སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོའི་འབེལ་གཏམ་ཁག་བདུན་པ།
ནད་ཡམས་བཞིན་དུ་འཛེམ་དགོས་ས།
འཇམ་མགོན་ས་པཎ་ཆེན་པོས། དྲང་བོ་མི་སྨྲ་འཛུམ་གྱིས་བསུ། །སྨྲ་ན་ངག་འཇམ་ཕིགས་པར་སྨྲ། །རྟག་ཏུ་གཞན་གྱི་ཉམས་དྲོས་ལེན། །དེ་དག་སྐྱེས་བུ་གཡོ་ཅན་ཡིན། །ཞེས་གསུངས་པ་ལྟར། དུས་ཀྱི་ཡང་མཐར་སླེབས་པའི་བར་སྐབས་འདིར། སྐྱེ་བོ་ཁ་ཅིག་གིས་རང་བཞིན་དྲང་བོ་བྱེད་པ་དང་སྐད་ཆ་བདེན་པར་སྨྲ་བ། བྱ་བ་ཕྱི་གསལ་ནང་གསལ་གྱིས་སྒྲུབ་པ་སོགས་ནི་རྗེས་ལུས་དང་གླེན་ལས་ཤིག་ཏུ་བསམ་སྟེ། བསམ་པ་རང་གཅེས་འཛིན་གྱིས་ཀུན་ནས་བསླངས་ཏེ་མཚན་སྙན་དང་དབང་ཐོབ། འབྱོར་ཕྱུག་སོགས་ཀྱི་ཆེད་དུ་བརྩོན་ཡང་། ངས་མིའི་རིགས་ཀྱི་ཁེ་དབང་དང་བདེ་སྐྱིད། མི་རིགས་ཤིག་གི་ཡར་རྒྱས་དང་དབུ་འཕང་ལ་དམིགས་ནས་རང་སྲོག་དང་རང་གི་བདེ་སྐྱིད་ལ་ཡང་ཅི་མི་སྙམ་པར་དཀའ་ཁག་ཡོད་ཚད་གདོང་གིས་བསུ་བཞིན་ཡོད་སྐད་ཀྱིས་དྲང་བོར་མི་སྨྲ་བ་དང་། དགའ་ཞིང་དུང་ལ་བརྩེ་ཞིང་བྱམས་པའི་ཟོལ་གྱིས་ཞལ་རས་འཛུམ་དཀར་གྱི་ལེར་གྲོགས་མཛའ་བཤེས་སོགས་ཀྱི་བསམ་སྤྱོད་ངན་པར་སྒྱུར་ཞིང་རང་ལ་གོ་སྐབས་བཟང་བོ་འཚོལ་བ། དུས་རྒྱུན་རླབས་ཆེན་གྱི་སྐྱེས་བུ་དམ་པ་ཞིག་གམ། ཚད་མཐོ་བའི་རིག་གནས་ཤིག ཡང་ན་སྐྱེ་བོ་དུང་ཕྱུར་མང་བོས་དད་མོས་བྱེད་པའི་ཆོས་ལུགས་དང་དེའི་སྲོལ་བཏོད་པ། དེ་རྒྱུན་འཛིན་བྱེད་པའི་བསམ་བློ་བ་དང་ཡོན་ཏན་པ་སོགས་ལ་ཚད་ལས་བརྒལ་བའི་དམའ་འབེབ་བྱེད་པ། ནག་ཐིག་འདེབས་པ། མངོན་སུམ་ལ་བསྙོན་འདིང་བ་སོགས་ཀྱང་མིའི་རིགས་སམ་ཡུལ་ལུང་ཞིག་གི་ཆེད་དུ་ཡིན་ཚུལ། ང་གཅིག་བུ་རིགས་སད་དེ་ཁོ་ར་ཁོར་ཡུག་དག་ལ་དྲན་སྐུལ་བྱེད་བཞིན་ཡོད་སྐད ། རང་ཉིད་བློས་གཏོང་གི་སྙིང་སྟོབས་དང་མཁྲེགས་འཛིན་བྲག་རི་གཏོར་བའི་བསམ་བློ་གསར་བའི་འགད་རྫད་རྩ་ཆེན་ཞིག་ངས་རྙེད་ཡོད་ཚུལ་ཤུགས་ཀྱིས་བསྒྲགས་ཏེ། དྭངས་གཙང་སླད་མེད་ཀྱི་སེམས་པ་གང་མར་ཁྱུར་མིད་དུ་གཏང་དང་གཏོང་བཞིན་ཡོད། དེས་ན་སྐྱེ་བོ་གཡོ་ཅན་དག་ལ་ནད་ཡམས་བཞིན་འཛེམ་ཞིང་གདོན་བཞིན་དུ་བལྟ་བར་བྱའོ། །
༢༠༢༢༢-༦-༡
སྐྱེ་བོ་ཕལ་བར་བསྟོད་པ་ཐལ་ཆེ་མི་ཉན།
