱུ་གུ་སོགས་དེ་དག་གི་ས་བོན་དུ་གྱུར་བའི་འབྲས་བུ་ཆུང་ངུ་ལ་ཡོད་པ་དང་།
གོས་ཧྲུལ་ནང་ན་རྒྱལ་བའི་སྐུ་ཡོད་པ་དང་།
བུད་མེད་ངན་མའི་ལྟོ་ན་མི་བདག་འཁོར་ལོས་བསྒྱུར་བ་ཡོད་པ་དང་། སའི་ཁོང་ན་རིན་ཆེན་གསེར་ལས་བྱས་པའི་གཟུགས་ཡོད་པ་ཇི་ལྟ་བར་གློ་བུར་གྱི་ཉོན་མོངས་པའི་དྲི་མས་བསྒྲིབས་པའི་སེམས་ཅན་རྣམས་ལ་དཔེ་དེ་བཞིན་དུ་ཁམས་རང་བཞིན་གྱིས་རྣམ་པར་དག་པ་འདི་གནས་པར་ཤེས་པར་བྱའོ།།
འདིས་པད་མ་ལ་སངས་རྒྱས་ཡོད་པ་སོགས་དཔེར་བྱས་ནས་གློ་བུར་གྱི་དྲི་མས་བསྒྲིབས་པ་ལ་ཁམས་སམ་རིགས་ཡོད་པ་ཙམ་དུ་བསྟན་ཏོ།། དེ་ནས།
དྲི་མ་པདྨ་སྲོག་ཆགས་སྦུན་པ་མི་གཙང་ས་འབྲས་གོས་ཧྲུལ་དང་།།
སྡུག་བསྔལ་འབར་བས་མངོན་པར་གདུངས་པའི་བུད་མེད་ས་ཡི་ཁམས་དང་མཚུངས།། ཞེས་པད་མ་དང་།
སྲོག་ཆགས་དང་། སྦུན་པ་དང་། མི་གཙང་བ་དང་། ས་དང་། འབྲས་བུ་དང་། གོས་ཧྲུལ་དང་།
སྡུག་བསྔལ་འབར་བས་མངོན་པར་གདུངས་པའི་བུད་མེད་དང་།
སའི་ཁམས་དང་མཚུངས་པར་ཤེས་པར་བྱའོ་ཞེས་དཔེ་གང་དང་མཚུངས་པར་བསྟན་པའོ།།
ཡང་དེ་ནས་དོན་གང་དང་མཚུངས་ཤེ་ན།
སངས་རྒྱས་སྦྲང་རྩི་སྙིང་པོ་གསེར་དང་གཏེར་དང་ནྱ་གྲོ་རིན་ཆེན་སྐུ།།
གླིང་བདག་མཆོག་དང་རིན་ཆེན་གཟུགས་དང་དྲི་མེད་ཁམས་མཆོག་མཚུངས་པ་ཉིད།། ཅེས་གསུངས་ཏེ།
སངས་རྒྱས་ཀྱི་སྐུ་དང་། སྦྲང་རྩི་དང་། སྙིང་བོ་དང་། གསེར་དང་། གཏེར་དང་ནྱ་གྲོ་དང་།
རིན་ཆེན་སྐུ་དང་། གླིང་བདག་མཆོག་དང་།
རིན་ཆེན་གཟུགས་དང་མཚུངས་པར་ཤེས་པར་བྱའོ་ཞེས་པའོ།།
