རྗེ་ཙོང་ཁ་བ།
རྩིང་བ་དཀོན་བྷེ།（གཙོས）
ཡབ་ཆེན་ཀླུ་འབུམ་དགེ་བ་དང་།།
རྒྱལ་ཡུམ་ཤིང་བཟའ་ཨ་ཆོས་ལ།།
འཁོར་བའི་སྐྱོན་གྱིས་མ་གོས་པའི།།
པད་མ་དཀར་བོ་འདམ་ལས་བཞད།།
ཁྱེད་སྐུ་གདོད་ནས་སངས་རྒྱས་ཤིང་།།
བྱིས་པའི་གཟུགས་སུ་བོད་དུ་བྱོན།།
བོད་འདི་གླེན་ཞད་ཆེ་ན་ཡང་།།
གསེར་ལ་གསེར་བཞིན་གོང་དུ་བཀུར།།
འཇམ་དབྱངས་སྤྲུལ་བ་ཁྱེད་རེད་ཟེར།།
མི་ཡི་དབང་བོ་ཁྱོད་རེད་སྐད།།
ཁྱེད་རང་ལྷ་མི་གང་ཡིན་ཡང་།།
བོད་མིའི་སེམས་ཀྱི་ང་རྒྱལ་ལགས།།
བོད་ཡུལ་གངས་རིས་བསྐོར་ན་ཡང་།།
གངས་རྒྱན་ཏི་སེ་གཅིག་ལས་མེད།།
བོད་ལ་འཕགས་པས་གང་ན་ཡང་།།
སངས་རྒྱས་འཕགས་པ་ཁྱོད་ཁོ་ན།།
བདེར་གཤེགས་དགོངས་པ་འགྲེལ་བ་ལ།།
རྒྱ་གར་ཡུལ་ན་ཀླུ་ཐོགས་གྲག།
བོད་དུ་དབུ་མའི་ལྟ་བ་ལ།།
འགྲེལ་བྱེད་དབང་ཐོབ་ཁྱོད་ལས་སུ།།
ཇོ་ནང་དབུ་མ་གཞན་སྟོང་དང་།།
ས་སྐྱའི་གསལ་སྟོང་འཛིན་མེད་སོགས།།
ཡང་དག་ལྟ་ལས་ཕྱིར་ཕྱོགས་པས།།
ཁྱོད་ཀྱིས་སྟོན་པའི་ཐུགས་བཞིན་བརྩམས།།
རྒྱ་གར་མཁས་པས་མ་དགོངས་ཤིང་།།
གངས་ཅན་མཁས་པས་མ་དྲན་པའི།།
རྟེན་འབྲེལ་ཉིད་ལས་སྟོན་པ་ལ།།
བསྟོད་མཁན་ཁྱོད་ལས་གཞན་མ་བྱུང་།།
ཐུབ་བསྟན་བྱི་དོར་མཛད་པ་ལ།།
བསམ་བཞིན་མི་ཡུལ་དུ་བྱོན་པའི།།
འཇམ་དབྱངས་ཐུགས་ཀྱི་སྤྲུལ་བ་ཁྱོད།།
མཁས་མང་རལ་བའི་གཙུག་ན་མཛེས།།
ཁྱེད་སྐུ་དཔག་བསམ་འཁྲི་ཤིང་ལས།།
དོན་གཉིས་དགོས་འདོད་ནོར་བུ་འབྱུང་།།
ཁྱེད་གསུང་ཚངས་པའི་སྒྲ་དབྱངས་ལས།།
འགོག་མེད་ཆོས་ཀྱི་རང་སྒྲ་སྒྲོག།
ཁྱེད་རང་གང་དུ་ཕེབས་ན་ཡང་།།
ས་ལ་བཀྲ་ཤིས་སྣང་བས་ཁྱབ།།
ཁྱོད་རང་གང་དུ་བཞུགས་ན་ཡང་།།
གནས་ལ་བདེ་ལེགས་དོན་ཀུན་འབྱུང་།།
མཁས་པ་ང་ཡིན་ཁྱོད་ཡིན་དང་།།
རྩོམ་པ་ང་ཐུ་ཁྱོད་ངར་རྣམས།།
ཁྱོད་ཀྱི་གསུང་གི་ཆ་ཤས་ཙམ།།
འགྲན་པར་ནུས་པ་ངས་མ་མཐོང་།།
གོ་རམས་བསོད་ནམས་སེང་གེ་དང་།།
པཎ་ཆེན་ཤཀྱཱ་མཆོག་ལྡན་སོགས།།
མཁས་དགུའི་གཙུག་གི་གྲགས་པ་ཅན།།
ཁྱེད་གསུང་ན་དཱའི་དབྱངས་ཀྱིས་ཕབ།།
ཐ་སྙད་ཚད་མ་མི་བཞེད་ཅིང་།།
