སྔགས་ལོག་སུན་འབྱིན་གྱི་བསྟན་བཅོས་ལྷ་བླ་མས་མཛད་པ་བཞུགས་སོ། །

མཛད་པ་པོ། རྒྱལ་པོ་ལྷ་བླ་མ།

 པུ་ཧྲངས་ཀྱི་རྒྱལ་པོ་ལྷ་བླ་མའི་ཞལ་སྔ་ནས་བོད་ཡུལ་དབུས་ཀྱི་སྔགས་པ་རྣམས་ལ་བརྫངས་པ། 
གཉེན་པོ་ཞུ་ཞིང་ལྟ་བ་བསྲང་བར་ཞུའོ། །

འོ་ཀོལ་མི་མཇེད་ལྷོ་ཡི་འཛམ་གླིང་འདིར། །

སྟོན་པ་ཤྰཀྱ་ཐུབ་པ་སྐུ་བལྟམས་ཏེ། །

བརྒྱད་ཁྲི་བཞི་སྟོང་ཉོན་མོངས་གཉེན་པོ་རུ། །

སྡེ་སྣོད་གསུམ་ལ་བརྒྱད་ཁྲི་བཞི་སྟོང་གསུངས། །

རྒྱུ་དང་གཉེན་པོ་དོན་དུ་གསུངས་པ་ནི། །

མི་དགེ་བཅུ་དང་མཚམས་མེད་རྣམ་པ་ལྔ། །

དེ་ལས་བཟློག་པའི་ཆོས་ཀྱི་རྒྱུ་འབྲས་ནི། །

བདེན་བཞིའི་སྒོར་ཞུགས་ཉིས་བརྒྱ་ལྔ་བཅུ་གསུངས། །

མཐོང་དང་གོམས་པས་ཉོན་མོངས་བརྒྱད་བཅུ་གཉིས། །

རྟོགས་ནས་རང་གིས་བྱང་ཆུབ་རིམ་གྱིས་སྒྲུབ། །

ཡ་མ་ཟུང་གི་རྫུ་འཕྲུལ་མཐུ་ལྡན་པ། །

རང་རྒྱལ་ཐེག་པར་འགྲོ་བའི་མགོན་པོས་བསྟན། །

བདེན་པ་གཉིས་ཀྱིས་འགྲོ་བའི་དོན་མཛད་ཅིང་། །

ཕྱི་ནང་ཆོས་རྣམས་སྟོང་པའི་ངོ་བོར་མཁྱེན། །

ཕ་རོལ་ཕྱིན་རྣམས་རིམ་གྱིས་རྫོགས་མཛད་པ། །

བླ་ན་མེད་པའི་ཐེག་པར་སྟོན་པས་གསུངས། །

གྲོང་ན་གནས་པའི་མཁན་པོ་སྔགས་པ་རྣམས། །

ཐེག་པ་དེ་གསུམ་གང་དང་འབྲེལ་མེད་པར། །

ངེད་ཅག་ཐེག་ཆེན་ཡིན་ཞེས་ཟེར་བ་ནི། །

ཐེག་པ་ཆེན་པོའི་ཚུལ་སྤྱོད་གཏན་མེད་པར། །

ཐེག་པ་ཆེན་པོ་ཡིན་ཞེས་ཟེར་བ་ནི། །

སྤྲང་པོ་རྒྱལ་པོ་ཡིན་ཞེས་ཟེར་བ་འདྲ། །

ཐེག་ཆེན་མིན་པར་ཐེག་ཆེན་ཁས་འཆེ་བ། །

བོང་བུས་སེང་གེའི་པགས་པ་གྱོན་པ་འདྲ། །

གཟུང་འཛིན་གཉིས་སྤངས་ཚོགས་ཆེན་གཉིས་རྫོགས་པའི། །

ས་བཅུའི་རྒྱལ་ཚབ་འཕགས་པ་བྱམས་པ་ཡང་། །

ཤེས་བྱའི་སྒྲིབ་པ་ད་དུང་མ་བྱང་ན། །

དེ་བས་སྙིགས་མའི་སེམས་ཅན་འཕགས་སམ་ཅི། །

འདོད་ལྔ་བུད་མེད་རྫབ་ལས་མ་ཐར་པར། །

ཆོས་ཀྱི་སྐུ་ཡིན་ཟེར་བ་ཡ་མཚན་ཆེ། །

མི་དགེ་བཅུ་སྤྱོད་ཁྱི་ཕག་བརྟུལ་ཞུགས་ཅན། །

མུ་སྟེགས་འབའ་འཇི་བ་ཡི་ཆོས་སྤྱོད་ཁྱེད། །

ངེད་ཅག་སངས་རྒྱས་ཡིན་ཞེས་ཟེར་བ་ནི། །

