ཆུང་གྲོགས་རྗེས་དྲན་གྱི་འགྲེལ་བ་ངག་གི་མེ་ཏོག
རྩོམ་པ་བོའི་ལོ་རྒྱུས།
དགེ་འདུན་ཆོས་འཕེལ་ལགས་ནི་ད་ལྟའི་མཚོ་སྔོན་ཞིང་ཆེན་རེབ་གོང་ཞོ་ཕུང་ཞེས་བྱ་བར་རབ་བྱུང་བཅོ་ལྔ་བའི་ཆུ་མོ་ཡོས(1903)ལོར་འཁྲུངས། དགུང་ལོ་བཅོ་ལྔ་བར་དྷི་ཚ་དགོན་པར་ཞུགས་ནས་སློབ་གཉེར་གནང་། དགུང་ལོ་བཅུ་བདུན་པར་བླ་བྲང་བཀྲ་ཤིས་འཁྱིལ་དུ་ཕེབས་ཏེ་མགོ་བསྡུས་གྲྭ་ནས་བཟུང་སྟེ་མཚན་ཉིད་རིག་པའི་གཞུང་ལ་སྦྱངས། དགུང་ལོ་ཉེར་ལྔ་བར་དབུས་སུ་ཕེབས་ནས་འབྲས་སྤུངས་དགོན་པར་སློབ་གཉེར་གནང་། དགུང་ལོ་སོ་གཉིས་པར(1934)ལོར་རྒྱ་གར་གྱི་པཎྜིཏ་ར་ཧུ་ལ་དང་ལྷན་རྒྱ་གར་དུ་ཕེབས། སིངྒ་ལར་སློབ་གྲྭར་ཞུགས་ནས་སཾསྐྲི་ཏའི་སྐད་ཡིག་སྦྱངས། 1938ལོར་ཕྱིར་བོད་དུ་ཕེབས་ཤིང་སླར་རྒྱ་གར་ཏུ་ལོག སྐབས་དེ་ཤེད་དུ་དབྱིན་ཡིག་སྦྱངས་ཤིང་དེབ་ཐེར་སྔོན་པོ་དབྱིན་ཡིག་ཏུ་བསྒྱུར་རོགས་མཛད། བོད་ཤིང་བྱ(1945)ལོར་བོད་དུ་ཕེབས། བོད་མེ་ཁྱི(1946)ལོར་བོད་གཞུང་གིས་བཙོན་དུ་བཟུང་ཞིང་། དེར་ལོ་གསུམ་ལ་བཀག 1949 ལོར་བཙོན་གྲོལ་ཐོབ། དགུང་གྲངས་ཞེ་དགུར་ཕེབས་པ་བོད་རབ་བྱུང་བཅུ་དྲུག་པའི་ལྕགས་ཡོས(1951.8.14)ཉིན་ལྷ་སར་སྐུ་གཤེགས། གསུང་འབུམ་པོད་ལྔ་བཞུགས།
རྩོམ་པའི་རྒྱབ་ལྗོངས། ལོ་རྒྱུས་རྒྱབ་ལྗོངས།
དགེ་འདུན་ཆོས་འཕེལ་མཆོག་གི་ཆུང་གྲོགས་རྗེས་དྲན་ཅེས་བྱ་བའི་སྙན་རྩོམ་འདི་རྩོམ་པའི་རྒྱུ་རྐྱེན་ནམ་རྩོམ་པའི་རྒྱབ་ལྗོངས་ཐད་ལ་འགའ་རེས་རྩོམ་པ་བོ་ཁོང་གི་སྙིང་གི་ཐིག་ལེར་གྱུར་པའི་མཛའ་མོ་ཞིག་ལ་བྲིས་པ་ཡིན་ནོ་ཞེས་ཟེར།ཡིན་ནའང་། རྩོམ་པ་བོ་ཁོང་ལ་དེ་ལྟ་བུའི་ཆུང་གྲོགས་ཤིག་ཡོད་པ་ལོ་རྒྱུས་གང་དུའང་སྒྲོས་ཙམ་ཡང་མ་བྱུང་ལ། ཁོང་གི་ལོ་རྒྱུས་ལས་མཐོང་བ་ནི། བུད་མེད་ཀྱི་ཡོན་ཏན་རང་ཆས་སུ་མངའ་བའི་མ་ཡུམ་ཨ་ནེ་པདྨ་སྐྱིད་ཞུ་བ་ལ་ཨ་ཅེ་ཚེ་རིས་ཞེས་པའི་སྤུན་ཞིག་ཡོད། དེ་ལ་ལྷ་བ་མགོན་པོ(ཨ་མྱེས་སྟོབས་ཆེན་གྱི་ལྷ་འབབ)དང༌། ཧན་རྒྱ་(གཡའ་མ་བཀྲ་ཤིས་འཁྱིལ་གྱི་གྲྭ་བ་མཛད།)ཡུམ་མེ་བཅས་བུ་བུ་མོ་མིང་སྲིང་གསུམ་ཡོད། དགེ་འདུན་ཆོས་འཕེལ་དགུང་ལོ་ཉེར་ལྔའི་སྟེང་ལྷ་སར་ཕེབས་འདུན་སྐྱེས་པ་ན་ཨ་མ་དང་གཅེན་མོ་ཟུང་གིས་གདུང་སེམས་ལྕི་མོས་བཀག་ཀྱང་གཡོལ་དུ་མེད་པར་ལོ་ངོ་གསུམ་གྱི་རྗེས་ནས་ཕྱིར་མ་རྒན་གྱི་འཁྲིས་སུ་ཕེབས་རྒྱུའི་ཁ་ཆད་བྱས་ཏེ་དྲེའུ་ཞིག་ཡོད་པར(ནག་ཆུ་ནས་རྐུན་མས་ཁྱེར།)ལམ་རྒྱགས་བཀལ་ནས་ཕེབས་ཁར་ལྷ་བ་མགོན་པོ་དང༌། ཧན་རྒྱ་ཕ་བུ་གཉིས་ཀྱང་དབུས་གྲོགས་བྱས་ཏེ་ལྷ་སར་ཕེབས། རིམ་གྱིས་དགེ་འདུན་ཆོས་འཕེལ་དབུས་གཙང་ཡོངས་སུ་སྙན་པ་ཆེ་བའི་མཁས་པ་ཞིག་ཏུ་གྱུར་བ་དང༌། ལྷ་བ་མགོན་པོ་བསྙེན་མཚམས་པ་བཟང་བོ་ཞིག་བྱུང༌། ཧན་རྒྱས་ལོ་འགར་དཔེ་གཟིགས་གནང་ནའང་སྦྱངས་བརྩོན་ལ་ལྷོད་གཡེང་ཆེ་བས་ཕྱིས་སུ་སློབ་གཉེར་རྒྱབ་ཏུ་བསྐྱུར་ཏེ་རྣམ་པ་གཉིས་ལ་ཞབས་ཏོག་མཐུན་རྐྱེན་བསྒྲུབ་རྒྱུའི་ཁ་ཚོན་བཅད་དེ་དེའི་ལས་ལ་ཞུགས། རེ་ཞིག་གི་ཚེ་འཚོ་བའི་མཐུན་རྐྱེན་གྱི་ཆེད་དུ་གནས་ག་ཤེད་ཅིག་ཏུ་ཕྱིན་ནས་སླར་ལོག་རྒྱུ་མ་བྱུང་བར་ཚེ་ལས་འདས་པའི་གཏམ་ངན་དེ་ཁོང་གི་ཕ་དང་དགེ་ཆོས་རིན་པོ་ཆེ་གཉིས་ཀྱིས་གསན་པ་ན། སྤྱིར་འཁོར་བའི་བྱ་གཞག་ལ་ཡིད་རབ་ཏུ་སྐྱོ་བ་དང་སྒོས་སུ་ཆུང་གྲོགས་ཧན་རྒྱ་ཚེ་ལས་འདས་པར་བཟོད་གླགས་མེད་པའི་སྙིང་རྗེའི་ཡིད་ཀྱིས་ཀུན་ནས་བསླངས་ཏེ་ད་གཟོད་ཆུང་གྲོགས་རྗེས་དྲན་ནམ།༼འདུ་བྲལ་སྙིང་བོ་མེད་པར་རྟོགས་པའི་གླུ༽ཞེས་པའི་སྙན་རྩོམ་འདི་ཆེད་དུ་བྲིས་པ་ཡིན་པར་གྲགས་སོ།།