སྤྱིར་འདིའི་སྐོར་ལ་བཤད་བྱ་ཧ་ཅང་མང་ཞིང་གལ་ཡང་ཤིན་ཏུ་ཆེ་སྟེ། བྱེ་མདོ་གཉིས་དང་ལུང་གི་རྗེས་འབྲངས་ཀྱི་སེམས་ཙམ་པ་རྣམས་མཐར་ཐུག་ཐེག་པ་གསུམ་དུ་གྲུབ་པར་འདོད་པ་ཡང་མཐར་གཏུགས་ན་རིགས་འཇོག་ཚུལ་ལ་ཐུག་ཡོད་དེ། དེ་དག་གིས་རིགས་བདེན་གྲུབ་ཏུ་འདོད་པའི་རྒྱུ་མཚན་གྱིས་ཡིན་པའི་ཕྱིར། དབུ་མ་བ་དང་རིགས་པའི་རྗེས་འབྲངས་ཀྱི་སེམས་ཙམ་པ་རྣམས་ཀྱིས་མཐར་ཐུག་ཐེག་པ་གཅིག་ཏུ་གྲུབ་པར་བཞེད་པ་ཡང་རིགས་འཇོག་ཚུལ་ལ་རག་ལས་ཏེ། རིགས་པའི་རྗེས་འབྲངས་ཀྱི་སེམས་ཙམ་པ་རྣམས་ནི་དྲི་མ་གློ་བུར་བ་དག་རང་གི་རྒྱུ་ཡོད་པས་ན་རྟག་པ་མ་ཡིན་པའི་ཕྱིར་དང་། རྒྱུའི་གཉེན་པོ་གོམས་པས་ཟད་པར་འགྱུར་བའི་ཕྱིར་དང་། རྒྱུའི་རང་བཞིན་ཤེས་པ་ཡོད་པའི་ཕྱིར་དང་།
དེ་ཡོད་པས་དེའི་གཉེན་པོ་ཤེས་པ་ཡང་ཡོད་པར་གྲུབ་པའི་ཕྱིར་སོགས་རྣམ་འགྲེལ་ལས་གསུངས་པའི་རིགས་པའི་སྒོ་ནས་མཐར་ཐུག་ཐེག་པ་གཅིག་ཏུ་གྲུབ་པ་དང་། དབུ་མ་བས་སེམས་བདེན་སྟོང་དུ་བཞེད་པ་ལ་ཐུག་པའི་ཕྱིར།
ད་ནི་སླར་ཡང་དཀྱུས་ལ་འཇུག་པར་བྱ་སྟེ།
དེ་ནས་ཝུ་ཏི་སྲིད་ལོ་དགུ་བ་ (武德九年) སྟེ། སྤྱི་ལོ་༦༢༦ལོར། རྒྱ་གར་གྱི་བཙུན་པ་འོད་ཟེར་ཡེ་ཤེས་ (天竺僧波颇) ཟེར་བ་ཞིག་ཐང་གི་རྒྱལ་ས་ཁྲང་ཨན་དུ་ཕེབས་པ་དང་སྟབས་ལེགས་ཏེ་འཕྲད། བགྲོ་གླེང་མཛད་པས་རྒྱ་གར་ན་པཎྚི་ཏ་མང་བོའི་བསྟི་གནས་ངོ་མཚར་བ་དཔལ་ན་ལེནྡྲ་ཟེར་བ་ཞིག་ཡོད་པ་དང་།
དེར་མ་ཟད་ད་ལྟ་དེ་ན་ཆོས་ཀྱི་དོན་ལ་ཤིན་ཏུ་མཁས་པའི་པཎྚི་ཏ་ཡ་མཚན་པ་དགུང་ལོ་ཧ་ཅང་བགྲེས་པ་མཚན་ལ་དུལ་བ་བཟང་བོ་ (戒贤) ཟེར་བ་ཞིག་ཡོད་ཚུལ་དང་།
དེས་ད་ལྟའང་ས་སྡེ་སོགས་ཐེག་པ་ཆེན་པོའི་གཞུང་ཁྱད་པར་དུ་འཕགས་པ་མང་བོ་སྐལ་ལྡན་གྱི་སློབ་མ་མང་བོ་ལ་འཆད་ཀྱིན་ཡོད་ཚུལ་སོགས་ཀྱི་གཏམ་མང་དུ་གསུངས་པ་ཐོས་པས། སློབ་དཔོན་རྨད་བྱུང་གཟི་བརྗིད་ཐུགས་ཤིན་ཏུ་དགྱེས་ཤིང་།
