༄༅།།དཔེ་རྒྱན་སོ་གཉིས་ཀྱི་དཔེར་བརྗོད།

༡ ཆོས་དཔེ།
སྟོབས་བཅུའི་དཔལ་མངའ་འདྲེན་མཆོག་ཤཀྱའི་ཏོག །
བྱ་རྒོད་ཕུང་བོར་ཞབས་སེན་འཁོད་པ་ན། །
གསེར་རིའི་ལྷུན་པོར་ཉི་འོད་བྱིན་པ་བཞིན། །
ཉིན་བྱེད་སྟོང་ལས་ལྷག་པའི་སྣང་བ་གསལ། །

༢ དངོས་པོའི་དཔེ།
རྨོངས་མུན་མ་ལུས་དྲུང་ནས་འཐར་བྱེད་ཅིང་། །
བློ་གྲོས་སྣང་བས་འཇིག་རྟེན་གསལ་མཛད་པ། །
བསླབ་གསུམ་ཁུར་གྱིས་དུད་པའི་པྲཛྙཱའི་ཞབས། །
རྟ་བདུན་དབང་བོ་ཉིད་དང་ཡང་དག་མཚུངས། །

༣ བཟློག་པའི་དཔེ།
མཚན་ལྡན་བཤེས་ཀྱི་སྨྲ་སྒོ་ཡངས་པ་ལས། །
གསུང་རབ་བརྡ་ཆད་ཅི་འདོད་འགྲོལ་བ་བཞིན། །
འཇམ་མཉེན་ཡོན་ཏན་འཛིན་པའི་ཆུ་སྐྱེས་ལས། །
བསུང་ཞིམ་དྲི་ངད་སྐྱེད་ཚལ་དཔལ་དུ་ཆགས། །

༤ ཕན་ཚུན་དཔེ།
བརྒྱད་གཉིས་ལང་ཚོའི་ཉམས་ལྡན་འཇམ་དཔལ་དབྱངས། །
ཇི་བཞིན་རྒྱལ་བ་གཉིས་པ་མཁྱེན་པའི་གཏེར། །
དགེ་ལྡན་རང་ལུགས་གསོ་བའི་བྱེད་པོ་བཞིན། །
ཟུར་ཕུད་ལྔ་བ་རྒྱལ་བ་ཀུན་ཀྱི་ཡབ། །

༥ ངེས་པའི་དཔེ།
ཀླུ་སྒྲུབ་དགོངས་པ་ཟབ་དོན་དབུ་མའི་ལུགས། །
ཐུབ་དགོངས་ཇི་བཞིན་འགྲེལ་མཁས་བློ་བཟང་གྲགས།།
བློ་གཏེར་འཇམ་དབྱངས་ཁོ་ནའི་རྗེས་འགྲོ་སྟེ། །
མཚུངས་དཔེ་གཞན་འགའ་ས་ཆེན་འདིར་མ་མཆིས། །

༦ ངེས་མེད་ཀྱི་དཔེ།
མཁྱེན་རབ་རལ་གྲི་གདེང་བའི་ཙོང་ཁ་བ། །
ཤིང་རྟ་ཆེན་པོ་ཀླུ་སྒྲུབ་གཟུགས་ཀྱི་ཟླ། །
གཞན་དུ་གང་དང་རྗེས་མཚུངས་སྲིད་པ་འདིར། །
མཆིས་ན་དེ་ཡང་དཔེ་ཟླ་ཅིའི་མི་འོས། །

༧ བསྡུས་པའི་དཔེ།
མཐོང་ན་དྲན་པ་འཐོམ་པའི་མིག་འཛུམ་ནི། །
ཁོ་ནས་འཆི་མེད་བུ་མོ་དང་མཚུངས་མིན། །
བྱིན་ཕྲའི་རྐེད་སྐབས་གཡོ་བ་དང་བཅས་པར།།
འཛུམ་དཀར་ལྷུག་ལྷུག་གྲོལ་བ་འདིས་ཀྱང་ངོ་། །

