སྟག་མཆོང་སར་ཝ་མཆོང་ན་ཉེན་ཆེ།

   མཁས་བླུན་དང་མཐོ་དམན་དྲག་ཞན་གྱི་སྐྱེ་བོ་སུ་ཡིན་ཡང་བསམ་བཞིན་ལོག་ལམ་ལ་དངོས་སུ་ཞུགས་ན་ནི་སྡུག་བསྔལ་དང་འགྱོད་པ་སྐྱེ་བའི་རྒྱུ་ལས་མ་འདས་ཤིང་ཐམས་ཅད་ཁྲེལ་བའི་གནས་ཡིན་པ་བཤད་མ་དགོས་མོད། ཇི་སྐད་དུ།  དེས་ན་ལས་ཀྱིས་མནར་བ་ན།  །མཁས་པ་བླུན་པོའི་ནང་དུ་འཁྱམས། །ཞེས་དང་། ལས་ཀྱི་ཤུགས་ཀྱིས་འཁྲིད་པ་ན། །བློ་ཆེན་ལོག་པའི་ལམ་དུ་འགྲོ། །ཞེས་གསུངས་པ་ལྟར།   ལས་འབྲས་ཀྱི་རང་བཞིན་མཐིལ་ཕྱིན་པ་ཤེས་ན་ཡང་ལས་དབང་བཙན་པོས་དབང་མེད་དུ་མི་དགེ་བར་འཇུག་དགོས་པའི་སྐབས་དང་། གློ་བུར་དུ་གྲོགས་ངན་པའི་རྐྱེན་གྱིས་ཤེས་མེད་ཚོར་མེད་ངང་ལོག་ལམ་དུ་ཞུགས་པའང་ཡོད་པས། དེ་འདྲའི་རིགས་ལ་ཆེས་ཆེར་མི་དམོད་པར་ཕན་གྲོགས་ཅི་ནུས་ཀྱིས་ལེགས་ལམ་དུ་འགོད་པར་བརྩོན་དགོས་པ་ཉིད་དོ།   །

      ཁྱད་པར་དུ་སྤྱོད་འཇུག་ལས།  གཙོ་ཆེར་གཞན་གྱི་དོན་བསམ་མོ། །ཞེས་གསུངས་པ་ལྟར །  མཁས་པ་དང་སྐྱེས་ཆེན་དམ་པ་ཕལ་མོ་ཆེས་བསྟན་པ་རྒྱས་ཤིང་འགྲོ་བ་བདེ་བ་དང་།  སྤྱི་ཕན་གྱི་བྱ་བཞག་རླབས་ཆེན་འགྲུབ་པ།   གནས་སྐབས་གནོད་ཀྱང་ཕུགས་སུ་ཕན་པ།   གཞན་གྱིས་ལས་འབྲས་བསླུ་མེད་ཡིན་ཚུལ་ལ་ངེས་པ་རྙེད་པ།   ཚེ་སྲོག་སྐྱོབ་པ།   རྒྱལ་ཁབ་དང་མི་རིགས་ཡར་རྒྱས་ལ་ཕན་བསྐྱེད་ཡོད་པ་སོགས་ཀྱི་ཆེད་དུ།   རང་ཉིད་བསམ་བཞིན་ལོག་པའི་ལམ་དུ་འགྲོ་བ་དང་ལོག་ལྟའི་སྐད་ཆ་བཤད་པ།   ལས་འབྲས་ལ་སྐུར་བ་འདེབས་པ།   དཀོན་མཆོག་གསུམ་ལ་མ་གུས་པའི་ཚིག་སྨྲ་བ།  མ་རུང་བའི་སྐྱེ་བོ་དག་དང་གྲོགས་བསྒྲིགས་ནས་དེ་དག་གི་ཁྲོད་དུ་གནས་པ།   སྙིང་རྗེ་མེད་པ།  བྱམས་བརྩེ་དང་བྲལ་བ།  ཁྲོ་ཞིང་གཏུམ་པ།   གདུག་རྩུབ་ཆེ་བ།  ངོ་ཚ་མེད་ཅིང་ཁྲེལ་གཞུང་མི་བརྩི་བ་སོགས་བྱེད་པའི་དུས་དང་སྐབས་ཀྱང་ཡོད་དེ།  དཔེར་ན། སྔོན་བདག་ཅག་གི་སྟོན་པ་ཞལ་བཞུགས་པའི་སྐབས། ལྷས་བྱིན་གྱིས་དགེ་འདུན་པ་ཕན་ཚུན་གྱི་བར་དུ་དབྱེན་དཀྲུག་རྒྱ་ཆེར་བྱས་ཏེ་གསར་ཞུགས་ཀྱི་རབ་ཏུ་བྱུང་བ་རྣམས་ལོག་པའི་ལམ་དུ་ཁྲིད་ནས་དགེ་འདུན་པའི་སྡེ་ཕྱོགས་གཉིས་སུ་གྱེས་པའི་སྐབས། ཉན་ཐོས་ཆེན་པོ་ཤཱ་རིའི་བུ་དང་མོའུ་འགལ་གྱི་བུ་སྟེ་མཆོག་ཟུང་གཉིས་ཀྱིས་ཀྱང་སྟོན་པ་ཐུགས་རྗེ་ཅན་བོར་ཏེ་ལྷས་བྱིན་གྱི་རྗེས་སུ་སོང་། གཞན་གྱི་སྣང་ཚུལ་ལ་མཆོག་ཟུང་གཉིས་ཀྱིས་སྟོན་པ་བོར་ཏེ་ལོག་པའི་ལམ་དུ་ཞུགས་པ་ལྟར་གྱུར་ཀྱང་། དོན་ལ་ཁོང་རྣམ་གཉིས་ཀྱིས་ལོག་པའི་ལམ་དུ་ཞུགས་པའི་དགེ་འདུན་པ་རྣམས་དང་ལྷན་ཅིག་ཏུ་གནས་ཤིང་འགྲོགས་པའི་གོ་སྐབས་བཙལ་ཏེ། རིམ་གྱིས་དེ་དག་ལ་བདེན་པའི་ཆོས་ཀྱི་གནས་ལུགས་དང་སྟོན་པའི་ཡོན་ཏན་བརྗོད་པ་སོགས་ཀྱིས་དེ་ཀུན་ཡང་དག་པའི་ལམ་དུ་སླར་ཡང་བཀྲི་བར་མཛད་པ་ལྟར་ཡིན་ལ། རིག་གནས་གསར་རྗེ་སོགས་ཀྱི་སྐབས་སུ་དགོན་པ་དང་བླ་མ།  སྐུ་གསུང་ཐུགས་རྟེན་སྲུང་སྐྱོབ་ཀྱི་ཆེད་དུ།  རང་ཉིད་སྔོན་ཐོན་པ་དང་ཆོས་དད་མེད་མཁན་དུ་བརྫུས་ཏེ་སྐད་ཆ་ལོག་བཤད་དང་སྤྱོད་པ་རྩུབ་མོ་སྟོན་མཁན་ཡང་མང་བོ་ཞིག་བྱུང་མྱོང་བ་ལྟ་བུའོ།  །