ཇི་ལྟར་མུན་པ་སྟུག་པོའི་ཁྲོད་ན་གར་འགྲོ་བརྟོལ་མེད་དུ་གྱུར་བའི་འགྲོན་པོ་ཞིག་འགྲོ་ལམ་གསལ་བར་བྱེད་པའི་འོད་སྣང་དང་འཕྲད་པ་བཞིན་གྱུར་བ་མ་ཟད།
ཅིས་ཀྱང་དམ་པ་ཆོས་ཀྱི་འབྱུང་ཁུངས་རྒྱ་གར་འཕགས་པའི་ཡུལ་དུ་སོང་ནས་བརྩད་གཅད་པར་བྱའོ་སྙམ་པའི་ཐུགས་འདུན་བཟློག་ཏུ་མེད་པ་ཞིག་ཐུགས་ལ་འཁྲུངས་སུ་བཅུག་གོ།
དེ་ཚེ་ཙི་ནའི་ནོར་འཛིན་ཁྱོན། །
མཛེས་བྱེད་མཁས་པ་ཕལ་ཆེར་ལ། །
ཆོས་ཀྱི་ཟབ་དོན་འདི་འདྲ་ཞིག །
མ་དྲིས་སྙམ་པ་མེད་པར་མཛད། །
རྣམ་གྲོལ་སྒྲུབ་བྱེད་ཐབས་ཀྱི་མཆོག །
བསྒྱུར་ཟིན་བཀའ་དང་བསྟན་བཅོས་ལས། །
འདི་དང་འདི་འདྲ་མ་གཟིགས་པར། །
ལུས་པའང་ཕལ་ཆེར་མེད་སྙམ་མཛད། །
འོན་ཀྱང་ཐུབ་པའི་དགོངས་དོན་དངོས། །
ཇི་ཙམ་བཙལ་བ་དེ་ཙམ་དུ། །
ཕྱི་ཕྱིར་ཐེ་ཚོམ་དྲ་བ་ཡིས། །
དེ་ཡི་ཡིད་ནི་ཀུན་ཏུ་གདུངས། །
དེ་ཚེ་འཕགས་ཡུལ་མཁས་པ་ཞིག །
ཐང་གི་རྒྱལ་སར་ཕེབས་པ་དང་། །
མཇལ་ཞིང་བགྲོ་གླེང་མཛད་པ་ལས། །
ན་ལེནྡྲ་ཡི་སྙན་པ་ཐོས། །
ཇི་ལྟར་མུན་པ་སྟུག་པོའི་ཁྲོད། །
ལམ་སྟོར་བརྟོལ་མེད་འགྲོན་པོ་ཞིག །
སྣང་བ་དང་བཅས་ལམ་གྱི་སྣེ། །
མཐོང་བ་ཇི་བཞིན་དགའ་བ་རྒྱས། །
ཞེས་ཀྱང་ཐོལ་བྱུང་དུ་སྨྲས་སོ།།
ཐུའུ་བཀྭན་གྲུབ་མཐའ་སོགས་བོད་ཡིག་རྣམས་སུ།
དགུང་ལོ་ཉེར་དགུའི་དུས་རྒྱ་གར་དུ་བགྲོད་པའི་ཐུགས་འདུན་གྱིས་ཕལ་སྐད་ལ་སྦྱངས་ནས་རྒྱལ་པོ་ལ་ཐབས་མཁས་ཀྱིས་ཞུས་པས་ལམ་ཡིག་གནང་ཞེས་གསུངས་ཀྱང་།
རྒྱའི་ཡིག་ཆ་མང་བོ་ལ་བལྟས་ན་ལམ་ཡིག་མ་གནང་བར་གསལ་ཏེ།
ཁོང་རྒྱ་གར་དུ་ཕེབས་རྒྱུའི་ཐུགས་ཐག་བཅད་པ་ནས་བཟུང་ཡར་གོང་མའི་སྲིད་གཞུང་ལ་འགྲོ་ཆོག་པའི་ཆོག་མཆན་དང་ལམ་ཡིག་གནང་རྒྱུའི་རེ་བ་ཞུས་ཤིང་།