ཇི་སྐད་དུ། ཕན་བཏགས་ལན་དུ་གནོད་པ་བསྐྱེལ། །བྱས་པ་ཆུད་ཟོས་དམན་ལ་སྡང་། །རང་བཞིན་ངན་པ་ཕག་ལྟ་བུ། །དེ་དག་སྐྱེས་བུ་ངན་པ་ཡིན། །ཞེས་གསུངས་པ་ལྟར། མི་ལ་ལས་གཞན་ཅུང་ཙམ་ཡར་རྒྱས་སུ་འགྲོ་བ་དང་མི་གྲལ་དུ་ཚུད་པ། འབད་བརྩོན་བྱེད་པ། སེམས་ཤུགས་མི་ཆག་པ། བདག་ཉིད་བརྙས་པའི་ལེ་ལོའི་དབང་དུ་མི་འགྲོ་བ་སོགས་ཀྱི་ཆེད་དུ། བསྟོད་བཀུར་དང་སྙན་པ་བརྗོད་པ། བྱ་དགའ་སྤྲོད་པ། གོ་ས་སྟེར་བ། གོ་སྐབས་བྱིན་པ་སོགས་བྱས་ན། སྐྱེ་བོ་དམན་པ་དང་ཐ་ཤལ་གྱི་རིགས་དག་གིས་རང་ཚོད་དང་རང་ཉམས་ལ་དཔོག་མི་ཤེས་པར་ངའོ་སྙམ་པའི་ང་རྒྱལ་བྱེད་པ། བསྟོད་པ་རྒྱུན་མ་བསྐྱངས་ན་མི་དགའ་བ། སྒྱིད་ལུག་པའི་རྒྱུ་རུ་འགྱུར་བ། དམན་ལ་སྡང་བ། གཞན་ལ་ངོམ་སོ་དང་མཐོང་ཆུང་བྱེད་པ། རང་ཉིད་ཀྱི་མདུན་ནས་ཁྲིད་ཅིང་གཞུག་ནས་སྐྱོར་མཁན་དག་ལ་དྲིན་ལན་ལོག་འཇལ་བྱེད་པ་སོགས་མཇུག་འབྲས་ངན་པའང་འབྱུང་སྲིད་དེ། འཇིག་རྟེན་གྱི་གཏམ་དཔེར། ངན་པ་མཐོ་སར་བཞག་ན་འཕོངས་རྡེབ་ཀྱི་རྒྱུན་མི་ཆད ། ཅེས་དང་། གཙོ་བོ་བྱས་ནས་ཡར་ལ་བཞག་ན། ངན་མཚང་བསྟན་ནས་མར་ལ་མཆོང་མཁན་མང་། ཟེར་བ་ལྟར་རོ། །
དེ་བས། བསྟོད་པའི་ཡུལ་དང་བསྟོད་པའི་དུས། བསྟོད་པའི་ཐབས་དང་བསྟོད་པའི་དགོས་པ་འགྲུབ་མིན་སོགས་ལ་བརྟག་དཔྱད་ཞིབ་མོ་བྱེད་རྒྱུ་གལ་ཆེའོ། །འདི་ལས་འཕྲོས་ཏེ་བསྟོད་རྩོམ་རྐྱང་རྐྱང་བྲིས་ན་ལེགས་མིན་དང་དགག་རྩོམ་མམ་སྨད་རྩོམ་རྐྱང་རྐྱང་འབྲི་བ་རྩོམ་རིག་གི་སྒྱུ་རྩལ་ཡིན་མིན་སོགས་བརྗོད་རྒྱུ་མང་མོད། རེ་ཞིག་ཆོག་ཤེས་པར་བྱས་སོ། །
༢༠༢༢༢-༦-༢
ཕྲག་དོག་གི་ཚབ་ཆེན་རང་བཞིན།
ཕྲག་དོག་ནི་ཉེ་ཉོན་ཉི་ཤུའི་ནང་གསེས་ཤིག་སྟེ། ཞེ་སྡང་གི་ཆར་གཏོགས་གང་ཞིག རྙེད་བཀུར་ལ་ཆགས་ནས་གཞན་གྱི་ཕུན་ཚོགས་ལ་མི་བཟོད་པར་སེམས་ཁོང་ནས་འཁྲུགས་པའི་རབ་ཏུ་ཕྱེ་བའི་རིག་པའོ། །བྱེད་ལས་ནི། ཡིད་མི་བདེ་བ་འདྲེན་པའི་ལས་ཅན་ནོ། །སྒྲ་བཤད་ནི། སེམས་གུ་དོག་པས་ན་ཕྲག་དོག་ཅེས་བྱ་སྟེ། སེམས་ཀྱི་ཕྲག་གམ་གུ་དོག་པས་དེ་སྐད་ཅེས་བྱའོ། ། སྤྱོད་འཇུག་ལས། ཁྱོད་ནི་རང་གིས་སྡིག་བྱས་ལ། །མྱ་ངན་མེད་པར་མ་ཟད་ཀྱི། །བསོད་ནམས་བྱས་པ་གཞན་