སྤྱིར་རྩོམ་ཞིག་ཡིན་ན་རྩོམ་པའི་རྒྱབ་ལྗོངས་རེ་ཅིས་ཀྱང་ཡོད་པའི་ངེས་པ་མེད་ཅིང་། དོན་དངོས་རྨང་གཞི(生活基础)ཞེས་པའང་བརྗོད་བྱ་དེ་རྩོམ་པ་བོ་ལ་དོན་དངོས་ཡིན་ཡང་ཆོག་ལ་མིན་ཡང་རུང་གི གནད་དགག་ནི་རྩོམ་པ་བོས་རང་སེམས་ལ་འགྱུར་བ་བསླངས་ནས་ཡིད་འགྱུར་རྒྱ་མཚོའི་རླབས་རིས་བཞིན་དུ་བྱུང་བ་དེ་སྙན་ངག་གི་སྒྱུ་འཕྲུལ་དུ་དྲངས་ཤིང་། སྙན་ངག་དེའི་རོ་ཉམས་ཀློག་པ་བོས་མྱངས་ཚེ་ཡིད་ལ་ཟད་མི་ཤེས་པའི་འགྱུར་བ་སྣ་ཚོགས་སློང་ལ། དོན་དངོས་ཀྱི་སྣང་བ་བསྐྱེད་ཐུབ་ཚེ་ད་གཟོད་དོན་དངོས་རྨང་གཞི་ལྡན་ཅེས་བསྔགས་པ་ཡིན་ནོ། །
སྙན་ངག་འདི་ནི་སྙན་པའི་འགྱུར་ཁུགས་གསལ་ལ་འཛོམས་པའི་རོལ་དབྱངས་ཤིག་དང་། སྣང་བརྙན་མིག་ལ་འཆར་བའི་བརྙན་རིས་ཤིག་ཡིན་ལ།རོལ་དབྱངས་དང་བརྙན་རིས་འདི་གཉིས་ཀྱང་སྙིང་གི་འགྱུར་བ་དང་འོ་ཆུ་བཞིན་གཅིག་ཏུ་འདྲེས་འདུག རོལ་དབྱངས་དང་བརྙན་རིས། སེམས་པ་གསུམ་ལྷན་དུ་འཛོམས་པའི་སྙན་ངག་གི་ཁམས་འདི་ལ་སེམས་པ་གླན་ཞིང་སེམས་པ་འགྱུ་བཞིན་མྱངས་ན་འུ་ཐུག་པའི་རེ་སྨོན་དང་སྨྲེང་སྐྱོ། དྲན་གདུང་དང་ཕྱི་ཐགའཁྲེང་ཞེན་དང་འགྱོད་སེམས་ཤིག་མཐའ་དང་ཟད་དུ་མེད་པའི་ཚུལ་དུ་ཉམས་སུ་མྱོང་ཐུབ།
སྤྱིར་ཇི་སྙེད་པའི་སེམས་ཅན། དེ་སྙེད་པའི་ཁམས་དང་མོས་པའི་ཚུལ་ཅན་དུ་ཡོད་ལ། སྒྱུ་རྩལ་མཚོན་ཐབས་དང་མྱོང་རོལ་ཡང་དེའི་རྗེས་སུ་འགྲོ་བས། སྙན་ངག་གཅིག་ལའང་མྱོང་འཆར་ཁྲི་མ་འབུམ་ཡོད་སྲིད། དེ་འདྲའི་ཁྲི་མ་འབུམ་ལས་ངས་ནི་རང་གི་ཁབ་མིག་ལ་འཆར་ཚུལ་ཞིག་གློད་པར་འདོད་མོད་ཀྱི། ཇི་ལྟར་དགའ་སྐྱོ་ཆགས་སྡང་གི་སེམས་གཤིས་ཇི་བཞིན་མཚོན་པའི་སྙན་ངག་དཀའ་བ་བཞིན། སྙན་ངག་དེ་དང་དེ་མྱོང་བའི་སེམས་པ་ཡང་སྨྲ་བསམ་བརྗོད་འདས་ཀྱི་ཡུལ་དུ་འགྱུར་བས། ལྐུགས་པ་བཞིན་དུ་ཁ་རོག་གེར་སེམས་ཀྱིས་མྱོང་བ་ལས་ཐབས་ཅི་ཡོད།
སྲིད་པའི་འབྱོར་བ་ལ་ཁའི་ན་བུན། །
འདུས་པའི་གཉེན་གྲོགས་ཚོང་འདུས་མགྲོན་པོ། །
མ་ངེས་སྐྱིད་སྡུག་མདང་གི་རྨི་ལམ། །
བསམ་ཞིང་བསམ་ན་སྙིང་བོ་མི་འདུག །
དོན་འགྲེལ། སྲིད་པ་འཇིག་རྟེན་འདི་ཡི་འབྱོར་བ་ཐམས་ཅད་ནི་སྐད་ཅིག་ལ་འདུ་ཞིང་ཡུད་ཙམ་གྱིས་འབྲལ་བའི་ལ་ཁའི་ལང་ལོང་གི་ན་བུན་ཡིན་ལ། ལས་ཀྱིས་གཅིག་དུ་འཛོམས་ཤིང་འདུས་པའི་གཉེན་ཉེ་དང་གྲོགས་དག་ནི་ཚོང་ལ་འདུས་པའི་མགྲོན་པོ་བཞིན་དུས་ཐུང་ངུ་ལ་ལྷན་དུ་བསྡད་ཀྱང་ཚོང་ཟིན་པ་དང་གྱེས་ནས་སོ་སོའི་གནས་སུ་བུད་འགྲོ། ངེས་པ་མེད་ཅིང་ཡིད་རྟོན་བྲལ་བའི་སྐྱིད་དང་སྡུག་གི་ཚོར་བ་རྣམས་ཀྱང་མདང་མར་གཉིད་ཀྱི་རྨི་ལམ་ཡིན་པས་དོན་ལ་ཅི་ཡང་མེད་དོ། ། འདི་ལྟར་སེམས་པ་ནང་ལ་བཀུག་ནས་བསམ་ཞིང་བསམ་ན་འཇིག་རྟེན་གྱི་ཆོས་ཐམས་ཅད་ནི་སྒྱུ་མ་ལྟ་བུ་སྟེ་སྙིང་བོ་ཏིལ་ཙམ་ཡང་མི་འདུག་ཨང་ཞེས་པའོ། །