ཞུ་ཡིག་གི་ནང་དུ།
ཅིས་ཀྱང་འགྲོ་དགོས་པའི་རྒྱུ་མཚན་དང་བཅས་པ་གསལ་བར་བཀོད་ནས་ཡུན་རིང་བསྒུགས་ཀྱང་ཆོག་མཆན་དང་ལམ་ཡིག་མ་ཐོབ། དེའི་རྒྱུ་མཚན་ཡང་སྐབས་དེར་ཐང་རྒྱལ་རབས་བཙུགས་ནས་མང་བོ་མ་འགོར་བས་ད་དུང་རྒྱལ་སྲིད་དེ་ཙམ་བརྟན་པོར་སོང་མེད་པ་དང་།
མཐའ་མཚམས་དེ་ལས་ཀྱང་མི་བརྟན་པས་འབངས་རྣམས་གང་བསམ་གང་འདོད་བཞིན་འགྲོ་འོང་བྱེད་མི་ཆོག་པའི་བཀའ་རྒྱ་བསྒྲགས་ཡོད། དེའི་ཕྱིར་སློབ་དཔོན་རྨད་བྱུང་གཟི་བརྗིད་དམ་ཐང་སན་བླ་མ་ནུབ་བསྐྱོད་ཀྱི་བར་ཆད་མང་བོ་ལས་ཆེས་ཐོག་མའི་བར་ཆད་ཀྱི་གཙོ་བོ་ནི་རྒྱལ་གཞུང་གི་བཀག་རྒྱའི་བར་ཆད་འདི་ཉིད་དུ་གྱུར། འོན་ཀྱང་འགལ་རྐྱེན་དེ་ཙམ་གྱིས་ཁོང་རྒྱ་གར་ལ་ཕེབས་འདོད་ཀྱི་ཐུགས་འདུན་འགོག་མ་ནུས་པས་ཇི་ལྟར་ཕེབས་པའི་གོ་སྐབས་བཙལ་ཞོར་དུ་ལེགས་སྦྱར་གྱི་སྐད་ལ་སྦྱང་བཞིན་བཞུགས།
སྐབས་དེར་གོང་མའི་སྲིད་གཞུང་གི་ཆོག་མཆན་དང་ལམ་ཡིག་མེད་པར་རང་འདོད་ཀྱིས་མཐའ་མཚམས་བརྒལ་ནས་གཞན་དུ་སོང་ན་ཆད་པ་ཧ་ཅང་ལྕི་ཞིང་ཉེན་ཁ་ཤིན་ཏུ་ཆེའོ།།
དེ་ཡང་ཀྲིན་བཀྭན་ཁྲི་ལོ་གསུམ་པ་ (贞观三年) སྟེ། སྤྱི་ལོ་༦༢༩ལོར།
ཐང་གི་རྒྱལ་ས་ཁྲང་ཨན་ལ་ཐན་མུག་ཆེན་པོ་ཞིག་བྱུང་བས་སྲིད་གཞུང་གིས་འབངས་མི་རྣམས་གཞན་དུ་ཟས་གོས་སོགས་འཚོལ་དུ་འགྲོ་ཆོག་པའི་བཀའ་བསྒྲགས།
གོ་སྐབས་འཚོལ་བཞིན་བཞུགས་ཡོད་པའི་སློབ་དཔོན་འདི་ཉིད་ཀྱང་གསང་སྟབས་ཀྱིས་འབངས་མི་ཟས་གོས་འཚོལ་མཁན་དག་གི་གྲས་སུ་ཞུགས་ཏེ་ཕེབས། ལོ་དེར་སློབ་དཔོན་འདི་ཉིད་དགུང་ལོ་ཉེར་བདུན་ཡིན་ལ།
ཉེར་དགུ་ཡིན་པར་བཤད་པའང་ཡོད་མོད།
དེ་ནི་ལོ་འཁོར་མོ་དང་ལོ་ངོ་བརྩིས་མ་བརྩིས་ལ་ཐུག་པས་འགལ་བ་ཆེར་མེད་དོ།།
