༄༅།།བོད་ལ་སློབ་གཉེར་དུ་སོང་བ་རྣམས་ལ་བསླབ་བྱ་བྱས་པ་མུ་ཐི་ལའི་ཕྲེང་བ་ཞེས་བྱ་བ་བཞུགས་སོ།།
ཨ་ལ་ཤའི་བསྟན་དར་ལྷ་རམས་པས།
ཨོཾ་བདེ་ལེགས་སུ་གྱུར་ཅིག །
ལེགས་སྨོན་གྱིས་བསྐྲུན་དལ་འབྱོར་འཁྲི་ཤིང་རྩེར།།
མང་ཐོས་མེ་ཏོག་རྣམ་པར་རྒྱས་ཤུལ་དུ།།
མཁས་མང་འབྲས་བུ་ཡོངས་སུ་སྨིན་པའི་དྲིས།།
རབ་འབྱམས་སྤྲོ་བ་བདག་གི་སྙན་གྱི་སྒོར།།
ལུང་གི་ཆུ་གཏེར་དབུས་སུ་རྟག་ཉལ་ཡང་།།
རྟོགས་པའི་ཡོན་ཏན་གཤེར་གྱིས་མ་བརླན་པའི།།
ཤེས་རྒྱུད་སྐམ་ཐག་ཆོད་པའི་རྡོ་ཡི་སྤུན།།
བཅོལ་ཆུང་ཞིག་གིས་འདི་སྐད་གསོལ་ལ་དགོངས།།
རྟོག་གེའི་རིག་པ་རྣོ་བ་ཙམ་ཞིག་ལ།།
མཁས་པ་མགུ་བའི་གནའ་སྐད་མི་འདུག་པས།།
གཞུང་གི་དོན་ལ་འབྱོར་ངེས་སློབ་གཉེར་ཞིག།
རྡོ་རུས་ཐུག་ངེས་ཡོང་བ་གལ་ཆེའོ།།
དེ་ཕྱིར་གྲྭ་བ་སོ་སོའི་འགལ་འདུ་ལ།།
གོ་ལུགས་མི་འདྲ་བ་རེ་ཡོད་ངེས་གཤིས།།
འཇམ་མགོན་བླ་མའི་ཁུངས་དང་ཉེར་གཏུགས་ཏེ།།
བརྡར་ཤ་ཆོད་ངེས་གྱིས་དང་གྲོགས་པོ་དག།
སྒོས་སུ་སྔགས་ལ་བག་ཆགས་མ་ཐེབས་ན།།
སངས་རྒྱས་ལས་ཀྱང་དཀོན་པའི་རྡོ་རྗེ་ཐེག།
ཅེས་སོགས་བསྔགས་པ་བརྗོད་པའི་དགོས་པ་ཡང་།།
སྟོར་ཉེན་ཆེའོ་སྙིང་གི་གྲོགས་པོ་དག
མང་དུ་ཐོས་ཀྱང་འཆད་ལ་མི་མཁས་ན།།
ལྕེ་བརྒྱ་སྤྲུལ་ནས་སྨྲས་ཀྱང་ལྐུགས་པ་ཡིན།།
རྩོད་ལ་མཁས་ཀྱང་རྩོམ་ཚུལ་མི་ཤེས་ན།།
མཁས་པའི་སྙན་པ་རང་དང་མཉམ་དུ་འཆི།།
ཁ་ནས་རྩོམ་ཡང་སུག་བྲིས་མི་འབྱོར་ན།།
དཔའ་རྩལ་ཆེ་བའི་ལག་རྡུམ་གཉིས་པ་ཡིན།།
རྩོམ་ཚིག་ཡི་གེ་གཞུང་བཞིན་མ་བྱུང་ན།།
མཁས་པ་ཁྲེལ་ཞིང་དོན་ལོག་སྟོན་ཉེན་ཆེ།།
ཡི་གེ་དག་ཀྱང་སྙན་ངག་མི་ལྡན་ན།།
ཡིད་འོང་མཛེས་མ་གོས་ཧྲུལ་གྱོན་པ་བཞིན།།
མངོན་བརྗོད་གསར་རྙིང་བརྡ་ཡིས་མ་སྤུད་ན།།
གྲོང་ཚིག་འདྲེས་པས་མཁས་རྣམས་བཞད་པའི་རྒྱུ།།
དེའི་ཕྱིར་རིག་གནས་ཀུན་ལ་མཁས་པ་དང་།།
མདོ་སྔགས་ཟུང་ལ་རིག་རྩལ་ཅི་ཡོད་ཀྱིས།།
མཁས་པར་སྦྱངས་ནས་ཕ་ཡུལ་འདིར་ཕེབས་ནས།།
ད་གཟོད་བསྟན་པའི་ཞབས་འདེགས་འགྱུར་རོ་སྙམ།།
དེ་རིང་ཐུག་ཀྱང་ལབ་རྒྱུ་འདི་ལས་མེད།།
ནངས་པར་ཤི་ཡང་ཁ་ཆེམས་འདི་རང་ཡིན།།
ཞུས་པ་འདི་ལ་ཞུས་དག་མ་དགོས་པར།།
གང་ཞུས་དགོངས་པའི་ཡུལ་དུ་བསྐྱུད་མེད་འཚལ།།
བླ་མ་བདེན་ཚིག་གྲུབ་པའི་བདེན་མཐུ་དང་།།
བླ་མ་སྐུ་གསུམ་བརྙེས་པའི་བྱིན་རླབས་དང་།།
བདག་ཅག་ལྷག་བསམ་འཛོམས་པའི་རྟེན་འབྲེལ་གྱིས།།
ཁྱེད་ཅག་ཅི་བསམ་དེ་ལྟར་འགྲུབ་གྱུར་ཅིག།
ཨ་ལ་ཤའི་བསྟན་དར་ལྷ་རམས་པས་སྨྲས་པའོ།།
ཡི་གེ་ཕབ་བཤུ་བ། དྲ་བའི་གསར་འགོད་པ་ནག་ཙན་དན།
| 
青公网安备 63262102000011号