༄༅།། མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཕྱོགས་བསྒྲིགས་དད་པའི་འཇུག་ངོགས་ལས།

གཉིས་པ།  ཕྱི་ནང་གི་རིག་གནས་མཐའ་དག་ལ་གསན་བསམ་མཐར་ཕྱིན་མཛད་པའི་སྐོར།

རྩོམ་པ་པོ་མི་གསལ།

     དེ་ནས་རྒྱལ་སྲས་གཞོན་ནུས་དབེན་པའི་ནགས་ཁྲོད་དུ་བླ་མ་ཨ་ཝ་དྷུ་ཏཱི་བའི་ཞབས་ལ་གཏུགས། དེས་ཐེག་ཆེན་སེམས་བསྐྱེད་ཀྱི་དབང་བསྐུར་ཡང་མཛད། བླ་མ་ཨ་ཝ་དྷུ་ཏཱི་པ་ལོ་དགུ་ཙམ་བསྟེན། ཨ་ཝ་དྷུ་ཏཱི་པས་རི་ནག་པོའི་གཙུག་ལག་ཁང་དུ་དཔལ་ལྡན་རཱ་ཧུ་ལའི་དྲུང་དུ་སོང་། དེ་ཡང་སྔོན་གྱི་བླ་མ་ཡིན་གསུངས་པ་ལྟར།  དེ་ནས་བླ་མ་རཱ་ཧུ་ལའི་དྲུང་དུ་བྱོན་པ་ན། བླ་མས་རྒྱུད་གསུང་གིན་ཡོད་པས་ཚུར་གཟིགས། མཆོག་འདོད་ནས་འོངས་པ་མཁྱེན་ཡང་སྡིགས་ར་བྱ་བའི་ཕྱིར་རྒྱལ་བུའི་སྟེང་དུ་ཐོག་ཅིག་ཕབ་པ་ན། ཐོག་དེ་མུ་སྟེགས་ནག་པོའི་མཆོད་རྟེན་རི་ལ་སོང་། འཁོར་གྱི་རྣལ་འབྱོར་བ་རྣམས་ཀྱིས་བླ་མ་ལ་སུ་ཡིན་ཞུས་པས། འདི་སྐྱེ་བ་ལྔ་བརྒྱ་ལྔ་བཅུ་རྩ་གཉིས་སུ་མཁས་པ་པཎ་ཆེན་གྱི་ལུས་ཤ་སྟག་ཏུ་ལེགས་པར་བརྒྱུད་པ།དེང་སང་བྷང་གྷ་ལར་རྒྱལ་དགེ་བའི་དཔལ་གྱི་སྲས་སུ་གྱུར་ཀྱང་།

   ཨེ་མ་བུ་ཁྱོད་ལེགས་པར་བཙས་པའི་ཚེ། ཡ་མཚན་ལྟས་མཐོང་རྒྱལ་སྲིད་སྐྱོང་སྙམ་ནས། དགའ་བའི་སེམས་ཀྱིས་ཡིད་དབང་སོས་པར་གྱུར། ད་ནི་ནགས་ཁྲོད་བསྟེན་བློ་ཇི་ལྟར་ལགས། ཞེས་གསུངས་པ་དང་། རྒྱལ་སྲས་ཀྱིས་དེའི་ལན་དུ། ཅི་གསུང་བདག་གིས་རྒྱལ་སྲིད་བཟུང་གྱུར་ན། ཚེ་འདིར་ཡུད་ཙམ་ཡབ་དང་འགྲོགས་མོད་ཀྱང་། སྐྱེ་བ་གཞན་དུ་ཕ་བུར་མི་ཤེས་ཤིང་། ཕན་གནོད་མེད་ན་ཤིན་ཏུ་མཚང་བ་ཡིན། བདག་གིས་རྒྱལ་སྲིད་ཆེན་པོ་རབ་སྤངས་ནས། ངེས་པར་རྣམ་གྲོལ་བྱང་ཆུབ་ལམ་བསྒྲུབས་ནས། སྐྱེ་བ་གཏན་དུ་དགའ་བདེར་འགྲོགས་སུ་འོང་། དེ་ཕྱིར་བདག་ལ་གོ་སྐབས་སྩལ་དུ་གསོལ།  