༄༅།། མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཕྱོགས་བསྒྲིགས་དད་པའི་འཇུག་ངོགས་ལས།

དྲུག་པ། སྟོད་མངའ་རིས་ཀྱི་རྒྱལ་པོ་བྱང་ཆུབ་འོད་ཀྱིས་ཇོ་བོ་རྗེ་བོད་དུ་གདན་དྲངས་པའི་སྐོར།

རྩོམ་པ་པོ་མི་གསལ།

   དེ་ནས་ལྷ་བཙུན་བྱང་ཆུབ་འོད་ཀྱིས་སྙིང་རུས་བསྐྱེད་དེ་ཁུ་བོ་ཡེ་ཤེས་འོད་ཀྱི་ཐུགས་དགོངས་ཡོངས་སུ་རྫོགས་པར་བྱ་བ་དང་། བོད་འདིར་ཡང་ཨ་ཙ་ར་དམར་པོ་དང་། པཎྜིཏར་གྲགས་པ་ཤམ་ཐབས་སྔོན་པོ་ཅན་དང་། ཨར་ཚོ་བནྡེ་བཅོ་བརྒྱད་སོགས་ཀྱིས་གསང་སྔགས་ལ་བསྙད་པའི་རྩིང་ཆིས་མང་དུ་བྱུང་བ་རྣམས་ཐབས་ཀྱིས་བསྣུབ་པའི་ཕྱིར་དུ་ཇོ་བོ་སྤྱན་འདྲེན་པའི་བང་མི་སུ་འོས་དཀོན་མཆོག་ལ་གསོལ་བ་བཏབ་པ་དང་མོ་རྩིས་ཅི་མཛད་ཀྱང་ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བ་བབས། དེ་དུས་ལོ་ཙཱ་བ་མངའ་རིས་གུང་ཐང་གསེར་གྱི་ལྷ་ཁང་དུ་སྟན་པ་ལ་བློ་ཕབ་སྟེ་བཞུགས་མུས་ནས་རྒྱལ་པོ་མངའ་རིས་སུ་འབོད་པར་མཛད། རྒྱལ་པོ་ལྷ་བཙུན་བྱང་ཆུབ་འོད་རང་གི་བཞུགས་ཁྲིའི་སྟེང་དུ་ལོ་ཙཱ་བ་བཞག་ནས་བསྙེན་བཀུར་དང་། མཁས་བཙུན་བཟང་གསུམ་གྱི་ཆེ་བསྟོད་མཛད་ནས། ཕ་མེས་རྒྱལ་བློན་གོང་མ་རྣམས་ཀྱིས་སངས་རྒྱས་ཀྱི་བསྟན་པའི་དབུ་བརྙེས། སྲོལ་བཏོད། དར་ཞིང་རྒྱས་པར་མཛད་པ་ཡིན་ལ། དུས་དེང་སང་སངས་རྒྱས་ཀྱི་བསྟན་པ་ཉམས་སྨད། བདུད་རིགས་ཀྱི་སེམས་ཅན་ཁ་རྒྱལ། མཁས་པ་ཐམས་ཅད་གཤེགས་ནས་ཤེས་པ་སྐྱོ་བར་བྱུང་བས། ངེད་ཁུ་དབོན་གཉིས་ཀྱིས་མི་དང་གསེར་མང་པོ་རྒྱ་གར་དུ་བཏང་ཡང་།  མི་ཤི་ནོར་གྲོན་ཆེ་བ་ལས་ཇོ་བོ་གདན་མ་འདྲོངས། ལྷ་བླ་མ་ཡེ་ཤེས་འོད་ཀྱང་རྒྱལ་པོ་ངན་པས་བཙོན་དུ་བཟུང་སྐུ་སྲོག་ཀྱང་བློས་བཏང་། དེ་ལྟར་ངེད་བོད་མཐའ་འཁོབ་ཀྱི་སེམས་ཅན་མ་རིག་པ་རྣམས་ཀྱི་སྙིང་སྟོབས་ཀྱང་དེ་འདྲ་ན། ཁྱེད་འགྲོ་བའི་སྐྱབས་གནས་ཐུགས་རྗེ་ཅན་ཅི་ཙུག་སོང་ཞེས་འུ་ཐུག་གིས་ཞུས་ཤིག

