སྲིན་མོ་གན་རྐྱལ་དུ་སྒྱེལ་བ་འདྲ་བའི་གནས།
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 12 ཚེས 7 རེས་གཟའ་སྤེན་པ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» རྒྱུན་ཤེས།» རིག་གནས་རྒྱུན་ཤེས། »སྲིན་མོ་གན་རྐྱལ་དུ་སྒྱེལ་བ་འདྲ་བའི་གནས།
སྲིན་མོ་གན་རྐྱལ་དུ་སྒྱེལ་བ་འདྲ་བའི་གནས།
རྩོམ་སྒྲིག་པ།  བན་ཤུལ་འཇམ་དབྱངས། སྤེལ་དུས 2017-01-23ལྟ་ཀློག (1075)རྩོམ་ཁུངས: ངེད་དྲ་བ།པར་འདེབ།

 སྲིན་མོ་གན་རྐྱལ་གྱི་གནས།

ལེའུ་བཅུ་གཉིས་པ། ལྷ་ཅིག་ཨོང་ཅོང་གིས་ས་དཔྱད་རིན་ཆེན་སྤུངས་པ་མཛད་པ།

    དེ་ནས་ཡང་བལ་མོ་བཟའ་ཁྲི་བཙུན་གྱིས་རང་གི་རྩེ་མཁར་དུ་ཕྱིན་ནས། རྒྱལ་པོ་དངུལ་ཟམ་ལ་སྤྱན་དྲངས་ནས་ལྷ་ཁང་རྩིག་པའི་གྲོས་ཞུས་པས། རྒྱལ་པོའི་ཞལ་ནས་ཁྱོད་རང་གར་འདོད་པའི་སར་རྩིགས་གསུངས་ནས། འཁོར་རྟ་པ་མང་བོ་དང་བཅས་གནོད་སྦྱིན་ཕོ་མོ་མང་པོ་བྲན་དུ་བསྐུལ་ནས་ལ་དོང་གི་ནེའུ་ཁར་ཉིན་བརྩིགས་པ་ནུབ་བཤིག་ནས་མ་བཏུབ། དེ་ནས་ཡང་ཡར་ཀླུངས་དང་དབུ་རུ་ཤོད་དང་། གཙང་དང་ཡུལ་གང་བཟང་ས་གང་ལེགས་རྣམས་སུ་ལྷ་ཁང་བརྒྱ་རྩ་བརྒྱད་ཀྱི་རྨང་བཏིང་བས་ཞིག   དེ་རྣམས་སུ་མ་འོངས་པ་ན་འཕགས་པ་ལ་བློན་པོ་རྣམས་ཀྱིས་ཁྱོད་ཀྱི་ལྷ་ཁང་བཞེངས་པའི་ཐབས་དེ་ཨོང་ཅོང་ལ་རག་ལས་ཡོང་ཟེར་བ་དེ་ད་བདེན་པ་འདུག་སྙམ་ནས། རྒྱལ་མོ་ཨོང་ཅོང་དེ་ཐབས་དང་དཔྱད་པ་ལ་མཁས་པ་ཞིག་ཡོད་འདུག་པ་ཐབས་དང་དཔྱད་པ་འདྲི་དགོས་སྙམ་ནས། གཡོག་མོ་དམ་ཞིག་ལ་གསེར་ཕྱེ་བྲེ་གང་འབུར་བ་ཞིག་བསྐུར་ནས། ཁྱོད་སོང་ལ་ལྷ་ས་བྱེ་མའི་གླིང་ནེའུ་ཆུང་གི་ཆུ་མིག་ཁ་ན། དར་དཀར་གྱི་ཡོལ་བའི་ནང་ཇོ་བོ་ཤཱཀྱ་མུ་ནེའི་དྲུང་ན་རྒྱལ་མོ་ཨོང་ཅོང་མཆོད་པ་འབུལ་གྱིན་ཡོད་ཀྱི། དེ་ལ་གསེར་འདི་ཕུལ་ལ་ཁ་སང་གི་དེ་འདྲ་མ་ཟེར་བར་ད་རེས་ང་ལ་ལྷ་ཁང་རྩིག་པའི་ས་ལེགས་པ་ཞིག་སྟོན་དང་། ངའི་ལྷ་ཁང་ཚར་ཙ་ན་ཁྱོད་རང་ཡང་བརྩིག་ཏུ་བཅུག་གིས་ཅེས་འཕྲིན་སྤྲིངས་པ་དང་། ཨོང་ཇོས་སྤོར་ཐང་ཁྲ་བོ་བཏིང་ནས་ས་དཔྱད་ལེགས་པར་ལྟས་ཏེ་ས་བཤད་བྱས་ནས། ངས་ཁ་སང་ནས་ཁྱེད་ཚོ་ལ་བཤད་དེ་དེ་སྡུག་བྱེད་པར་གོ ། ད་སའི་དཔྱད་འདི་ལ་བྱེད་པ་བརྒྱ་རྩ་བརྒྱད། བརྟག་པ་དགུ་བཅུ་ཐམ་པ། ནོར་ལ་བདུན་ཅུ་དོན་གཉིས། སའི་དགྲ་ངོས་ཟིན་པ། དེ་བཟློག་པའི་ཐབས་དགོས་པས། དེ་དག་ཐམས་ཅད་བསྡུ་ན་སྐྱེ་བོ་མང་བོ་འདུ་བས་བདག་རྒྱལ་པོའི་ཕོ་བྲང་གི་ས་དང་གཅིག  འཕགས་པའི་དགེ་འདུན་མང་པོ་འདུ་བ་གཙུག་ལག་ཁང་གི་ས་དང་གཉིས། དྲང་སྲོང་འབྱུང་བའི་གནས་འབྲོག་དགོན་པའི་ས་དང་གསུམ། རེ་ཞིག་བདེ་བར་སྤྱོད་པ་སྐྱེ་བོ་ཕལ་བའི་ས་དང་བཞི། ཅུང་ཞིག་གནས་པ་བས་མཐའི་ས་གཏན་ལ་དབབ་པ་དང་ལྔའོ།།  ད་རེ་འདིའི་དབང་དུ་བྱས་ན་ཡོན་ཏན་བརྒྱད་དང་ལྡན་པ་རྒྱལ་པོའི་ས་གཏན་ལ་འབེབས་དགོས། དེའི་མགོ་འདོན་པ་ལ་སྐྱོན་བཟློག་དགོས། དེ་ཡང་ལྷ་སའི་ཕྱོགས་བཞིའི་རི་རྒྱབ་ན། ཤར་ནི་རི་པདྨ་དཔུངས<སྤུངས་>པ་འདྲ་བ་ཡོད། ལྷོ་ན་རིན་པོ་ཆེ་འདྲ་བ་ཡོད། ནུབ་ན་མཆོད་རྟེན་རྩེགས་པ་འདྲ་བ་འདུག བྱང་ན་པདྨ་ཁ་ཕྱེས་པ་འདྲ་བ་འདུག་པས་ས་ཕྱོགས་དེར་སྟོན་པ་རྒྱལ་བ་ཤཱཀྱ་ཐུབ་པའི་སྐུ་གཟུགས་སྐུ་གདུང་རིང་བསྲེལ་ལ་མཆོད་པ་རྒྱས་ཤིང་ཡུ་རིང་དུ་འབྱུུང་བའི་རྟགས་ཡིན།  དེའི་ནང་ཁོངས་ན་བཀྲ་ཤིས་རྟགས་བརྒྱད་ཡོད་དེ། བྱང་འཕན་དཀར་གྱི་རི་ལ་དབུ་ལ་གདུགས་ལྟ་བུ་འདྲ་བའི་རི་ཡོད། ཤར་གྱི་གདོས་པའི་བྲག་ལ་སྤྱན་ལ་ཉ་འདྲ་བའི་རི་ཡོད། ལྷོའི་ལྡོང་བཙན་རི་ལ་གསུང་འབུད་དུང་འདྲ་བ་ཡོད། རྫོང་བཙན་རི་ལ་ལྗགས་ལ་པདྨོའི་ལོ་འདབ་འདྲ་བ་ཡོད། གྲིབ་རྫོང་གི་བྲག་ལ་མགུལ་ལ་བུམ་པ་འདྲ་བའི་རི་ཡོད། སྒོ་ཕུ་ན་ཐུགས་དཔལ་བེའུ་འདྲ་བ་ཡོད། ནུབ་བྱང་ཕུ་ན་སྐུ་ལུས་རྒྱལ་མཚན་འདྲ་བ་ཡོད། སྟོད་ལུང་མདའ་ན་ཕྱག་ཞབས་འཁོར་ལོ་རྩིབས་བརྒྱད་ཡོད་པ་དེ་ནི་ས་ཕྱོགས་འདིར་ཡོན་ཏན་ཐམས་ཅད་འབྱུང་བའི་རྟགས་ཡིན། གཞན་ཡང་གཏེར་ཁ་རང་བྱུང་བཞི་ནི། དོག་སྡེ་ར་གའི་བྲག་ལ་རིན་པོ་ཆེ་ཟངས་ཡོད། དོན་ཏེ་སྒོ་ཕུ་ན་ལྕགས་ཡོད། ལ་དོང་གི་རི་ལ་དངུལ་ཡོད། ལྕགས་ཁ་རི་ལ་གསེར་ཡོད། འོ་ཐང་ན་མཚོ་འདི་ལ་ཤར་ནས་སྟག་སྐྱ་བོ་ཡོད། ལྷོ་ན་འབྲུག་སྔོན་པོ་ཡོད། ནུབ་ན་བྱ་དམར་མི་འདྲ་བའི་རི་ཡོད། བྱང་ན་རུས་སྤལ་ནག་པོ་འདྲ་བ་ཡོད། དེ་བཞི་ནི་གཙུག་ལག་ཁང་གི་ལྷ་བཞི་ཚང་བ་ཡིན། དེ་ཚོའི་ཐད་ཀ་ན་ས་དགྲ་རེ་རེ་ཟུག་ཡོད་པས། དེ་ཚོ་བཟློག་པའི་ཐབས་ཤེས་དགོས་པ་ཡིན་ནོ།།  བོད་ཡུལ་འདི་སྲིན་མོ་གན་རྐྱལ་དུ་སྒྱེལ་བ་འདྲ། ལྷ་སའི་མཐིལ་འདི་སྲིན་མོའི་སྙིང་ཁ་འདྲ་བ། འོ་ཐང་གི་མཚོ་འདི་སྲིན་མོའི་སྙིང་ཁྲག་འདྲ་བར་མཁྱེན། དམར་པོ་རི་དང་ལྕགས་ཁ་རི་གཉིས་སྟག་དང་སེངྒེ་གཉིས་མཇུག་མ་སྦྲེལ་བ་འདྲ་བ་འདི་སྲིན་མོའི་གནོད་སེམས་ཡིན་པར་མཁྱེན། ར་མོ་ཆེ་ཀླུའི་ཕོ་བྲང་དུ་མཁྱེན། བྲག་ལྷ་ན་མ་མོའི་ཉལ་ཁང་ཡོད། གྲིབ་ཕུ་ནས་ཉང་རན་གྱི་བར་ལ་ཀླུ་བཙན་གྱི་རྒྱུ་སྲང་ཡོད། དཀར་ཆུང་ཟླ་བ་ཚལ་ན་འདྲེ་དང་ཐེའུ་རང་གི་འདུན་མ་བྱེད་པའི་ས་ཡོད། ཤར་ན་ཆུ་སྲིན་ལངས་པ་འདྲ་བའི་ས་དགྲ་ཡོད། ངན་ལམ་གྲོན་པ་རི་ཡོད། ལྷོ་ན་ནག་པོ་གཟན་ལ་རུབ་པ་འདྲ་བ་དཀར་ཆུང་ཡུག་མའི་རི་ལ་ས་དགྲ་ཡོད། ནུབ་ན་ཤུན་གྱི་བྲག་ཏེའུ་རྩེ་ལ་བདུད་ནག་པོ་བྱ་ར་བྱེད་པ་འདྲ་བའི་ས་དགྲ་ཡོད། བྱང་ན་ཉང་བྲན་དང་དོར་ཏེའུ་བར་གྱི་རི་ལ་གླང་པོ་ཆེ་གཡུལ་དུ་ཞུགས་པ་འདྲ་བའི་ས་དགྲ་ཡོད།  