༄༅།། ས་སྐྱ་ལེགས་བཤད་ལས་རབ་བྱེད་བདུན་པ་མི་རིགས་པའི་ཚུལ་བརྟགས་པ་བཞུགས་སོ།།
བྲན་གཡོག་ང་རྒྱལ་ཆེ་བ་དང་།།
དཀའ་ཐུབ་ལྡན་པ་ཆས་གཟོབ་དང་།།
རྒྱལ་བོ་ཆོས་བཞིན་མི་སྤྱོད་པ།།
གསུམ་པོ་ཚུལ་མིན་ཞུགས་པ་ཡིན།།
མི་ལྕོགས་བྱ་བ་རྩོམ་པ་དང་།།
མང་དང་འཁོན་ཞིང་སྟོབས་ལྡན་རྩོད།།
བུད་མེད་ཡིད་རྟོན་ངན་དང་མཛའ།།
ལྔ་བོ་མྱུར་དུ་བརླག་པའི་རྒྱུ།།
ནོར་མེད་ཟས་གོས་མཆོག་འདོད་དང་།།
གཞན་ལ་སློང་ཞིང་ང་རྒྱལ་ཆེ།།
བསྟན་བཅོས་མི་ཤེས་རྩོད་པར་འདོད།།
གསུམ་པོ་འགྲོ་བའི་བཞད་གད་ས།།
ཡུལ་བཟང་ཡོད་བཞིན་ཡུལ་ངན་ལ།།
སྐྱེ་བོ་ངན་པ་ཕོངས་ཤིང་ཆགས།།
ཀིང་ཤུའི་མེ་ཏོག་ཤ་ཡིན་ཞེས།།
ཅེ་སྤྱང་ལས་གཞན་སུ་ཞིག་རེ།།
ཆེན་པོ་རྣམས་ལ་དགྲ་བས་ཀྱང་།།
རང་གི་འཁོར་གྱིས་གནོད་པ་མང་།།
སེང་གེ་ལུས་ཀྱི་འབུ་མིན་པ།།
སྲོག་ཆགས་གཞན་གྱིས་ག་ལ་ཟ།།
རྗེ་བོས་བདག་ལ་གནོད་བྱེད་པ།།
དེ་ལ་སྐྱོབ་པར་བྱེད་པ་སུ།།
སྣང་བས་གཟུགས་ལ་སྒྲིབ་བྱེད་ན།།
དེ་ལ་ལྟ་བའི་ཐབས་གཞན་མེད།།
སྐྱེ་ངན་རང་ལ་མི་ཕན་ཡང་།།
གཞན་ལ་གནོད་པ་བྱེད་པ་ཡོད།།
སྦྲུལ་གདུག་ཟས་སུ་རླུང་ཟ་ཡང་།།
ཕ་རོལ་མཐོང་ན་མི་གསོད་དམ།།
འདོད་པ་བདེ་འོ་སྙམ་སེམས་ཀྱང་།།
དེ་སྤྱོད་སྡུག་བསྔལ་ཁོ་ནའི་རྒྱུ།།
ཆང་འཐུང་བདེ་འོ་སྙམ་པ་དེ།།
སྨྱོ་བ་བདེ་བར་བསྒོམ་པ་ཡིན།།
ཡོན་ཏན་ཅན་ལ་འཇིག་རྟེན་གུས།།
ཡོན་ཏན་འབད་པའི་ཤུགས་ལ་གནས།།
འབད་ནས་ཡོན་ཏན་མི་བསྒྲུབ་པར།།
གཞན་ལ་འཁངས་པས་ཅི་ཞིག་ཕན།།
མི་རྣམས་ཚེ་རིང་བ་ལ་སྨོན།།
རྒས་པར་གྱུར་ལ་འཇིགས་པར་ལྟ།།
རྒས་པ་འཇིགས་ཤིང་ཚེ་རིང་བར།།
འདོད་པ་བླུན་པོའི་ལོག་ལྟ་ཡིན།།
གང་ཞིག་མཁས་པ་ཡོད་བཞིན་དུ།།
དེ་ལས་ཡོན་ཏན་མི་ལེན་ན།།
མི་དེ་གདོན་གྱིས་བཏབ་པའམ།།
ཡང་ན་ལས་ཀྱིས་མནར་བ་ཡིན།།
གང་ལ་ལོངས་སྤྱོད་ཡོད་བཞིན་དུ།།
