༄༅།། མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཕྱོགས་བསྒྲིགས་དད་པའི་འཇུག་ངོགས་ལས།

   དང་བོ།  རྒྱ་གར་ཤར་ཕྱོགས་བྷང་གྷ་ལའི་ཡུལ་གྱི་རྒྱལ་བོའི་སྲས་སུ་སྐུ་འཁྲུངས་པའི་སྐོར།                  
                                                   རྩོམ་པ་པོ་མི་གསལ།
  མཉམ་མེད་ཇོ་བོ་རྗེ་དཔལ་ལྡན་ཨ་ཏི་ཤ་ནི་བོད་ཆུ་རྟ༼སྤྱི་ལོ982༽ལོར་རྒྱ་གར་ཤར་ཕྱོགས་བྷང་གཱ་ལ་ཞེས་བྱ་བའི་གྲོང་ཁྱེར་ཆེན་པོར་སྟོབས་འབྱོར་མངའ་ཐང་ལོངས་སྤྱོད་ཤིན་ཏུ་ཆེ་བའི་ཡབ་རྒྱལ་བོ་དགེ་བ་དཔལ་དང་ཡུམ་དཔལ་མོ་འོད་ཟེར་ཅན་གཉིས་ལ་སྲས་ཆེ་བ་པདྨའི་སྙིང་བོ་དང་འབྲིང་བ་ཟླ་བའི་སྙིང་བོ། ཆུང་བ་དཔལ་གྱི་སྙིང་བོ་བཅས་གསུམ་མངའ་བ་ལས་འབྲིང་བ་ཟླ་བའི་སྙིང་བོར་ངོ་མཚར་བའི་བལྟས་དུ་མ་དང་བཅས་ཏེ་སྐུ་བལྟམས།  མཁན་ཆེན་ཞི་བ་འཚོ་དང་གདུང་རྒྱུད་གཅིག་པར་གྲགས།

   རྒྱལ་སྲས་གཞོན་ནུ་དེ་ཉིད་སྐུ་འཁྲུངས་ནས་ཟླ་བ་བཅོ་བརྒྱད་ལོན་པ་ན་ཉེ་འགྲམ་གྱི་གཙུག་ལག་ཁང་བྲི་ཀཱ་མ་ལ་པུ་རིར་ཡབ་ཡུམ་དང་ལྷན་དུ་ཕེབས་པ་ན།  ལམ་བར་དུ་གྲོང་ཁྱེར་གྱི་སྐྱེ་བོ་མང་བོས་རྒྱལ་སྲས་གཞོན་ནུ་དེ་མཇལ་བའི་ཕྱིར་ལྷགས་པའི་མི་ཁྲོམ་ཆེན་པོ་གཟིགས་པས། འདི་དག་སུ་ཡིན་ཞེས་ཡབ་ཡུམ་ལ་བཀའ་འདྲི་གནང་བར་ཡབ་ཡུམ་གྱིས་འདི་དག་ཁྱོད་ཀྱི་འབངས་འཁོར་ཡིན་ནོ།།  ཞེས་གསུངས་པས་ཐུགས་སྙིང་རྗེ་ཆེན་པོས་གཟིགས་ཏེ།

འདི་དག་བདག་བཞིན་ཕ་མ་ཕུན་ཚོགས་ཤིང་། ། རྒྱལ་སྲིད་མངའ་ཐང་བསོད་ནམས་འབར་བ་ཡིས།། མི་དབང་སྲས་ཀྱི་ཐུ་བོར་རབ་བསྐྲུན་ཏེ།། ཐམས་ཅད་དམ་པའི་ཆོས་ཀྱིས་འཚོ་བར་ཤོག།

  ཅེས་གསུང་ངག་སྙན་པོས་གསུངས་པ་ན་དེར་འདུས་སྐྱེ་བོའི་ཚོགས་ཐམས་ཅད་ཤིན་ཏུ་ངོ་མཚར་ཆེ་བར་གྱུར། དེ་ནས་གཙུག་ལག་ཁང་དུ་ཕེབས་པ་ན་ཡབ་ཡུམ་སོགས་གཞན་ཐམས་ཅད་ཀྱིས་ནི་ཚེ་རིང་ཞིང་ནད་མེད་པ་དང་ལོངས་སྤྱོད་ཕུན་སུམ་ཚོགས་པ། ཕྱི་མ་ངན་སོང་དུ་མི་ལྟུང་བ། བདེ་འགྲོར་སྐྱེས་པ་སོགས་ཀྱི་སྨོན་ལམ་བཏབ།

རྒྱལ་སྲས་བདག་ཉིད་ཆེན་པོ་འདིས། བདག་ནི་དལ་འབྱོར་མི་དབང་ལུས་ཐོབ་ཅིང་།། སྐྱོན་མེད་དབང་བོས་དཀོན་མཆོག་གསུམ་མཐོང་ཞིང་།། རྟག་ཏུ་གུས་པས་དཀོན་མཆོག་སྤྱི་བོར་བླང་།། དེ་རིང་ཉིད་སྐྱབས་གནས་མཛད་དུ་གསོལ།། ནམ་ཡང་ཁྱིམ་པའི་གནས་ཀྱིས་མ་བཅིངས་པར།། དགེ་འདུན་དབུས་སུ་ཆོས་འབྱོར་ཐོབ་པ་དང་།། ང་རྒྱལ་མེད་པར་དཀོན་མཆོག་མཆོད་བྱེད་ཅིང་།། སྐྱེ་བོ་ཡོངས་ལ་སྙིང་རྗེ་བལྟ་བར་ཤོག། ཅེས་སྨོན་ལམ་མཛད་དོ།།

    དེ་ནས་རིམ་གྱིས་སྐུ་ནར་སོན་ཏེ་དེ་ཡང་༼བཀའ་གདམས་གླེགས་བམ༽ལས། དེ་ནས་རྒྱལ་བུས་ལོ་གསུམ་ལོན་པ་ན། རྩིས་དང་ཡི་གེ་སྒྲ་ལ་མཁས་པར་གྱུར། དེ་ནས་རྒྱལ་བུས་ལོ་དྲུག་ལོན་པ་ན། ཕྱི་ནང་གཉིས་ཀྱི་བྱེ་བྲག་ཕྱེད་པར་གྱུར། ཞེས་པ་ལྟར་ཐུན་མོང་དང་མུན་མོང་མ་ཡིན་པའི་རིག་གནས་སྤྱི་དང་བྱེ་བྲག་སྒྱུ་རྩལ་སྣ་ཚོགས་ལའང་སྦྱངས་ཤིང་། ལྷག་པར་ཚད་མ་རིག་པ་སོགས་སངས་རྒྱས་ཆོས་ལུགས་ལ་སློབ་གཉེར་ལེགས་པར་མཛད། དགུང་ལོ་བཅོ་ལྔ་བཞེས་པའི་ཚེ་རིགས་ཐིག་ཚར་གཅིག་གསན་པས་ཕྱི་རོལ་བའི་རྟོག་གེ་བ་མཁས་པར་གྲགས་པ་ཞིག་དང་བརྩད་ཅིང་། དེ་ཕམ་པར་མཛད་པས་སྙན་པའི་གྲགས་པས་ཕྱོགས་ཀུན་ཏུ་ཁྱབ་པར་གྱུར།  དགུང་ལོ་ཉི་ཤུ་ལྷག་ཙམ་ལ་ཕེབས་དུས་ཡབ་ཡུམ་གཉིས་ཀྱིས་རྒྱལ་སྲིད་འཛིན་པའི་རེ་བ་གནང་སྟེ་རྒྱལ་རིགས་ཀྱི་བུ་མོ་མཛེས་མ་ཧ་ཅང་མང་པོ་བདམས་ནས་གཉེན་སྒྲིག  གནང་བར་ཞུས་ཀྱང་གཏན་ནས་ཞལ་བཞེས་མ་གནང་བར་ཐུགས་ཡིད་འབྱུང་སྐྱོ་ཤས་ཀྱི་སྐུལ་མར་གྱུར། ལྷག་པར་སྒྲོལ་མའི་སྤྲུལ་བ་བུ་མོ་སྔོ་སངས་མ་ཞིག་གིས། ལྷ་ཅིག་མ་ཆགས་མ་ཆགས་སྐལ་བ་ཅན།། འདམ་བུའི་ཚལ་དུ་གླང་བོ་བྱིང་བ་ལྟར།། འདོད་པའི་འདམ་འདིར་དཔའ་བོ་ཁྱོད་བྱིང་ན།། ཚུལ་ཁྲིམས་གོས་ཅན་བསྣུབས་པར་མི་འགྱུར་རམ།།

