རྫ་དཔལ་སྤྲུལ་གྱིས་གདམས་པའི་མི་ཆོས་བསླབ་བྱ།
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 10 ཚེས 21 རེས་གཟའ་ཟླ་བ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» རྩོམ་རིག» འབོལ་རྩོམ། »རྫ་དཔལ་སྤྲུལ་གྱིས་གདམས་པའི་མི་ཆོས་བསླབ་བྱ།
རྫ་དཔལ་སྤྲུལ་གྱིས་གདམས་པའི་མི་ཆོས་བསླབ་བྱ།
རྩོམ་སྒྲིག་པ།  ཨ་བུ་འབྲོང་། སྤེལ་དུས 2016-11-03ལྟ་ཀློག (2812)རྩོམ་ཁུངས: ངེད་དྲ་བ།པར་འདེབ།

༄༅། །རྫ་དཔལ་སྤྲུལ་གྱིས་གདམས་པའི་མི་ཆོས་བསླབ་བྱ།


རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོ།
    ད་མི་ལུགས་ཐམས་ཅད་གཙོ་བོ་ཚུར་བསྡུས་ན་རྒྱུད་འཇམ་པ་དང་གཅིག བྱ་སྤྱོད་ཚོད་ཟིན་པ་དང་གཉིས། ཁོག་ཡངས་ཤིང་ཚུགས་བརྟན་པ་དང་གསུམ། བྱ་བ་ཀུན་ལ་ཐོག་མར་བརྟག་དཔྱད་མཁས་པ་དང་བཞི། དེ་ཐམས་ཅད་ཕན་སེམས་དྲང་པོའི་ཟིན་པ་དང་ལྔ་པོ་དེ་ལ་འདུས་ཡོད། དང་པོ་རྒྱུད་ཁོང་ཁྲོ་ཚིག་རྩུབ་ཅན་ཞིག་ཡིན་ན་མི་སུ་དང་ཡང་མི་མཐུན། ཕར་ལ་ཕན་ཐོག་བྱས་རུང་ཚུར་ལ་གཅར་སྙིང་མི་འདོད། ཀུན་གྱིས་མཐོང་ས་འགྲོགས་ས་མེད་པ་ཡོང་བས་རྒྱུད་འཇམ་དགོས། རྒྱུད་འཇམ་ཟེར་བ་དེ་མི་ཐམས་ཅད་ལ་ཁོང་ཁྲོ་ཚིག་རྩུབ་མེད་པར་རྒྱུད་འཇམ་ལྷོད་དེ་ཡོད་པ་ཞིག་ལ་ཟེར་བ་རེད་མ་གཏོགས་གླ་ལྤག་འདྲ་བའི་གར་མཐུན་ས་ནས་ནུར་འགྲོ་མ་རེད། དེ་གཅིག་རེད། བྱ་བ་མང་ཞིང་རང་ཚོད་མ་ཟིན་ན་ཁེ་ཉེན་ཆེ་ཞིང་། སྐབས་རེ་ལེགས་རུང་སྐབས་རེར་བརླག མིས་འཕྱ་གཞི་ཞིག་ལས་མི་ཡོང་བས། གྲོགས་དང་བྱ་བ་རང་ཚོད་གཅིག་གི་ཐོག་ནས་བློ་སྣ་འགྱུར་ལྡོག་མི་མང་བར་བྱ་བྱེད་ཐམས་ཅད་ཚོད་ཟིན་དགོས། བྱ་བ་རང་ཚོད་ཟིན་ཟེར་བ་དེ་བྱ་བ་གང་བྱེད་རུང་རང་གི་རྒྱུད་ཚོད་ཐུབ་ཚོད་ནུས་ཚོད་མི་ཚོད་སོ་སོར་བསྟུན་ཤེས་པ་ཞིག་ལ་ཟེར་བ་རེད་མ་གཏོགས་གླེན་པ་ཨུ་ཚུགས་ཅན་བྱ་སྤྱོད་གང་ཡང་ཁས་མི་ལེན་པ་ཞིག་ལ་ཟེར་བ་མ་རེད། དེ་དང་གཉིས་ཡིན། ཁ་ཟས་ནོར་རྫས་བུད་མེད་སོགས་མི་འདོད་མཁན་མེད་ཀྱང་ལོངས་སུ་སྤྱད་ལུགས་ཕུགས་ཀྱི་ཁེ་ཕན་ཆེ་ཆུང་ལ་བསམ། འཕྲལ་གྱི་ངོ་ཚ་ཁྲེལ་འཛིན་ལ་བསམ། ཡང་ཚིག་ངན་གནོད་པ་སོགས་ལ་མ་ཁྲོ་མཁན་མེད་ཀྱང་། སྤྱིར་གྱིས་བཀའ་ཁྲིམས་ཆད་པ་སོགས་ལ་བསམ། སྒོས་ཀྱི་འདི་ཕྱི་ལས་འབྲས་ལ་བསམ་དགོས། བཟང་ངན་སྐྱིད་སྡུག་གང་གིས་ཀྱང་གཤིས་མི་འགྱུར་བའི་ཚིགས་ཐུབ་པོ་དེ་ནམ་ཕུགས་རྒྱལ་ཁམས་ཀུན་གྱིས་བསྟོད་ནས་ཡོང་ངེས། དེས་ན་གང་ལའང་འགྱུར་ལྡོག་མེད་པའི་ཚུགས་ཟིན་པ་ཞིག་དགོས། ཚུགས་ཐུབ་ཟེར་བ་དེ་རང་གི་དྲན་ཚད་མིས་ཟེར་ཚད་ཚང་མའི་རྗེས་སུ་མི་རྒྱུག་པར་བྱ་སྤྱོད་བརྟག་ཐུབ་པ་ཞིག་ལ་ཟེར་བ་རེད་མ་གཏོགས། སྒལ་ཚིགས་ནང་དུ་དབྱུག་པ་བརྒྱུས་པ་འདྲ་བ་བཀུག་རྒྱུ་མེད་པ་ཞིག་ལ་ཟེར་བ་མ་རེད། དེ་དང་གསུམ་ཡིན།
