སའི་གོ་ལའི་ཆུ་ཚོད་གཅིག 

   སའི་གོ་ལའི་ཆུ་ཚོད་གཅིག་ཅེས་པ་འདི་ནི་༢༠༠༧ལོར་འཛམ་གླིང་རང་བྱུང་ཐེབས་རྩ་ཚོགས་པས་གྲོས་གཞི་བརྟོན་པ་ལྟར་འཛམ་བུ་གླིང་གི་རྒྱལ་ཁབ་མང་བོ་དངོས་སུ་བྱ་འགུལ་ལ་ཞུགས་ཏེ་ལོ་རེའི་སྤྱི་ཟླ་གསུམ་པའི་ཆེས་མཐའ་མཇུག་གི་གཟའ་སྤེན་པའི་དགོང་མོར་དུས་ཡུན་ཆུ་ཚོད་གཅིག་གི་ཡུན་ལ་གློག་གཟིམས་ཏེ་ཐོན་ཁུངས་གྲོན་ཆུང་གི་བྱ་འགུལ་སྤེལ། 

  ༢༠༡༣ལོ་ནས་ཀྲུང་གོའི་རྒྱལ་ཁབ་ཀྱིས་ཀྱང་གཞུང་སྒེར་གཉིས་ཐད་ནས་བྱ་འགུལ་འདི་ཉིད་ཤུགས་ཆེར་སྤེལ། ༢༠༡༦ལོ་ནས་ངེད་སློབ་གླིང་གི་སློབ་དཔོན་ཆེན་མོ་རྭ་རྒྱ་འཇིགས་མེད་རྒྱལ་མཚན་གྱིས་དངོས་སུ་དབུ་ཁྲིད་ཅིང་དགེ་སློབ་ཡོངས་བྱ་འགུལ་འདིར་ཞུགས། 

     བྱ་འགུལ་གྱི་དམིགས་ཡུལ་ནི་སློབ་མ་རྣམས་ཀྱི་རྒྱུད་ལ་ཁོར་ཡུག་སྲུང་སྐྱོབ་ཀྱི་འདུ་ཤེས་བརྟན་པོ་འཇོག་པ་དང་། རང་བྱུང་ཁམས་ཆེན་མོར་གཅེས་སྐྱོང་གི་འདུ་ཤེས་གསོ་སྐྱོང་བྱ་ཕྱིར་ཡིན། སློབ་དཔོན་འཇིགས་མེད་རྒྱལ་མཚན་མཆོག་གིས་གསུང་རྒྱུར། ང་ཚོས་ཆུ་ཚོད་གཅིག་གི་ཡུན་ལ་གློག་གྲོན་ཆུང་བྱས་པ་ཙམ་གྱིས་བྱས་རྗེས་ཆེན་པོ་ཞིག་བཞག་པ་མིན་མོད། གོམས་གཤིས་འདི་ཆགས་སུ་འཇུག་དགོས། ནམ་རྒྱུན་ཟ་ཁང་དུ་འགྲོ་ནའང་རང་གིས་ཇ་ཕོར་དང་ཐུར་མ་ཁྱེར་བ་དང་། གཙང་ཤོག་གི་ཚབ་ཏུ་ལག་ཕྱིས་སྤྱོད་རྒྱུ་སོགས་བཟང་སྤྱོད་ལ་གོམས་རྒྱུ་དེ་གལ་ཆེན་པོ་རེད་གསུངས་པས། ད་ལྟའི་བར་མི་ལོ་དྲུག་གི་ཡུན་ལ་བྱ་འགུལ་འདི་རྒྱུན་བསྐྱངས་པས་སློབ་མ་རྣམས་ཀྱི་སེམས་ལའང་ཐོན་ཁུངས་གྲོན་ཆུང་གི་བག་ཆགས་བརྟན་པོ་བཞག 

གསར་འགོད་པ། གྱི་ལིང་འཇིགས་མེད།