༄༅།། ས་སྐྱ་ལེགས་བཤད་ལས་རབ་བྱེད་ལྔ་བ་ངན་སྤྱོད་བརྟགས་པ་བཞུགས་སོ།།

གཡོ་ཅན་ཚུལ་གཟོབ་ངག་འཇམ་ལ།།
མ་བརྟགས་བར་དུ་ཡིད་མི་བརྟན།།
རྨ་བྱ་གཟུགས་མཛེས་སྒྲ་སྙན་ཡང་།།
དེ་ཡི་ཁ་ཟས་དུག་ཆེན་ཡིན།།

གཡོ་ཅན་བཟང་བོའི་ཚུལ་བཟུང་ན།།
ཕྱི་ནས་དོན་ལ་བསླུ་བ་ཡོད།།
རི་དྭགས་རྔ་མ་བསྟན་ནས་ནི།།
ཁྲེལ་འདས་བོང་བུའི་ཤ་དག་འཚོང་།།

ངོ་ཚ་ཆུང་རྣམས་གཞན་ནོར་ལ།།
བདག་གི་ཆེ་བ་སྒྲུབ་པ་ཡོད།།
མགྲོན་ལ་གྲོགས་ཀྱི་གོས་བཏིང་ནས།།
བདག་གིས་གུས་རྟགས་སྟོན་པར་བྱེད།།

གཏིང་ནས་ཉམས་པའི་ཁྲེལ་འདས་རྣམས།།
རང་གི་གཏམ་ངན་ངོ་སོར་འཁྱེར།།
ཀཉྩའི་ཡུལ་གྱི་རྒྱ་རིགས་འགའ།།
ཕ་བསད་པ་ལ་རྒྱ་རྔ་རྡུང་།།

བློ་ཆུང་རྣམས་ཀྱིས་ཕན་བཏགས་པ།།
འགའ་ཞིག་གནོད་པ་ཆེན་པོར་འགྱུར།།
སྐྱ་ཀའི་ཕྲུ་གུས་མ་ཡི་སྤུ།།
འཐོག་པ་དྲིན་ལན་ཡིན་པར་སྒོམ།།

གཞུང་ངན་གཞན་གྱི་བཀའ་དྲིན་ལས།།
བྱུང་བ་རང་གི་ཆེ་བར་སྒོམ།།
ཀླུ་ཡིས་འབད་ནས་ཕབ་པའི་ཆར།།
ཞིང་བ་རང་གི་དཔལ་དུ་རྩི།།

བློ་ངན་ལས་ལ་སྤྱོད་པ་ལ།།
རང་གི་འབད་པས་ཐོབ་པར་སེམས།།
ཁྱི་རྒན་ཡ་རྐུན་ཕུག་པའི་ཁྲག།
རུས་པའི་བཅུད་དུ་བསྒོམས་ནས་འཆའ།།

མི་མཁས་པ་དག་གཉེན་བཅོམ་ནས།།
འབྲེལ་མེད་གཞན་དག་གསོ་བར་མཐོང་།།
མགོ་བོ་བཅད་ནས་མཇུག་མའི་རྒྱན།།
སྨྱོན་པ་མིན་པ་སུ་ཞིག་བྱེད།།

བླུན་པོས་དགོས་པའི་སར་མི་བྱིན།།
མི་དགོས་པ་ལ་ལྷུག་པར་འཆོར།།
ཆུ་མིག་ངན་པ་དབྱར་འདབ་ཀྱི།།
དཔྱིད་དུས་དགོས་པའི་ཚེ་ན་སྐམ།།

སྐྱེ་བོ་དམ་པ་ཞི་བ་ལ།།
ངན་པས་ལྷག་པར་འཚེ་བར་བྱེད།།
སྣུམ་དང་ལྡན་པའི་སྡོང་བུ་ལ།།
མེ་ལྕེ་ཆགས་ཀྱི་གཞན་ལ་མིན།།

རྩུབ་པས་རྩུབ་པ་ཐུལ་འགྱུར་གྱི།།
ཞི་བས་འདུལ་བར་ག་ལ་ནུས།།
ཕོལ་མིག་བསྲེགས་དང་བཅད་པས་འདོན།།
ཞི་འཆོས་དེ་ཡི་དུག་ཏུ་འགྱུར།།

རྒྱལ་པོས་ཆོས་བཞིན་ས་བསྐྱང་སྟེ།།
མིན་ན་རྒྱལ་བོ་ཉམས་པའི་རྟགས།།
ཉི་མས་མུན་པ་མི་སེལ་ན།།
དེ་ནི་གཟའ་ཡིས་ཟིན་པའི་རྟགས།།

སྡིག་སྤྱོད་རྗེ་བོར་བསྐོས་པ་དང་།།
ཁང་བའི་ཡང་ཐོག་གྲུམ་པ་དང་།།
རི་རྩེ་ཤིན་ཏུ་ཞིག་པ་ཡི།།
འོག་ན་གནས་རྣམས་རྒྱུན་དུ་སྐྲག།

གལ་ཏེ་རིག་པ་ཡོད་ན་ཡང་།།
སྐྱེ་བོ་རང་བཞིན་ངན་པ་སྤང་།།
དུག་སྤྲུལ་ནོར་བུས་མགོ་བརྒྱན་ཡང་།།
མཁས་པ་སུ་ཞིག་པང་དུ་ལེན།།

སྙན་གྲགས་རྒྱལ་བོ་བཞེད་པ་དཀའ།།
བཀྱེད་ན་ཐུགས་ཀྱིས་འཛིན་པ་དཀོན།།
བར་མར་གནས་པ་གཡང་ཟ་བས།།
རྒྱལ་བོ་ལ་ལ་མེ་ཆེན་འདྲ།།

སྐྱེ་བོ་ངན་པ་སུན་ཕྱུང་བའི།།
ས་དེར་དམ་པ་མཐོང་ཡང་སྤོང་།།
སྦྲུལ་གྱིས་གཅེས་པའི་ས་ཕྱོགས་དེར།།
གསེར་གྱི་ཉམ་ཐག་མཐོང་ཡང་བྲོས།།

ངན་པས་གཞན་དོན་སྒྲུབ་བོ་ཞེས།།
སྙད་བཏགས་ནས་ནི་སྡིག་ལ་སྦྱོར།།
གཞན་དོན་ལྟར་སྣང་སྒྲུབ་དོན་དུ།།
མཁས་པ་སུ་ཞིག་རང་ཉིད་འཇོམས།།