༄༅།།ཐོན་མི་སམྦྷོཊའི་བསྟོད་པ་ཚངས་པའི་དབྱངས་སྙན།
བསེ་ཚང་བློ་བཟང་དཔལ་ལྡན་ཆོས་ཀྱི་རྡོ་རྗེསམཛད།
བསིལ་ལྡན་ཕྲེང་བས་བསྐོར་བའི་ཞིང་ཁམས་འདིར།།
བརྡ་སྤྲོད་དབྱངས་གསལ་ཉི་གཞོན་གསར་བའི་འཛུམ།།
གངས་ཅན་དགུང་དུ་འདྲེན་མཁས་ཐོན་མི་རྗེ།།
སཾ་བྷོ་ཊ་ཡི་ཞབས་ལ་སྙིང་ནས་འདུད།།
དམིགས་མེད་སྙིང་རྗེའི་གཏེར་གྱུར་སྤྱན་རས་གཟིགས།།
སྒྱུ་འཕྲུལ་གར་གྱིས་མི་ཡི་རྣམ་རོལ་མཁན།།
གངས་ཅན་ལྗོངས་འདིར་ཆོས་སྲིད་འཁོར་ལོ་ཆེ།།
བསྒྱུར་མཛད་རྒྱལ་བློན་རྣམས་ལ་གུས་པས་འདུད།།
ཁ་བའི་ལྗོངས་འདིར་རྒྱུ་བའི་གདོང་དམར་བུ།།
རིག་རྨོངས་མུན་པའི་ཀློང་དུ་འཁྱམས་པ་རྣམས།།
རིག་པའི་སྣང་བ་འབར་བའི་ཞིང་ཁམས་སུ།།
འགོད་མཛད་རྩ་བའི་སློབ་དཔོན་སཾ་བྷོ་ཊའི།།
བརྩེ་ཆེན་ཐུགས་བསྐྱེད་རླབས་ཕྲེང་ཆེར་འཁྲིགས་པས།།
དཀའ་བ་བརྒྱ་ཕྲག་བསལ་ཏེ་འཕགས་ཡུལ་དུ།།
བཤེས་གཉེན་ཞལ་ལས་ལེགས་བཤད་བདུད་རྩིའི་རྒྱུན།།
བཞེས་ཏེ་གངས་རིའི་ལྗོངས་འདིར་དབྱངས་གསལ་སོགས།།
བརྡ་སྤྲོད་རིག་པའི་པད་ཚལ་གསར་བའི་འཛུམ།།
བཞད་པས་དགའ་བ་འབུམ་གྱིས་རྫོགས་ལྡན་བསུས།།
འཛམ་གླིང་རིག་པའི་ལྷུན་པོའི་ཡང་རྩེ་རུ།།
སྙན་པའི་བ་དན་རླུང་གིས་བསྐྱོད་པ་ཅན།།
གངས་ལྗོངས་གནས་ལྔ་རིག་པའི་ནོར་བུ་ཞེས།།
གྲགས་པའི་འབྲུག་སྟོང་འཛམ་གླིང་ཁྱོན་དུ་ལྡིར།།
ཐོན་མིའི་ལག་སོར་གངས་རིའི་རྩེ་མོ་ནས།།
བརྡ་སྤྲོད་རིག་པའི་ཆུ་བོ་རྣམ་བཞིའི་རྒྱུན།།
བྷོ་ཊའི་ལྗོངས་སུ་ཁྱབ་པའི་རིན་ཆེན་ནོར།།
འབྱུང་གནས་གྱུར་འདིའི་བཀའ་དྲིན་གཞལ་མི་ནུས།།
དེ་ལྟར་བསུབ་མེད་ངོ་མཚར་ཕྱག་རྗེས་མཆོག།
རྡོ་ལ་རི་མོ་བྲིས་པ་ལྟ་བུ་འདི།།