སྤྱོད་དམ་སྦྱིན་པར་མི་བྱེད་ན།།
མི་དེ་ནད་ཀྱིས་བཏབ་པའམ།།
ཡང་ན་ཡི་དྭགས་མངོན་སུམ་ཡིན།།
ཆོས་ལུགས་ཤེས་ཀྱང་མི་སྒྲུབ་ན།།
དེ་ཡི་ཆོས་ཀྱིས་ཅི་ཞིག་བྱ།།
ལོ་ཏོག་ཕུན་སུམ་ཚོགས་ན་ཡང་།།
གཅན་གཟན་དགའ་བ་ག་ལ་སྐྱེ།།
ལས་ཀྱིས་མནར་བའི་སེམས་ཅན་ལ།།
ལོངས་སྤྱོད་ཡོད་ཀྱང་སྤྱོད་མི་ནུས།།
བྱ་རོག་ལྟོགས་ཀྱང་བསྐུངས་མོད་ཀྱི།།
འགྲངས་པར་ཟ་བ་ག་ལ་ནུས།།
སྤྱོད་དང་སྦྱིན་པར་མི་ནུས་པའི།།
ནོར་དེས་ཕྱུག་པོར་བསྒོམ་ན་ནི།།
རི་བོ་གསེར་དུ་བསྒོམས་པ་ཡིས།།
ཕྱུག་པོར་བསྒྲུབ་པ་ཤིན་ཏུ་སླ།།
ཆོས་དང་ཆོས་མིན་སྨྲ་བ་ལ།།
མཁས་པ་ཤིན་ཏུ་མང་ན་ཡང་།།
དེ་ལྟར་ཤེས་ནས་ཉམས་ལེན་པ།།
འཇིག་རྟེན་འདི་ན་ཤིན་ཏུ་དཀོན།།
རིགས་གཟུགས་ལང་ཚོ་ལྡན་ན་ཡང་།།
ཡོན་ཏན་མེད་ན་མཛེས་མ་ཡིན།།
རྨ་བྱ་སྤུ་སྡུག་ཡིད་འོང་ཡང་།།
ཆེན་པོའི་རྒྱན་དུ་འོས་སམ་ཅི།།
སྣ་ཡི་ཚབ་དང་ཉོས་པའི་བུ།།
གཡར་པོའི་རྒྱན་དང་བརྐུས་པའི་ནོར།།
སློབ་དཔོན་མེད་པའི་རིག་པ་རྣམས།།
ཡོད་ཀྱང་གཞན་གྱིས་བརྩི་བ་མེད།།
མི་གང་བྱས་པ་མི་གཟོ་བ།།
དེ་ནི་གཞན་པས་རང་ལ་གནོད།།
ལྟས་ངན་སྒྲུབ་པ་ཉེས་པ་འགའ།།
དགྲ་ཡི་ཐོག་མ་རང་ལ་འབྱུང་།།
ལོངས་སྤྱོད་འགྲུབ་པར་མཐོང་ན་ཡང་།།
གནས་མ་ཡིན་ལས་སུ་ཞིག་ལེན།།
ལུག་ཐུག་འཐབ་པའི་ཁྲག་བལྡགས་པས།།
ཝ་སྐྱེས་མགོ་བོ་བཀས་ཞེས་ཐོས།།
འབྲེལ་བ་འགའ་ཡི་ངོར་བྱས་ནས།།
གཞན་ལ་སྟེར་ཀྱིས་དོར་མི་བྱ།།
བརྒྱ་བྱིན་ཡིན་ཡང་འཁོར་འདབས་རྣམས།།
ག་བུར་བཞིན་དུ་འབྲོས་པར་འགྱུར།།
རྒྱུན་དུ་འགྲོགས་པའི་གྲོགས་སྤང་ནས།།
གསར་བུ་འགའ་ལ་ཡིད་མི་བརྟན།།
འུག་པའི་རྒྱལ་པོས་བྱ་རོག་གི།།
བློན་པོ་བསྟེན་པས་ཕུང་ཞེས་གྲགས།།
མི་ངན་འབད་པས་བསྟེན་བྱས་ཀྱང་།།
རང་གི་མི་རུ་འགྲོ་བ་མེད།།
ཆུ་ནི་ཇི་ལྟར་བསྐོལ་གྱུར་ཀྱང་།།
མེ་རུ་འབར་བ་མི་སྲིད་དོ།།
རྒྱུ་མཚན་བརྟགས་ནས་ཁྲོ་བ་ནི།།
ཅུང་ཟད་རིགས་ཤིང་སེལ་བའང་ཤེས།།
རྒྱུ་མེད་པར་ནི་གང་ཁྲོ་བ།།
དེ་ཡི་བསལ་ཐབས་སུ་ཡིས་ཤེས།།
དགྲ་བོའི་ནུས་པ་མ་བརྟགས་པར།།
ཉམ་ཆུང་ན་ཡང་བརྙས་མི་བྱ།།
ཏ་ཌི་བྷ་ལ་བརྙས་པ་ཡིས།།
ནམ་མཁའ་ལྡིང་གིས་རྒྱ་མཚོ་བཅོམ།།
བསོད་ནམས་འཛད་ན་ངན་སེམས་སྐྱེ།།
རིགས་འཛད་པ་ན་བུ་ངན་སྐྱེ།།
ནོར་འཛད་པ་ན་བརྐམ་ཆགས་སྐྱེ།།
ཚེ་འཛད་པ་ན་འཆི་ལྟས་འབྱུང་།།
རང་གིས་ངན་སྤྱོད་མ་བྱས་ན།།
བརྒྱ་བྱིན་གྱིས་ཀྱང་སྨད་མི་ནུས།།
ཆུ་མིག་རང་ཉིད་མ་བསྐམས་ན།།
ས་ཡིས་མནན་པས་ག་ལ་ཐུབ།།
བྱ་བ་མི་འདྲ་བརྒྱ་ཕྲག་རྩོམ།།
མཐར་ཕྱིན་བྱ་བ་གཅིག་ཀྱང་མེད།།
བློ་རྒོད་ཕལ་ཆེར་གྲོང་བར་གྱི།།
ཁྱི་རྒན་འདྲ་བར་རྒྱུན་དུ་འཁྱམས།།
ལས་ཀྱི་ཤུགས་ཀྱིས་ཁྲིད་པ་ན།།
བློ་ཆེན་ལོག་པའི་ལམ་ནས་འགྲོ།།
མུ་སྟེགས་བྱེད་པའི་སྟོན་པ་མཆོག།།
དབང་ཕྱུག་སྨྱོན་པའི་བརྟུལ་ཞུགས་འཛིན།།
མི་གང་ཁྲིམས་ལས་གང་འདའ་བ།།
རེ་ཞིག་རྒྱལ་ཡང་ཕམ་པ་ཡིན།།
ཆུ་སྐྱར་ཁྲིམས་ལས་འདས་པ་ཡིས།།
ས་ཀུན་ཐོབ་ཀྱང་སེང་གེས་བསད།།
ཧ་ཅང་ཤེས་རབ་ཆེ་དྲགས་པའི།།
བྱ་བ་མང་ན་བདག་ཉིད་བརླག།།
རྒྱལ་པོ་དྲན་རྒྱ་ཆེ་བ་ཡིས།།
རྒྱལ་སྲིད་ཉམས་པ་ཤིན་ཏུ་མང་།།
ཧ་ཅང་ལོངས་སྤྱོད་བསགས་དྲགས་པའི།།
ནོར་ནི་རང་གི་གཤེད་མ་ཡིན།།
ཕུང་ཁྲོལ་ཕལ་ཆེར་ཕྱུག་པ་ལ།།
འབྱུང་གི་སྤྲང་པོ་བདེ་བར་རྒྱུ།།
ཧ་ཅང་མཐུ་རྩལ་ཆེ་དྲགས་ན།།
ལྕེབ་པའི་སྟ་གོན་བྱེད་པ་ཡིན།།
གཡུལ་དུ་བསད་པ་ཕལ་མོ་ཆེ།།
མཐུ་རྩལ་ཅན་ལ་བྱུང་བ་མང་།།
འབྱོར་དང་ཤེས་རབ་སྟོབས་ལ་སོགས།།
བསོད་ནམས་ལྡན་ལ་གྲོགས་སུ་འགྱུར།།
བསོད་ནམས་མེད་ན་དེ་དག་ཀུན།།
བདག་ཉིད་བརླག་པའི་རྒྱུ་རུ་འགྱུར།།
མཁས་པས་བྱ་བ་ཅི་བྱེད་ཀྱང་།།
རང་གི་བསོད་ནམས་བརྟགས་ཏེ་བྱ།།
རྩོད་དུས་བསོད་ནམས་ཕུན་ཚོགས་པ།།