   འདི་ན་གསེར་སྲང་བདུན་བརྒྱ་ཡོད་པས་འདི་ཕར་ཁྱེར་ལ་ཇོ་བོའི་ཕྱག་ཏུ་ཕུལ། ངེད་བོད་པྲེ་ཏ་པུ་རིའི་གྲོང་ཁྱེར་ལྟ་བུ་ན་གསེར་ལུག་ཤིག་ཙམ་པ་རེ་ལའང་དཀའ་ལས་ཆེན་པོ་ཡོད་པ་ལ། ད་འདིས་བོད་ཀྱི་མི་ནོར་ཐམས་ཅད་ཡོངས་སུ་རྫོགས་པ་ནས་འདུག་ལགས་ཀྱི། ད་རེས་འདི་ལ་མགོན་པོ་བོད་དུ་མ་བྱོན་ན་ཁྱེད་དམ་པ་རྣམས་ཀྱི་ཐུགས་རྗེ་ཡང་དེ་ལྟར་ཟད་པས། ངེད་ཀྱང་བྱ་བ་ཅི་བདེར་སྤྱད་པར་བགྱི། ཞེས་ཁྱེད་འདུལ་ན་འཛིན་པས་ལོ་རྒྱུས་འདི་རྣམས་ཇོ་བོ་རྗེ་ལ་དངོས་སུ་ཞུས་པའི་མཇུག་ཐ་ལ་འབྱོན་པར་མ་བཞེད་ནའང་སྙན་དུ་ཐེབས་པ་ཞིག་ངེས་པར་མཛོད་གསུངས་ནས། སྤྱན་ཆབ་ཀྱིས་པང་ཁེབས་དང་ལྕོག་རྩེ་བང་ཙམ་དུ་བཤུམས་པ་ན། ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བ་རང་ཡང་སྔར་ས་མཐའ་མང་པོ་བགྲོད་མ་མྱོང་བ་དང་བཅས་ཕེབས་སྙམ་པ་ཆེར་མེད་ཀྱང་ཡིན་མིན་གྱི་ཚིག་ཟུར་ཙམ་ཡང་ཞུ་མ་ནུས། ལྷ་བཙུན་བྱང་ཆུབ་འོད་ཀྱི་གསུངས་དེ་རྣམས་ཤིན་ཏུ་བདེན་པ་དང་ལྷ་བླ་མ་ཡེ་ཤེས་འོད་ཀྱི་གསུངས་དེ་རྣམས་ཤིན་ཏུ་བདེན་པ་དང་ལྷ་བླ་མ་ཡེ་ཤེས་འོད་དེ་མ་མཇལ་ཡང་རྣམ་པ་དྲན་པ་དང་། ཁོང་ཁུ་དབོན་གྱི་མི་ནོར་མང་པོ་ཟད་ཀྱང་དེ་རྒྱུས་ཡོད་པ་དང་། བོད་ཀྱི་དོན་དུ་ཁུ་དབོན་གཉིས་སྡུག་ཆེ་བ་དང་། རང་རེ་སྐྱིད་ཆེ་བ་དང་། ལྷ་བཙུན་མི་ཆེན་གཅིག་གིས་བཤུམས་ཤིང་གསུང་བྱོན་པའི་སྟོབས་ཀྱིས་ལུས་འདར། གདོང་མཆི་མས་གང་སྟེ་ལྷ་བཙུན་པའི་ཞལ་ཡང་བལྟ་མ་ནུས་པར་ལུས་སྲོག་གི་དཀའ་ཚེགས་དང་། ཚེ་འདིའི་བདེ་སྐྱིད་གང་ལའང་མ་ཆགས་པར་ལན་དུ་འོ་ལགས་སོ་ཞེས་ཞུས་ནས། ནག་ཚོ་ལོ་ཙཱ་བ་འཁོར་བཅས་བདུན་གྱིས་གསེར་ལིང་བ་དེ་དང་གསེར་སྲང་བདུན་བརྒྱ་ཁུར་ཏེ་རྒྱ་གར་གྱི་ལམ་ལ་ཞུགས། ་ལྷ་བཙུན་པས་ཀྱང་ཐག་རིང་པོར་སྐྱེལ་ཐུང་མཛད་དེ་དགེ་སློང་ཁྱོད་ཀྱིས་ངའི་ཕྱོགས་ཀྱི་བྱ་བ་བྱས། ད་རེས་དཀའ་བ་ཆེ་ནའང་ཕར་བྱོན་ལ་འབད་བརྩོན་ཆེན་པོས་ལུས་དང་སྲོག་ལ་བསྡོས། ་ཕྱིས་འཁོར་ནས་བྱས་ཤེས་དྲིན་དུ་གཟོ་བར་བྱ། ་ཞེས་གསུངས་ནས་རྒྱང་ཙམ་སླེབས་པ་ན་སླར་ཡང་སྐད་བཏང་ནས། ཇོ་བོ་ཐུགས་ཆེན་པོ་ལ་གསོལ་བ་འདེབས་ཤིང་གཤེགས་པར་ཞུ་གསུངས། དེ་ནས་ནག་ཚོ་ལོ་ཙཱ་བ་འཁོར་བཅས་རྣམས་བལ་པོ་རྫོང་ལ་ཕེབས་ཙ་ན་མི་རེང་གཅིག་དང་ཕྲད་པས། ཁྱོད་ཡུལ་ས་ཐག་རིང་པོར་དོན་ཆེན་པོར་འགྲོ་བ་སྣང་བས།

  འདི་སྐད་ཟེར་ཞིང་སོང་དང་དོན་གྲུབ་ནས་འོང་གི་དཀོན་མཆོག་གསུམ་ལ་ཕྱག་འཚལ་ལོ། ཁ་བ་ཅན་གྱི་རྒྱལ་ཁམས་སུ་དུས་གསུམ་གྱི་སངས་རྒྱས་ཀྱི་འབྱུང་གནས་དམ་པའི་ཆོས་འཕེལ་བར་གྱུར་ཅིག ཅེས་ཟེར་ཞིང་སོང་དང་། ལམ་དུ་ཞོ་མི་འབྱུང་བ་ཡིན་གྱི་ཟེར་བ་ལ། ཁྱོད་སུ་ལགས་བྱས་པས། རིམ་གྱིས་ཤེས་པར་འགྱུར་ཟེར། དེ་ནས་ནག་ཚོ་ལོ་ཙཱ་བ་འཁོར་དང་བཅས་ལམ་བར་དུ་འཇིགས་པ་མང་དུ་བྱུང་བ་རྣམས་འབྲོམ་རང་ཉིད་ཀྱི་སྤྲུལ་པའི་རྣམ་པ་མང་པོས་བསལ་ཏེ་རིམ་གྱིས་ཆུ་མོ་གང་གའི་འགྲམ་གྱི་བྲི་ཀ་མ་ལ་ཤཱི་ལའི་གཙུག་ལག་ཁང་གི་སྒོ་འཕྱོར་འོག་ཏུ་བྱོན། 