སྒྱུ་རྩལ་གྱི་ཁྱད་ཆོས། ཤོ་ལོ་ཀ་འདིས་ཡུལ་དང་ཡུལ་ཅན་གཉིས་གཞི་གཅིག་ལ་སྦྲེལ་ཅིང་། སྙན་འཇེབས་ཀྱི་དབྱངས་འགྲོས་དང་ཡིད་འཕྲོག་པའི་བརྙན་རིས་ལྷན་དུ་འཛོམས་པ་དང་།བརྙན་རིས་དེ་ཡང་འགུལ་མེད་གཟུགས་རིས་ཙམ་མིན་པར་ལང་ལོང་གཡོ་བའི་ན་བུན་དང་། སོ་སོར་གྱེས་པའི་ཚོང་འདུས་ཀྱི་མགྲོན་པོ།གཉིད་པའི་རྨི་ལམ་སྟེ་འགུལ་བའི་བརྙན་རིས་ཤིག་ཡིན་ལ།དབྱངས་འགྲོས་དང་བརྙན་རིས་འདི་གཉིས་ཀྱང་རྩོམ་པ་བོའི་ཡིད་ཀྱི་སྨྲེང་སྐྱོའི་འགྱུར་བ་དང་དབྱེར་མེད་དུ་འདྲེས་ནས་བྱུང་བས་ད་གཟོད་སྙན་ངག་གི་ཁམས་ཤིག་ངང་གིས་མིག་ལ་འཆར་ཅིང་ཡིད་ཀྱིས་མྱོང་ཐུབ།ཕྱི་ཡུལ་གྱི་ན་བུན་དང་། ཚོང་མགྲོན་དག་ཀྱང་སྤྱིར་བཏང་གི་ན་བུན་དང་ཚོང་མགྲོན་ཙམ་མིན་པར་ཡུན་ཅན་རྩོམ་པ་བོའི་ཡིད་ཀྱི་འགྱུར་བས་ལྕགས་ཁམས་གསེར་འགྱུར་གྱི་རྩིས་བསྒྱུར་བ་བཞིན་དུ་ཁྱབ་ཡོད་པས་དེ་ནི་སྙན་ངག་གི་ཞིང་ཁམས་ཁོ་ན་ལས་གཞན་དུ་ནམ་ཡང་བཙལ་དུ་མེད་པར་མ་ཟད། མཚོན་བྱ་སྙིང་བོ་མི་འདུག་སྙམ་པའི་སེམས་པ་སྙི་མོ་དེ་མཚོན་པར་ལ་ཁའི་ན་བུན་དང་། ཚོང་འདུས་མགྲོན་པོ། མདང་གི་རྨི་ལམ་གསུམ་བཀོད་ཅིང་། མཚོན་བྱེད་འདི་གསུམ་ལས་རྩོམ་པ་བའི་སེམས་པ་ཀློག་པ་བོའི་སྐྱོ་བ་རུ་མི་འགྱུར་ཀ་མེད་ཡིན་ལ། ཁོང་གི་ཆུང་གྲོགས་གང་དེར་བཀྲ་མི་ཤིས་པ་ཅི་ཞིག་བྱུང་སོང་སྙམ་པའི་དོགས་བློ་བསྐྱེད་ལ། ཤོ་ལོ་ཀ་འདི་ནི་སྙན་རྩོམ་འདིའི་མགོ་འདྲེན་དང་སྤྱི་དོན་ཡང་ཡིན་ནོ་སྙམ།
རྒྱུས་མེད་གཤིན་རྗེའི་ཕོ་ཉས་ཁྲིད་ནས། །
ཕྱི་མའི་འཕྲང་རིང་འགྲིམ་པའི་གྲོགས་ལ། །
སྐྱབས་ཀྱི་དམ་པ་རྩ་གསུམ་ལྷ་ཡིས། །
ཐུགས་རྗེའི་སྤྱན་གྱིས་སྐྱེལ་མ་མཛོད་ཅིག །
དོན་འགྲེལ། ཆ་མེད་རྒྱུས་མེད་ཀྱི་འཇིགས་རུང་གཤིན་རྗེའི་ཕོ་ཉས་རང་དབང་མེད་པར་ཁྲིད་ཅིང་། ཚེ་ཕྱི་མའི་འགག་འཕྲང་རིང་མོ་འགྲིམ་པའི་སྙིང་གི་མཛའ་གྲོགས་དེ་ལ། གང་ལ་སྐྱབས་སུ་རེ་ན་བསླུ་བ་སྐད་ཅིག་ཙམ་ཡང་མེད་པའི་སྐྱབས་ཀྱི་དྭངས་མ་དང་རྩ་བར་གྱུར་བ་བླ་མ་དང་ཡི་དམ་མཁའ་འགྲོའི་ཚོགས་ཀྱིས་ཐུགས་བརྩེ་བ་ཆེན་པོའི་སྤྱན་གྱིས་གཏོང་བ་མེད་པར་ཕར་འགྲོའི་སྐྱེལ་མ་མཛོད་ཅིག་ཅེས་རེ་སྐུལ་ཞུས་པའོ། །
སྒྱུ་རྩལ་གྱི་ཁྱད་ཆོས། སྙན་ངག་འདིར་འུ་ཐུག་ཐབས་ཟད་དང་སྡུག་བསྔལ་ཚད་མེད་ཁྲོད་ཀྱི་རེ་སྨོན་ཞིག་མཐོང་ཐུབ་ལ། རེ་སྨོན་དེ་ཡང་རྩོམ་པ་བོའི་ནང་ཆོས་ཀྱི་ལྟ་བའི་མིག་ཟུང་ལས་མངོན་པའི་བསླུ་བ་མེད་ཅིང་དད་གུས་ཀྱིས་ཁེངས་པའི་རེ་སྨོན་ཞིག་རེད། རེ་སྨོན་འདི་ལས་རྩོམ་པ་བོའི་དད་པའི་ཟབ་ཚད་མཐོང་ཐུབ་ལ་གྲོགས་ལ་བཅངས་པའི་ཞེ་འདང་ཡང་མྱོང་ཐུབ། རྒྱུས་མེད་གཤིན་རྗེའི་ཕོ་ཉ་དང་ཕྱི་མའི་འཕྲང་རིང་འགྲིམ་ཞེས་པས་ཉམ་ང་ཉག་ཕྲག་གྱུར་བའི་གྲོགས་ཀྱི་ངང་ཚུལ་བཟོད་དཀའ་བ་ཞིག་ཀློག་པ་བོའི་སྙིང་ལ་མེ་ལྕེ་བཞིན་མཆེད་པར་བྱེད།
སྐྱེས་ནས་འཆི་བ་འཁོར་བའི་ཆོས་ཉིད། །
བསྒྱུར་དུ་མེད་པ་སྒྱུ་མའི་རང་མདངས། །
མི་བཟློག་གཤིན་རྗེ་རྒྱལ་པོའི་བཀའ་ཡིག །
ཉམ་ཆུང་གྲོགས་ཀྱི་སྟེང་དུ་སླེབས་སོང། །