སྐྱེ་བོ་བརྒྱ་ཡི་ནང་ན་དཀོན།།
རྫིང་ངན་ཆུ་ཡིས་ཁེངས་པ་ན།།
ཕྱོགས་གཅིག་ཅི་ནས་འཇིག་པ་ལྟར།།
གང་ལ་ནོར་དང་ལྡན་གྱུར་པ།།
དེ་ལ་རིགས་རྒྱུད་ཤིན་དུ་དཀོན།།
བུ་དང་ལྡན་ན་ནོར་ཆེན་དཀོན།།
དེ་དང་ལྡན་ན་དགྲ་བོས་འཇོམས།།
ཐམས་ཅད་ཕུན་སུམ་ཚོགས་གྱུར་ན།།
མི་དེ་མྱུར་དུ་འཆི་བ་མང་།།
དེས་ན་མཁས་པས་བསོད་ནམས་གསོག།
བསོད་ནམས་ཁོ་ན་ཕུན་ཚོགས་རྒྱུ།།
སུ་ཞིག་གང་ན་ཕུན་ཚོགས་པ།།
དེ་ནི་བསོད་ནམས་བསགས་པའི་རྟགས།།
རྫུན་གྱིས་ཕ་རོལ་བསླུས་སོ་ཞེས།།
སྙམ་ན་རང་ཉིད་བསླུས་པ་ཡིན།།
ལན་གཅིག་རྫུན་དུ་སྨྲ་བ་དེས།།
བདེན་པ་སྨྲས་ཀྱང་དོགས་པ་སྐྱེ།།
ལེགས་ཉེས་རྣམ་པར་མི་དཔྱོད་པར།།
ཁྲོས་ཤིང་ཕ་རོལ་གནད་འབེབས་པ།།
ཆུང་མ་བསད་པའི་ཐི་བ་ལྟར།།
གྲོགས་དང་བྲལ་བའི་མྱ་ངན་ཐོབ།།
མ་འོངས་པ་ན་མི་དཔྱོད་པར།།
བྱུང་བའི་ཚེ་ན་འབད་དེ་བཙལ།།
ཆུ་དང་ཕྲད་ན་ལྷམ་ཕུད་ཀྱི།།
མ་ཕྲད་པ་ན་ག་ལ་ཕུད།།
ཕུགས་སུ་བསྒྲུབ་པར་མི་ནུས་པའི།།
བྱ་བ་ལེགས་ཀྱང་འཇུག་མི་རུང་།།
ཁོང་པའི་ནང་དུ་མི་འཇུ་བའི།།
ཁ་ཟས་ཞིམ་ཡང་སུ་ཞིག་ཟ།།
རྩོལ་བ་དོར་ནས་འདུག་པ་ལ།།
འདི་ཕྱི་གཉིས་ཀ་འགྲུབ་མི་འགྱུར།།
འབད་པ་མེད་ན་ཞིང་བཟང་ཡང་།།
ལོ་ཏོག་ཐོབ་པར་མི་འགྱུར་རོ།།
གནས་མ་ཡིན་པའི་དུལ་དྲགས་ན།།
ཐམས་ཅད་ཀྱིས་ནི་བཀོལ་བར་འགྱུར།།
ཤིང་བལ་སྟན་དུ་བྱེད་མོད་ཀྱི།།
ཡལ་ག་སུ་ཞིག་སྟན་དུ་འདིངས།།
བྱ་བ་ངན་དང་མི་འགྲུབ་པ།།
ཕ་རོལ་བསྒོ་ཡང་བྱེད་ན་བླུན།།
སྦྱར་དུག་ཉོ་ལ་སུ་ཡིད་རྟོན།།
ཐམས་ཅད་སྦྱིན་ཞེས་སུས་སྨྲ་ནུས།།
ནོར་རྣམས་གསོག་ཅིང་མི་སྤྱོད་པ།།
རང་སྲེག་བུད་ཤིང་གསོག་པ་ཡིན།།
བུང་བ་སྦྲང་རྩི་མི་ཟ་བ།།
གཞན་གྱིས་ཁྱེར་ན་ལྕེབ་པར་རྩོམ།།
རྩོམ་ཡིག་མཁོ་སྤྲོད་པ། གསར་འགོད་པ། ནག་བཟའ་བློ་བཟང་ཆོས་གྲགས།
| 
青公网安备 63262102000011号