   དེ་ལྟར་བྱ་སྤྱོད་ཐམས་ཅད་ལ་སྔ་བསམ་ཕྱི་བསམ་གཏོང་། རང་དང་གཞན་ལ་འཕྲལ་དང་ཕུགས་སུ་གང་ཕན་གང་གནོད་སོགས་ཁེ་ཉེན་ལེགས་ཉེས་ཐམས་ཅད་ཞིབ་པར་བརྟག དཔྱད་མཁས་ན་གང་བསམ་ལེགས་པར་འགྲུབ་ནས་འོང་། བརྟག་ལོང་དཔྱད་ལོང་མེད་པར་བྱ་བ་བསྒྲུབ་མི་ཉན། ཧ་གོ་ངེས་མ་བྱུང་བར་དུ་གཏམ་མ་བཤད། དོན་རྟོགས་ངེས་མ་བྱུང་བར་དུ་མནའ་མ་བསྐྱལ། ཟེར་བའི་དཔེ་ལྟར་བརྟག་དཔྱད་དེ་ཡང་རང་གཞན་གྱི་བྱ་སྤྱོད་གང་ཡིན་ཡང་བརྩམ་ན་འགྲུབ་དང་མི་འགྲུབ། འགྲུབ་ན་དོན་འབྲས་ཆེ་ཆུང་སོགས་ལ་དཔྱད་མཁས་པ། མདའ་གང་འཕང་ཐང་ལ་མི་ཡར་བ། ལས་གང་སྒྲུབ་ཐུར་ལ་མི་ལྷུང་བ་ཞིག་ལ་ཟེར་བ་རེད་མ་གཏོགས་རང་སྐྱོན་བལྟ་བའི་མི་ལོང་མེད་པར་གཞན་སྐྱོན་འཚོལ་བའི་ཐུར་མ་བཟུང་ནས་མི་ཐམས་ཅད་ཀྱི་ཚོད་བླངས་ཏེ་གཡོ་སྒྱུའི་རིག་པ་བཀྱེ་ཐབས་ཞིག་ལ་ཟེར་བ་མ་རེད། དེ་དང་བཞི་ཡིན།
   དེ་ལྟར་རང་གཞན་གྱི་བྱ་བ་བྱེད་ཚད་ཐམས་ཅད་ལ་བསམ་པ་ཕན་སེམས་དྲང་པོ་ཞིག་ཡོད་ན་རང་གཞན་གྱི་དོན་ཐམས་ཅད་འགྲུབ། ཚེ་འདིར་དཀར་ཕྱོགས་ཀྱི་སྲུང་མ་རྣམས་ཀྱིས་སྲུང་སྐྱོབ་མཛད་དེ་ཁ་རྗེ་རླུང་རྟ་དར། མི་ཐམས་ཅད་ཀྱིས་བྱམས་ཤིང་བཀུར་བསྟི་བྱེད། ཚེ་ཕྱི་མའི་ཆོས་ཀྱང་རང་བཞིན་ཤུགས་ཀྱིས་འགྲུབ་ཡོང་བས། བསམ་པ་བཟང་པོ་འདི་དང་མི་འབྲལ་བ་ནི་ཤིན་ཏུ་གལ་ཆེ་བ་ཡིན། བསམ་པ་གཞན་ལ་གནག་ན་སྦྱོར་བ་རང་ལ་རྩུབ་ཟེར་བ་རེད། ཕན་སེམས་དེའང་རང་ལ་ཕན་བཏགས་མིན་དང་ཆ་རྒྱུས་ཡོད་མེད་ལ་མ་ལྟོས་པར་མཐོ་དམན་བཟང་ངན་བར་མ་ཡོངས་ལ་ཕན་འདོགས་པའི་བསམ་པ་བཟང་པོ་ཞིག་ཡོད་དགོས་པ་རེད་མ་གཏོགས། རང་གི་གཉེན་གྲོགས་དགའ་མཐུན་བུ་ཚ་ཆུང་མ་ཚོ་ལ་གཅེས་འཛིན་བརྩེ་སེམས་འཆང་བ་ཙམ་ལ་ཟེར་བ་མ་རེད། དེ་དང་ལྔ་ཡིན། དེ་ལྔ་ཀ་ཚང་ན་གཞན་ཅི་ཡང་མེད་རུང་མིའི་དམ་པ་མཆོག་ཏུ་གྱུར་ཞིག་ཡིན་ནོ།། །།

དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། pmfs བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
5865429
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།
网站备案号:青ICP备15000002号 青公网安备 63262102000011号