སའི་ཡོན་ཏན་བརྒྱད་ནི། ས་ལ་པདྨ་འདབ་བརྒྱད། གནམ་ལ་འཁོར་ལོ་རྩིབས་བརྒྱད། ལོག་ལ་བཀྲ་ཤིས་རྟགས་བརྒྱད་ཡོད་དོ། ། དང་པོར་སའི་བཅོས་བྱེད། འདྲེའི་མུན་ཁུང་ཤིག་བཙན་གྱི་རྒྱུ་སྲང་དུ་མཆོད་རྟེན་དཀར་བོ་བརྩིགས། ནུབ་བྱང་མཚམས་ལྕགས་ཁ་རི་ལ་མ་མོའི་ཉལ་ས་ཡོད་པས་དེ་ལ་བྲག་ལྷ་མགོན་པོ་བཞེངས། ཀླུའི་འཇིགས་གཟུགས་ཀྱི་ཕོ་བྲང་ཇོ་བོས་མནན་ནས་ཡོད། ཤར་བྱེ་མ་ལུང་སྟོང་ན་སྲིན་མོ་ནག་མོ་འདོམས་བཟེད་པ་འདྲ་བ་ཡོད། དེ་ལ་དབང་ཕྱུག་ཆེན་པོའི་ལིངྒ་ཚུགས། གཞན་ཡང་ཆུ་སྲིན་ལ་དུང་ཁ་སྟོན། སྡིག་པ་ལ་བྱ་ཁྱུང་སྟོན། བདུད་ནག་པོ་བྱ་ར་བྱེད་པ་ལ་བར་ཆུའི་ཁར་མཆོད་རྟེན་དམར་བོ་བརྩིགས། གླང་པོ་ཆེ་ལ་སེངྒེ་སྟོན། དེ་རྣམས་གྲུབ་པ་དང་འཕན་ཡུལ་ནས་ར་དཀར་མོ་ལ་ས་སྐྱོས་ལ་མཚོ་བསྲུབས་ལ་ལྷ་ཁང་བརྩིགས་ཤིག ཐུགས་དམ་གྱི་ལྷ་ཁང་རྩིག་ཏུ་སྟེར་ནས་འབྱོངས་པ་ཡོང་བྱ་བའི་འཕྲིན་དེ་གཡོག་མོ་ལ་བསྐུར་བས། བུ་མོས་འཕྲིན་སྔ་ཕྱི་ནོར་ནས། སྔོན་ལ་ར་དཀར་མོ་ལ་ས་སྐྱོས་ལ་འོན་ཐང་གི་མཚོ་བསྲུབས་ལ་བགྱིས་ཟེར་བ་བྱས་པས། ལྷ་ཅིག་བལ་ཟ་ཁྲི་བཙུན་གྱིས་འཕན་ཡུལ་ནས་ར་དཀར་མོ་ལ་ས་བསྐྱས་ནས། འོན་ཐང་གི་མཚོ་ལ་བཏབ་པས་སྙོག་མ་ལང་ལང་སོང་ནས་ཉི་མ་བདུན་དུ་བྱས་ཀྱང་གོང་ལྟར་སོང་ནས་མ་བཏུབས་པས། ཁྲི་བཙུན་གྱི་བསམ་པ་ཨོང་ཅོང་གིས་ཕྲག་དོག་བྱས་འདུག་སྙམ་ནས། རྒྱལ་པོ་སྲོང་བཙན་སྒམ་པོ་ལ་ལྷ་ཁང་རྩིག་པའི་ཐབས་ཀྱི་གྲོས་དྲིས་སོ།། ལྷ་ཅིག་རྒྱ་མོ་ཨོང་ཅོང་གིས་ས་དཔྱད་རིན་ཆེན་སྤུངས་པ་མཛད་པའི་ལེའུ་སྟེ་བཅུ་གཉིས་པའོ།། །།

རྩོམ་ཁུངས།  བཀའ་ཆེམས་ཀ་ཁོལ་མ་ལས་བཤུས།  ཤོག་ལྷེ། ༡༢༥

དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། kh9n བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
5997907
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།
网站备案号:青ICP备15000002号 青公网安备 63262102000011号