༄༅།།ས་སྐྱ་ལེགས་བཤད་ལས་རབ་བྱེད་དགུ་བ་ཆོས་བརྟགས་པ་བཞུགས་སོ།།

འགྲོ་མགོན་སངས་རྒྱས་བཞུགས་བཞིན་དུ།།

སྟོན་པ་གཞན་ལ་གུས་བྱེད་པ།།

ཡན་ལག་བརྒྱད་ལྡན་ཆུ་འགྲམ་དུ།།

བ་ཚྭའི་ཁྲོན་པ་བརྐོ་བ་ཡིན།།

དངོས་པོ་གང་དང་གང་ལ་ཡང་།།

གོམས་ན་དཀའ་བ་ཅི་ཡང་མེད།།

བཟོ་ཡི་རིག་བྱེད་སྦྱངས་པ་ལྟར།།

དམ་ཆོས་དཀའ་བ་མེད་པར་འགྲུབ།།

གང་ཞིག་ཉུང་ངུས་ཆོས་ཤེས་པ།།

དེ་ཡི་ལོངས་སྤྱོད་ཟད་མི་ཤེས།།

ཆོག་ཤེས་མེད་པར་འཚོལ་བ་ལ།།

སྡུག་བསྔལ་ཆར་བཞིན་རྒྱུན་དུ་བབ།།

ནམ་དགོས་ཚེ་ན་ལེན་པ་ཡི།།

ནོར་ནི་སྦྱིན་པར་ཐུབ་པས་གསུངས།།

བསགས་པའི་ནོར་ནི་སྦྲང་རྩི་ལྟར།།

ནམ་ཞིག་གཞན་གྱིས་སྤྱོད་པར་འགྱུར།།

འཇིག་རྟེན་འདི་ན་བུན་བཏང་བས།།

དངོས་པོ་ཐོབ་པའི་ངེས་པ་མེད།།

སློང་ལ་བྱིན་ན་འབད་མེད་པར།།

ཆུང་ཡང་བརྒྱ་འགྱུར་ཐོབ་པ་ཡིན།།

འཇུངས་ལ་ཕྱུག་པོ་མི་སྲིད་ཅིང་།།

གཏོང་ལ་དབུལ་བོ་མི་སྲིད་པས།།

འཇུངས་ལ་ནོར་དད་ཆུང་བ་དང་།།

གཏོང་བ་ནོར་ལ་རྔམས་པ་འདྲ།།

སྦྱིན་ན་དབུལ་གྱུར་དོགས་པ་ཡིས།།

འཇུངས་པས་སྦྱིན་པ་མི་གཏོང་ལ།།

སེར་སྣ་ངེས་པར་ཕོངས་འགྱུར་བས།།

བློ་ལྡན་ཅུང་ཟད་རྙེད་པ་གཏོང་།།

བཞག་ན་ནོར་བསྐྱེད་མི་འཕེལ་བས།།

ཚོང་པས་ཟོང་རྣམས་འགྲེམས་པ་ལྟར།།

བསགས་ན་དབང་ཕྱུག་མི་ཐོབ་པས།།

མཁས་པས་ཚོང་བཞིན་ཕྱོགས་བཅུར་སྟེར།།

བྱེ་བ་སྟོང་ཕྲག་གཏེར་ཡོད་ཀྱང་།།

སུ་ཞིག་ལ་ཡང་གཏོང་མི་བྱེད།།

དེ་དག་འཇིག་རྟེན་འདི་དབུལ་ཞེས།།

ཐོས་མང་རྣམས་ཀྱིས་དེ་སྐད་བཤད།།

རིགས་རྒྱུད་རྒུད་ཀྱིས་དོགས་པས་ན།།

བློ་ཆུང་ཅུང་ཟད་རྙེད་པ་སོགས།།

མཁས་པའི་རིགས་རྒྱུད་མཐོ་ཐོབ་ཕྱིར།།

གསུག་བཞིན་གཞན་ལ་སྦྱིན་པ་གཏོང་།།

རིགས་རྒྱུད་ཕྱུག་པོར་བྱེད་སྙམ་ནས།།

རང་ཉིད་བཙོངས་ནས་བུ་ལ་སྟེར།།

བུ་ངན་ཕ་ལ་རྒོལ་བཞིན་དུ།།

ནོར་རྣམས་བརླགས་ནས་ཁྱི་བཞིན་འཁྱམས།།

ཇི་ལྟར་ཕ་མ་བུར་བྱམས་ཀྱང་།།

དེ་ལྟར་བུ་ཚས་ཕ་མ་མིན།།

ཕ་མས་བུ་ཚ་བསྐྱངས་བསྐྱངས་ནས།།