དོན་དམ་བློ་ངོར་མི་བདེ་བའི།།
མཁས་པ་ཇི་ལྟར་མང་ན་ཡང་།།
ཁྱོད་གདོང་འབུད་མཁན་གཅིག་ཀྱང་མེད།།
རང་ངོར་ཇི་སྙེད་མི་གཟིགས་ཤིང་།།
གཞན་ངོར་གསལ་བཞིན་སྣང་ཟེར་ཡང་།།
བདེན་གཉིས་ཅིག་ཅར་མཐོང་བ་ལ།།
འཇམ་མགོན་་ཁྱོད་ལས་གཉིས་པ་དཀོན།།
བུ་སྟོན་གསུང་རྩོམ་མང་ན་བཟང་།།
མི་ཕམ་རྟོགས་པ་མཐོ་ན་རབ།།
ཚད་མའི་སྲང་གིས་འཇལ་བ་ན།།
ཁྱོད་ནི་གསེར་ཡིན་དངུལ་ལས་མཐོ།།
བསྟན་པ་གཅིག་ལ་སྟོན་པ་གཅིག།
རྒྱལ་བས་ཇི་ལྟར་ལུང་བསྟན་ཀྱང་།།
མགོན་པོའི་མཚན་གྱི་ཟུར་ཅིག་ལ།།
རྒྱལ་བ་ཞེས་པ་ངང་གིས་འབྱོར།།
མདོ་སྨད་རིགས་ཀྱི་ཉི་མ་ཁྱོད།།
དབུས་དང་གཙང་གི་མཁར་འཕགས་ཏེ།།
བོད་ཡུལ་སྟོད་སྨད་བར་གསུམ་དུ།།
ཁྱོད་ཀྱི་བསྟན་པས་ཡུག་ཅིག་བྲེས།།
བོད་ལ་གྲུབ་མཐའ་མང་ན་ཡང་།།
འདྲ་འདྲའི་ནང་གི་མི་འདྲ་བ།།
མདོ་སྔགས་ཟུང་དུ་འབྲེལ་བ་ཡི།།
དགེ་ལྡན་གྲུབ་མཐའ་ཨེ་མ་ཧོ།།
བསྟན་པའི་ཟབ་གནད་ཀུན་མཁྱེན་ཞིང་།།
གྲུབ་པའི་གོ་འཕང་མཐོར་གཤེགས་ཀྱང་།།
འདུལ་བ་ནང་བཞིན་མངོན་ཆུང་གིས།།
སྦས་པའི་བརྟུལ་ཞུགས་ཁྱོད་ཀྱིས་མཛད།།
རྗེ་བཙུན་མི་ལ་རས་པ་ཡིས།།
བདེན་པ་མངོན་སུམ་མཐོང་ན་ཡང་།།
མི་ལའི་བསྟན་པ་ཟེར་བ་ཞིག།
ཁྱོད་བཞིན་མེད་པ་ངོ་མཚར་ཆེ།།
གཞན་རྣམས་བདག་གི་དགྲ་མ་ཡིན།།
སྐུ་ཉིད་བདག་གི་གཉེན་མིན་རུང་།།
ཁྱེད་གསུང་ལེགས་བཤད་རྨ་མེད་པས།།
བདག་ཡིད་སྙེ་མ་ཁྱོད་ལ་ཕྱོགས།།
འབྲུག་པ་པད་མ་དཀར་པོ་དང་།།
སྟག་ལོ་མི་ཕམ་བླ་མ་ཡིས།།
ཁྱོད་ཞབས་གུས་པས་ཕྱག་འཚལ་ན།།
དེ་ལས་མི་གུས་སྐྱེས་བུ་གང་།།
གྲུབ་མཐའི་ཆགས་སྡང་རབ་སྤངས་ནས།།
སྒྲོ་སྐུར་ཚིག་གིས་མི་ལྷད་པར།།
ཡང་དག་ཉིད་ལ་ཡང་དག་ཏུ།།
མཐོང་བའི་བློ་མིག་ལྡན་པར་ཤོག།
བདག་གིས་གང་བྱས་དགེ་བ་རྣམས།།
བྱང་ཆུབ་སྙིང་བོ་མ་འཐོབ་བར།།
དགེ་ལྡན་བསྟན་པའི་བསྟན་ཞབས་སུ།།
སྐྱེས་ནས་བསྟན་ལ་ཞུགས་པར་ཤོག།
༢༠༢༢-༤-༣༠ཉིན་གྱི་བོད་ཀྱི་ཡིག་གཟུགས་དུས་ཆེན་ཉིན་ལ་གཙོས་ཀྱི་རང་ཤག་ནས་སྦྱར།
| 
青公网安备 63262102000011号