དོན་འགྲེལ། སྐྱེ་བའི་མཐའ་མར་མི་འདོད་པའི་འཆི་བ་ཡོད་པ་ནི་འཁོར་བའི་ཆོས་ཉིད་ཡིན་ལ། གང་གིས་ཀྱང་བསྒྱུར་དུ་མེད་པ་ནི་སྒྱུ་མ་རྨི་ལམ་གྱི་རང་བཞིན་མ་ཡིན་ནམ། བཟློག་ཐབས་གང་ཡང་མེད་པའི་འཆི་བདག་གཤིན་རྗེའི་རྒྱལ་བོའི་བཀའ་ཡིག་དེ་ཉིད། ཉམ་ཆུང་བའི་བདག་གི་སྙིང་གྲོགས་ཀྱི་སྟེང་ལ་མི་འདོད་བཞིན་དུ་སླེབས་ནས་གཏན་དུ་ཕྱིར་འོང་མེད་པའི་གནས་ལ་ཁྲིད་སོང་ཞེས་པའོ། །
སྒྱུ་རྩལ་གྱི་ཁྱད་ཆོས། ཤོ་ལོ་ཀ་འདིར་བཙན་བརྗེད་ཆེ་ལ་བཟློག་ཐབས་མེད་པའི་གཤིན་རྗེ་རྒྱལ་བའི་བཀའ་ཡིག་དེ་ཉིད། ཉམ་ཆུང་ལ་སྙིང་རྗེ་བའི་གྲོགས་ཀྱི་སྟེང་ལ་སླེབས་ཞེས་པས་བཙན་དྲགས་ལ་གཉོམ་ཆེས་པའི་དོ་མི་མཉམ་པའི་འགལ་ཟླ་གཉིས་མིག་ལ་འཆར་ཅིང་། གདུང་སེམས་མཉམ་བསྐྱེད་ཀྱི་སེམས་དང་སེམས་བྱུང་ཞིག་ངང་གིས་སྐྱེད་པར་བྱེད་དོ། །
སྔོན་སྨོན་ལས་ཀྱི་ཆར་ཟིམ་བབས་ཚེ། །
ཡོད་ཡོད་འདྲ་བའི་དགུང་གི་འཇའ་ཚོན། །
དུང་སེམས་ཉི་མ་གསལ་དུ་སོང་ཚེ། །
མི་མཐོང་ནམ་མཁའི་དབྱིངས་སུ་ཡལ་སོང་། །
དོན་འགྲེལ། ཚེ་རབས་སྔོན་མར་ལྷན་དུ་འཛོམས་པའི་སྨོན་ལམ་དང་ལས་ཀྱི་སྦྲང་ཆར་ཟམ་ཟིམ་བབས་པའི་ཚེ། ཡོད་ཡོད་འདྲ་བའི་མཛེས་སྡུག་རྣམ་པར་བཀྲ་ལ་ཡིད་དུ་འོང་བའི་དགུང་གི་འཇའ་ཚོན་དེ་ཉིད། ཞེ་དུངས་དུངས་པའི་ཉི་མ་གསལ་དུ་སོང་བའི་དུས་སུ་མཐོང་དུ་མེད་པའི་ནམ་མཁའི་དབྱངས་སུ་ཡལ་ནས་མེད་པར་གྱུར་སོང་ཞེས་པའོ། །
སྒྱུ་རྩལ་གྱི་ཁྱད་ཆོས། སྙན་ངག་འདིར་ཚེ་རབས་སྔོན་མའི་ལས་དང་སྨོན་ལམ་གྱིས་ལྷན་དུ་འཛོམས་པའི་རྩོམ་པ་བོ་རང་ཉིད་དང་རང་གི་ཆུང་གྲོགས་གཉིས་ཀྱི་ཡིད་མི་ཚིམ་པའི་ལས་སྐལ་བརྗོད་ཡོད་དེ། དེ་ཡང་དང་བོ་ལྷན་འཛོམས་བྱུང་བ་ནི་ཡིད་འཕྲོག་པའི་འཇའ་ཚོན་བཞིན་མཛེས་སྡུག་ལྡན་ནའང་ཕན་ཚུན་ལ་ཞེ་དུངས་པའི་ངང་ཡུན་རིང་འགྲོག་པའི་སྐལ་བཟང་མ་བྱུང་བར་ཆུང་གྲོགས་དེ་ཉིད་གློ་བུར་གཤེགས་པ་ནི་སེམས་ཀྱི་སྨྲེང་སྐྱོ་ཡིན་ལ། ལས་སྐལ་ལ་འཁང་ར་བྱས་པའང་ཚིག་ཤུགས་ལས་མྱོང་ཐུབ། འཛོམས་ཤིང་གློ་བར་གྱེས་པའི་དཔེ་ལ་འཟའ་ཚོན་དང་ཉི་མ་བཀོད་པས། དཔེ་ཅན་འདུ་བྲལ་གྱི་ངང་ཚུལ་སྣང་བརྙན་བཞིན་མིག་ལ་འཆར་བའི་སྙན་ངག་གི་ཁམས་ཤིག་ངང་གིས་མྱོང་ཐུབ། ཡོད་ཡོད་ཅེས་པ་ནི་སྙན་ངག་འདིར་བྱུང་བའི་སྒྲ་རྒྱན་དང་བོ་སྟེ། སྒྲ་རྒྱན་འདིས་དོན་གྱི་ཉམས་འདོན་པ་ལ་ཕན་གྲོགས་བླ་མེད་ཅིག་བྱས་ཡོད་དེ། འཇའ་ཚོན་དེ་ནི་དོན་ལ་མེད་པའམ་གློ་བུར་ཡལ་ངེས་ཡིན་ནའང་སེམས་སུ་རྟག་བརྟན་དང་མཛེས་སྡུག་གིས་བཞད་ཡོད་ཅིང་། ཡལ་སྙམ་པ་ཞེ་ན་མེད་མོད་ཀྱི།འོན་ཀྱང་གློ་བུར་ཡལ་སོང་ཞེས་པའོ། །
ན་གཞོན་ལང་ཚོའི་མེ་ཏོག་རྒྱས་ཚེ། །
ཡིད་ཀྱི་ཆུ་བོ་གཅིག་ཏུ་འདྲེས་པའི། །
འདྲིས་འདྲིས་ཆུང་གྲོགས་སྙིང་གི་ཚེར་མ། །
ད་ལྟ་རིགས་དྲུག་གང་དུ་ཡོད་ན། །
དོན་འགྲེལ། དེ་དུས་ནི་ན་གཞོན་གྱི་དུས་ཤིག་སྟེ། ཡིད་འཕྲོག་པའི་ན་གཞོན་གྱི་ལང་ཚོ་དག་ཕྱོགས་ཀུན་ནས་མེ་ཏོག་བཞིན་མཛེས་པར་སྨིན་ཅིང་བཞད་པའི་སྐབས་སུ། ཡིད་ཀྱི་བརྩེ་ཞེན་དང་དུངས་ཀ་ཆུ་ལ་ཆུ་ཞུགས་པ་བཞིན་གཅིག་དུ་འདྲེས་ལ། ལན་གཅིག་དང་འདྲེས་པ་ཙམ་མིན་པར་ལུས་སེམས་དབྱེར་མེད་དུ་འདྲིས་འདྲིས་པའི་ཆུང་གྲོགས། སྐད་ཅིག་ལ་ཙམ་ལའང་བརྗེད་མི་ཐུབ་ཅིང་ཞེ་ནས་འབོར་མི་ནུས་པའི་ཚེར་མ་དེ་ཉིད། ད་ལྟའི་དུས་འདིར་འགྲོ་བ་རིགས་དྲུག་གི་ཞིང་ཁམས་གང་ཞིག་ན་ཡོད་ན་སྟེ་ཡོད་དམ་ཞེས་པའོ། །