ཕ་མ་རྒས་ན་བུ་ཚས་བརྙས།།

ནོར་གསོག་འཇུངས་པའི་ཕྱུག་པོ་དང་།།

དགོས་སར་གཏོང་བའི་ཕྱུག་པོ་གཉིས།།

རང་རང་རིགས་རྒྱུད་གཉིས་ཀ་ལ།།

འཇིག་རྟེན་གཞན་གྱི་བྱེ་བྲག་འབྱེད།།

སྲིད་པའི་ཁོལ་པོར་འགྱུར་བ་རྣམས།།

སྲོག་དང་བསྡུས་ནས་ནོར་ཕྱིར་འབྲེང་།།

ཆོག་ཤེས་ཅན་གྱིས་ནོར་རྙེད་ཀྱང་།།

དེ་པ་བཞིན་དུགཞན་ལ་སྟེར།།

བདོག་པ་བཏང་བས་སྦྱིན་པ་རྫོགས།།

དེ་ལ་ཁྲོ་ན་བཟོད་པ་འཕེལ།།

ཚིམ་ན་རྗེས་སུ་ཡི་རངས་བསྒོམས།།

དེས་ན་སྦྱིན་པ་ཆོས་ཀྱི་མཆོག།

སྡུག་བསྔལ་རྒྱ་མཚོའི་སྣོད་གྱུར་བའི།།

ལུས་འདི་དགྲ་དང་འདྲ་མོད་ཀྱི།།

བློ་དང་ལྡན་པས་འཁོལ་ཤེས་ན།།

འདི་ལ་བསོད་ནམས་རྟེན་དུ་རུང་།།

སྐད་ཅིག་འཇིག་པའི་ཚེ་ལ་ཡང་།།

དགེ་བའི་བག་ཆགས་རིང་དུ་ཁྱེར།།

རླུང་གིས་བགོས་པའི་ཙན་དན་དྲི།།

རིང་དུ་ཐུལ་ཡང་དགའ་བ་སྐྱེ།།

ཡུན་རིང་བདེ་བ་སྤྱད་སྤྱད་ཀྱང་།།

འབྲལ་བའི་སྡུག་བསྔལ་ལྷག་པར་ཆེ།།

རང་དབང་མེད་པར་འཆི་དགོས་པ།།

འདི་ལ་རྟག་འཛིན་དེ་དག་བརླག།

བཤེས་གཉེན་ཀུན་གྱིས་མཐའ་བསྐོར་ཏེ།།

བཅོམ་བསྐྱུངས་མིག་རྩ་ཤིན་ཏུ་ཞན།།

གང་ཕྱོགས་འགྲོ་བའི་གཏོལ་མེད་པ།།

དེ་ཚོ་དགེ་བ་གཞན་རྣམས་ཕུང་།།

ངན་སོང་གསུམ་གྱི་ནད་རྣམས་ནི།།

མ་བྱུང་པ་ནས་གསོ་བར་བྱ།།

གནམ་ལྕགས་མགོ་ལ་བབ་པ་ལྟར།།

ཐོག་ཏུ་བབས་ན་ཅི་བྱར་ཡོད།།

མཛའ་བཤེས་ཀུན་དང་བྲལ་བ་དང་།།

ངེས་པར་འཆི་བ་ཤེས་བཞིན་དུ།།

ད་དུང་བདེ་བར་གཉིད་ཕེབས་པ།།

བདག་ཉིད་སྙིང་ལ་ཅི་ཞིག་ཞུགས།།

གང་གིས་བརྩོན་པར་མི་ནུས་ཀྱང་།།

ཅི་ནས་ངན་འགྲོར་མི་ལྷུང་བྱ།།

དཔའ་བོས་དགྲ་སྡེ་མ་བསད་ནའང་།།

རང་ཕྱོགས་གསོད་པར་བྱེད་དམ་ཅི།།

འཕྲལ་དུ་ཅུང་ཟད་སྡུག་ན་ཡང་།།

རྒྱུན་དུ་བདེ་བ་མཁས་པས་བསྟེན།།

གཏར་བསྲེག་དག་གིས་ནད་འདོན་པ།།

སྨན་པ་མཁས་པའི་གཞུང་ལུགས་ཡིན།།

གལ་ཏེ་གཞན་དག་ཕུན་ཚོགས་པས།།

བདག་གི་ཡིད་ལ་མི་བཟོད་ན།།

དེ་ཡིས་རང་འབྱོར་འཇོམས་པའི་ཕྱིར།།