    ཁ་འདོན་བྱས་པས་དེར་རྒྱ་བརྩོན་སེང་གེས་བོད་ཀྱི་སྐད་གོ་ནས་སྒོའི་སྟེང་གི་སྒེའུ་ཁུང་གཅིག་ནས་མར་བོད་ཀྱི་ཚེ་དང་ལྡན་པ་ཀུན་གང་ནས་བྱོན་ཟེར། ་ངེད་མངའ་རིས་སྟོད་ནས་འོངས་པ་ཡིན་བྱས་པས། དེ་ན་སྒོ་སྲུང་བྱིས་པ་གཅིག་ཡོད་པ་དེ་ལ་ཁྱོད་རང་ཚོའི་ཁུར་པོ་ཀུན་བཅོལ་ལ་སྐྱིབས་ཤིག་ཏུ་ངལ་གསོ་ནས་སྡོད། སྐྱ་རེངས་གཉིས་པའི་མཇུག་ཙམ་ལ་སྒོ་འབྱེད་པ་ཡོང་གསུངས། དེ་ནས་སྒོ་སྲུང་བྱིས་པ་དེ་ལ་གསེར་རྣམས་བཅོལ་བས། དེས་གསེར་རྣམས་ཕུག་གཅིག་ཏུ་བཞག་ནས། བློ་གཏད་ཐུབ་པ་གྲོགས་ཀྱི་མཆོག་བྱ་བ་ཡིན།  ཁྱེད་རང་རྣམས་བློ་བདེ་བར་གཟིམ་ཟེར་བ་ལ། ཆུང་ཆུང་འདིའི་ཁ་ནས་འདི་འདྲ་ཡོང་བ་གང་ཟག་ཐ་མལ་པ་རང་མིན་ནམ་སྙམ་ནས་སེམས་བག་ཕེབས་པ་བྱུང་། སང་ཞོགས་པ་སྒོ་ཕྱེ་མ་ཐག་ཏུ་བྱིས་པ་གཞོན་ནུ་ཞྭ་སྤྱི་རིང་དང་འབྲོག་སྣམ་གྱི་གོས་ཉིས་བརྩེགས་གྱོན་པ་ཕོར་ཆུང་ཁྱེར་བ་ཅིག་བྱུང་ནས། ་ཁྱེད་བོད་རྣམས་གང་ནས་བྱོན། ལམ་དུ་འཇིགས་པའི་སྐྱོན་མི་བྱུང་ངམ་ཟེར་ནས་བོད་ཀྱི་འབྲོག་པའི་སྐད་དུ་ལྷང་ལྷང་བྱུང་བས་སྐྱོ་བ་སངས་པ་འདྲ་བྱུང་། ངེད་མངའ་རིས་སྟོད་ནས་འོངས། ལམ་འཇམ་པར་བྱུང་། ཁྱོད་སུ་ཡིན། གར་འགྲོ་བྱས་པས། དེས་ང་ཡང་བོད་པ་ཡིན། བོད་དུ་འགྲོ་འུ་ཅག་བོད་འདི་ཁ་མང་ལ་གཏིང་ལྷོད་གཏམ་མཚང་ཅན་སྦེད་མི་ཤེས། བྱ་བ་གལ་ཆེན་གསང་ནས་སྒྲུབ་དགོས་པ་ཡིན། རྒྱ་བརྩོན་འགྲུས་སེང་གེ་བོད་ཀྱི་སྤྱི་ཁང་ན་བཞུགས་ཡོད་པས་དེར་རྩད་བཅད་ན་ཡོང་ཟེར་ནས་ཡུད་ཀྱིས་སོང་།  དེ་ནས་སྲང་ལམ་རིང་པོ་ཞིག་ཏུ་ཞུགས་ནས་ཕེབས་པས། དྲང་སྲོང་རྒད་པོ་ཆུ་ཤིང་གི་འཁར་བ་ཐོགས་པ་ཞིག་དང་འཕྲད་དེ། ཁྱེད་གང་ནས་བྱོན། ཅི་བྱེད་དུ་འགྲོ་སོགས་འདྲིས་པས། ངེད་བོད་མངའ་རིས་སྟོད་ནས་ཇོ་བོ་རྗེ་ཨ་ཏི་ཤ་སྤྱན་འདྲེན་དུ་འོངས། རྒྱ་བརྩོན་འགྲུས་སེང་གེ་ཁང་པ་གང་ན་ཡོད་བྱས་པས། ཁོ་འཁར་བ་ལ་བརྟེན་ནས་མིག་བཙུམ་ཙམ་ཞིག་བྱས་ཏེ། ད་ནངས་ཀྱི་བྱིས་པ་དེ་བདེན། བོད་ཀྱི་མི་ལ་གཏམ་གསང་བ་མེད་པ་སྲང་ལམ་གྱི་འཁྱམས་པོ་ཚུན་ཆད་ལའང་སྙིང་གཏམ་འཆད་པ་ཁྱོད་ཀྱིས་དོན་འགྲུབ་ཏུ་རེ་བ་ཨང་། ད་རེས་ངའི་རྩར་བཤད་པ་དྲག ད་ཇོ་བོ་མིན་པ་གཞན་གྱི་རྩར་མ་བཤད། སྒོ་ངས་བསྟན་པ་ཟེར་ནས་ཁོའི་རྗེས་ལ་བྱོན་པས། ཁོ་ག་ལེར་སོང་བའི་རྗེས་ལ་ནག་ཚོ་མགྱོགས་པོས་མ་སླེབས།

ཁོ་བོད་ཀྱི་སྤྱི་ཁང་གི་སྒོ་ཕུག་ན་སྒུགས་ནས་བསྡད་དེ་བྱ་བ་ཆེན་པོ་གྲུབ་པ་ལ་ག་ལེར་བྱེད་དགོས་པ་ཡིན། ཁང་པ་འདི་ཡིན་ཟེར། དེ་ནས་ནང་དུ་བྱོན། ལོ་ཙཱ་བ་རྒྱ་བརྩོན་སེང་ལ་གསེར་གྱི་ཕྱག་རྟེན་ཕུལ་ཏེ་མཇལ་བས། ཁོང་གིས་ཁྱེད་རྣམས་ཕྱོགས་གང་ནས་བྱོན་གསུངས་པ་ལ་ལོ་རྒྱུས་རྣམས་ཞིབ་པར་ཞུས་པས།  