ཞེས་ཞུས་པ་དང་ཡུམ་གྱི་ཞལ་ནས། ཅི་ཕན་བུ་འདི་ཤིན་ཏུ་འཕྲེང་ན་ཡང་། སྐྱེ་རྒུ་ཀུན་ལ་ལས་ཀྱི་འཕེན་པ་གཙོ།   སྐྱེས་མཆོག་གང་དུ་བདེ་བར་ཆོས་ལ་ཐོངས། ཕྱིས་ནས་གཏན་དུ་འགྲོགས་པའི་སྨོན་ལམ་འཚོལ། ཞེས་གསུངས་ནས་གནང་བ་བྱིན། དེ་ནས་རྒྱལ་བུས་རྒྱལ་པོའི་ཕོ་བྲང་གསེར་གྱི་རྒྱལ་མཚན་ཅན་མི་ཁྱིམ་འབུམ་ཕྲག་གཅིག་དང་། ཁྲུས་ཀྱི་རྫིང་བུ་སྟོང་ཕྲག་ཉི་ཤུ་རྩ་ལྔ། སྐྱེད་མོས་ཚལ་བདུན་བརྒྱ་ཉི་ཤུ། ཏཱ་ལའི་ལྗོན་ཤིང་སྟོང་ཕྲག་དྲུག འབངས་ཀྱི་སྐྱེ་བོ་སྟོང་ཕྲག་སོ་ལྔ་དང་། ལྕགས་རི་རིམ་པ་བདུན་གྱིས་བསྐོར་བ། བར་གྱི་ཟམ་པ་སུམ་བརྒྱ་རེ་གསུམ། གསེར་གྱི་རྒྱལ་མཚན་སྟོང་ཕྲག་ཉེར་ལྔ། དབུས་ཀྱི་ཕོ་བྲང་རྒྱ་ཕིབས་བཅུ་གསུམ། ལོངས་སྤྱོད་མངའ་ཐང་འཁོར་ལོས་སྒྱུར་བའི་རྒྱལ་བོ་དང་མཉམ་པ་ཡོད་པ་རྣམས་མཆིལ་མའི་ཐལ་བ་བཞིན་དོར་ནས་སང་ཞོགས་པར་ཐོ་རེངས་རྣལ་འབྱོར་ཕོ་མོ་རྣམས་དང་ལྷན་ཅིག་ཏུ་མི་མེད་དབེན་པའི་ནགས་ཁྲོད་དུ་སླར་ཡང་བླ་མ་ཨ་ཝ་དྷུ་ཏཱིའི་སར་བྱོན། དབུ་མའི་ཆོས་རྣམས་བསླབ། བླ་སློབ་གཉིས་ཟམ་པ་དོག་མོ་ཡ་ང་བ་ཞིག་ལ་བྱོན་པའི་དུས་བུ་བདག་འཛིན་དང་མ་བྲལ་བར་དུ་ལས་འབྲས་ཕྲ་བ་ལ་ཡང་འཛེམས་ཤིགཔཎྚི་ཏ་དང་ནུས་པ་ཅན་འདི་དང་འདི་འདྲ་བ་ཡང་ལས་འབྲས་ཕྲ་མོ་ལ་མ་འཛེམས་པས་ངན་སོང་གི་སྡུག་བསྔལ་འདིའདྲ་བ་ཡང་མྱོང་བཞིན་འདུག་གོ་གསུངས་ནས་ལས་འབྲས་ཕྲ་ཞིབ་ཀྱང་བསྟན། གཞན་ཡང་དངོས་གྲུབ་བརྙེས་པའི་བླ་མ་དུ་མའི་སྤྱན་སྔར་རྡོ་རྗེ་ཐེག་པ་ལ་སྦྱངས་པས་གཞུང་དང་གདམས་ངག་མ་ལུས་པ་ལ་ཐུགས་སུ་ཆུད་པར་གྱུར་ཏེ་གསང་སྔགས་ལ་ང་ཉིད་མཁས་སོ་སྙམ་དུ་དགོངས་པ་བྱུང་བ་ན། ཌ་ཀི་མ་རྣམས་ཀྱིས་སྔགས་ཀྱི་གླེགས་བམ་སྔར་མཐོང་མ་མྱོང་བ་མང་བོ་མནལ་ལམ་དུ་བསྟན་ནས་ཐུགས་རྒྱལ་བཅག ད་ནི་ཚེ་འདི་ལ་སྔགས་ཀྱི་བརྟུགས་ཞུགས་ཀྱི་སྤྱོད་པ་སྤྱད་དེ་ཕྱག་རྒྱ་ཆེན་པོམཆོག་གི་དངོས་གྲུབ་ཐོབ་པ་ཞིག་བྱ་སྙམ་དུ་དགོངས་པ་ན།                     