དེ་ཡང་བོད་ཀྱི་ཡི་གེ་གསར་བཟོ་མཛད་པ་བོ་འཇམ་དབྱངས་རྣམ་སྤྲུལ་སློབ་དཔོན་ཐོན་མི་མཆོག་སྤྱི་ལོ་༦༣༣ལོར་རྒྱ་གར་དུ་ཕེབས་པར་བཤད་པ་ལྟར་ན་སློབ་དཔོན་འདི་ཚང་ལོ་བཞི་ལས་སྔ་བར་སྣང་ངོ་།།
དེ་ལྟར་ཐང་སན་བླ་མ་ཁོང་རྒྱ་ཡུལ་གྱི་བསྟན་པ་དང་འགྲོ་བའི་ཆེད་དུ་དཀའ་བ་དང་འཇིགས་པ་ཇི་འདྲ་དང་འཕྲད་རྒྱུ་ཡིན་པར་གཏན་་མི་ཤེས་ཤིང་ཆ་མེད་རྒྱུས་མེད་ཀྱི་ལམ་འཕྲང་ཆེས་ཤིན་ཏུ་རིང་མོ་ཞིག་ལ་བསྐྱོད་པའི་གོམ་པའི་ཐོག་མ་སྤོས་སོ།།
དེས་ན་ལོ་རྒྱུས་ལ་དངོས་སུ་བྱུང་བའི་ཐང་སན་བླ་མ་ནི་བརྩམས་སྒྲུང་དུ་མཐོང་བའི་བློ་སྤོབས་ཆུང་བ་དེ་ལྟ་བུ་ཞིག་གཏན་མ་ཡིན་པར་བློ་གྲོས་དང་སྤོབས་པ་གང་གིས་ཆ་ནས་བཤད་ཀྱང་འགྲན་ཟླ་མེད་པ་ཞིག་གོ།
སྨྲས་པ།
ཇི་ལྟར་རང་ཅག་ཕལ་བའི་ཕལ་བ་རྣམས། །
དུག་གསུམ་དུག་གིས་ཤེས་རྒྱུད་བཅིངས་པ་བཞིན། །
བསམ་བཞིན་བྱོན་པའི་བློ་ཆེན་དེ་དག་ཀྱང་། །
ཐུགས་རྗེ་ཆེན་པོས་ཐུགས་རྒྱུད་དམ་པོར་བསྡམས། །
གཞན་དོན་རྒྱ་ཆེན་མཐོང་ན་རང་སྲོག་ཀྱང་། །
རྩྭ་ལྟར་འདོར་ལ་འཇིགས་པ་མི་མངའ་བས། །
རྒྱལ་སྲས་དཔའ་བོ་འདི་ཡང་རྒྱ་ཡི་ཆེད། །
ཤུལ་རིང་ལམ་ལ་ཐེ་ཚོམ་མེད་པར་ཞུགས། །
དེ་ནི་གོང་མའི་བཀའ་ལ་རྒོལ་བ་མིན། །
བསྟན་འགྲོའི་ཕན་བདེ་འདོར་ཐབས་མེད་རྟགས་ཡིན། །
རྙེད་དཀའ་དལ་འབྱོར་གཅེས་སྦྲས་མེད་པའང་མིན། །
དེ་ཉིད་སྙིང་བོའི་སྙིང་བོར་ཕུལ་བ་ཡིན། །
རྒྱུ་མཚན་ལྟར་སྣང་དུ་མས་དོན་ཆེན་ལས། །
བཤོལ་ཐབས་འཚོལ་ལ་ཐ་མལ་རྣམས་ནི་མཁས། །
ཅི་ལ་ཐུག་ཀྱང་བསྟན་འགྲོའི་དོན་ཆེན་ལས། །
མི་བཤོལ་འཇུག་ལ་དམ་པ་དེ་དག་གོམས། །
ཞེས་པའང་བར་སྐབས་ཀྱི་ཚིགས་སུ་བཅད་པའོ།།
--- མུ་འགོད། ---
རྩོམ་ཡིག་མཁོ་སྤྲོད་པ། བྱམས་པ་དོན་གྲུབ།
|