  ཁྱེད་ངའི་སློབ་མར་སྣང་སྟེ། ངོ་མི་ཤེས་པར་འདུག  ད་ཨ་ཏི་ཤ་གདན་འདྲེན་པར་ཡོང་བ་ཡིན་ཞེས་མ་བཤད་པར་སློབ་གཉེར་ལ་འོངས་པ་ཡིན་ཟེར་བ་ཀུན་ལ་སྨོས།  འདི་ན་གནས་བརྟན་རཏྣ་ཨ་ཀ་ར་བྱ་བ་ཡོད། དེ་འདི་ན་དབང་ཆེ་ཞིང་ཨ་ཏི་ཤའི་ཡང་བདག་པོ་ཡིན།  དེས་ཤེས་ན་འགྲིག་པས། ད་ལྟ་ཁོ་རང་ལ་གསེར་སྲང་ཕྱེད་ཕུལ་ལ་ངེད་བོད་ནས་འོངས་པ་ཡིན། པཎྜིཏ་སྤྱན་མ་འདྲོངས། ད་ཁྱོད་ཀྱིས་པཎྜིཏ་དང་ཁྱད་མེད་པའི་སློབ་གཉེར་ཞིག་བདག་གི་ཐུགས་ལ་འདོགས་པར་ཞུ་ཟེར་བའི་ཞུ་ཕུལ། དེ་ནས་ཀྱང་དུས་ཚོད་གང་ཙམ་རིང་བློ་མ་བདེ་ན་བྱེད་པར་ལྷོད་པར་སྡོད། རྗེས་སུ་ངེད་རྣམས་ཐབས་མཁས་པོས་ཇོ་བོ་འདིར་ཕེབས་པའི་དུས་སུ་ཞུ་བ་བྱེད་པ་ཡིན་གསུངས། དེ་ནས་ནག་ཚོ་དང་རྒྱ་བརྩོན་སེང་གཉིས་ཀྱིས་གནས་བརྟན་རཏྣ་ཨ་ཀ་རའི་དྲུང་དུ་གསེར་སྲང་ཕྱེད་ཕུལ་ཏེ་ནག་ཚོ་ལོ་ཙཱ་བས་རྒྱ་བརྩོན་སེང་གེས་བསླབ་པ་ལྟར་གྱི་ཞུ་བ་བྱས་པས། གནས་བརྟན་གྱིས་དེ་ཤིན་ཏུ་ལེགས། ངེད་འདིར་མི་ལ་རྩེགས་པ་མིན་ཏེ། གཞན་གྱིས་སེམས་ཅན་མ་ཐུལ། འདི་ན་ཨ་ཏི་ཤ་མེད་ན་རྒྱ་གར་སངས་རྒྱས་ཀྱི་བསྟན་པའི་འབྱུང་གནས་ཡིན་པ་ལ། འདི་བཏང་ན་སེམས་ཅན་སྤྱིའི་བསོད་ནམས་ཉམས་འགྲོ་བ་ཡིན་མོད། ཅེས་སོགས་གསུངས་སྙན་པོ་མང་པོ་བྱོན།  རེ་ཞིག་ཇོ་བོའི་ཞལ་རས་མཇལ་བ་ཤིན་ཏུ་དཀའ་བ་བྱུང་། དེ་ནས་ཐུགས་རྗེ་ཆེན་པོའི་སྤྲུལ་བས་ཇོ་བོ་བོད་དུ་འབྱོན་པའི་རྟེན་འབྲེལ་སྒོ་དུ་མ་ནས་བསྒྲིགས་ཏེ། ཉིན་གཅིག་རྒྱ་གར་གྱི་པཎྜི་ཏ་དང་རྒྱལ་པོ་གཞན་གྱིས་མ་ཚོར་བར་དབེན་པ་ཞིག་གི་དུས་རྒྱ་བརྩོན་སེང་གེས་ནག་ཚོ་ལོ་ཙཱ་བ་ལ་ཤོག་གསུངས་ནས་ཇོ་བོའི་གཟིམ་ཁང་དུ་ཁྲིད། མཎྜལ་ཁྲུ་གང་བ་ཅིག་ཡོད་པའི་སྟེང་གསེར་ལིང་བ་དེ་བཞག་སིལ་མ་རྣམས་ཚོམ་བུར་བཀོད་ནས་ཇོ་བོ་རྗེ་ལ་ཕུལ་ཏེ་གསོལ་བ་བཏབ།

 ལོ་ཙཱ་བ་རྒྱ་བརྩོན་འགྲུས་སེང་གེས་ཞུས་པར། བོད་ཀྱི་རྒྱལ་པོ་བྱང་ཆུབ་སེམས་དཔའ་ཡིན་ལུགས། ཆོས་རྒྱལ་མེས་དབོན་རྣམ་གསུམ་གྱི་རིང་ལ་ཆོས་ཇི་ལྟར་དར་ལུགས། 

  གླང་དར་མའི་དུས་སུ་བསྟན་པ་ཉམས་ལུགས། བླ་ཆེན་པོའི་དྲིན་ལས་དགེ་འདུན་ཇི་ལྟར་འཕེལ་ལུགས། ལྷ་བླ་མ་ཁུ་དབོན་གྱིས་ཇོ་བོ་སྤྱན་འདྲེན་པའི་ཕྱིར་དཀའ་སྤྱད་མཛད་ལུགས། ཡེ་ཤེས་འོད་ཀྱིས་ཞུ་འཕྲིན་བསྐུར་ལུགས། ད་ལྟ་བོད་ན་ཆོས་ལོག་ཇི་ལྟར་དར་ལུགས་སོགས་ཞིབ་ཅིང་རྒྱས་པ་ཞུས་པས། 

   ཇོ་བོ་རྗེའི་ཞལ་ནས། བོད་ཀྱི་རྒྱལ་པོ་བྱང་ཆུབ་སེམས་དཔའ་ཡིན་པར་འདུག  ཆོས་རྒྱལ་མེས་དབོན་རྣམ་གསུམ་ཡང་བྱང་ཆུབ་སེམས་དཔའ་རྣམ་འཕྲུལ་ཡིན་ཏེ། དེ་བས་བླ་ཆེན་དགོངས་པ་རབ་གསལ་ཡང་བྱང་ཆུབ་སེམས་དཔའི་རྣམ་འཕྲུལ་ཡིན་ཏེ། དེ་མིན་ན་བསྟན་པའི་མེ་རོ་བསླང་བར་མི་ནུས། ལྷ་བླ་མ་དེ་ཀུན་ཡང་བྱང་ཆུབ་སེམས་དཔའ་ཡིན་པར་འདུག བྱང་ཆུབ་སེམས་དཔའི་བཀའ་བཅག་ཏུ་ཡང་མི་རུང་བ་ཡིན། རྒྱལ་པོ་དེ་ལ་ངོ་ཡང་གནོང་པར་ཡོད། ཁོང་གི་མི་ནོར་མང་པོ་ཆུད་ཟོས་ལ་སོང་། ཁྱེད་བོད་རྣམས་སྙིང་རྗེ་བར་ཡང་འདུག་སྟེ། ང་ཡང་ན་སོ་རྒས། ལྡེ་མིག་མང་པོའང་འཛིན། བྱ་བ་མང་པོའི་འཕྲོ་ཡང་ཡོད་པས་བོད་དུ་ཕལ་ཆེར་འགྲོ་མི་ཐུབ། འོན་ཀྱང་ངས་བརྟག་པ་ཞིག་བྱ་ཡིན། རེ་ཞིག་ཁྱེད་རང་གི་གསེར་ཚགས་ཀྱིས་གསུངས་ནས་ཕྱིར་ལ་གཏོད་པར་མཛད།  

    དེ་ནས་ཇོ་བོ་རྗེས་བོད་ཁམས་ཀྱི་གདུལ་བྱ་རྣམས་ལ་ཐུགས་བརྩེ་བས་བོད་དུ་བྱོན་ན་སངས་རྒྱས་ཀྱི་བསྟན་པ་ཕན་མི་ཕན། རང་གི་སྐུ་ཚེའི་བར་ཆད་དུ་འགྱུར་མི་འགྱུར་བརྟག་པ་མཛད་པས། ཐུགས་རྗེ་ཆེན་པོ་དང་རྗེ་བཙུན་སྒྲོལ་མ་སོགས་བོད་དུ་བྱོན་ན་བསྟན་པ་དང་སེམས་ཅན་ལ་ཤིན་ཏུ་ཕན་ཐོགས་པ་འོང་། ཁྱད་པར་དུ་ཨུ་པ་སི་ཀ་གཅིག་ཀ་བརྟེན་ནས་ཕན་ཐོགས་ཏེ་འོང་། ཚེ་ནི་བོད་དུ་བྱོན་ན་ཐུང་བར་འདུག་གསུངས། ཇི་ཙམ་གྱིས་ཐུང་ཞུས་པས། བོད་དུ་མ་བྱོན་ན་དགུ་བཅུ་གོ་གཉིས་ཐུབ། བྱོན་ན་བདུན་ཅུ་རྩ་གསུམ་ལས་མི་ཐུབ་གསུངས། དོན་ལ་ཉི་ཤུ་ཐམ་པས་ཐུང་དུ་སོང་བ་ཡིན་སྐད།

   དེའི་ཚེ་ཇོ་བོའི་ཐུགས་དགོངས་ལ་བོད་ལ་ཕན་ཐོགས་ན་ཚེ་ཐུང་ནའང་ཐུང་། ཚེ་ལ་མི་ལྟ་སྙམ་པའི་ཐུགས་བསྐྱེད་ཆེན་པོ་སྐྱེས་ནས་བོད་རབ་བྱུང་དང་པོའི་ས་སྟག(༡༠༣༨)ལོར་བོད་དུ་ཕེབས་པའི་འགོ་ཚུགས། དེ་ནས་རྒྱ་གར་དགེ་འདུན་གྱི་སྡེ་རྣམས་དང་སྦྱིན་བདག་རྣམས་ཀྱིས་ཇོ་བོ་རྗེ་བོད་དུ་བྱོན་ན་རྒྱ་གར་བསྟན་པའི་འབྱུང་གནས་ཉམས་པར་འགྱུར་ཞེས་ཐམས་ཅད་ཀྱིས་མཐུན་པར་བཀག་ནས་བོད་དུ་འབྱོན་མི་འཇུག་པ་ལ། ཇོ་བོ་རྗེས་ཐབས་མཁས་ཀྱིས་བོད་དུ་འབྱོན་པའི་འཕྲོས་མེད་པར་རྡོ་རྗེ་གདན་སོགས་གནས་ཆེན་རྣམས་སུ་མཆོད་པ་རྒྱ་གང་ཆེ་བ་རེ་བགྱིད་པ་ཡིན་གསུངས་ནས་གདན་གནས་རྣམས་སུ་ཕར་ཕེབས་ཚུར་ཕེབས་མཛད།

         དེའི་དུས་སུ་རྗེ་ནཱ་རོ་པ་ཆེན་པོ་བྲི་ཀ་མ་ལ་ཤཱི་ལའི་གཙུག་ལག་ཁང་དུ་བྱོན་རབ་ཏུ་བྱུང་བ་ཐམས་ཅད་ཀྱིས་བསུ་བ་མཛད། ཇོ་བོ་རྗེ་དང་ཛྙཱ་བ་ཤྲི་མི་ཏྲ་གཉིས་ཀྱིས་ཕྱག་གཡས་གཡོན་ནས་བརྟེན་ཏེ་སྤྱན་དྲངས། སེང་གེའི་ཁྲི་ལ་བཞུགས་པའི་ཚེ་ཁོ་བོ་ཡུན་རིང་དུ་མི་སྡོད་པས་ད་ཕྱིན་སངས་རྒྱས་ཀྱི་བསྟན་པའི་བདག་པོ་ནི་དཱི་པཾ་ཀ་ར་ཁྱེད་ཡིན་ནོ་ཞེས་བསྟན་པ་གཏད་ནས་རྒྱ་གར་ལྷོ་ཕྱོགས་སུ་བྱོན་ཏེ་ཞག་ཉི་ཤུ་ཙམ་ན་མྱ་ངན་ལས་འདས་ཏེ་གདུང་ཞིག་སྤྱན་དྲངས་ཏེ་བྱུང་། [ད་ལྟ་སྙེ་ཐང་སྒྲོལ་མ་ལྷ་ཁང་གི་མཆོད་སྡོང་ན་བཞུགས།]དགྱེས་པ་རྡོ་རྗེའི་རྣལ་་འབྱོར་པ་ཧ་ར་ནག་པོས་ཇོ་བོ་རྗེ་ལ་དཔྱད་འཕྲུལ་མེ་ལོང་ཞེས་བྱ་བ་གནང་སྟེ་ཁྱེད་བོད་དུ་ཕེབས་པར་འདུག    ཁྱེད་ལ་གདན་ས་བྱང་བསྐྱབས་པ་ལྷོ་གཞོལ་པ་ཤིང་རྩི་ནགས་ཚལ་ཅན་ཞིག་འོང་། བོད་ནས་ཚུར་མི་ལྡོག་པར་འདུག བུ་སློབ་མང་པོ་འོང་། དེ་རྣམས་ཀྱིས་དགོན་སྡེ་མང་པོ་བཞེངས་པར་འདུག དེའི་ཚེ་འདི་དགོས་པ་ཡིན།  ཁྱེད་ཀྱི་བུ་སློབ་རྣམས་ཀྱང་བུ་ཚ་བོ་ཡང་ཚ་གསུམ་ཙམ་ལེགས་པར་འོང་། དེ་ནས་ནི་འཚོལ་གྱིས་འགྲོ་ཉེན་ཡོད་གསུངས། 