      བླ་མ་རཱ་ཧུ་ལ་གུབྟ་རྫུ་འཕྲུལ་གྱིས་རྩིག་པ་ལ་ཡང་མ་ཐོགས་པར་ཐལ་བྱུང་དུ་བྱོན་ནས། ཁྱེད་ཀྱིས་སེམས་ཅན་བཞག་ནས་གར་ཆད། རབ་ཏུ་བྱུང་ཞིག་དང་བསྟན་པ་དང་འགྲོ་བ་མང་བོ་ལ་ཕན་པར་འདུག་གསུངས། དཔལ་ཧེ་རུ་ཀ་མདུན་གྱི་ནམ་མཁར་དངོས་སུ་བྱོན་ནས་ཀྱང་བསྐུལ། བདག་ཅག་གི་སྟོན་པ་ཐུབ་པའི་དབང་བོ་དང་། མགོན་པོ་བྱམས་པས་ཀྱང་མནལ་ལམ་དུ་རབ་ཏུ་བྱུང་བར་བསྐུལ་ཏེ། ཇོ་བོ་རྗེ་ཉིད་དགུང་ལོ་ཉི་ཤུ་རྩ་དགུ་ལ་ཕེབས་སྐབས་ཕལ་ཆེན་སྡེ་བའི་མཁན་པོ་སྦྱོར་ལམ་བཟོད་པ་ཚུལ་ཁྲིམས་སྲུང་བ་བླ་མ་ཤྲི་ལ་རཀྵི་ཏ་ཞེས་བྱ་བ་ལས་རབ་ཏུ་བྱུང་ཞིང་བསྙེན་པར་རྫོགས་མཚན་དཱི་པ྄ཾ་ཀ་ར་ཤྲི་ཛྙཱ་ན་ཞེས་གསོལ། དེ་ནས་བླ་མ་བརྒྱ་དང་ལྔ་བཅུ་རྩ་བདུན་ཙམ་བསྟེན་ནས་རིག་གནས་མཐའ་དག་དང་། མདོ་སྔགས་ཀྱི་གསུང་རབ་གདམས་པ་དང་བཅས་པ་ཐམས་ཅད་སྦྱངས། ཁྱད་པར་བླ་མ་ངྷརྨ་རཀྵི་ཏའི་སྤྱན་སྔར་ཨོ་ཏན་ཏ་པུ་རིར་འདུལ་བ་ལུང་སྡེ་བཞིའི་གནད་ཀུན་བསྡུས་ཤིང་། མངོན་པ་ཀུན་ལས་བཏུས་པའི་བསྟན་བཅོས་བྱེ་བྲག་བཤད་མཛོད་ཆེན་མོ་ཞེས་བྱ་བ་བམ་པོ་བརྒྱད་བརྒྱ་ཙམ་ཡོད་པའི་བསྟན་བཅོས་ཆེན་མོ་དེ་ལོ་བཅུ་གཉིས་ཀྱི་བར་དུ་གསན་ནས་མཐའ་ཆོད་པར་སྦྱངས། སྡེ་བ་བཅོ་བརྒྱད་པོ་སོ་སོའི་སྦྱིན་ལེན་རུང་ཆུ་སོགས་ཕྱག་ལེན་ཕྲ་མོ་མཐའ་དག་མ་འདྲེས་པར་མཁྱེན། གཞན་ཡང་རིག་པའི་གནས་མཐའ་དག་ལ་སྦྱངས་བརྩོན་མཐར་ཕྱིན་མཛད་ཡོད་པ་ནི་འཕགས་པ་འཇམ་དཔལ་གྱིས་མཛད་པའི་སྒྲ་རིག་པའི་བསྟན་བཅོས་ཀ་ལཱ་པ་དང་། ཙན་དྲ་བ། པཱ་ཎི་པ། ཀུན་ཏུ་བཟང་བོ་ལ་སོགས་པའི་བྱཱ་ཀ་ར་ཎ་སྡེ་བརྒྱད་དང་། བྲམ་ཟེ་ནོར་ལྷས་མཛད་པའི་ཚིག་གི་སྒྲོན་མ་ལ་སོགས་པ་སྦྱངས་བརྩོན་ཡོངས་སུ་མཛད། གཏན་ཚིགས་རིག་པ་ནི་སློབ་དཔོན་ཕྱོགས་གླང་གིས་མཛད་པའི་ཚད་མ་ཀུན་བཏུས་དང་། སློབ་དཔོན་ཆོས་གྲགས་ཀྱིས་མཛད་པའི་ཚད་མ་སྡེ་བདུན། ཞི་བ་ལྷས་མཛད་པའི་དེ་ཁོ་ན་ཉིད་བཏུས་པ་ལ་སོགས་པ་ཐམས་ཅད་ཐུགས་སུ་ཆུད།

        གཙུག་ལག་རྩིས་ཀྱི་བསྟན་བཅོས་ཕྱི་ནང་གི་རྟེན་འབྲེལ་བཅུ་གཉིས་ལ་བརྟེན་པ་དང་། འབྱུང་བ་ཆེན་པོ་བཞི་ལ་བརྟེན་པ། རྒྱུ་སྐར་ཉེར་བརྒྱད་ལ་བརྟེན་པ། གཟའ་ཆེན་བརྒྱད་ལ་བརྟེན་པ་བཅས་ཀྱི་གནས་མ་ལུས་པ་ལ་འགྲན་པའི་ཟླ་བྲལ། དེ་བཞིན་བྲ་བ་དང་། དྲུབ་པ། ལུགས་སུ་བླུགས་པ། རིས་སུ་བྲིས་པ་ལ་སོགས་པའི་བཟོའི་བསྟན་བཅོས་རྣམས་དང་སློབ་དཔོན་ཀླུ་སྒྲུབ་ཀྱིས་མཛད་པའི་རྒྱུར་སྨྲ་བ་ལ་སོགས་པའི་བསྟན་བཅོས་ཁག་དང་། བུ་རམ་ཤིང་གི་ལས་ཀྱི་མཐའི་བསྟན་བཅོས། བྲམ་ཟེ་མཆོག་སྲེད་ཀྱིས་མཛད་པའི་ལུགས་ཀྱི་བསྟན་བཅོས་སོགས་མ་ལུས་པ་མཁྱེན། ཕྱིས་ཇོ་བོ་རྗེའི་ཞལ་ནས་ཁྱེད་བོད་ལ་བཟོའི་བསྟན་བཅོས་མེད་པས་བཟོ་ཚད་གཅིག་ཏུ་མི་འོང་བ་ཡིན། ངེད་རྒྱ་གར་ན་བཟོ་ཐམས་ཅད་ལ་བསྟན་བཅོས་ཡོད་པས་ཚད་གཅིག་ལ་འཕྱུགས་མེད་པ་ཡིན་གསུངས། སྨན་དཔྱད་གཞན་ལ་ཕན་པའི་མདོ་དང་། རེག་པ་རྩའི་མདོ། འཚོ་བ་ཟས་ཀྱི་མདོ་ལ་སོགས་པ་དང་། དྲང་སྲོང་ལེགས་ཐོབ་ཀྱིས་མཛད་པའི་སྨན་ཡིག་ལེགས་ཐོབ།

       སློབ་དཔོན་ཀླུ་སྒྲུབ་ཀྱིས་མཛད་པའི་ཡན་ལག་བརྒྱད་པ་ལ་སོགས་པ་ཀུན་ཐུགས་སུ་ཆུད། ཇོ་བོ་རྗེ་ཉིད་ཀྱིས་ཀྱང་འཚོ་བ་སྙིང་བོ་ཞེས་བྱ་བའི་སྨན་གྱི་བསྟན་བཅོས་ཀྱང་མཛད། ཇོ་བོ་རྗེས་བོད་དུ་བྱོན་ནས་ཐུགས་དགོངས་སུ་གསོ་བ་རིག་པ་འདི་བོད་ན་སྨན་མེད་པས་ནུབ་ནས་འགྲོ་ལས་ཆེ་སྙམ་པ་ལ། ཕྱིས་བོད་ཀྱི་རི་ལུང་ཀུན་ཏུ་སྨན་རྩྭ་མ་ལུས་པར་ཡོད་པ་མཁྱེན་པས་ཇོ་བོས་རྒྱ་གར་གྱི་སྨན་རེ་ལ་བོད་ན་སྨན་རེ་ཅི་ནས་ཀྱང་འདུག་པ་མ་ཟད་བོད་ཀྱི་སྨན་རང་ནུས་པ་ཆེ་བ་ཙམ་འདུག་གསུངས། གསང་སྔགས་མཐའ་དག་གི་བརྒྱུད་པ་ནི་སློབ་དཔོན་ཀླུ་སྒྲུབ། ཨརྱ་དེ་བ། མ་ཏི་ཙ་ལ། ཏི་ལ་ཡོ་ག ཙ་ཏི་པ་ལ། མན་ཇུ་ཤྲཱི་བྷ་དྲ། བོ་དྷི་བྷ་དྲ། ཤཱནྟི་པ། ཇོ་བོ་རྗེ་ལ་བརྒྱུད་པ་དང་། མ་རྒྱུད་ཀྱི་བརྒྱུད་པ་ནི་སློབ་དཔོན་ཀླུའི་ས། འདང་གི་བ། ད་རི་ཀ་པ། བྲམ་ཟེ་ཛེ་ཏ་རི། གཤིན་རྗེ་གཤེད་ཀྱི་བརྒྱུད་པ་ནི། ཀཱ་མ་ལ་རཀྵི་ཏ། ནག་པོ་ཞབས་ཆེན་པོ། ཇོ་བོ་རྗེ་སྟེ་རྣལ་འབྱོར་བ་ཆེན་པོ་དེ་རྣམས་ཀྱིས་ཡོན་ཏན་མ་ལུས་པ་ཐམས་ཅད་ཇོ་བོ་རྗེ་ལ་ཡོངས་སུ་རྫོགས་པ་ལྡན་ཡོད།  དེ་བཞིན་ཤེས་རབ་ཀྱི་ཕ་རོལ་ཏུ་ཕྱིན་པའི་ཤིང་རྟ་ཆེན་པོ་གཉིས་ཀྱི་ལྟ་སྤྱོད་ཀྱི་བརྒྱུད་པ་ཡོངས་སུ་རྫོགས་པ་དང་ལྡན་ཡོད་དེ། སློབ་དཔོན་ཀླུ་སྒྲུབ། ཟླ་བ་གྲགས་པ། རིག་པའི་ཁུ་བྱུག ཨ་ཝ་དྷི་ཏི་བ་ཆེ་ཆུང་། ཇོ་བོ་རྗེ་སྟེ་གནས་ལུགས་ཀྱི་དོན་ཕྱིན་ཅི་མ་ལོག་པར་རྟོགས་པའི་ལྟ་བ་རྣམ་པར་དག་པའི་བརྒྱུད་པ་དང་། ས་བཅུའི་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་རྒྱལ་ཚབ་ཏུ་དབང་བསྐུར་ཞིང་དེ་བཞིན་གཤེགས་པའི་གསང་བའི་གནས་ཐམས་ཅད་ལ་ལྐོག་ཏུ་མ་གྱུར་བ་སངས་རྒྱས་དང་གཞན་དོན་འཕྲིན་ལས་མཉམ་པ་རྗེ་བཙུན་བྱམས་པ་མགོན་པོ། ཆོས་རྒྱུན་གྱི་ཏིང་ངེ་འཛིན་གྱི་འཐུས་འཕགས་པ་བྱམས་པ་ལས་ཆོས་གསན་ནས་འཛམ་བུའི་གླིང་དུ་ཐེག་པ་ཆེན་པོའི་ཆོས་དར་བར་མཛད་པའི་སློབ་དཔོན་ཐོགས་མེད། སྐྱེ་བ་ལྔ་བརྒྱར་པཎྚིཏར་འཁྲུངས་པའི་སྐྱེས་ཐོབ་ཀྱི་ཤེས་རབ་ཕུན་སུམ་ཚོགས་པ་དང་ལྡན་པ། ཡི་དམ་གྱི་ལྷས་ཞལ་གཟིགས་ཤིང་འབུམ་སྡེ་བརྒྱད་ཅུ་ཐུགས་ལ་མངའ་བའི་སློབ་དཔོན་དབྱིག་གཉེན། ས་ལ་གནས་པའི་བྱང་ཆུབ་སེམས་དཔའ་འཕགས་པ་རྣམ་གྲོལ་སྡེ། བློ་གྲོས་མཆོག་དང་ལྡན་པས་བསྟན་བཅོས་ཀུན་ལ་མཁས་ཤིང་ཕྱིར་མི་ལྡོག་པའི་རྟགས་ཐོབ་པ་བཙུན་པ་གྲོལ་སྡེ། སྡོམ་པ་གསུམ་དང་ལྡན་ཞིང་བླ་མ་ལ་གུས་པས་གསུང་བཞིན་དུ་སྒྲུབ་པ་མཆོག་གི་སྡེ། དཀའ་བ་དཔག་ཏུ་མེད་པ་བསྒྲུབས་པས་འཁོར་འདས་གཉིས་མེད་དུ་རྟོགས་པ་དུལ་བའི་སྡེ། གྲུབ་བ་བརྙེས་ཤིང་འཕགས་པའི་ཡོན་ཏན་དང་ལྡན་པ་རྣམ་སྣང་མཛད་བཟང་བོ།། ལུང་རིགས་གཉིས་ལ་མཁས་ཤིང་བྱམས་པའི་ཐུགས་དང་ལྡན་པ་སེང་གེ་བཟང་བོ།  བློའི་དྲི་མ་དང་བྲལ་བ་ཐམས་ཅད་ནམ་མཁའ་ལྟར་ཐུགས་སུ་ཆུད་པ་རིན་ཆེན་སྡེ། བྱང་ཆུབ་གསེར་གྱི་བདག་པོ་གསེར་གླིང་བ་བཅས་དེ་རྣམས་ཀྱི་ཡོན་ཏན་མ་ལུས་པ་ཐམས་ཅད་ཇོ་བོ་རྗེར་བུམ་པ་གང་བྱོའི་ཚུལ་དུ་ལྡན་ཡོད་པས་ཐེག་ཆེན་གྱི་སྒོར་ཞུགས་ནས་རྫོགས་པའི་བྱང་ཆུབ་ཏུ་སེམས་བསྐྱེད་པའི་དམ་བཅའ་བརྟན་ཞིང་བྱམས་པ་དང་སྙིང་རྗེའི་ཐུགས་རྒྱུད་བརླན་པ། འགྲོ་བ་མཐའ་དག་ལ་དངོས་དང་བརྒྱུད་པའི་སྒོ་ནས་ཕན་པ་དང་བདེ་བའི་དོན་དུ་གཡོ་དང་སྒྱུ་མེད་པར་ལྷག་པའི་བསམ་པ་རྣམ་པར་དག་པ། བྱང་ཆུབ་ཀྱི་སེམས་རྒྱུན་དུ་ཉམས་བཞེས་མཛད་པས་བྱང་ཆུབ་སེམས་ཆེན་པོར་གྱུར་བ། འཁོར་མང་བོ་ལ་བྱམས་དང་སྙིང་རྗེ་ལས་བརྩམས་པའི་ཆོས་ཁོ་ན་གསུངས་པས་གྲུབ་པ་ཐོབ་པ་མང་དུ་བྱུང་བ། སེམས་ཅན་སྡུག་བསྔལ་གྱི་མནར་བ་གཟིགས་པ་ན་སྤྱན་ཆབ་རང་དབང་མེད་པར་འབྱུང་བ། ཇོ་བོའི་ཞལ་ནས་ཀྱང་ངན་སོང་ཐམས་ཅད་འཇིགས་པ་དང་། སྒྲིབ་པ་ཐམས་ཅད་ལས་སྒྲོལ་ཞིང་། རྫོགས་སངས་གོ་འཕང་གསལ་མཛད་པ། བྱང་ཆུབ་སེམས་ལ་ཕྱག་འཚལ་ལོ།། ཞེས་རྟག་ཏུ་གསུངས་པ་བཅས་འཕགས་ཡུལ་གྱི་སྡེ་བ་བཅོ་བརྒྱད་པོ་ཐམས་ཅད་ཀྱི་གཙུག་གི་ནོར་བུར་གྱུར་ཏོ།།

རྩོམ་ཡིག་མཁོ་སྤྲོད་པ། གསར་འགོད་པ། བློ་བཟང་ཆོས་གྲགས།