རང་ལ་ཕྲག་དོག་བྱེད་པར་ཟད།།

གནོད་པ་བྱ་ཕྱིར་དགྲ་འཇོམས་ན།།

ཁྱེད་ཀྱི་ཁྲོ་བ་ཁོ་ན་ཆོམས།།

ཁྲོ་བས་འཁོར་བ་ཐོགས་མེད་ནས།།

བདག་ལ་གནོད་པ་མཐའ་ལས་འདས།།

གལ་ཏེ་དགྲ་ཀུན་བརླག་འདོད་ན།།

བསད་པས་དེ་ཀུན་ག་ལ་འཛད།།

རང་གི་ཁྲོ་བ་གཅིག་བཅོམ་པས།།

དགྲ་ཀུན་ཅིག་ཅར་བསད་པ་ཡིན།།

མཐུ་ཆེན་གཟུ་ལུམ་སྤྱོད་པ་ལ།།

ཁྲོས་ན་རང་ལ་ལྷག་པར་གནོད།།

དམ་པ་ཉེ་བར་ཞི་བ་ལ།།

ཁྲོ་བ་བྱ་རྒྱུ་ག་ལ་ཡོད།།

སྡོང་བུ་གཅིག་ལས་སྐྱེས་པ་ཡི།།

རྩྭ་རྣམས་རླུང་གིས་ཕྱོགས་བཅུར་སྟོར།།

དེ་བཞིན་ལྷན་ཅིག་སྐྱེས་པ་ཡིས།།

སྐྱེ་བོ་ལས་ཀྱིས་སོ་སོར་འབྲལ།།

སྔོན་ཆད་མ་མཐོང་འབྲེལ་བར་འཐམ།།

དེ་ནས་སླར་ཡང་གཞན་འགྲོ་བའི།།

མི་དེ་བདག་དང་ཅུར་འབྲེལ་ན།།

ཤི་ནས་མྱ་ངན་ཆེན་པོ་བྱེད།།

རང་དོན་འབད་པས་བསྒྲུབ་འདོད་ན།།

དེ་ཡི་དང་བོར་གཞན་དོན་སྒྲུབས།།

རང་དོན་ཁོ་ནར་གཙོར་བྱེད་པ།།

དེ་ཡིས་རང་དོན་འགྲུབ་མི་སྲིད།།

མི་གང་གཞན་དོན་གཙོར་བྱས་ན།།

གཡོ་ཅན་རང་དོན་སྒྲུབ་པ་འདྲ།།

རང་དོན་འབའ་ཞིག་གཙོར་བྱེད་པ།།

གཞན་མགོ་འདོན་ཕྱིར་དྲང་བ་འདྲ།།

བློ་ལྡན་ཆེ་འདི་སྒྲུབ་ན་ཡང་།།

ཆོས་ཀྱིས་སྒྲུབ་ན་བདེ་བར་འགྲུབ།།

དམ་པ་རྣམས་དང་ཆོམ་་རྐུན་གྱི།།

ཕུན་སུམ་ཚོགས་པའི་ཁྱད་པར་ལྟོས།།

མི་རྣམས་ཚེ་ཐུང་དེ་ཡི་ཕྱེད།།

མཚན་མོ་གཉིད་ལོག་ཤི་དང་འདྲ།།

ན་རྒས་སྡུག་བསྔལ་སྣ་ཚོགས་ཀྱིས།།

ཕྱེད་པོའང་བདེ་བར་སྤྱད་དུ་མེད།།

སྐྱེ་བོ་ཀུན་གྱི་དྲུང་སྡོད་པའི།།

འཆི་བདག་གལ་ཏེ་མངོན་སུམ་མཐོང་།།

བྱ་བ་གཞན་དག་ལྟ་ཅོ་སྨྲོས།།

ཟ་བར་དྲན་པའི་ནུས་པ་མེད།།

ཁྱེད་ཀྱི་བྱ་བ་ཟིན་ནམ་ཞེས།།

འཆི་བདག་སྡོད་པར་མི་འགྱུར་གྱིས།།

ངེས་པར་བྱ་དགོས་ཡོད་ན་ནི།།

དེ་རིང་ཉིད་དུ་བསྟུན་ལ་གྱིས།།

བདག་གི་བྱ་བ་མ་ཟིན་པས།།

རེ་ཞིག་དེ་རིང་ཁྱེད་བཞུགས་ཞེས།།

མཆི་མས་བརྣངས་ཏེ་གསོལ་བཏབ་ཀྱང་།།

འཆི་བདག་བཅོས་སུ་ག་ལ་རུང་།།

འདུ་འཛི་སྤངས་པ་བདེ་བ་སྟེ།།

མིན་ན་བཟང་བོ་རྣམས་དང་འགྲོགས།།