         ལྷོ་ཕྱོགས་མཐར་སྐྱེས་ཀྱི་གྲོང་ན་མུ་སྟེགས་པ་རྒན་པོ་ལོ་བཞི་བརྒྱ་དང་ལྔ་བརྒྱ་ལོན་པ་ནག་ཚོས་མཐོང་ནས་ཇོ་བོ་ལ་ཞུས་པས་ཇོ་བོས་དེ་དག་གིས་དོན་མེད་རླུང་སེམས་འཛིན་པ་ཡིན། ཕྱི་བ་དང་གྲུམ་པས་ཀྱང་ཤེས་གསུངས། ཇོ་བོའི་ཕྱིར་ནག་ཚོས་ཆུ་འགྲམ་ཞིག་ཏུ་ཕྱིན་པས་བྲམ་ཟེ་རྒན་པོ་ཞིག་གིས་རྒྱལ་པོའི་བུ་ལོ་བཅུ་ལོན་པའི་རོ་ཅིག་ཁུར་ནས་བྱུང་སྟེ་རོ་དེ་ཆུས་བཀྲུས། 

    ཅུང་ཟད་ཅིག་ནས། རྒྱལ་པོའི་བུའི་རོ་དེ་ལངས་ནས་བྲམ་ཟེ་རྒན་པོའི་རོ་དེ་ཆུ་ལ་བསྐུར་ནས་སོང་བས། ཇོ་བོའི་ཞལ་ནས།  གསང་སྔགས་ལ་ཡོན་ཏན་འདི་འདྲ་ཡོད་གསུངས། ཡང་སློབ་མ་དགེ་སློང་ཞིག་བྱུང་ནས་ཁོ་བོ་སྤྱོད་པ་བགྱིད་པར་ཞུ་ཟེར་བ་ལ་ཇོ་བོས་ད་ལྟ་སྔས་པ་མིན་ནམ་གསུངས་པས། དེ་ན་རེ། མི་མོས་པ་མ་མཛད་པར་ཞུ་ཟེར་ནས་ཆོས་གོས་དང་ལྷུང་བཟེད་བཞག  སྤྱང་ཀི་ཆེན་པོ་ཞིག་ཏུ་སྤྲུལ་ནས་དུར་ཁྲོད་ནས་མི་རོ་ཞིག་ཁྱེར་ཏེ་ཟོས། ཡང་དགེ་སློང་དུ་བྱུང་བས་ཇོ་བོའི་ཞལ་ནས་ཅི་བདེར་མཛོད་ཅིག་གསུངས།

       དེ་ནས་རྒྱ་གར་འཁོབ་ཙིན་དྷི་ལི་ཀྲ་མ་བྱ་བར་ཆོས་བློན་ཞིག་གིས་གཙུག་ལག་ཁང་བཞེངས་པའི་ས་གནོན་བཅོལ་བ་ལ་སྔར་འགྲོ་མ་ཁོམ་པས་ད་རེས་འགྲོ་བར་བྱ་བས་ཁྱེད་རྣམས་ཕྱིར་ལོག་ཅིག་གསུངས་ནས་འཁོར་བྱིངས་རྣམས་ཟློག་ཀྱང་གནས་བརྟན་རཏྣ་ཨཱ་ཀ་ར་སོགས་བདག་ཅག་ཀྱང་འགྲོ་བར་ཞུ་གསུངས་ནས་བྱོན་ཏེ་ས་གནོན་མཛད།

    ད་ནི་བལ་ཡུལ་རང་བྱུང་གི་མཆོད་རྟེན་ལ་མཆོད་པར་འགྲོ་བས་ཁྱེད་རྣམས་ལོག་ཕེབས་ཤིག་གསུངས་པ་དང་གནས་བརྟན་རཏྣ་ཨཱ་ཀ་རས་ན་རེ། ད་ངས་གོ་སོང་། ཚེ་དང་ལྡན་པ་འདི་ཡང་སློབ་གཉེར་ལ་འོངས་པ་རེད་མི་འདུག བོད་ཀྱི་རྒྱལ་པོས་ངེད་ཀྱི་མི་རྐུ་བར་བཏང་བ་རེད་འདུག  སྔར་སྤྱན་འདྲེན་བྱུང་བ་ལ་ངེད་ཀྱིས་མ་བཏང་བ་ཡིན།  ད་རེས་ཇོ་བོ་ཡང་གཤེགས་པ་ལ་དགྱེས་པར་འདུག  མ་བཏང་ན་གཞན་དོན་གྱི་བར་ཆད་དུ་འགྲོ།  ཚེ་དང་ལྡན་པ་ཡང་ང་རང་གི་སློབ་མ་ཡིན་པས་མི་དགའ་བ་བྱར་མི་རུང་། ལོ་གསུམ་ཁྱེད་ལ་གཡར་དུ་བཏང་།  དེ་ནས་ཚུར་སྤྱན་དྲོངས། ཁྱེད་ཀྱིས་ཀྱང་བལ་ཡུལ་ཚུན་ཆད་དུ་མ་བསྐྱལ་ན་དམ་ཚིག་ཉམས་སོ། ་ཇོ་བོ་མ་བཞུགས་ན་རྒྱ་གར་ན་བསྟན་པ་ནུབ་པ་འདྲ་བ་ཡིན་ནོ་གསུངས། ནག་ཚོ་ལོ་ཙཱ་བས་ཀྱང་བསྐྱལ་བར་ཞལ་གྱིས་བཞེས་སོ།།