སྒྱུ་རྩལ་གྱི་ཁྱད་ཆོས། ཤོ་ལོ་ཀ་འདིར་ཡང་དབྱངས་འགྲོས་དང་བརྙན་རིས་ལྷན་འདྲེས་ཀྱིས་ཀློག་པོའི་ཡིད་ལ་སྙན་ངག་གི་དོན་སྤྱི་ཞིག་གསལ་བོར་བཞེངས་འདུག སྤྱིར་བརྩེ་འདང་ནི་མིག་ལ་འཆར་མི་ཐུབ་མོད། འདིར་ཡིད་ཀྱི་བརྩེ་འདང་དེ་གཅིག་དུ་འདྲེས་པའི་ཆུ་བོ་ཞིག་གི་གཟུགས་སུ་བཀོད་པས་ཀློག་པ་བོའི་མིག་ལའང་དབྱེར་མེད་རོ་གཅིག་དུ་འདྲེས་པའི་སེམས་པ་ཟུང་ཞིག་འཆར་ཐུབ་ལ། འདྲིས་འདྲིས་པའི་རྐྱེན་གྱིས་སྐད་ཅིག་ལའང་བརྗེད་དཀའ་བ་ནི་སྙིང་ལ་ཟུག་པའི་ཚེར་མའི་གཟུགས་སུ་བཀོད་པ་ནི་མཚོན་ཐབས་ཁྱད་པར་བ་ཞིག་སྟེ།ཚེར་མ་དེ་ཡང་གནོད་བྱེད་ཀྱི་ཚེར་མ་ཞིག་མ་ཡིན་པར་སྙིང་ཉེ་བའི་ཚེ་མ་ཞིག་ཡིན་པ་མཐོང་། སྤྱིར་སྒྲ་རྒྱན་ནི་དོན་ཉམས་ཕུན་སུམ་ཚོགས་པ་ཞིག་འདོན་པའི་གྲོགས་སུ་འགྲོ་ན་བཀོལ་དགོས་ལ། དེ་ལྟར་མིན་པར་ཚིག་གི་སྙིགས་མ་སྤུངས་ན་སྙིང་བོ་ཅི་ཡང་མེད། སྙན་རྩོམ་འདིར་བྱུང་བའི་སྒྲ་རྒྱན་གཉིས་པ་འདྲིས་འདྲིས་ཞེས་པས་ཀྱང་དོན་གྱི་རོ་ཉམས་མཛད་མེད་ཅིག་སྟོན་པ་ལ་ཉི་མ་མེ་གྲོགས་དང་། ཆར་བ་ཆུ་གྲོགས་སུ་སོང་བའི་ཚད་ལ་ཐོན་ཡོད།
སྐྱིད་ཤོད་ལྷ་སའི་གྲོག་ཆུ་ཕྲ་མོར། །
ཞག་གསུམ་འཛོམས་པ་འགྲོགས་པའི་ཐ་མ། །
མི་རིང་འཕྲད་པའི་ཁ་ཆད་བྱས་པ། །
རྨི་ལམ་ངང་ནས་མཇལ་དུས་སླེབས་སོང་། །
དོན་འགྲེལ། ཡུལ་སྐྱིད་ཤོད་ཀྱི་ལྷ་སའི་སྐྱིད་ཆུའི་གྲོག་ཆུ་ཕྲ་མོའི་འགྲམ་དུ་དུས་ཤིན་ཏུ་ཐུང་བ་ཞག་གསུམ་ལ་འཛོམས་པ་ནི་མི་ཚེ་འདིར་དགའ་སྐྱིད་ཀྱིས་འགྲོགས་པའི་དུས་ཀྱི་མཐའ་མ་ཡིན་པ་སུ་ཡིས་རྟོགས། ཡིན་ནའང་དེ་ནི་འགྲོགས་པའི་དུས་ཀྱི་མཐའ་མར་གྱུར་སོང་། གྱེས་ཁར་མི་འགྱངས་པར་འཕྲད་འོང་ཞེས་ཁ་ཆད་བཞག་ཡོད་མོད་ཀྱི། འོན་ཀྱང་། ཁ་ཆད་བཞིན་མཛོམས་པའི་སྐལ་བ་མ་བྱུང་བར་མར་གཉིད་རྨི་ལམ་ལས་ཡང་ཡང་འཛོམས་པའི་དུས་ཀྱི་གོ་སྐབས་འདི་ཙམ་སླེབས་སོང་ཞེས་པའོ། །
སྒྱུ་རྩལ་གྱི་ཁྱད་ཆོས། ཤོ་ལོ་ཀ་འདིར་གྲོག་ཆུ་ཕྲ་མོ་ཞིག་གི་འགྲམ་དུ་ཞག་གསུམ་འཛོམས་པ་ནི་འགྲོགས་པའི་དུས་ཀྱི་མཐའ་མ་ཡིན་པ་མ་རྟོགས་པར་མི་རིང་འཕྲད་པའི་ཁ་ཆད་བཞག་མོད། དེ་མི་རྨི་ལམ་དུ་མཇལ་བའི་སྐལ་བ་ཙམ་དུ་གྱུར་ཚུལ་བརྗོད་ནས་རྩོམ་པ་བོའི་སྨྲེང་སྐྱོ་ཀློག་པ་བོའི་མྱ་ངན་དུ་འགྲེམ་པར་བྱེད་ལ། སྤྱིར་རྩོམ་པ་བོ་དང་ཁོང་གི་ཆུང་གྲོགས་འདི་གཉིས་འགྲོགས་པའི་ཡུལ་དུས་མང་བོ་ཞིག་ཡོད་ངེས་ནའང་། ཆེད་དུ་ཡུལ་ལྷ་སའི་གྲོག་ཆུ་ཕྲ་མོའི་འགྲམ་དང་དུས་འགྲོགས་པའི་མཐའ་མར་གྱུར་པ་གཉིས་བདམས་པ་ནི་ཁོང་ལ་ནང་སེམས་ཀྱི་འགྱུར་བ་སྟོན་པ་ལ་གྲོགས་སུ་འགྲོ་བའི་ཕྱིའི་ཡུལ་དུས་འདེམས་པའི་ཤེས་རབ་བློ་ཡུལ་དུ་ཤོང་དཀའ་བའི་ཚོད་དུ་ཡོད་པ་མཐོང་།
རྒན་གཞོན་བར་མའི་སྐྱེ་བོ་ཐམས་ཅད། །
ངེས་མེད་འཆི་བའི་སྣང་ཚུལ་མཐོང་ཡང། །
ཆུང་སྐྱེས་གྲོགས་ཀྱིས་བོར་བའི་ཕྱོགས་ལ། །
ནང་གི་གདུང་སེམས་ཆོད་ཐབས་མི་འདུག །