  དེ་ལྟར་སྤྱི་དོན་དང་གཞན་ཕན་ལ་དམིགས་པའི་བསམ་བློ་དང་འཆར་གཞི་ཅི་ཡང་མེད་པར།  ངས་ཀྱང་ཁོར་ཚོ་ལྟར་བྱེད་རྒྱུ་ཟེར་ན། འཇིག་རྟེན་ཁ་དཔེར། སྟག་མཆོང་སར་ཝ་མཆོང་ན་སྐེད་པ་འཆག་པར་འགྱུར་ཟེར་བ་ལྟར་ལས་མ་འདས་པར་འགྱུར་རོ།   །

༢༠༢༢-༥-༢

 གཞུང་ཚིག་བློར་འཛིན་གྱི་དགེ་མཚན།

      འཇམ་དབྱངས་བླ་མ་གུང་ཐང་བསྟན་པའི་སྒྲོན་མེའི་ཞལ་ནས། དོན་གྱི་རྒན་པོ་ཚིག་གི་འཁར་བ་ལ། །བརྟེན་ཕྱིར་གཞུང་ཚིག་བློ་འཛིན་མི་བྱེད་པར། །དཔེ་ཀློག་ཙམ་དང་ངག་སྒྲོས་ཐན་ཐུན་གྱིས། ། ཉིན་རེ་འགྲོ་ཐབས་དེས་ཀྱང་མི་ཕན་པས། ། དཔེ་འཛིན་སྐྱོར་སྦྱངས་ཡུན་དུ་གྱིས་ཤིག་ཨང་། ། ཞེས་བརྗོད་བྱ་དོན་གྱི་རྒན་པོ་རྗོད་བྱེད་ཚིག་གི་འཁར་བ་ལ་བརྟེན་པའི་ཕྱིར་ཏེ་ཚིག་ལ་མ་བརྟེན་པར་དོན་རྟོགས་ཚུལ་མེད་པས། སློབ་གཉེར་བ་ལ་ལས་གཞུང་ཆེན་མོའི་ཚིག་བློ་འཛིན་མི་བྱེད་པར། དཔེ་ཆ་བམ་ཀློག་ཙམ་དང་གཞན་གྱི་ངག་སྒྲོས་ཐན་ཐུན་བསགས་ཏེ་ཉིན་རེའི་ཆོས་གྲྭའི་རྩོད་པ་སོགས་འགྲོ་ཐབས་འདུག་ཐབས་བྱས་ནས་སློབ་གཉེར་བའི་གཟུགས་བརྙན་ཙམ་བཟུང་བས་ཅི་ཡང་མི་ཕན་པ་སྟེ་ཕན་ཐོགས་ཡེ་ནས་མེད་པས། མདོ་སྔགས་ཀྱི་དཔེ་ཆ་མང་བོའི་རྩ་སྡོམ་སོགས་ཀྱི་ཚིག་བློ་ལ་འཛིན་ཕྱིར་ནང་སྔ་ལངས་དང་དགོང་འཕྱི་ཉལ་གྱིས་སྐྱོར་སྦྱོང་དང་གཤར་སྦྱང་ཡུན་ནས་ཡུན་དུ་བྱེད་དགོས་པར་གདམས་ཤིང་།