ཞེས་བསྐུལ་བས། མ་ཆགས་པ་དང་བོ་ཚེ་འདི་དང་། གཉིས་པ་འཁོར་བ། གླང་བོ་ཆེ་སྟོབས་དང་ལྡན་པ་འདམ་རྫབ་ཏུ་བྱིང་ན་དེ་ལས་ཐོན་དཀའ་བའི་དཔེ་ལྟར་བྱང་ཆུབ་སེམས་དཔའ་ཁྱོད་འཁོར་བའི་འདམ་རྫབ་སོགས་ལ་མ་ཆགས་པར་སེམས་ཅན་ཐམས་ཅད་ཀྱི་དོན་བསྒྲུབ་དགོས་པའི་བསྐུལ་མ་མཛད་དོ།།    དེ་ནས་མ་འགྱངས་པར་རྒྱལ་བུ་རྟ་པ་སུམ་ཅུ་བཅས་དམག་གི་ཆས་སུ་ཞུགས་ཏེ་ཐབས་མཁས་ཀྱིས་མཛད་པའི་རི་བྲག་བསྐོར་བ་ལྟར་མཛད་ནས་དོན་དུ་བླ་མ་འཚོལ་དུ་བྱོནཔས་རི་བྲག་གཅིག་ན་བྲམ་ཟེ་ཛེ་ཏཱ་རི་བཞུགས་པ་དང་མཇལ་ཞིང་།

   དེས་སྐྱབས་སེམས་གནང་ནས་ནཱ་ལེན་དྲར་སྐྱེ་བ་ཐོག་མ་མེད་པ་ནས་ལས་འབྲེལ་ཡོད་པའི་བླ་མ་བྱང་ཆུབ་བཟང་བོ་བཞུགས་ཡོད་པས་དེར་སོང་གསུངས་སོ།། དེ་ནས་བྱང་ཆུབ་བཟང་བོ་དང་མཇལ། རིན་པོ་ཆེའི་མཆོད་པས་མཉེས་པར་མཛད། བླ་མས་མཉམ་བཞག་མཛད་ནས་སྒོ་གསུམ་བྱིན་གྱིས་བརླབས་ཤིང་། སེམས་བསྐྱེད་ཀྱི་གདམས་པ་གནང་ནས་འདི་རུ་མ་བཞུགས་བྱང་ཕྱོགས་ན་སྐྱེ་བ་ཐོག་མེད་དུས་ནས་ཕར་གྱུར་བ་བླ་མ་རིག་པའི་ཁུ་བྱུག་ཅེས་བྱ་བ་ཞིག་ཡོད་པ་དེའི་དྲུང་དུ་ཕེབས་པའི་ལུང་བསྟན་པ་ལྟར་བླ་མ་རིག་པའི་ཁུ་བྱུག་གི་དྲུང་དུ་བྱོན། དེས་ཀྱང་སེམས་བསྐྱེད་ཀྱི་གདམས་པ་སོགས་གནང་སྟེ་སྔོན་གྱི་བླ་མ་ཨ་ཝ་དྷུ་ཏི་པ་ལུང་བསྟན་པ་ལྟར་མཇལ་དུ་བྱོན་ཏོ།།