དོན་འགྲེལ། སྤྱིར་འཇིག་རྟེན་ཁམས་འདིར་འཚོ་བའི་རྒན་གཞོན་བར་མས་བསྡུས་པའི་སྐྱེ་བོ་ཐམས་ཅད་ལ་ཐམས་ཅད་དུ་རྒན་གཞོན་བར་མའི་ན་ཚོད་ཀྱི་གོ་རིམ་ལ་ངེས་པའམ་བདེན་པ་ཅི་ཡང་མེད་པར་འཆི་བའི་སྣང་ཚུལ་མང་བོ་དངོས་སུ་མཐོང་མོད་ཀྱི།འོན་ཀྱང་། ཆུང་ནས་ལྷན་ཅིག་སྐྱེས་ཤིང་། སྙིང་ལ་འདྲིས་པའི་གྲོགས་ཀྱིས་མི་འདོད་བཞིན་དུ་བོར་བའི་ཕྱོགས་ལ་ཞེ་དུངས་དུངས་པའི་སེམས་ཀྱི་ཐག་པ་ཆོད་ཐབས་མི་འདུག་ཅེས་པའོ། །
སྒྱུ་རྩལ་གྱི་ཁྱད་ཆོས། སྙན་ངག་འདིར་གནས་ལུགས་ཡོངས་སུ་ཤེས་ཀྱང་དུངས་ཞེན་ཆེ་དྲགས་ནས་དངོས་ཡོད་གནས་ཚུལ་དང་ལེན་བྱེད་མི་ཐུབ་པའི་ཚུལ་གསལ་བོར་བརྗོད་ཡོད་པ་སྟེ།རྒན་གཞོན་བར་མའི་སྐྱེ་བོ་ཐམས་ཅད་ངེས་མེད་འཆི་བའི་སྣང་ཚུལ་མཐོང་བ་དང་། དུངས་སེམས་ཆོད་ཐུབ་མི་འདུག་པའི་གནས་ཚུལ་འདིས་རྩོམ་པ་བོའི་མྱ་ངན་དང་དྲན་གདུང་གི་སེམས་པ་དེ་ལག་ལ་འཇོག་པར་བྱེད་ཅིང་། བོར་ཞེས་པའི་བྱེད་མེད་ལས་ཚིག་འདི་སྡུག་བསྔལ་གྱིས་མནར་བའི་རྩོམ་པ་བོའི་ལུས་སེམས་སྟོན་པ་ལ་ལྷག་པར་ནུས་པ་ཆེ་སྟེ། ཆུང་གྲོགས་ཀྱི་ངོས་ནས་བསམ་བཞིན་དུ་དོར་བ་མིན་པས་དགའ་ཞེན་ཆེ་ངེས་ལ། རྩོམ་པ་བོ་ཁོང་ནི་བདག་པའི་བོར་བའི་བདག་མེད་ཅིག་དུ་གྱུར་པས། འཕྲད་འདོད་ཀྱི་རེ་བ་ནི་འདི་ཙམ་ཞེས་བཤད་དཀའོ། །
ཤི་རྗེས་འགྱོད་པ་བླུན་པོའི་ངང་ཚུལ། །
ལུས་སེམས་རྒུད་པའི་རྒྱུ་ལས་མེད་ཀྱང་། །
ཡུན་རིང་འདྲིས་པའི་སེམས་ཀྱི་བག་ཆགས། །
གོམས་པའི་ཤུགས་འདི་བཟློག་ཐབས་མི་འདུག །
དོན་འགྲེལ། གསོན་པའི་དུས་སུ་གཅེས་སྤྲས་བྱེད་དགོས་པ་ལས་ཤི་བའི་རྗེས་སུ་འགྱོད་པ་ནི་ལས་ཀྱི་མཐའ་མ་བླུན་པོའི་ངང་ཚུལ་ཡིན་ལ། རང་གི་ལུས་སེམས་ཉམས་ཤིང་རྒུད་པའི་རྒྱུ་རྐྱེན་ལས་མ་འདས་མོད། ཡིན་ནའང་། དུས་ཡུན་རིང་བོར་འདྲིས་ཤིང་འདྲོགས་པའི་ནང་སེམས་ཀྱི་བག་ཆགས་གོམས་གོམས་པའི་ནུས་ཤུགས་འདི་བཟློག་པའི་ཐབས་ཅི་ཡང་མི་འདུག་ཨང་ཞེས་པའོ། །
སྒྱུ་རྩལ་གྱི་ཁྱད་ཆོས། ཤོ་ལོ་ཀ་འདིར་ཡང་ཤི་རྗེས་འགྱོད་པ་བླུན་པོའི་རང་བཞིན་ཡིན་པ་གསལ་བོར་ཤེས་པར་མ་ཟད་རང་གི་ལུས་སེམས་རྒུད་པའི་རྒྱུ་ཡིན་པ་ཡང་གསལ་བོར་ཤེས་མོད།ཤེས་བཞིན་དུ་ཡང་ཆུང་གྲོགས་དེ་ཉིད་སེམས་ཀྱིས་གཏོང་མི་ཐུབ་ལ། ཆུང་གྲོགས་དེ་ཉིད་དྲན་པ་དང་འབྱེར་མེད་དུ་འདྲེས་ཡོད་པ་ལྟ་བུའི་ཚུལ་དེ་རྟོགས་ནུས་ཤིང་། རྩོམ་པ་བོའི་འགྱོད་གདུང་དང་དུངས་ཞེན། དྲན་པས་སྨྱོས་པའི་ངང་ཚུལ་དག་ཀློག་པ་བོའི་ཞེ་ལ་ཆུ་འཁྱག་བཞིན་འཁྱག་སིབ་སིབ་ཀྱིས་སིམ་འོངས།
ལུས་ཟུངས་ཟད་པ་ཀེང་རུས་གཟུགས་བརྙན། །
གསོན་དུ་རེ་བའི་ཁོ་ཐག་ཆད་དེ། །
འཆི་བའི་མིག་གིས་ཅེ་རེ་ལྟ་བའི། །
གཏམ་དེ་བདེན་ན་སྙིང་ལ་གཟན་པ། །
དོན་འགྲེལ། ཆུང་གྲོགས་གང་དེའི་ལུས་ཀྱི་ཟུངས་དང་མདངས་ཟད་ཟད་པ་ནི་ཤ་མེད་རུས་ཁོག་གི་ཀེང་རུས་ཀྱི་གཟུགས་བརྙན་དུ་གྱུར་ཅིང་། ད་ནི་གསོན་དུ་རེ་བའི་ཁོ་ཐག་སེམས་གཏིང་ནས་ཆད་དེ། འཆི་བ་མགོ་ལ་སླེབས་པའི་ཉམ་ཐག་པའི་མིག་ཟུང་གིས་སུ་ཞིག་མཐོང་འདོད་པ་འམ་ཞེ་འཁྲེང་བའི་ངང་ཅེ་རེ་རེ་ལྟ་བཞིན་འདུག་ཟེར་བའི་གཏམ་དེ་ཉིད་བདེན་ན་ནི་བདག་གི་སྙིང་ལ་གཟན་པའམ་མྱ་ངན་བསྐྱེད་པ་ལ་གཏམ་ངན་དེའི་ཐུ་ཞིག་མི་འདུག་ཅེས་པའོ། །