དུག་སྦྲུལ་གསོ་བ་ག་ལ་རུང་།།

གསོ་ན་བཟླས་བརྗོད་བརྩོན་པར་བྱ།།

སེམས་ནི་རྣམ་པར་གཡེང་བ་ལ།།

དམ་ཆོས་སྒྲུབ་པའི་གོ་སྐབས་མེད།།

ཉེ་བར་ཞི་བར་གནས་པ་ལ།།

སེམས་ནི་ལས་རུང་ཤིན་ཏུ་ཉེ།།

དམིགས་པ་ཀུན་ལ་རབ་མཁས་ཤིང་།།

ཏིང་ངེ་འཛིན་གྱི་སེམས་དུལ་བ།།

འཕགས་པའི་ཆོས་ལ་རབ་སྦྱངས་པ།།

ཡོན་ཏན་ཀུན་གྱི་ཞིང་ས་ཡིན།།

བླུན་པོ་སློབ་པ་ངོ་མཚར་འཛིན།།

མཁན་རྣམས་མ་བསླབས་ངོ་མཚར་འཛིན།།

དེས་ན་མཁས་པ་རྒས་གྱུར་ཀྱང་།།

ཕྱི་མའི་དོན་དུ་རིག་པ་སློབ།།

ཤེས་རབ་མེད་པའི་རྒྱུ་མཚན་གྱིས།།

བླུན་པོ་ཡོན་ཏན་མི་སློབ་ལོ།།

བརྟགས་ན་ཤེས་རབ་མེད་ཉིད་ཀྱིས།།

བླུན་པོས་འབད་པ་ལྷག་པར་དགོས།།

སྐྱེ་བ་སྔོན་མར་མ་བསླབས་པས།།

ཚེ་འདིར་བླུན་པོར་མཐོང་བས་ནི།།

ཕྱི་མར་བླུན་པོ་སྐྱེ་དོགས་པས།།

ཚེ་འདིར་དཀའ་ཡང་འབད་དེ་མཉན།།

བསྒོམས་ན་ཐོས་པ་མི་དགོས་ཞེས།།

བླུན་པོ་བློ་རྒྱ་ཆུང་ངུ་སྨྲ།།

ཐོས་པ་མེད་པར་བསྒོམ་པ་ཙམ།།

འབད་ཀྱང་དུད་འགྲོའི་སྒྲུབ་ཐབས་ཡིན།།

རྒྱུ་འབྲས་བསླུ་བ་མེད་པ་འདི།།

ཐམས་ཅད་མཁྱེན་པའི་ཁྱད་ཆོས་ཡིན།།

མ་བསླབས་པ་ལ་ཀུན་མཁྱེན་དུ།།

འགྲོ་ན་རྒྱུ་འབྲས་ག་ལ་བདེན།།

ཐོས་པ་མེད་པའི་བསྒོམ་པ་དེ།།

རེ་ཞིག་གྲུབ་ཀྱང་མྱུར་ཏུ་འཇིག།

གསེར་དངུལ་ལེགས་པར་བཞུ་ན་ཡང་།།

མེ་དང་བྲལ་ན་སྲ་བར་འགྱུར།།

ཤེས་རབ་ཀྱིས་ནི་གཏིང་བརྟགས་ནས།།

ཉེས་རྒྱུ་སྤོང་བ་སྒོམ་པ་ཡིན།།

ལུས་ཀྱི་དྲི་མ་བཀྲུས་པ་ལྟར།།

བསྒོམས་ཀྱང་རིང་ཞིག་ལོན་ནས་ལྡོག།

རྒྱུ་འབྲས་ཕུལ་བྱུང་མ་ཚོགས་པར།།

བདག་མེད་རྟོགས་ཀྱང་འཚང་མི་རྒྱ།།

ཐབས་མཆོག་དག་གིས་མ་བསྒྲུབས་པའི།།

བདེན་པར་མཐོང་ཡང་དགྲ་བཅོམ་མིན།།

དེས་ན་ཆོས་རྣམས་ལེགས་རྟོགས་ཏེ།།

ཏིང་ངེ་འཛིན་ལ་སེམས་བཞག་ན།།

ཉེས་པ་བག་ཆགས་དང་བཅས་པ།།

གང་གིས་སྤངས་པ་རྫོགས་འཚང་རྒྱ།།

གང་ལ་བློ་གྲོས་མི་ལྡན་ན།།

བསྟན་བཅོས་ལེགས་ཀྱང་སུ་ཞིག་ལེན།།

ནོར་བུས་སྤྲས་པའི་གསེར་གྱི་རྒྱན།།