ཡང་ཨ་ཝ་དྷུ་ཏི་མཇལ་བ་ན་བླ་མས་བུ་ཁྱོད་དེ་རིང་རྒྱལ་བོའི་ཁབ་ཏུ་སོང་། ཁྱིམ་གྱི་ཉེས་དམིགས་ལྟོས་ལ་ཤོག་གསུངས། དེ་ལྟར་ཕེབས་པ་ན་ཡབ་ཡུམ་དགྱེས་ནས་ཟླ་བའི་སྙིང་བོ་ཁྱོད་ནི་གང་དུ་ཕྱིན། དུབ་པར་མ་གྱུར་རམ། ཤེས་པ་མ་སྐྱོའམ། སླེབས་པ་ལེགས། ཞེས་གསུངས་པ་དང་ལན་དུ། ཐུབ་པའི་སྐྱབས་གནས་བླ་མ་འཚོལ་དུ་ཕྱིན།། རི་བྲག་དག་ཏུ་དབེན་གནས་འཚོལ་དུ་ཕྱིན།། གང་དུ་ཕྱིན་ཀྱང་འཁོར་བའི་ཉེས་དམིགས་མཐོང་།། སུ་དང་འགྲོགས་ཀྱང་འཁོར་བའི་ཉེས་དམིགས་བཤད།། ཇི་ལྟར་བྱས་ཀྱང་ཤེས་པ་མ་ཕེབས་པས།། གོ་སྐབས་ཕྱེ་ཞིག་བདག་ནི་ཆོས་ལ་འགྲོ། །

ཞེས་གསུངས་པ་དང་། ཡབ་ཡུམ་གྱིས་འཁོར་བས་སྐྱོ་ན་རྒྱལ་སྲིད་བཟུང་ལ་དཀོན་མཆོག་ལ་མཆོད་པ། དབུལ་ཕོངས་ལ་སྦྱིན་པ། གཙུག་ལག་ཁང་བཞེངས་ལ། དགེ་འདུན་སྤྱན་དྲངས་པ་སོགས་བྱས་ན་ཀུན་ཏུ་བདེ་བར་འགྱུར་ཚུལ་ཞུས་པ་ན། ངེད་ཀྱིས་འཁོར་བ་འདི་ལ་ཆེར་བལྟས་པས། རྒྱལ་སྲིད་ལ་ཆགས་པའི་སྣང་བ་ནི་རྡུལ་ཙམ་ཡང་མི་གདའོ།། གསེར་གྱི་ཕོ་བྲང་དང་བཙོན་ར་ལ་ཁྱད་མེད། བཙུན་མོ་དང་བདུད་ཀྱི་བུ་མོ་ལ་ཁྱད་མེད། ཁ་ཟས་མངར་གསུམ་དང་ཁྱི་ཤ་རྣག་ཁྲག་ལ་ཁྱད་མེད། དར་ཟབ་གོས་རྒྱན་གྱིས་མཛེས་པ་དང་། མི་གཙང་ཁྲོད་དུ་ལྭ་བ་གྱོན་པ་ལ་ཁྱད་པར་ཅུང་ཟད་ཀྱང་མི་གདའ་པས་ད་ནགས་སུ་བསམ་གཏན་སྒོམ་དུ་འགྲོ།

ཉིན་མ་དེ་རིང་ང་ལ་འོ་མ་དང་སྦྲང་རྩི་བུ་རམ་སོགས་ཉེར་མཁོའི་ཡོ་བྱད་ཅུང་ཞིག་ཐུགས་ལ་ཐོགས། བླ་མ་ཨ་ཝ་དྷུ་ཏི་པའི་དྲུང་དུ་འགྲོ་གསུངས་པ་དང་། ཡབ་ཡུམ་གཉིས་གང་འདོད་བྱེད་དུ་གནང་། དེ་ནས་རྟ་པ་འཁོར་གཡོག་ཅུང་བསྡུས་པ་དང་བཅས་མི་མེད་དབེན་པའི་ནགས་ཁྲོད་དུ་གཤེགས་སོ།།

རྩོམ་ཡིག་མཁོ་སྤྲོད་པ།  གསར་འགོད་པ།  ནག་བཟའ་བློ་བཟང་ཆོས་གྲགས།