རླབས་ཆེ་བའི་ཨ་མ་ཞིག་གི་བྱམས་བརྩེའི་ལག་ལེན།
འབའ་སྣང་གྲོལ་གྱིས་དོན་བསྒྱུར་བྱས། 

    རླབས་ཆེ་བའི་ཨ་མ་ཞིག་གིས་དབྱི་སི་ལན་གྱི་ཁྲིམས་རར་འདུས་པའི་མི་རྣམས་ཧ་ལས་སུ་བཅུག་ཅིང་།  ཁོ་མོའི་བྱམས་བརྩེ་ནི་ཧ་ཅང་གནད་འགག་གི་སྐབས་སུ་འཛམ་བུ་གླིང་གི་མི་ཡོངས་ཀྱི་སེམས་ངོར་འཕྲོས་ནས་ཡིད་འགུལ་ཐེབས་སུ་བཅུག 

    ༢༠༡༤ལོའི་ཟླ་༤ཚེས༡༧ཉིན་གྱི་སྔ་དྲོར་དབྱི་སི་ལན་གྱི་བྱང་ཕྱོགས་གྲོང་ཁྱེར་ནཱོ་ཁྲ་ཧི་རུ་མི་རྣམས་འུར་འུར་ཟིང་ཟིང་ངང་མི་ལོ་ཉེར་བཞི་ལ་བུད་མ་ཐག་པའི་སྐྱེས་པ་པཱ་ལ་ལི་ལ་སྐེ་བསྒགས་སྲོག་ཁྲིམས་གཅོད་པའི་ཁྲིམས་རར་འདུས། 

   པཱ་ལ་ལི་ཁོང་ལ་སྲོག་ཁྲིམས་གཅོད་དགོས་པའི་རྒྱུ་མཚན་ནི་ཁོང་ལོ་བཅུ་བདུན་ལ་བུད་པའི་ལོ་དེར་ཁོ་རང་གིས་མི་གཞན་དང་འཐབ་འཛིང་ཐེངས་གཅིག་བྱས་ཤིང་།  དེ་དུས་རང་ཉིད་དང་འདྲ་བའི་ན་གཞོན་ཞིག་ཡ་ང་དང་སྙིང་རྗེ་མེད་པར་འཆི་ལམ་ལ་དེད་པས་ཡིན་ནོ།།ལོ་བདུན་འགོར་བའི་དེ་རིང་ད་གཟོད་ལག་དམར་པཱ་ལ་ལིས་ལ་སྐེ་བསྒགས་སྲོག་ཁྲིམས་གཅོད་པའི་ཁྲིམས་ར་འཚོགས་ཤིང་།     སྲོག་ཁྲིམས་གཅོད་སྟངས་ནི་ཕྱོགས་གཉིས་ཀྱི་མི་དང་ལྟད་མོ་བ་རྣམས་ཁྲིམས་རར་འཚོགས་པའི་དབུས་ནས་ལག་དམར་པཱ་ལ་ལི་སྟེགས་བུ་ཞིག་གི་སྟེང་ལ་འབུད་དུ་བཅུག་ནས་སྐེ་ལ་ཐ་གུ་བརྒྱབ་ནས་ཐ་གུའི་སྣེ་མོ་གནམ་ལ་བཏེགས་རྗེས།  ད་གཟོད་ཁོ་རང་གིས་བསད་པའི་ན་གཞོན་དེའི་ཨ་མ་ཡོང་ནས་རྐང་འོག་གི་སྟེགས་བུ་བླངས་ནས་རང་ཤི་རྒྱག་ཏུ་འཇུག་པ་དེ་རེད།

ལག་དམར་པཱ་ལ་ལིའི་ཨ་མ་ལགས་ནི་རང་གི་བུ་ཕྲུག་ལ་སྲོག་ཁྲིམས་གཅོད་པ་མཐོང་ནས་སེམས་ཀྱིས་མ་བཟོད་པར་དྲན་པ་འཐོར་ནས་རང་དབང་མེད་པར་ཐང་ལ་འགྱེལ་ཡོད་པ་རེད།

མི་ཚོགས་ཀྱི་ཞེ་འཁོན་དང་གདུང་སེམས་འདྲེས་མའི་མིག་ཟུང་རིག་རིག་གི་ཁྲོད་ནས་རང་གི་བུ་ཕྲུག་གསོད་པའི་ལག་དམར་གྱི་སྟེགས་བུའི་སྟེང་དུ་ཨ་མ་ཞིག་གློ་བུར་དུ་གྲོང་ངེར་བུད་ཅིང་།  བལྟས་ཚོད་ལ་ཧ་ཅང་ཞེ་འཁོན་ཚ་བའི་ངང་ལག་དམར་གྱི་སྐྱེས་པ་དེ་ལ་འགྲམ་ལྕག་ཚ་བེར་བ་ཞིག་བཞུས།
འོན་ཀྱང་སྐབས་དེའི་གཤེད་མ་དང་མི་ཚོགས་རྣམས་རང་རང་གི་མིག་ཟུང་ལའང་ཡིད་མི་ཆེས་ཤིང་བློ་ཡུལ་འདས་པ་ཞིག་ལ།   ཨ་མ་དེས་རང་གི་བུ་ཕྲུག་གདུག་རྩུབ་ངང་གསོད་པའི་ལག་དམར་གྱི་རྐང་འོག་གི་སྟེགས་བུ་བླངས་ནས་རང་ཤི་རྒྱག་ཏུ་འཇུག་པ་ལྟ་ཅི།རླབས་ཆེ་བའི་བྱམས་བརྩེ་ངང་ལག་ཟུང་འཇམ་པོས་ལག་དམར་སྐེ་ལ་བརྒྱབ་པའི་ཐ་གུའི་ཨ་ལོང་ལས་ལག་དམར་གྱི་མགོ་བོ་ཕྱི་ལ་བླངས་སོང་།

རང་གི་བུ་ཕྲུག་གསོད་པའི་ལག་དམར་དེའི་སྲོག་བསྐྱབས་རྗེས་རླབས་ཆེ་བའི་ཨ་མ་དེ་གདུང་སེམས་དང་བཅས་ཁ་ཕྱིར་འཁོར་ནས་ངུས་སོང་། 

འཆི་བའི་འཇིགས་སྐྲག་ལས་ཐར་བའི་ལག་དམར་པཱ་ལ་ལི་དེ་མ་ཐག་རླབས་ཆེ་བའི་ཨ་མ་དེའི་མདུན་དུ་བརྒྱུགས་ནས་པུས་མོ་ས་ལ་བཙུགས་ཏེ་ཨ་མ་ལགས་ཀྱི་རྐང་བ་ལ་ཡང་ཡང་འོ་བྱས་ཤིང་ཕྱག་འཚལ།