ཟླ4བའི་ཚེས1ཉིན་ནས་བཟུང་འགྲིམ་འགྲུལ་སྒྲིག་ཁྲིམས་ལས་འགལ་ཏེ་ཁ་ལོ་བའི་འཛིན་ཡིག་ལས་སྐར་མ་འཐེན་ཐབས་ལ་སྒྱུར་བཅོས་ཆེན་པོ་བྱ་རྒྱུ་རེད།
རང་གི་ཚབ་ཏུ་མི་གཞན་གྱི་ཁ་ལོ་བའི་འཛིན་ཡིག་ལས་སྐར་མ་འཐེན་དུ་འཇུག་པ་དང་རང་གི་ཁ་ལོ་བའི་འཛིན་ཡིག་གི་སྐར་མ་བཙོང་བའི་བྱ་སྤྱོད་ལ་སྐར་མ12འཐེན་རྒྱུ་ཡིན་པ་དང་། རླངས་འཁོར་བསྐོར་སྐབས་ཁ་པར་བརྒྱབ་ཚེ་སྐར་མ2འཐེན་པ་དེ་སྐར་མ3འཐེན་རྒྱུར་སྒྱུར་རྒྱུ། ཞིབ་བཤེར་ཚད་ལོན་མཚོན་རྟགས་སྦྱར་མེད་ཚེ་སྐར་མ3འཐེན་པ་དེ་སྐར་མ་གཅིག་ཀྱང་མི་འཐེན་པར་བསྒྱུར་རྒྱུ་སོགས2022ལོའི་ཟླ4བའི་ཚེས1ཉིན་ནས་བཟུང་བགྲོད་ལམ་འགྲིམ་འགྲུལ་བདེ་འཇགས་ཀྱི་ཁྲིམས་འགལ་བྱ་སྤྱོད་ལ་ཁ་ལོ་བའི་འཛིན་ཡིག་ལས་སྐར་མ་འཐེན་པའི་ལམ་སྲོལ་སྒྱུར་བཅོས་བྱ་རྒྱུ་ཡིན་པར་མ་ཟད་སྐར་མ་འཐེན་པའི་དོན་ཚན་ཁག་ཅིག་གསར་དུ་སྣོན་རྒྱུ།
གཤམ་གྱི་འགྲིམ་འགྲུལ་ཁྲིམས་འགལ་བྱ་སྤྱོད་ལ་ཁ་ལོ་བའི་འཛིན་ཡིག་ལས་སྐར་མ་འཐེན་ཚད་དམའ་རུ་གཏོང་རྒྱུ།
1.ཁ་ལོ་བའི་འཛིན་ཡིག་དང་རང་གིས་སྐོར་བའི་རླངས་འཁོར་གཉིས་ཁ་ལོ་བའི་འཛིན་ཡིག་གི་གཏན་འབེབས་དང་མི་མཐུན་པའི་རིགས།(སྐར་མ12འཐེན་པ་ནས་སྐར་མ9འཐེན་པའི་བར་དམའ་རུ་གཏོང་རྒྱུ)
2.རླངས་འཁོར་གྱི་ཨང་བྱང་བཀལ་མེད་པའམ་ཡང་ན་བསམ་བཞིན་དུ་རླངས་འཁོར་གྱི་ཨང་བྱང་སྒྲིབ་གཡོགས་བྱས་པ་དང་། རླངས་འཁོར་གྱི་ཨང་བྱང་ལ་ཆག་སྐྱོན་ཐེབས་ཡོད་པའི་རིགས་བགྲོད་ལམ་དུ་སྐྱོད་པ།(སྐར་མ12འཐེན་པ་ནས་སྐར་མ9འཐེན་པའི་བར་དམའ་རུ་གཏོང་རྒྱུ)
3.སློབ་གྲྭའི་རླངས་འཁོར་སྐོར་ཆོག་པའི་ཐོབ་ཐང་འཛིན་ཡིག་མ་བླངས་པར་སློབ་གྲྭའི་རླངས་འཁོར་སྐོར་བའི་རིགས།(སྐར་མ12འཐེན་པ་ནས་སྐར་མ9འཐེན་པའི་བར་དམའ་རུ་གཏོང་རྒྱུ)
4.མི་ལ་རྨས་སྐྱོན་ཡང་མོ་བཟོས་པའམ་རྒྱུ་ནོར་ལ་གྱོང་གུན་ཕོག་པའི་འགྲིམ་འགྲུལ་དོན་རྐྱེན་བཟོས་རྗེས་བྲོས་སོང་རུང་བྱས་ཉེས་སུ་གྲུབ་མེད་པའི་རིགས།(སྐར་མ12འཐེན་པ་ནས་སྐར་མ6འཐེན་པའི་བར་དམའ་རུ་གཏོང་རྒྱུ)
5.འགྲུལ་བ་ནང་དུ་ཡོད་པའི་རླངས་འཁོར་འབྲིང་གྲས་ཡན་དང་ཉེན་ཆེའི་དངོས་རྫས་སྐྱེལ་འདྲེན་བྱེད་པའི་རླངས་འཁོར་སྐོར་ནས་ཆུ་ཚོད4ལས་བརྒལ་ཡང་རླངས་འཁོར་བསྡད་ནས་ངལ་གསོ་མ་བྱས་པའམ་ཡང་ན་རླངས་འཁོར་བསྡད་ནས་ངལ་གསོ་བྱས་ཚད་སྐར་མ20ལས་ཉུང་བའི་རིགས།(སྐར་མ12འཐེན་པ་ནས་སྐར་མ9འཐེན་པའི་བར་དམའ་རུ་གཏོང་རྒྱུ)
6.རླངས་འཁོར་གྱི་ཨང་བྱང་གཏན་འབེབས་ལྟར་མི་འགེལ་བར་བགྲོད་ལམ་དུ་སྐྱོད་པའི་རིགས། (སྐར་མ12འཐེན་པ་ནས་སྐར་མ3འཐེན་པའི་བར་དམའ་རུ་གཏོང་རྒྱུ)
7.རླངས་འཁོར་སྐོར་སྐབས་གཏན་འབེབས་ལྟར་སློབ་གྲྭའི་རླངས་འཁོར་ལ་ལམ་མི་ཕྱེས་པའི་རིགས། (སྐར་མ12འཐེན་པ་ནས་སྐར་མ3འཐེན་པའི་བར་དམའ་རུ་གཏོང་རྒྱུ)
8.རླངས་འཁོར་བསྐོར་ནས་བཀག་རྒྱའི་མཚོན་རྟགས་དང་ཐིག་རྟགས་ལས་བརྒལ་བའི་རིགས། (སྐར་མ3འཐེན་པ་ནས་སྐར་མ1འཐེན་པའི་བར་དམའ་རུ་གཏོང་རྒྱུ)
9.གཏན་འབེབས་བྱས་པའི་དུས་བཀག་ལྟར་ཉེན་མེད་ལག་རྩལ་ཞིབ་བཤེར་བྱས་མེད་པའི་གཞུང་ལམ་གྱི་འགྲུལ་སྐྱེལ་རླངས་འཁོར་དང་ཡུལ་སྐོར་འགྲུལ་སྐྱེལ་རླངས་འཁོར། ཉེན་ཆེའི་དངོས་རྫས་སྐྱེལ་འདྲེན་བྱེད་པའི་རླངས་འཁོར་སོགས་སྐོར་བའི་རིགས། (སྐར་མ3འཐེན་པ་ནས་སྐར་མ1འཐེན་པའི་བར་དམའ་རུ་གཏོང་རྒྱུ)
གཤམ་གྱི་འགྲིམ་འགྲུལ་ཁྲིམས་འགལ་བྱ་སྤྱོད་ལ་ཁ་ལོ་བའི་འཛིན་ཡིག་ལས་སྐར་མ་འཐེན་ཚད་ཇེ་མཐོར་གཏོང་རྒྱུ།
1.མདུན་དུ་རླངས་འཁོར་གྲལ་སྒྲིག་པའམ་ཡང་ན་དལ་མོར་སྐྱོད་སྐབས་རླངས་འཁོར་སྔོན་མ་ལས་བརྒལ་བའམ་ཁ་གཏད་ཀྱི་ལམ་འགོག་པ། ལམ་བར་དུ་རླངས་འཁོར་སྒུག་སྡོད་བྱེད་མཁན་ལ། (སྐར་མ2འཐེན་པ་ནས་སྐར་མ3འཐེན་པའི་བར་མཐོ་རུ་གཏོང་རྒྱུ)
2.རླངས་འཁོར་བསྐོར་དུས་ཁ་པར་རྒྱག་པ་དང་ལག་ཏུ་ཁ་པར་འཛིན་པ་སོགས་བདེ་འཇགས་ངང་རླངས་འཁོར་གཏོང་བར་འགོག་རྐྱེན་བཟོ་བའི་བྱ་སྤྱོད་རིགས་ལ། (སྐར་མ2འཐེན་པ་ནས་སྐར་མ3འཐེན་པའི་བར་མཐོ་རུ་གཏོང་རྒྱུ)