     བཙན་པོ་ཁྲི་ལྡེ་གཙུག་བརྟན་གྱིས་གངས་ཏི་སེ་ནས་སངས་རྒྱས་གསང་བ་དང་སངས་རྒྱས་ཞི་བ་གཉིས་གདན་དྲངས་ཀྱང་མ་འདོངས་པས། ཕོ་ཉས་ཐེག་པ་ཆེན་པོའི་མདོ་སྡེ་ལྔ་བློ་ལ་བཟུང་ནས་ཕེབས་པ་སོགས་གཞུང་ཆེན་བློ་འཛིན་གྱི་སྲོལ་རང་རེའི་བོད་འདིར་གནའ་སྔ་མོའི་དུས་ནས་ཡོད་ལ། ཁྱད་པར་དུ་གྲྭ་ས་སོགས་དགོན་སྡེ་ཆེ་གྲས་རྣམས་སུ་ཆུང་དུས་དགེ་རྒན་གྱི་མདུན་ནས་བློ་འཛིན་གཙོ་བོར་བྱེད་ཅིང་ལོ་ཉི་ཤུ་ཙམ་ནས་རང་ཉིད་ཀྱིས་དཔེ་གཟིགས་དང་བསམ་སྒོམ་བྱེད་པའི་སྲོལ་བཟང་བོ་ཞིག་ཡོད་པས། དགེ་བཤེས་སོགས་སློབ་གཉེར་བ་རྣམས་ལྟ་ཅི་གྲོང་ཆོག་པ་དགའ་རབ་ཅིག་གི་བློ་ལའང་ཤོག་བུ་སྟོང་ཕྲག་ལས་བརྒལ་བ་ཤར་ཤར་འདོན་རྒྱུ་ཡོད་ལ། དེ་ནི་བོད་ཀྱི་དགོན་སྡེའི་སློབ་གཉེར་བ་དག་གི་ཁྱད་ཆོས་ཤིག་ཡིན་ཞེས་བརྗོད་ཀྱང་ཐལ་མི་ཆེ་བ་ལྟ་བུར་གྱུར་ཡོད་པས། གནས་གང་དུ་དུས་ནམ་ཞིག་ལ་འཆད་རྩོད་རྩོམ་གསུམ་གྱི་ལས་གང་ལ་ཞུགས་ཀྱང་གཞུང་ཚིག་མང་བོ་བློ་ཐོག་ནས་ཤར་ཤར་འདྲེན་པ་ལ་དཀའ་ཁག་མེད་དོ། །

     འོན་ཀྱང་བོད་སྤྱི་ཚོགས་ཀྱི་ཁྲོད་དང་ཁྱད་པར་དུ་དེང་གི་སློབ་གྲྭ་ཆེ་འབྲིང་ཆུང་གསུམ་གྱི་དགེ་སློབ་ཕལ་མོ་ཆེར་དཔེ་ཆ་བློ་ལ་འཛིན་པའི་གོམས་གཤིས་ལེགས་པོ་དེ་ཆགས་མ་ཐུབ་པར། དགེ་རྒན་འཆད་ཁྲིད་ལ་ཕེབས་ན་དཔེ་ཆ་པོ་ཏི་ལྔ་དྲུག་ཙམ་དང་ཟིན་བྲིས་བམ་ཁ་མཐུག་པོ་རེ་ཁྱེར་ནས་འོང་སྟེ་ཡིག་ཁྲིད་རྐྱང་བ་བྱེད་ལ། སློབ་བུ་ཚོས་ཀྱང་རྩོམ་པ་བོའི་འཁྲུངས་འདས་ཀྱི་ལོ་ཚིགས་ཙམ་མམ་མཚན་དང་ས་གནས་སོགས་རེ་འགའ་ལ་ངེས་ཆ་ཞིག་གཏོང་ཁུལ་བྱེད་པ་ལས་གཞུང་ཆ་ཚང་དང་རྩ་སྡོམ་ཡོངས་རྫོགས་བློ་ལ་འཛིན་མཁན་ཤིན་ཏུ་ཉུང་།  དཔེ་ཆ་ལག་ཏུ་མེད་ན་འཆད་རྩོམ་རྩོད་གསུམ་གང་ལ་བསྐུལ་ཡང་ལྐུགས་པ་དང་ལག་རྡུམ་ཡིན་པས། ངེས་པར་དུ་དགོན་སྡེའི་སློབ་གཉེར་བའི་ལེགས་ཆ་འདི་ལེན་པར་རིགས་སོ་ཞེས་བོད་སྤྱི་ཚོགས་ཀྱི་ཤེས་ཡོན་པ་ཡོངས་ལ་ཞུ་བར་འདོད་དོ། །