དག་དང་། །ལྷན་ཅིག་འགྲན་པར་བྱེད་འདོད་དམ། །ཞེས་གསུངས་པ་ལྟར། མི་མང་བོ་ཞིག་མྱ་ངན་དང་སྐྱོ་བ་སྐྱེ་དགོས་སའི་རང་གི་སྒོ་གསུམ་གྱི་བྱ་བ་མི་དགེ་བ་དག་ལ་ནོངས་འགྱོད་ཅི་ཡང་མེད་པར། རང་དང་ལས་རིགས་གཅིག་པ་སོགས་གཞན་དག་ལ། ཡོན་ཏན་ཆེན་པོ་འབྱོར་བ་དང་། མཚན་སྙན་རྒྱས་པ། གོ་ཐོབ་ལོན་པ། ཕྱུག་པོར་གྱུར་བ། འཁོར་སློབ་མང་བ། ཐ་ན་གཟུགས་མཛེས་པ་དང་སྐད་སྙན་པ། སྨྲ་ལྕེ་མྱུར་བ། གཞན་གྱིས་བསྟོད་བཀུར་ཐོབ་པ་སོགས་ཀྱི་ཚེ་སེམས་ཁོང་ནས་འཁྲུགས་ཤིང་མི་བཟོད་པར། དེ་དག་ལ་ངན་དམོད་དང་ཟུར་ཟ་བྱེད་པ། དེའི་ཕུན་ཚོགས་རྒུད་པའི་ལས་ལ་བརྩོན་པ། གཞི་མེད་ཀྱི་སྒྲོ་འདོགས་དང་སྐུར་འདེབས་བྱེད་པ། ལྷག་པར་དུ་དེང་སྐབས་ཚན་རིག་ལག་རྩལ་ཅུང་ཙམ་མཐོ་རུ་ཕྱིན་ཡོད་པས། གཞན་གྱི་སྐད་ཆ་བཅད་གཏུབ་བྱས་ཏེ་བསམ་བཞིན་ནོར་འཁྲུལ་དང་ཚིག་སྐྱོན་ཡོད་པར་བྱེད་པ། བརྙན་དང་པར། སྐད་སྒྲ་ཚང་མ་རྫུན་བཟོ་བྱས་ཏེ་ཕ་རོལ་བོ་ནག་པོ་ནག་རྐྱང་ཞིག་ཏུ་བཟོ་བ་སོགས་ཀྱིས་མི་ཁོམ་ཞིང་མི་སྐྱིད་པར་འདུར་རྒྱུགས་བྱེད་དོ། །
འདི་ནི་འཇམ་མགོན་ས་པཎ་ཆེན་པོས། གལ་ཏེ་གཞན་དག་ཕུན་ཚོགས་པས། །བདག་གི་ཡིད་ལ་མི་བཟོད་ན། །དེ་ཡིས་རང་འབྱོར་འཇོམས་པའི་ཕྱིར། །རང་ལ་ཕྲག་དོག་བྱེད་པར་ཟད། །ཅེས་གསུངས་པ་ལ་ྟལྟར། ཕར་བལྟས་ཚོད་དུ། སྤྱི་ཚོགས་སྟེང་དུ་དམིགས་ཡུལ་དེར་སྣང་བརྙན་ངན་པ་བཟོ་བ། ཉམས་སྨད་པ། མི་གྲལ་དུ་འགྲོ་ཐབས་མེད་པར་བྱས་པ་སོགས་སུ་སྣང་ཡང་། དོན་གྱིས་རང་ཉིད་ཀྱི་དགེ་རྩ་རང་གིས་འཇོམས་པ། རང་ཉིད་ཀྱི་མི་གཞི་ལྷང་ལ་ཕུད་པ། རང་གི་ཚེ་འདི་ཕྱིའི་འདུན་མ་གཏན་བརླགས་བྱས་པ་ལས་མ་འདས་པས། སེམས་རྒྱ་དང་ཕྲག་ཞེང་ཅུང་ཆེ་རུ་བཏང་སྟེ། གཞན་གྱི་ཕུན་ཚོགས་ལ་རྗེས་སུ་ཡི་རང་བྱེད་ཐུབ་ན་རབ་རེད། གལ་ཏེ་རྗེས་སུ་ཡི་རང་དང་དགའ་བ་བསྒོམ་མ་ཐུབ་ནའང་། འགལ་རྐྱེན་མི་བཟོ་བ་དང་བསྙོན་འདིང་བ་མ་བྱས་ནའང་ལེགས་སོ་འབུལ་བའི་གནས་ཡིན་ཏེ། ངོས་ཟིན་དང་བསྒྱུར་བཅོས་འདིས་རང་གཞན་གཉིས་ཀར་བག་ཕེབས་དང་སོས་དལ། བདེ་སྐྱིད་དང་དགའ་སྤྲོའི་འཚོ་བ་ཞིག་བསྐྱལ་འོང་ངེས་པའི་ཕྱིར་རོ། །
༢༠༢༢-༦-༤
| 
青公网安备 63262102000011号