བདུད་ཀྱིས་བསླུས་སམ་ཡང་ན་སྨྱོ་བར་ངེས། །

གནའ་སྔོན་བོད་ཡུལ་དབུས་ཆོས་བྱུང་བ། །

ངན་སོང་སྒོ་གཅོད་ཐར་པའི་ལམ་སྟོན་པ། །

སྡེ་སྣོད་རིན་ཆེན་གསུམ་པོ་དར་ཞིང་རྒྱས། །

སྔོན་གྱི་རྒྱལ་པོ་བྱང་ཆུབ་སེམས་དཔའ་ཡིས། །

བཀའ་དང་བསྟུན་ནས་ཆོས་ལོག་འདི་བཀག་སྟེ། །

ཀུན་གྱི་ལྟ་བསྲང་མཐོ་རིས་སྒོ་ཕྱེ་བས། །

སེམས་ཅན་མང་པོ་བླ་མེད་ལམ་དུ་ཆུད། །

ད་ལྟ་ལས་ཟད་རྒྱལ་པོའི་ཁྲིམས་ཉམས་པས། །

རྫོགས་ཆེན་མིང་བཏགས་ཆོས་ལོག་བོད་དུ་དར། །

ལྟ་བ་ཕྱིན་ཅི་ལོག་གི་སར་ཐོགས་པ། །

ཆོས་པར་མིང་བཏགས་སྔགས་ལོག་བོད་དུ་དར། །

དེ་ཡིས་རྒྱལ་ཁམས་ཕུང་སྟེ་འདི་ལྟར་གྱུར། །

སྒྲོལ་བ་དར་བས་ར་ལུག་དམྱལ་ཐག་གཅོད། །

སྦྱོར་བ་དར་བས་མི་རིགས་འཆོལ་པར་འདྲེས། །

སྨན་སྒྲུབ་དར་བས་ནད་པའི་གསོ་རྐྱེན་ཆད། །

བམ་སྒྲུབ་དར་བས་དུར་སའི་མཆོད་པ་སྟོང་། །

མཆོད་སྒྲུབ་དར་བས་མི་ལ་གསོན་སྒྲོལ་བྱུང་། །

སྲིན་པོ་ཤ་ཟ་མཆོད་པས་མི་ནད་ཕྱུགས་ནད་བྱུང་། །

མི་གསུར་དུད་པ་བཏང་བས་ཡུལ་གྱི་ལྷ་ཀླུ་འཕངས། །

དེ་ལྟར་སྤྱོད་པ་ཐེག་ཆེན་ཡིན་ནམ་ཅི། །

ཁྱེད་ཅག་གྲོང་གི་མཁན་པོ་སྔགས་པའི་སྤྱོད་ཚུལ་འདི། །

རྒྱལ་ཁམས་གཞན་དུ་ཐོས་ན་གཞན་དག་ངོ་ཚའི་རྒྱུ། །

ངེད་ཅག་སངས་རྒྱས་ཡིན་ནོ་ཟེར་བའི་སྤྱོད་པ་ནི། །

ལམ་གྱི་སྲིན་པོ་བས་ནི་སྙིང་རྗེ་ཆུང་། །

ཁྲ་དང་སྤྱང་ཀི་བས་ནི་ཤ་དད་ཆེ། །

བོང་རངས་གླང་རངས་བས་ནི་འདོད་ཆགས་ཆེ། །

ཁང་རུལ་སྦུར་གོག་བས་ནི་སྐྱུར་དད་ཆེ། །

ཁྱི་དང་ཕག་པ་བས་ནི་གཙང་བཙོག་ཆུང་། །

གཙང་མ་ལྷ་ཡི་རིགས་ལ་དྲི་ཆེན་དང་། ། 

དྲི་ཆུ་ཁ་ཆུ་ཁྲག་གི་མཆོད་ཕུལ་བས། །

རོ་མྱགས་འདམ་དུ་སྐྱེ་བ་སྙིང་རེ་རྗེ། །

སྡེ་སྣོད་གསུམ་གྱི་ཆོས་ལ་སྐུར་བཏབ་པས། །

མནར་མེད་དམྱལ་བར་སྐྱེ་བ་སྙིང་རེ་རྗེ། །

སྒྲོལ་བས་སྲོག་ཆགས་གསོད་པའི་རྣམ་སྨིན་གྱིས། །

ལས་ཀྱི་སྲིན་པོར་སྐྱེ་བ་སྙིང་རེ་རྗེ། །

སྦྱོར་བས་འདོད་ཆགས་དར་བའི་རྣམ་སྨིན་གྱིས། །

མངལ་གྱི་སྲིན་བུར་སྐྱེ་བ་སྙིང་རེ་རྗེ། །

