ཤེས་རིག་གླིང་དུ་འགྲོ་དགོས་ཡོད།

ཁ་བའི་བམ་ཁ་ཇི་ལྟར་མཐུག་ན་ཡང་།།

ཙག་སེར་ཁ་ཆར་ཇི་ལྟར་རྒོད་ཀྱང་རུང་།།

ལས་དང་རིག་པས་བསྐྱེད་པའི་ཤེས་རིག་གླིང་།།

འོད་ཀྱི་གོང་བུར་བསྒྲུབ་ཕྱིར་འགྲོ་དགོས་ཡོད།།

ཕྱི་ནང་འགལ་རྐྱེན་ཕྲ་རགས་མང་ཡང་རུང་།།

རང་གི་འོས་སྐལ་མང་བོ་ཤོར་ཡང་ཆོག །

གངས་རིའི་དབུགས་རྒྱུན་མཐུད་སའི་ཤེས་རིག་གླིང་།།

མི་ཉམས་གོང་འཕེལ་གཏོང་ཕྱིར་འགྲོ་དགོས་ཡོད།།

གོ་ཐོབ་མཚན་སྙན་ལེན་རྒྱུ་མེད་ཀྱང་ཆོག །

རྒྱུ་འབྱོར་ལོངས་སྤྱོད་ཐོབ་རྒྱུ་ཉུང་ཡང་རུང་།།

མི་ཚེའི་ཕྱེད་ཀ་ཟད་སའི་ཤེས་རིག་གླིང་།།

སྐྱིད་སྡུག་མཉམ་མྱོང་བྱེད་ཕྱིར་འགྲོ་དགོས་ཡོད།།

ཕ་ས་ཕ་ཡུལ་སྤྲོ་ལ་སྐྱིད་ཀྱང་ཆོག།

མི་ཡུལ་ལུང་བར་དྲན་གདུང་མོད་ཀྱང་རུང་།།

བོད་ཕྲུག་གཙང་མ་འཛོམས་སའི་ཤེས་རིག་གླིང་།།

མིང་དོན་མཚུངས་པར་བསྒྲུབ་ཕྱིར་འགྲོ་དགོས་ཡོད།།

རྔ་བ་ནས་རྭ་རྒྱ་ཤེས་རིག་ནོར་བུའི་སློབ་གླིང་དུ་བསྐྱོད་སྐབས་ཁ་བས་ལམ་ཁ་བཀག་ནས་འགྲོ་དཀའ་བར་གྱུར་བས་རང་གིས་རང་ལ་སེམས་གསོ་དང་ཀུ་རེའི་ཚུལ་དུ་ལྡོང་ཡོན་ཏན་རྒྱ་མཚོས་བྲིས།༢༠༡༧-༣-༡༢ཉིན།