 ཇོ་བོའི་ཞལ་ནས་ལོ་ཙཱ་བ་ལ་གསེར་དེ་རྣམས་ཁྱེར་ལ་ཤོག་གསུངས་ནས་སྔར་གྱི་གསེར་ལིང་བ་དང་བཅས་ཆ་བཞིར་བགོས། ཆ་གཅིག་ཇོ་བོའི་བླ་མ་རྣམས་ལ་བསྔོས། ཆ་གཅིག་རྡོ་རྗེ་གདན་དུ་མཆོད་པ་ལ་བསྔོས། ཆ་གཅིག་གནས་བརྟན་རཏྣ་ཨཱ་ཀ་རས་དབུ་མཛད་པའི་བྲི་ཀ་མ་ལ་ཤཱི་ལའི་དགེ་འདུན་རྣམས་ལ་བསྔོས། ཆ་གཅིག་རྒྱལ་པོ་ལ་གཏད་ནས་བླ་མ་ཚོར་བསྔོས་སོ།།

   ནག་ཚོ་ལོ་ཙཱ་བ་འཕགས་ཡུལ་དུ་ལོ་གསུམ་དང་ཟླ་བ་ལྔ་ཙམ་བཞུགས་རིང་དམ་པའི་ཆོས་བསྒྱུར་བ་ནི་དཔལ་གཤིན་རྗེ་གཤེད་ཀྱི་རྒྱུད་ཆུང་ངུ་དང་། ཤེས་རབ་སྙིང་པོའི་འགྲེལ་བ་སློབ་དཔོན་བྲམ་ཟེ་ཛེ་ཏཱ་རིས་མཛད་པ་དང་། སྨན་དཔྱད་འཚོ་བའི་སྙིང་པོ་དང་། བདུད་རྩི་ཟ་མ་ཏོག་ཁ་འབྱེད་པ་རྣམས་ཇོ་བོ་ཉིད་ཀྱི་དང་ལོ་ཙཱ་བ་གཉིས་ཀྱིས་བསྒྱུར་རོ།།

     དེ་ནས་ཇོ་བོ་འཁོར་བཅས་རྒྱ་གར་གྱི་མཐའ་འཁོབ་ནས་ཚུར་བྱོན་སྐབས་ཕྱི་རོལ་མུ་སྟེགས་པའི་གནས་ཤིག་ཡོད་པས་དེར་མུ་སྟེགས་ཀྱི་སྟོན་པ་བཅོ་ལྔ་ཙམ་ཡོད་པས་དེ་རྣམས་ཀྱིས་ཉིན་ཧྲིལ་པོར་ཇོ་བོ་ལ་རྗེ་མུ་སྟེགས་པའི་ལྟ་བ་དང་ཆོས་ཀྱི་བགྲོ་གླེང་མཛད་པས། ཇོ་བོ་རྗེ་གང་ཉིད་ནི་ཕྱི་རོལ་པའི་རིག་བྱེད་དང་མུ་སྟེགས་ཀྱི་ཆོས་ལའང་ཤིན་ཏུ་མཁས་པ་ཡིན་པས། དེ་རྣམས་ལ་ཆོས་གསུངས། མུ་སྟེགས་སྟོན་པ་བཅོ་ལྔ་པོ་ཤིན་ཏུ་ཡི་རངས་ནས་བསྔགས་བརྗོད་ཀྱི་གདུགས་བཅོ་ལྔ་ཕུལ་ནས། ཇོ་བོའི་བཀའ་འཁོར་གྱི་ནང་དུ་བསྐྱལ།  ཇོ་བོའི་ཞལ་ནས། ཁོ་བོས་མུ་སྟེགས་པ་རྣམས་དགའ་བར་བགྱིས་པ་ཡིན་གསུངས།

       ཡང་མུ་སྟེགས་པ་དེ་རྣམས་ཀྱིས་ནང་ནས་འཁོར་ཉུང་ངུ་འགའ་ཤས་ཀྱིས་བོད་དུ་ནང་པའི་བསྟན་པ་འཕེལ་བར་ཕྲག་དོག་སྐྱེས་ནས་ཇོ་བོ་བཀྲོངས་བར་བཏང་བས་ཇོ་བོས་ཆོམ་རྐུན་བཅིངས་པའི་སྔགས་མཛད་པས་ལྡེར་སོ་བཞིན་དུ་སོང་། ཐག་རིང་པོར་ཕེབས་རྗེས་ཇོ་བོ་རྗེས་སྙིང་རྗེ་གསུངས་ནས་བྱེ་མ་ལ་སྔགས་བཏབ་སྟེ་བསྐུར་ནས་བཏབ་པས་གདོད་འགྲོ་ཤེས་པར་བྱུང་། ཇོ་བོ་རྗེ་འཁོར་དང་བཅས་བལ་ཡུལ་དུ་ཕེབས་པའི་སྐབས་བལ་ཡུལ་གྱི་རྒྱལ་པོ་གྲགས་པ་མཐའ་ཡས་སོགས་དང་པཎྜི་ཏ་རྣམས་ཀྱིས་གཙོས་དད་ལྡན་ཐམས་ཅད་ཀྱིས་གུས་པ་ཆེན་པོས་མཆོད་པའི་བྱེ་བྲག་སྣ་ཚོགས་ཀྱིས་ཕེབས་བསུ་རྒྱ་ཆེར་མཛད། དེའི་དུས་སུ་ལོ་ཙཱ་བ་རྒྱ་བརྩོན་འགྲུས་སེང་གེ་ཤིན་ཏུ་སྙུང་བས་ཇོ་བོའི་ཞལ་ནས། ཁྱེད་ཀྱིས་ཅི་བྱས་གསུངས།

   གཞན་ཅི་ཡང་མ་བགྱིས་མུ་སྟེགས་པ་ཞིག་ལ་རྫུ་འཕྲུལ་མིག་མཐོང་གི་ས་ལ་འཕྱུར་ནས་འགྲོ་བ་ཞིག་ཞུས་པས་དེའི་རྔན་པ་གསེར་ཞོ་དོ་འདོད་པ་ལ་མེད་ནས་ཁོ་མ་འདོད་པས་དེ་དང་འཁོན་འགྲས་བྱུང་། དེ་ནས་ཅུང་ཟད་ཅིག་མ་བདེ་བ་ལགས་ཞུས་པས། ཇོ་བོའི་ཞལ་ནས་སྤྱིར་བཏང་དེ་ལྟ་བུ་ཞུ་བ་མ་ལེགས། དེ་ནས་ང་ལ་མི་བཤད་པར། ཐབས་ཡོད་པ་ཡིན་ཏེ་གསུངས་ནས་བྱིན་རླབས་མཛད་པས་ཕྱིས་དྲག་འདུག་གསུངས། མུ་སྟེགས་པ་དེས་མཐུ་བཏང་ནས་རྒྱ་བརྩོན་འགྲུས་སེང་མཐར་བལ་པོར་གྲོངས། 