ཤ་ཁྲག་གཅིན་གྱིས་དཀོན་མཆོག་གསུམ་མཆོད་ཅིང་། །

ལྡེམ་དགོངས་མི་ཤེས་དྲང་ཐད་ཆོས་སྤྱོད་པ། །

གནོད་སྦྱིན་སྲིན་པོར་སྐྱེའོ་ཐེག་ཆེན་པ། །

དེ་ལྟར་སྤྱོད་པའི་སངས་རྒྱས་ཨེ་མ་མཚར། །

ཁྱེད་ཀྱི་སྤྱོད་པ་འདི་ཀས་སངས་རྒྱ་ན། །

རྔོན་པ་ཉ་པ་ཤན་པ་སྨད་འཚོང་མ། །

གཅིག་ཀྱང་མ་ལུས་བྱང་ཆུབ་འཐོབ་པར་ངེས། །

ཁྱེད་ཅག་གྲོང་གི་མཁན་པོ་སྔགས་པ་ཀུན། །

ངེད་ཅག་ཐེག་ཆེན་ཡིན་ཞེས་མ་ཟེར་བར། །

ཕྱིན་ཅི་ལོག་གི་ལྟ་བ་འདི་སྤོངས་ལ། །

མ་ནོར་དྲི་མེད་སྡེ་སྣོད་གསུམ་ལ་སྤྱོད། །

སྔ་ཕྱོགས་མི་དགེ་བཅུ་སྤྱད་མཐོལ་བཤགས་ཀྱིས། །

དེ་ལྟར་མ་བྱས་ཆོས་ལོག་འདི་སྤྱད་ན། །

ལས་ཀྱི་རྣམ་པར་སྨིན་པས་མི་བསླུ་སྟེ། །

སྟོན་པའི་ཞལ་ནས་གསུངས་པའི་བཀའ་དག་ལས། །

ཆོས་ཉིད་སྟོང་པར་གསུངས་པ་བདེན་མོད་ཀྱི། །

ལས་ཀྱི་རྣམ་པར་སྨིན་པར་ཡིད་ཆེས་བྱོས། །

ལས་རྣམས་མི་བསླུ་རང་གི་ཕྱི་བཞིན་འབྲང་། །

འབྱུང་བ་བཞི་ལ་རྣམ་སྨིན་མི་འགྱུར་བར། །

ངན་སོང་གསུམ་གྱི་སྡུག་བསྔལ་མི་བཟོད་པས། །

སྤྱོད་ངན་འདི་སྤོངས་སྡེ་སྣོད་གསུམ་པོ་སྤྱོད། །

ཐེག་པ་ཆེན་པོར་སྨོན་ཅིང་འདོད་པ་རྣམས། །

ཚོགས་གཉིས་གསོག་ཅིང་གཟུང་འཛིན་རྣམ་གཉིས་སྤོངས། །

སྦྱིན་པ་ལ་སོགས་ཕ་རོལ་ཕྱིན་བཅུ་སྤྱོད། །

བྱང་ཆུབ་སེམས་དཔའི་སྤྱོད་པ་མཐའ་དག་སྒྲུབས། །

བྱམས་དང་སྙིང་རྗེས་འགྲོ་དོན་རྫོགས་པར་གྱིས། །

དེ་ལྟར་སྤྱོད་ན་ཐེག་པ་ཆེན་པོ་ཡིན། །

ཁྱེད་ཅག་འབན་འཇི་རྣམས་ལ་བསྐུར་བ་འདིས། །

ཐེག་ཆེན་སྤྱོད་པ་མ་བོར་བསྙེན་པར་གྱིས། །

གཏི་མུག་མུན་པའི་ཚོགས་ཀྱིས་ཤེས་རབ་རྨོངས། །

འདོད་ཆགས་རྒྱ་མཚོའི་འདམ་དུ་རྣམ་ཤེས་བྱིང་། །

ང་རྒྱལ་ཆེན་པོའི་རི་བོས་ངན་འགྲོར་མནན། །

ཕྲག་དོག་རླུང་དམར་འཚུབས་པས་འཁོར་བར་གཡེང་། །

བདག་ཏུ་འཛིན་པའི་མདུད་པ་དམ་པོས་བཅིངས། །

ཐར་པ་ཐོབ་པ་དཀའ་མོར་མི་མཆིའམ། །

པུ་ཧྲངས་ཀྱི་རྒྱལ་པོ་ལྷ་བླ་མས་བོད་ཀྱི་སྔགས་པ་རྣམས་ལ་བརྫངས་པ་རྫོགས་སོ། །

རྩོམ་ཡིག་མཁོ་སྤྲོད་པ། གསར་འགོད་པ། སྨྲ་ཁམས་མཁའ་འགྲོ་རྒྱལ།