༄༅།། འཛམ་གླིང་གི་དུས་ཚོད།

རྩོམ་པ་པོ།  དུང་དཀར་བློ་བཟང་འཕྲིན་ལས།

   དུས་ཁུལ་ཉི་ཤུ་རྩ་བཞི་པོ་སོ་སོའི་ཉེ་ལོགས་ཀྱི་ཚད་ལྡན་དུས་ཚོད་བར་དུ་ཆུ་ཚོད་རེ་རེའི་བར་ཁྱད་ཡོད་པ་དང་། རང་རང་སོ་སོའི་ཤར་ཕྱོགས་ཀྱི་ཆུ་ཚོད་ནི་རང་ས་ལས་ཆུ་ཚོད་གཅིག་གི་སྔ་བ་ཡོད་པ། དཔེར་ན། པེ་ཅིན་གི་རེས་གཟའ་ཟླ་བའི་ཉིན་དགུང་ཆུ་ཚོད་བཅུ་གཉིས་པར་སླེབས་སྐབས། ཤར་ཁུལ་དགུ་བར་གནས་པའི་རི་པན་གྱི་རྒྱལ་ས་ཏུང་ཅིང་གི་རེས་གཟའ་ཟླ་བའི་ཕྱི་དྲོའི་ཆུ་ཚོད་དང་བོར་སླེབས་ཟིན་པ་དང་།
      རང་རྒྱལ་གྱི་ནུབ་ཕྱོགས་དབྱིན་ཇི་རྒྱལ་ཁབ་ཀྱི་ནམ་ལངས་ཁའི་ཆུ་ཚོད་བཞི་བ་མ་གཏོགས་སླེབས་མེད་ཅིང་། ཨ་མེ་རི་ཁའི་གྲོང་ཁྱེར་ཧ་ཧྲན་ཏུན་ལ་གཟའ་ཉི་མའི་ནམ་ཕྱེད་མ་ཟིན་གྱི་ཙམ་གྱི་ཆུ་ཚོད་ཉི་ཤུ་རྩ་གསུམ་པར་མ་གཏོགས་སླེབས་མེད་པ་ལྟ་བུ་རེད།   རྒྱལ་སྤྱིའི་ཐོག་ད་དུང་གཏན་འབེབས་བྱས་དོན་དུ། ཞི་བདེ་རྒྱ་མཚོ་ཆེན་པོའི་གཞུང་ཐིག་བརྒྱ་དང་བརྒཡད་ཅུ་བ་དེ་ནི་རྒྱལ་སྤྱིའི་མཚོ་ཐོག་གི་དུས་ཚོད་འགྱུར་ལྡོག་གཏོང་སའི་མཚོན་ཐིག་ཡིན་པར་གཏན་འཁེལ་བྱས་ཡོད། དེ་ཡང་གྲུ་གཟིངས་ཐོག་ནས་ཞི་བདེ་རྒྱ་མཚོ་ཆེན་པོ་བརྒྱུད་འགྲོ་མཁན་ཡིན་ན།  ནུབ་ནས་ཤར་ཕྱོགས་སུ་ཁ་གཏད་དེ་འགྲོ་སྐབས་ས་ཡི་གོ་ལའི་རང་འཁོར་གྱི་ཁ་ཕྱོགས་དང་མཐུན་ཡིད་པས་དེ་ཉིན་གྱི་རེས་གཟའ་དེ་ནས་ཉིན་གཅིག་ཕྱི་བཤོལ་བྱ་དགོས་(དཔེར་ན། དེ་ཉིན་རེས་གཟའ་མིག་དམར་ཡིན་ན་རེས་གཟའ་ཟླ་བར་ཕྱི་བཤོལ་བྱ་དགོས་པ) དེ་ལས་ལྡོག་སྟེ་གྲུ་གཟིངས་ཤར་ནས་ནུབ་ཕྱོགས་སུ་ཁ་གཏད་ནས་འགྲོ་སྐབས་ས་ཡི་གོ་ལའི་རང་འཁོར་གྱི་ཁ་ཕྱོགས་དང་གདོང་གཏད་ནས་འགྲོ་གི་ཡོད་པས་དེ་ཉིན་གྱི་རེས་གཟའ་དེ་ཉིན་གཅིག་སྔ་བསྣུར་བྱ་དགོས་པ(དེ་ཉིན་རེས་གཟའ་མིག་དམར་ཡིན་ན་རེས་གཟའ་ལྷག་པར་མཆོང་དགོས) ལྟ་བུ་ཡིན།  གནམ་གྲུའི་ཐོག་ནས་འགྲོ་སྐབས་ཀྱང་དེ་དང་འདྲ་བར་ཕྱི་བཤོལ་དང་སྔ་བསྣུར་བྱེད་དགོས།
      བོད་ས་གནས་སད་པེ་ཅིན་གི་ཡུལ་གྱི་དུས་ཚོད་བར་ཁྱད་ནི། དབྱར་སྟོན་ཉིན་མཚན་མཉམ་པའི་སྐབས་ཆུ་ཚོད་གཅིག་དང་སྐར་མ་སུམ་ཅུའི་བར་ཁྱད་ཡོད་ཅིང་། དབྱར་དགུན་ཉི་ལྡོག་སྐབས་ཆུ་ཚོད་གཉིས་ཀྱི་བར་ཁྱད་ཡིད་པ་དུས་ཡུན་རིང་བོར་ཐེངས་མང་བརྟག་དཔྱད་བྱས་པ་ལས་ཤེས་རྟོགས་བྱུང་།

རྩོམ་ཡིག་མཁོ་སྤྲོད་པ། གསར་འགོད་པ།  ནག་བཟའ་བློ་བཟང་ཆོས་གྲགས།