      ཁོང་གིས་དཔེ་ཆ་ཁག་ཅིག་བལ་པོར་བཅོལ་བ་མ་ལོན་ནས་དེའི་གསེབ་ཏུ་རྩ་ལྟུང་རྒྱ་ཆེར་འགྲེལ་པ་ཇོ་བོ་དང་རྒྱ་བརྩོན་འགྲུས་སེང་གེས་བྲི་ཀ་མ་ལ་ཤཱི་ལའི་གཙུག་ལག་ཁང་དུ་བསྒྱུར་བ་དེ་ཡང་ལུས། ཕྱིས་བླངས་ཏེ་བོད་དུ་བསྒྱུར་བའི་ཆོས་ལ་འགྱུར་བཟང་བ་ཞིག་ཡིན་ཞེས་གྲགས།  དེ་ལྟ་བུའི་ལོ་ཙཱ་བ་རྒྱ་བརྩོན་འགྲུས་སེང་གེ་འདས་པས་ཇོ་བོའི་ཞལ་ནས་ང་བོད་དུ་ཕྱིན་ཡང་དོན་མེད། ངའི་ལྕེ་ཆད་པས་ཕན་མི་ཐོགས། བོད་སྤྱི་མཐུན་གྱི་བསོད་ནམས་ལ་རྒྱ་བརྩོན་འགྲུས་སེང་གེ་མི་འཆི་ཙམ་གྱི་བསོད་ནམས་ཤིག་མེད་གསུངས། དེར་ནག་ཚོ་ལོ་ཙཱ་བས་བླ་མ་དེ་སྐད་མི་གསུངས་བར་ཞུ། ལོ་ཙཱ་བ་རིན་ཆེན་བཟང་པོ་དང་ལོ་ཆུང་ལེགས་པའི་ཤེས་རབ་དང་དགེ་བའི་བཤེས་གཉེན་ཁུ་ལོ་ཙཱ་བ་ལ་སོགས་མང་དུ་མཆིས། ཁོ་བོས་ཀྱང་ལོ་ཙཱ་བ་ཕྲན་བུ་ཤེས་པས་ཐུགས་འཕྲལ་མ་མཛད་པར་ཞུ་ཞུས་པས། ཇོ་བོའི་ཞལ་ནས་ངེད་རྒྱ་གར་ན་པཎྜི་ཏའི་མྱ་ངན་རྣལ་འབྱོར་པས་བསངས།  རྣམ་འབྱོར་པའི་ཆོས་ཀྱི་རྒྱབ་རྟེན་པཎྜིཏས་བྱེད་པ་ཡིན། དམའ་མོའི་མྱ་ངན་མཆོག་གིས་སེལ་དགོས་པ་ལ་མཐོ་ཤོས་ཀྱི་མྱ་ངན་དམའ་ཤོས་ཀྱི་སེལ་བ་མིན་གསུངས།  དེའི་ཚེ་མ་ག་དྷའི་རྒྱལ་པོ་རྱ་པཱ་ལ་ལ་འཕྲིན་ཡིག་མཛད་པ་དེ་ནག་ཚོས་བསྒྱུར།  དེ་ནས་བལ་ཡུལ་འོལ་ཁ་ཞེས་བྱ་བར་གནས་བརྟན་འོན་པ་བྱ་བ་ཇོ་བོའི་གྲོགས་པོ་ཞིག་གིས་ཡོན་བདག་བྱས་ནས་ཟླ་བ་གཅིག་བཞུགས།

     དེའི་དུས་སུ་གནས་བརྟན་འོན་པས་གསང་སྔགས་མ་ཡིན་པའི་ཕ་རོལ་ཏུ་ཕྱིན་པའི་ལུགས་གཉིས་ཞག་འཕྲུལ་གཅིག་གི་བྱ་བ་ཚང་བ་ཞིག་ཞུས་པས། གནས་བརྟན་ལ་སྔགས་ལ་མི་མོས་ཀྱང་སྔགས་དང་ཕ་རོལ་ཏུ་ཕྱིན་པ་གཉིས་ཀ་ལ་བྱང་ཆུབ་སྒྲུབ་པའི་ཐབས་ཡོད་གསུངས་ནས། སྤྱོད་པ་བསྡུས་པའི་སྒྲོན་མ་མཛད་དེ། ཇོ་བོ་ཉིད་དང་ནག་ཚོ་ལོ་ཙཱ་བས་བསྒྱུར་རོ།། བལ་པོར་སྠ་བི་ཧ་ར་བྱ་བའི་གཙུག་ལག་ཁང་ཞིག་བཞེངས་ཏེ་རྒྱ་བོད་ཀྱི་དགེ་འདུན་ལ་སཱ་ཏྲ་བཙུགས་དེ་བར་ལ་བལ་ཡུལ་དུ་ལོ་གཅིག་ཙམ་བཞུགས་ཞེས་གྲགས་སོ།། བལ་པོའི་རྒྱལ་པོས་ཇོ་བོ་ལ་ཙན་དན་ལས་བྱས་པས་ཁྲིའུ་ཤིང་དེ་ང་ལ་གནང་བ་ཞུ་ཞེས་ཞུས་པར་ཇོ་བོས་ང་བོད་ལ་སྐྱེས་བྱེད་པ་ཡིན་གསུངས་ནས་མ་གནང་བས། བལ་རྒྱལ་དེས་ཆོམ་རྐུན་བཏང་ནས་ལེན་ཐབས་བྱས་ཀྱང་ཇོ་བོས་སྔགས་མཛད་པས་ཆོམ་རྐུམ་རྣམས་ཀྱིས་མིག་ཅེ་རེ་མ་མཐོང་བར་འདུག  དེ་ནས་ལ་ཁར་སླེབས་ནས་བྱེ་མ་ལ་སྔགས་བཟླས་བྱས་ཏེ་གཏོར་བས་ལངས་ནས་སོང་བར་གྲགས།

གསར་འགོད་པ།  ནག་བཟའ་བློ་བཟང་ཆོས་གྲགས།