བཙན་པོའི་གདུང་རྒྱུད་དངོས་མ་འོད་སྲུང་གི་གདུང་རྒྱུད་བར་མ་ཆད་པ་ཇོ་སྲས་སམ་ཁྲི་ནམ་ལྡེ་བཙན་མདོ་སྨད་ཙོང་ཁའི་མངའ་བདག་ཏུ་བྱོན་སྐབས་སྟོད་མངའ་རིས་ནས་ཆས་ཏེ་ཚོང་བར་བརྫུས་ནས་ནུབ་ལྗོངས་ཏེ་ད་ལྟའི་ཞིན་ཅང་བརྒྱུད་དེ་བྱོན་པ་རེད་ཟེར་བའི་བཤད་སྒྲོས་ཀྱང་བདེན་པར་ཆེ་སྟེ།  སྐབས་དེེ་ལི་ཡུལ་གཙོ་བྱས་ནུབ་ལྗོངས་སུ་ནང་བསྟན་བླ་ལྷག་ཏུ་དར་ཡོད་ལ། དེ་ཙ་ན་ནུབ་ལྗོངས་སུ་གཡང་ཊི་དང་གཞན་པའི་སྐུ་བརྙན་བཟོ་བའི་ལག་རྩལ་ཧ་ཅང་དར་ཡོད་པ་མ་ཟད་རྒྱ་གར་དང་གནའ་བོའི་གྷི་རིག་རོམ་བཅས་ཀྱི་སྒྱུ་རྩལ་གྱི་ཤུགས་རྐྱེན་ཟབ་མོ་ཐེབས་ཡོད་ཅིང་། སངས་རྒྱས་ཀྱི་རིང་བསྲེལ་སྐབས་དེར་རྒྱ་ནག་དང་ནུབ་ལྗོངས་ན་དར་ཁྱབ་ཆེ་ལ།   བཞེངས་སྟངས་དང་རྒྱུ་ཆའི་ངོས་ནས་ཀྱང་ནུབ་ལྗོངས་དང་འབྲེལ་བ་དམ་པོ་ཡོད། བཙན་པོའི་གླིང་ག་འདི་ནི་སྔོན་༦༤༡ལོར་སྲོང་བཙན་སྒམ་པོས་རྒྱ་བཟའ་ཀོང་ཇོ་ཁབ་ཏུ་བསུ་སྐབས་འ་ཞའི་རྒྱལ་བོ་ནོར་སྒར་པོ་དང་ཧོང་ཧྭ་ཀོང་ཇོ་རྣམ་གཉིས་ཀྱིས་རྒྱ་བཟའ་ཀོང་ཇོ་ལ་ཕེབས་བསུ་ཆེད་བཞེངས་པའི་ཕོ་བྲང་གི་རྣམ་པའི་གླིང་ག་ཞིག་ཡིན་པ་མ་ཟད་བཙན་པོའི་མཚན་ཐོག་ནས་བསྐྲུན་པའི་གླིང་ག་སྔ་ཤོས་དེ་ཡིན་ནོ།།