ང་ཡི་ཉི་མ་ལྷ་ས།

  སེང་གེ་རྣམ་རྒྱལ། མཐར་ཕྱིན་གཉིས་པ།

སེར་ཀའི་མཐིལ་དུ་ལུས་པའི་ཉི་མ་ལྷ་ས། །
དུས་ཀྱི་རླུང་བུ་གཡུགས་པའི་ཡོ་འཁྱོམས་ཁྲོད་དུ། །
སྟོང་མཇུག་སྡོང་ལོ་བཞིན་དུ་གང་སར་སྤུར་ཞིང་། །
སྲིད་པ་གངས་ཀྱི་རྒྱལ་མོའི་དབུ་ནས་འཐོར་བའི། །
འདབ་དྲུག་ཁ་བ་དཀར་པོའི་མེ་ཏོག་རེ་རེ། །
ཁྱོད་ཀྱི་རྡོ་བཅལ་སྟེང་དུ་བཞུ་བར་མཐོང་ན། །
དྲན་པའི་ཟབ་སར་ལུས་པའི་ན་ཟུག་དེ་ཡི། །
སྒྲ་དབྱངས་སྐྱ་བོ་བདག་གི་རྣ་བར་ལྷུང་བྱུང་། །

ཉི་འོད་འཇམ་པོའི་ཀློང་གི་ང་ཡི་ལྷ་ས། །
བཅོས་མིན་འཛུམ་མདངས་མོད་པའི་ཞལ་རས་ངོས་ནས། །
དགའ་སྐྱོའི་མིག་ཆུ་སྐམ་པའི་རྗེས་ཤུལ་མཐོང་ཞིང་། །
འོད་དུ་འཚེར་བའི་མུ་ཏིག་སུམ་ཅུའི་དོ་ཤལ། །
ཕྱག་ཏུ་བསྣམས་ནས་རྒྱང་དུ་ཕེབས་པར་མཐོང་ན། །
མག་མོག་རྒྱབ་གཟུགས་ཁྲོད་ཀྱི་ཞབས་རྗེས་པད་མ། །
འདབ་མ་རེ་རེ་བདག་གི་སྙིང་ཁར་སྤུང་བྱུང་། །
ཐོག་མར་རྡོ་ལ་བརྐོས་པའི་འབྲུ་དྲུག་མ་ཎི། །
མཇུག་མཐར་ང་ལ་གནང་བའི་དྲན་རྟེན་ཡིན་ནམ། །

མཚམས་སྤྲིན་དམར་པོའི་འོག་གི་ཉི་མ་ལྷ་ས། །
རྡོ་བའི་མེ་ཏོག་བཞད་པའི་སྐྱེད་ཚལ་སྣུམ་པོ། །
ཞེ་སྡང་ཆུ་བོ་བྲུག་པས་ཡོད་ཚད་བཅོམ་ནས། །
ཤར་ཕྱོགས་རྒྱ་མཚོའི་ཀློང་དུ་ཁྱེར་བའི་ཤུལ་དུ། །
ཨར་འདམ་རྣོ་ལྕགས་གཟེངས་པའི་འདུ་འཛི་མཐོང་ན། །
ཡལ་མེད་བྲེང་ངེར་འཕྱོ་བའི་རྡུལ་གྱི་ཟེགས་མ། །
བདག་གི་མིག་ཀོང་དམར་པོའི་དཀྱིལ་དུ་འཕྱོ་བའི། །
ཁེར་རྐྱང་ཨ་འཐས་འགྱིང་བའི་བྱི་རུའི་ཀ་བ། །
མཐའ་མ་ང་ལ་གནང་བའི་ནོམ་པ་ཡིན་ནམ། །

དུ་བའི་འཇའ་རིས་གྱོན་པའི་ང་ཡི་ལྷ་ས། །
འབྲོང་རྭའི་སྒྲ་སྙན་ཁུད་ཀྱི་དབྱངས་རྟ་གཉོམ་པོ། །
སྐྱིད་ཆུའི་བཞུར་དབྱངས་འགྲོགས་ནས་རྒྱང་དུ་ཆས་ན། །
དུས་འགྱུར་རླུང་བུའི་གྲང་རེག་རྩུབ་མོའི་ཀློང་གི། །
གཤོག་རྩེ་ལྷོ་རུ་གཏད་པའི་ཁྲུང་ཁྲུང་ཁེར་འཕུར། །
འཁྲེང་ཞེན་མིག་ཆུ་ལྷུང་བའི་ཐིགས་སྒྲ་དེ་ཡང་། །
བདག་གི་དྲན་པའི་ཀློང་དུ་ཡང་ཡང་འཁོར་བྱུང་། །
མི་ཚོགས་རྒྱ་མཚོའི་ནང་གི་འཛུམ་མདངས་ཁེར་ཆད། །
མཇུག་མཐར་ང་ལ་གནང་བའི་སེམས་གསོ་ཡིན་ནམ། །

  ཡིད་ཁམས་ཁ་བས་གཡོགས་སོང་།

གྱད་མི   

                                                 མེ་ཕུང་ངམ་འཇིགས་མེད་རྒྱ་མཚོ།    མཐོ་གཅིག་དང་བོ།                                             

                       

མགུལ་རྒྱན། 

 བདག་གི་འཚོ་སྟངས།

འགྲོ་སའི་གནས་དང་འདུག་སའི་ས་རུ་རིགས་ཀྱི་ཁྱད་ཆོས་སྲུང་བ་ཡིན།།

རང་མགོ་རང་གིས་ཐོན་ཁུལ་བྱས་ནས་ས་མཐའ་གོམ་པས་གཞལ་བ་ཡིན།།

གཙོ་སྒྲུབ་ལས་ཁུངས།  གངས་ལྗོངས་ཤེས་རིག་ནོར་བུའི་སློབ་གླིང་གི་སློབ་སྟོན་གཞུང་ལས་ཁང་དང་ཐོན་མིའི་སློབ་ཚོགས་གཞུང་ལས་ཁང་གཉིས་མཉམ་འབྲེལ་སྒོས་སྤེལ།