༈རྫ་དཔལ་སྤྲུལ་གྱིས་མཛད་པའི་ཞལ་གདམས་རྐྱེན་ངན་གྲོགས་སུ་འཆར་བའི་ཉམས་ལེན་བཞུགས་སོ།།

སྐྱིད་ན་མི་དགའ་སྡུག་ན་དགའ།།

སྐྱིད་ན་ཉོན་མོངས་དུག་ལྔ་འབར།།

སྡུག་ན་སྔོན་བསག་ལས་ངན་འཛད།།

སྡུག་བསྔལ་བླ་མའི་ཐུགས་རྗེ་ཡིན།།

བསྟོད་ན་མི་དགའ་སྨད་ན་དགའ།།

བསྟོད་ན་ང་རྒྱལ་ཁེངས་སེམས་ཆེ།།

སྨད་ན་རང་སྐྱོན་ཐེར་ལ་འབུད།།

མི་ཁ་ལྷ་ཡི་ཕ་འབབ་ཡིན།།

མཐོ་ན་མི་དགའ་དམའ་ན་དགའ།།

མཐོ་ན་ཕྲག་དོག་ང་རྒྱལ་སྐྱེ།།

དམའ་ན་བག་ཡངས་དགེ་སྦྱོར་འཕེལ།།

དམན་ས་གོང་མའི་གདན་ས་ཡིན།།

འབྱོར་ན་མི་དགའ་རྒུད་ན་དགའ།།

འབྱོར་ན་གསོག་སྲུང་སྡུག་བསྔལ་ཆེ།།

རྒུད་ན་དཀའ་སྤྱད་ལྷ་ཆོས་འགྲུབ།།

སྤྲང་ལུས་ཆོས་པའི་གཏད་སོ་ཡིན།།

བྱིན་ན་མི་དགའ་འཕྲོག་ན་དགའ།།

བྱིན་ན་ལན་ཆགས་འཁུར་པོ་འཕེལ།།

འཕྲོག་ན་ཚེ་རབས་བུ་ལོན་སོད།།

ཆོག་ཤེས་འཕགས་པའི་སྤྱི་ནོར་ཡིན།།

གཉེན་ལ་མི་དགའ་དགྲ་ལ་དགའ།།

གཉེན་གྱིས་ཐར་ལམ་བར་དུ་གཅོད།།

དགྲ་བོ་བཟོད་པའི་ཡུལ་དུ་བྱེད།།

རོ་སྙོམས་ཉམས་ལེན་གནད་འགག་ཡིན།།

ཆོས་བཞིན་མཛད་ན་དེ་འདྲ་དགོས།།

བློ་ཐག་ཆོད་ན་དེ་འདྲ་དགོས།།

རི་ཁྲོད་འཛིན་ན་དེ་འདྲ་དགོས།།

རྒྱལ་ཁམས་འགྲིམས་ན་དེ་འདྲ་དགོས།།

རྩོམ་ཡིག་མཁོ་སྤྲོད་པ། གསར་འགོད་པ་བན་ཤུལ་འབུམ་རྩེ་ཡག