༨ ཕུལ་བྱུང་གི་དཔེ།
དུང་བའི་མྱོས་བུམ་བུ་མོའི་ལག་ཟུང་མཚམས། །
དབྱར་སྐྱེས་ཆུ་འཛིན་གསར་བ་ནམ་མཁའི་ངོས། །
རྟེན་གཞི་ཙམ་ལས་ཁྱད་པར་གཉིས་པ་ཞིག །
དཔྱད་གསུམ་བློ་ཡིས་བརྟག་ཀྱང་མ་འཚལ་ལོ། །

༩ རབ་བཏགས་ཀྱི་དཔེ།
ལྗོན་ཤིང་ལྕུག་མ་རླུང་གིས་བསྐྱོད་པ་ཡིས། །
མཛེས་མའི་ནག་སྣུམ་སྐྲ་ལོར་སྙེམས་མི་དགོས། །
སྐུད་པས་དཀྲི་བར་ནུས་པའི་ལེགས་འགྲོ་ཡི། །
མཇུག་མ་ཡིས་ཀྱང་དེ་ལ་སྒྲུན་པར་ནུས། །

༡༠ རྨད་བྱུང་གི་དཔེ།
གླང་བོའི་འགྲོས་ཅན་སྒེག་ལྡན་ལུས་ཕྲ་མས། །
མི་དབང་སྲས་གཙང་སྲས་པོ་སྦྲུམ་ནུས་ན། །
སྐྱོན་ལྔས་ཡོངས་དག་སྒྱུ་འཕྲུལ་ལྷ་མོ་ཡི། །
མཛེས་པ་ཟུམ་པར་བྱེད་ལ་ངལ་བ་བྲལ། །

༡༡ རྨོངས་པའི་དཔེ།
སྟོན་རླུང་གསེར་བུས་ཆུ་སྐྱེས་མགོ་ལྕོགས་དག །
དལ་གྱིས་ཆུ་བོའི་གཞུང་ལ་བསྒྱུར་བ་ན། །
མཛའ་མོ་ཆུ་ལྷས་འཕྲོག་ཅེས་བླུན་པོ་འགས། །
ཆོ་ངེས་འདོན་ཞིང་འགྲེས་ལོག་བྱེད་འདི་འཚར། །

༡༢ ཐེ་ཚོམ་གྱི་དཔེ།
མཛེས་སྡུག་དཔལ་ཆགས་རི་བོ་ཏི་སེ་ལ། །
རྟ་བདུན་དབང་བོའི་འོད་ཀྱིས་ཁྱབ་བམ་ཅི། །
ཡང་ན་ནོར་བུ་འཛིན་པ་མཚན་དཔེ་ཡིས། །
བརྒྱན་པ་ཡིན་ནམ་བདག་ཡིད་འཕྱང་མོ་ཉུག །

༡༣ གཏན་འབེབ་ཀྱི་དཔེ།
འཛུམ་དཀར་ལྷུག་ལྷུག་གྲོལ་བའི་མོད་ཉིད་ལ། །
གཟི་ཡི་རི་མོ་བཀྲ་བའི་མིག་ཟུང་གིས། །
ཡིད་ཀྱི་བརྟན་པ་ཡོད་དགུ་འཕྲོག་པ་འདི། །
ན་ཆུང་བུ་མོ་ཡིན་གྱི་ཟླ་བ་མིན།

༢༡ ངོ་བསྟོད་ཀྱི་དཔེ།
བཞིན་ལེགས་བུ་མོ་བརྩེ་དགའ་སྟེ། །
མཚོ་བྱུང་མ་ཉིད་བྱམས་སྙིང་རྗེ། །
འདི་ཀོ་འདྲ་བའི་ཆོས་དག་གིས། །
ཁྱད་པར་མེད་ཅེས་གཅིག་ཏུ་བརྗོད། །