སྒྱུ་རྩལ་གྱི་ཁྱད་ཆོས། ཤོ་ལོ་ཀ་འདི་ལས་རྩོམ་པ་བོ་ཁོང་གི་ཆུང་གྲོགས་དེ་རྐྱེན་ངན་བར་ཆད་བཟློག་ཏུ་མེད་པ་ཞིག་གིས་རྗེས་མེད་ཕྱི་མའི་ཡུལ་ལ་འཁྱེར་ཁ་མའི་གནས་ཚུལ་གསལ་བོར་བརྗོད་ཡོད་ཅིང་། དེ་ཡང་གཞན་གྱི་ངག་ལས་ཐོས་པ་སྟེ། རྩོམ་པ་བོ་ཁོང་གི་ཆུང་གྲོགས་དེ་ཉིད་ལུས་ཟུངས་ཟད་ནས་ཀེང་རུས་གཟུགས་བརྙན་ལྟ་བུར་གྱུར་བ་དང་། ཁོ་རང་ཡང་རང་ཉིད་གསོན་པའི་རེ་ཐག་ཆད་དེ། འཆི་བའི་མིག་གིས་ཅེ་རེ་རེ་འཁྲེང་ཞེན་དང་རེ་བའི་ལྟ་བཞིན་འདུག་ཅེས་པའི་གཏམ་དེ་བདེན་ན། དེ་ནི་རྩོམ་པ་བོའི་སྙིང་ལ་དུག་བཞིན་གཟན་པ་སྟེ། འཆི་མིག་ཉམ་ཞན་ཞིག་གིས་འཁྲེང་བཞིན་མཐོང་དུ་རེ་བ་དེ་ཡང་རྩོམ་པ་བོ་དགེ་འདུན་ཆོས་འཕེལ་ཡིན་སྲིད་ན་རྩོམ་པ་བོའི་སེམས་ཀྱི་བཟོད་མི་ཐུབ་པའི་མྱ་ངན་དང་འགྱོད་པ། དྲན་གདུང་སོགས་ཀྱིས་ཀློག་པ་བོའི་ཞེ་རྩ་འཁྱག་ལ་སྦྱོར་ཞིང་། གཏམ་དེ་བདེན་ན་ཞེས་པའི་ཚིག་ཤུགས་ན་གཏམ་དེ་མི་བདེན་ན་ཅི་རུང་སྙམ་པའི་རེ་སྨོན་བསྐུངས་ཡོད་པས་སེམས་པ་ཡངས་པོར་འགྱུ་བཞིན་མྱངས་ན་སྙན་ངག་གི་མནར་གཅོད་འདི་ཀློག་པ་བོས་ཀྱང་བཟོད་དཀའོ། །
མ་བརྟག་སེམས་ཀྱི་འཆར་ཚུལ་ཞིག་ལ། །
ད་དུང་དྲུང་ན་ཡོད་ཡོད་འདྲ་བ། །
དྲན་པའི་གཞུ་མོ་ནང་དུ་བཀུག་ཚེ། །
སྙིང་ཁོང་སྟོང་བའི་རྒྱུ་ལས་མི་འདུག །
དོན་འགྲེལ། ཆུང་གྲོགས་དེ་ཉིད་སེམས་ལ་འདྲིས་ཆེས་པས་མ་བརྟག་རང་བབས་སུ་གནས་པའི་སེམས་ཀྱི་འཆར་ཚུལ་ཞིག་ལ་ད་དུང་ཡང་སྔོན་འགྲོགས་པའི་སྐབས་བཞིན་གམ་ན་ཡོད་ཡོད་འདྲ་ནའང་། དྲན་པའི་གཞུ་མོ་ནང་ལ་བཀུག་ནས་འདང་ཞིག་བརྒྱབ་ཚེ་གཏན་དུ་བྲལ་བའི་སྡུག་བསྔལ་གྱིས་སྙིང་ཁོང་སྟོང་ལྷང་ལྷང་བྱེད་པའི་རྒྱུ་ལས་ཅི་ཡང་ལྷག་མི་འདུག་ཅེས་པའོ། །
སྒྱུ་རྩལ་གྱི་ཁྱད་ཆོས། ཤོ་ལོ་ཀ་འདིར་ཡང་ཆུང་གྲོགས་དེ་ཉིད་ཞེ་ལ་འདྲིས་ཆེ་བས་དྲན་པ་རང་བབ་དུ་གནས་ཚེ་སྔོན་གྱི་དུས་བཞིན་གམ་དུ་ཡོད་ཡོད་འདྲ་བའི་སྣང་བ་རང་བྱུང་དུ་འཆར་ཅེས་པས་ཆུང་གྲོགས་དེ་དྲན་ནས་བཟོད་ཐབས་མི་འདུག་ཅེས་མ་བརྗོད་ཀྱང་། རྩོམ་པ་བོས་རང་གི་ཆུང་གྲོགས་དྲན་པའི་ཟབ་ཚད་མཐོང་ཐུབ་སྟེ། དྲན་དྲགས་ནས་དྲུང་ན་ཡོད་པ་ཐམས་ཅད་རང་གི་ཆུང་གྲོགས་ཡིན་པའི་འཁྲུལ་སྣང་བྱུང་། འཁྲུལ་སྣང་དེ་ལས་སད་ཚེ་གྲོགས་དང་གཏན་བྲལ་བྱུང་བའི་སྟོང་ལྷང་ལྷང་གི་སེམས་པ་ཞིག་ལས་ཅི་ཡང་མེད་པ་ཀློག་པ་བོས་ཀྱང་མྱོང་ཐུབ། འདི་ནི་རྩོམ་པ་བོ་ཁོང་གི་སྙན་ངག་སྒྱུ་རྩལ་གྱིས་བྱིན་པའི་བཟོད་མི་ཐུབ་པའི་མནར་གཅོད་ཅིག་ཅི་ལ་མིན།
བརྩེ་ཞིང་འགྲོགས་པའི་ཕྱི་ཐག་བསམས་ཏེ། །
མཆོག་གསུམ་བསླུ་བ་མེད་པའི་ཞིང་དུ། །
དགེ་བའི་དངོས་པོ་ཅུང་ཟད་བསྒྲུབས་པ། །
ཕྱི་མའི་ཡུལ་དུ་གྲོགས་ལ་བསྲིངས་སོ། །
དོན་འགྲེལ། ཕན་ཚུན་ལ་སེམས་བརྩེ་ཞིང་འགྲོགས་འགྲོགས་པའི་ཕྱི་ཐག་ལ་བསམ་ཞིང་བསམ་ཏེ།སངས་རྒྱས་དང་། ཆོས་དང་། དགེ་འདུན་དེ་མཆོག་གསུམ་བསླུ་བ་མེད་པའི་ཞིང་དམ་པ་དེར། ལས་དགེ་བའི་དངོས་པོ་ཅུང་ཟད་བསྒྲུབས་པ་ཐམས་ཅད། ཚེ་ཕྱི་མའི་ཡུལ་དུ་གྲོགས་མེད་གཅིག་པུར་འཁྱམས་པའི་ཆུང་གྲོགས་ཡིད་ཀྱི་ཚེར་མ་འདྲ་བ་ཁྱོད་ལ་ཕན་ཞིང་བདེ་བའི་ཕྱིར་དུ་བསྲིངས་པའམ་བསྔོ་བར་བྱེད་དོ་ཞེས་པའོ། །