མཛེས་ཀྱང་བ་གླང་ག་ལ་ལྟ།།

མཁས་པ་རྣམས་ཀྱིས་ལེགས་བཤད་ཀུན།།

ཤིན་ཏུ་བདེན་པར་གོ་བཞིན་དུ།།

དེ་དོན་ཉམས་སུ་མི་ལེན་ན།།

བསྟན་བཅོས་ཤེས་ཀྱང་ཅི་ཞིག་ཕན།།

རང་ལ་དགོས་པའི་བསྟན་བཅོས་རྣམས།།

ཉི་མ་རེ་ལ་ཚིག་རེ་བཟུང་།།

གྲོག་མཁར་དང་ནི་སྦྲང་རྩི་ལྟར།།

རིང་པོ་མི་ཐོགས་མཁས་པར་འགྱུར།།

ལེགས་པར་སྤྱོད་ལ་འཇུག་འདོད་ན།།

ཅི་ནས་འདི་ཡི་ཁ་མཉན་ཏེ།།

དམ་པ་ཀུན་ཏུ་སྲན་བཙུགས་ནས།།

སྲོག་ལ་བབས་ཀྱང་ལུགས་བཞིན་བསྐྱང་།།

དེ་ལ་འབད་པས་གཞུང་ལུགས་ནས།།

འབྱུང་བཞིན་གཉེན་པོས་བསྒྲུབ་ནུས་ན།།

མཁས་རྣམས་རྫུན་པ་མི་གསུང་གིས།།

འདི་ཡི་ཕན་ཡོན་ཕྱི་ནས་ལྟོས།།

སྔོན་ཡང་འདི་བཞིན་སྤྱད་རྣམས་འཕེལ།།

ད་ལྟ་ན་ཡང་དེ་ལྟར་མཐོང་།།

གཏན་ཚིགས་བཟང་བོ་འདི་ཡིས་ནི།།

མ་འོངས་རྣམས་ཀྱང་ཕུན་ཚོགས་ཐོབ།།

བློ་ལྡན་རང་གིས་ཤེས་ན་ཡང་།།

མཁས་པའི་གཞུང་ལུགས་གུས་པས་བལྟ།།

རིན་ཆེན་ཤིན་ཏུ་བཟང་བོ་ཡང་།།

མ་བཙོངས་བར་དུ་རིན་ཐང་ཆུང་།།

ནགས་ཚལ་ཤིན་ཏུ་མང་མོད་ཀྱང་།།

ཙན་དན་ས་མཆོག་སྐྱེ་བ་ཉུང་།།

དེ་བཞིན་མཁས་པ་མང་ན་ཡང་།།

ལེགས་བཤད་འབྱུང་བ་ཤིན་ཏུ་དཀའ།།

རྟ་མཆོག་འགྲོ་བའི་ཚེ་ན་ཤེས།།

གསེར་དངུལ་བཞུ་ན་ཤེས་པར་འགྱུར།།

གླང་ཆེན་གཡུལ་ངོར་ཤེས་འགྱུར་ཏེ།།

མཁས་པ་ལེགས་བཤད་རྩོམ་ན་ཤེས།།

གང་ཞིག་འཇིག་རྟེན་ཐམས་ཅད་ཀྱིས།།

རང་ལ་ཚད་མར་བྱེད་འདོད་ན།།

དེ་ཡི་གཞུང་འདི་ལེགས་བརྟགས་ཏེ།།

གཉེན་པོ་བསྐྱེད་ལ་འབད་དེ་བསྒྲུབ།།

འཇིག་རྟེན་བྱ་བ་ལེགས་ཤེས་པ།།

དེ་ཡིས་དམ་པའི་ཆོས་ལུགས་འགྲུབ།།

དེས་ན་ཆོས་ལུགས་སྤྱོད་པ་དེ།།

བྱང་ཆུབ་སེམས་དཔའི་རྣམ་ཐར་ཡིན།།

འཚོ་བྱེད་ཟས་སུ་སྒྲོ་བཏགས་ནས།།

སྨན་གྱིས་ནད་ཆེན་གསོ་བ་ལྟར།།

འཇིག་རྟེན་ལུགས་ཀྱི་རྗེས་འབྲངས་ནས།།

བདག་གིས་དམ་པའི་ཆོས་འདི་བསྟན།།

           རྫོགས་སོང་།  བཀྲ་ཤིས་བདེ་ལེགས་ཤོག

རྩོམ་ཡིག་མཁོ་སྤྲོད་པ། གསར་འགོད་པ། ནག་བཟའ་བློ་བཟང་ཆོས་གྲགས།