རྗེས་འཇུག་གདུལ་བྱ་ཡོངས་ཀྱི་སྙིང་ཁོང་དུ།།
དམ་དུ་བཅངས་ཏེ་བཀའ་དྲིན་རྗེས་སུ་དྲན།།
འདི་ཡི་དགེ་བས་གངས་རི་ར་བའི་ཞིང་།།
རྫོགས་ལྡན་དཔལ་ལ་འགྲན་ཞིང་ལྔ་རིག་གི།
ཟླ་བའི་འོད་དཀར་སྐྱོན་གྱིས་མ་གོས་པ།།
ཆོལ་གསུམ་འཁོར་ལོའི་ཁྱོན་དུ་ཁྱབ་པར་ཤོག།
ཡབ་གཅིག་ཟུར་ཕུད་ལྔ་བའི་བྱིན་རླབས་མཆོག།
སྙིང་ལ་ཞུགས་ཏེ་རྨོངས་མུན་རབ་བསལ་ནས།།
དད་བརྩོན་ཤེས་རབ་རྣམ་དཔྱོད་རྩལ་རྫོགས་ཏེ།།
འཇིགས་མེད་སྨྲ་བའི་དབང་བོར་བདག་གྱུར་ཅིག།
གངས་ཅན་འགྲོ་ལ་སྨན་པའི་ལྷག་བསམ་གྱིས།།
ཇི་ལྟར་སྨོན་པ་དེ་ལྟར་ལེགས་འགྲུབ་ཅིང་།།
སྲིད་གསུམ་འགྲོ་ཀུན་སྡུག་བསྔལ་ལས་བསྒྲལ་ཏེ།།
གཏན་བདེ་ཐར་བའི་གོ་འཕང་མྱུར་ཐོབ་ཤོག།
ཅེས་བོད་ཆོལ་ཁ་གསུམ་ཡོངས་སུ་རྫོགས་པའི་གངས་ཅན་གྱི་ལྗོངས་འདིར་བརྡ་སྤྲོད་ཡི་གེའི་སྲོལ་ཐོག་མར་གསར་གཏོད་མཛད་པའི་ཤིང་རྟ་བ་ཆེན་པོ། བོད་མི་ཡོངས་ཀྱི་རྩ་བའི་སློབ་དཔོན་ཐོན་མི་སཾ་བྷོ་ཊ་ཞེས་སྙན་པའི་གྲགས་པ་འཛམ་གླིང་ཡོངས་སུ་ཁྱབ་པ་དེ་ཉིད་ལ་བཀའ་དྲིན་རྗེས་སུ་དྲན་པའི་བསྟོད་པ་ཚངས་པའི་དབྱངས་སྙན་ཞེས་བྱ་བ་འདི་ནི། གངས་ལྗོངས་ཤེས་རིག་ནོར་བུའི་སློབ་གླིང་ཞེས་གྲགས་པའི་སློབ་གྲྭ་གསར་སྐྲུན་བྱེད་པ་པོ། མཁྱེན་རབ་ཀྱི་རྩལ་དགུ་རབ་ཏུ་རྫོགས་པའི་རྭ་རྒྱའི་འཇིགས་མེད་རྒྱལ་མཚན་གཙོ་བྱས་རྣམ་དཔྱོད་ཀྱི་ཁོ་ལག་རབ་ཏུ་ཡངས་པའི་སློབ་གྲྭའི་དགེ་རྒན་འགས་ནན་གྱིས་བསྐུལ་པར་བརྟེན་༧ཤཱཀྱའི་བཙུན་གཟུགས་བསེ་ཚང་བློ་བཟང་དཔལ་ལྡན་ཆོས་ཀྱི་རྡོ་རྗེས་རང་ལོ་བརྒྱད་ཅུར་སོན་པའི་མེ་སྤྲེལ་ལོའི་ཆུ་སྟོད་ཟླ་བའི་ཚེས་ལ་བྲིས་པ་དགེ་ལེགས་འཕེལ།།
|