སྒྱུ་རྩལ་གྱི་ཁྱད་ཆོས། ཤོ་ལོ་འདིར་རྩོམ་པ་བོའི་ཁྲེལ་ཡོད་ཕྱི་ཐག་རིང་བའི་སེམས་པ་དེ་མཐོང་ཐུབ་ལ། ཁོང་གི་སྐྱེ་སྔ་ཕྱི་ཡོད་ཅིང་། སྐྱབས་ཀྱི་རེ་ས་གཅིག་པུ་ནི་བསླུ་མེད་དཀོན་མཆོག་གསུམ་པོ་ཡིན་ཤག་གི་ནང་བསྟན་མཚན་ཉིད་རིག་པའི་ལྟ་བ་དེ་ཡང་རྟོགས་ཐུབ། དེ་ཡང་ཉམ་ཆུང་བའི་རྩོམ་པ་བོ་ཁོང་ལ་གྲོགས་ལ་ཕན་འདོད་ཀྱི་སེམས་པ་མེ་འབར་བ་འདྲ་ཞིག་ཡོད་ནའང་། ནུས་པ་རྡུལ་ཙམ་ཡང་མེད། ཐབས་གཅིག་ཡོད་པ་ནི་རང་གིས་ད་བར་དུ་བསྒྲུབས་པའི་དགེ་བའི་དངོས་པོ་ཅུང་ཟད་ཅིག་ཡོད་པ་ཐམས་ཅད་གྲོགས་ལ་ཕན་ཕྱིར་དཀོན་མཆོག་གི་ཞིང་ལ་བསྔོ་སྨོན་རྣམ་དག་ཅིག་བྱེད་པ་དེ་ཁོ་ན་ཡིན། ཐབས་དང་ནུས་པ་ཡང་འདི་ཙམ་ལས་ཅི་ཞིག་ཡོད། ཅི་ཡང་མེད་དོ། །
བརྗོད་བྱའི་བསམ་བློའམ་བརྗོད་སྙིང་།
དེ་ལྟར་སྙན་རྩོམ་འདིའི་བརྗོད་བྱ་རང་གི་བློ་མིག་ཏུ་འཆར་ཚུལ་ཙམ་ཞིག་གཙོ་བོར་བརྗོད་ནས།ད་ནི་བརྗོད་བྱའི་བསམ་བློའམ་བརྗོད་སྙིང་ལ་ཅུང་ཟད་རྟོག་པར་བྱས་ན། འདུས་བྱས་ཐམས་ཅད་མི་རྟག་པ་ཡིན་པས་སྙིང་བོ་ཡོད་པ་དང་། ཡིད་རྟོན་ཆོག་པའི་ཆོས་རྡུལ་ཕྲན་ཙམ་ཡང་མེད་མོད། འོན་ཀྱང་། ཡུན་ཐུང་མི་ཚེའི་འཚོ་བའི་ཁྲོད་དུ་གྲོགས་ཀྱི་མཆོག་ནི་མི་བསླུ་བའོ་ཞེས་དང་ཡིད་རྟོན་ཐུབ་པ་གྲོགས་ཀྱི་མཆོག་ཅེས་གསུངས་པ་བཞིན་ལས་ཀྱིས་འབྲེལ་བའི་སྙིང་གྲོགས་ལ་བསླུ་བ་མེད་ཅིང་མཛའ་བརྩེའི་སེམས་ཀྱིས་འགྲོགས་དགོས་པ་དང་། ཚེ་ལ་རིང་ཐུང་ཤོར་ནས་སྙིང་གྲོགས་ཚེ་ལས་འདས་ན་སྐྱབས་ཀྱི་དྭངས་མ་བསླུ་བ་མེད་པའི་དཀོན་མཆོག་གསུམ་ལ་སྐྱབས་འཇུག་ཞུ་བ་དང་།རང་གིས་བསྒྲུབས་པའི་དགེ་རྩ་ཅི་ཡོད་ཤི་བོའི་རྗེས་སུ་བསྔོ་སྨོན་བྱེད་པའི་ལྟ་བའང་བརྗོད་ཡོད་ལ། དེ་ནི་སྙིང་བོ་མེད་པའི་ཆོས་ལ་ཤེས་རབ་ཀྱིས་སྙིང་བོ་ལེན་ཚུལ་ཞིག་ཀྱང་ཡིན་ནོ་སྙམ། འདིར་རྩོམ་པ་བོ་ཁོང་གི་ནང་བསྟན་སྙིང་བོར་བྱས་པའི་མཚན་ཉིད་རིག་པའི་ལྟ་བ་དང་། སྐྱབས་ཀྱི་མཐར་ཐུག་གང་ལ་བྱེད་པའི་ཆོས་ཀྱི་བསམ་བློའང་མཐོང་ཐུབ་བོ། །
བརྗོད་སྙིང་གི་རིང་ཐང་ལ་དཔྱད་པ།
ཤར་ཙོང་ཁ་བ་ཆེན་པོའི་ཞལ་ནས་དོན་བཟང་བོ་ཚིག་འབྲུ་བཟང་བོ་ཞེས་རྩོམ་གྱི་ཚིག་དོན་གཉིས་ཆ་བཟང་བ་ལ་བསྔགས་བརྗོད་གནང་བས། བརྗོད་བྱ་དང་རྗོད་བྱེད་གཉིས་ཀ་བཟང་བ་གལ་ཆེ་ལ། སྙན་རྩོམ་འདིའི་ཚིག་དོན་གཉིས་ཀ་སྤྱིར་ལེགས་མོད་ཀྱི། འོན་ཀྱང་། བརྗོད་བྱ་དང་བརྗོད་སྙིང་གང་ནས་བལྟས་ཀྱང་སྔར་མེད་པའི་ལེགས་བཤད་ཅིག་མིན་པས། སྙན་རྩོམ་འདིའི་རིན་ཐང་གཙོ་བོ་ནི་ཚིག་སྦྱོར་ཚུལ་ལ་མཁས་པའི་ངག་གི་དཔལ་ལམ་སྙན་ངག་གི་སྒྱུ་རྩལ་དེ། སྒྲ་དོན་སོགས་སྒྱུ་རྩལ་གྱི་རོ་ཉམས་འདོན་པའི་ཐབས་རྩལ་དེ་ལས་མངོན་ཡོད་པར་འདོད་ཅིང་། སྙན་ངག་སྒྱུ་རྩོམ་གྱི་འོས་འགན་གཙོ་བོ་ཡང་གནས་ལུགས་གང་ཞིག་གཙོ་བར་སྟོན་པ་མ་ཡིན་གྱི། སྐྱེ་བོ་ཕལ་བས་སྨྲ་བསམ་བརྗོད་མེད་དུ་གྱུར་པའི་ནང་སེམས་ཀྱི་འགྱུར་བ་ཕྲ་མོ་དག་སྙན་ངག་པའི་ཤེས་རབ་ཀྱིས་རླབས་ཆེ་བའི་ངག་རིག་གི་སྒྱུ་མའི་འཕྲུལ་ལ་བསྐྱིལ་ནས་ཀློག་པ་བོར་ཞབས་ཞུ་བྱེད་པ་དེ་ཡིན་ནོ། །
སྤྱི་ལོ2016ལོའི12ཚེས6ཉིན་ཆོས་སྐྱོང་རྒྱལ་ལམ་དབྱངས་ཅན་བཞད་པའི་འཛུམ་ཟེར་གྱིས་བྲིས།
|