3.མྱུར་བགྲོད་གཞུང་ལམ་མམ་ཡང་ན་གྲོང་ཁྱེར་གྱི་མྱུར་བགྲོད་གཞུང་ལམ་དུ་ཁྲིམས་འགལ་གྱིས་རླངས་འཁོར་འཇོག་པའི་རིགས་ལ། (སྐར་མ6འཐེན་པ་ནས་སྐར་མ9འཐེན་པའི་བར་མཐོ་རུ་གཏོང་རྒྱུ)
གསར་དུ་བསྣན་པའི་གཏན་འབེབས།
1.རླངས་འཁོར་ཁ་ལོ་བའི་ཚབ་བྱས་ཏེ་འགྲིམ་འགྲུལ་ཁྲིམས་འགལ་བྱ་སྤྱོད་ཀྱི་ཆད་གཅོད་དང་སྐར་མ་འཐེན་པའི་ཐད་ནས་དཔལ་འབྱོར་ཁེ་ཕན་རེག་ཐབས་བྱེད་པ་ལ། ཐེངས་གཅིག་ལ་སྐར་མ12འཐེན་རྒྱུ། 2.འདུག་སྟེགས་བདུན་ཡན་གྱི་འགྲུལ་སྐྱེལ་རླངས་འཁོར་དང་གཏན་འབེབས་མི་གྲངས་ལས་བརྒྱ་ཆའི་ལྔ་བཅུ་ཡན་ནས་བརྒྱ་ཆའི་བརྒྱ་མན་བརྒལ་མཁན་ལ། ཐེངས་གཅིག་ལ་སྐར་མ9འཐེན་རྒྱུ།
3.ཐོ་འགོད་བྱས་ཟིན་པའི་གྲུབ་ཚུལ་ལ་རང་དགར་འགྱུར་ལྡོག་བཏང་བའི་ཟོང་འདྲེན་རླངས་འཁོར་གཞུང་ལམ་ཐོག་བསྐྱོད་པར་ཐེངས་གཅིག་ལ་སྐར་མ1འཐེན་རྒྱུ།
ཐེངས་འདིའི་སྒྲིག་སྲོལ་གསར་བའི་ནང་། སྐར་མ་འཐེན་སྟངས་ཁ་ཤས་སུབ་ཡོད་པ་སྟེ། “བགྲོད་ལམ་སྟེང་སྐྱོད་པའི་རླངས་འཁོར་གྱིས་ཞིབ་བཤེར་ཚད་ལོན་མཚོན་རྟགས་དང་འགན་སྲུང་མཚོན་རྟགས་སྦྱར་མེད་པ། ཁ་ལོ་བའི་འཛིན་ཡིག་དང་རླངས་འཁོར་གྱི་འགྲོ་སྐྱོད་འཛིན་ཡིག་ཁྱེར་མེད་པ” “མཐོང་ཚད་དམའ་བའི་གནམ་གཤིས་ཆ་རྐྱེན་འོག རླངས་འཁོར་མྱུར་བགྲོད་གཞུང་ལམ་ཐོག་གི་གཏན་འབེབས་ལྟར་མ་བསྐྱོད་པ” “སློབ་གྲྭའི་རླངས་འཁོར་ལ་གཏན་འབེབས་ལྟར་བདེ་འཇགས་སྒྲིག་ཆས་སྒྲིག་སྦྱོར་མ་བྱས་པའམ་ཡང་ན་སློབ་གྲྭའི་རླངས་འཁོར་ལ་གཏན་འབེབས་ལྟར་བདེ་འཇགས་སྲུང་སྐྱོང་མ་བྱས་པ”དང“རླངས་འཁོར་བཞི་མདོར་སྐྱོད་སྐབས་གཏན་འབེབས་ལྟར་མ་སོང་བའམ་ཡང་ན་རླངས་འཁོར་བསྡད་པ”སོགས་ཀྱི་བྱ་སྤྱོད་ཁག11ཚུད་ཡོད་པ་རེད། གཞན་ཡང་འགྲིམ་འགྲུལ་ཐད་ཀྱི་ཁྲིམས་འགལ་བྱ་སྤྱོད་ཀྱི་ཉེས་ཚབས་ཆུང་བུར་ཐ་ཚིག་སྒྲོག་པའི་ཆད་པ་གཅོད་རྒྱུ་ཡིན་ན། སྐར་མ་འཐེན་མི་དགོས་པ་སོགས་ཚུད་ཡོད།
|