ཧཱ་པ་ལ་གྲོས་འདེབས་པ་བདུད་རྩིའི་ཐིགས་པ།

                    མཛད་པ་པོ།  གྲགས་པ་རྒྱ་མཚོ།

༄༅།  །ན་མོ་གུ་རུ།  ཉིན་གཅིག་ཨ་ཁུ་ཉིན་ཁ་ནས་བཞུགས་པའི་དྲུང་དུ། ཧཱ་པ་དོན་གྲུབ་ཟེར་བས་ཙོག

པུར་ཐལ་མོ་སྦྱར་ཏེ་རྒྱའི་ལུགས་ཀྱི་ཙོ་ཡེ་དང་བཅས་འདི་སྐད་ཟེར།  །

ཀྭ་ཡེ་དབུ་སྐྱེས་དུང་ལྟར་དཀར་བ་ཡི།།

ཁ་ཏོན་བཟླས་བརྗོད་བརྩོན་པའི་ཀུན་སྤངས་ཁྱོད། །

ག་ལེར་གཞན་ལ་ཧཱ་པ་རྡུངས་རྡུངས་ཟེར། །

ང་ལ་བརྡུངས་པས་ཁྱོད་ལ་ཅི་ཞིག་ཕན།  །

ཅ་ཅོའི་ལོང་གཏམ་སྨྲ་བ་ཁྱེད་རང་དགའ། །

ཆ་མེད་མཐོང་ཚེ་ང་རང་ཟུག་པར་དགའ། །

ཇ་སོགས་བཟའ་བཏུང་ཉི་མར་ངེད་གཉིས་དགའ།།

ཉྭ་སུག་འདུར་འདུར་རྒྱུག་པའང་འུ་ཅག་མཚུངས།།

ཏ་ཐཱ་ག་ཏའི་བསྟན་པའི་སྒོར་ཞུགས་པའི།།

ཐ་མའོ་དུས་ཀྱི་བགྲེས་པོ་མཐའ་ཐུག་ཁྱོད། །

ད་ལྟ་སྐུ་བརྗིད་ང་ལས་ཆེ་ན་ཡང་།།

ན་འཆིའི་འཇིགས་པ་སླེབས་དུས་ག་འདྲ་ཡིན།།

ཙ་རི་ཏེ་སེ་ཡན་ཆད་ཀུན་བསྐོར་ནས།།

ཚ་ཆུ་དུག་ཆུ་ལྟ་བུའི་དཀོར་ཟས་ཟོས།།

ཛ་ཡའི་གསུང་བཞིན་མ་བསྒྲུབས་རང་འདོད་དུ།།

ཝ་ལྟར་ཡིབ་པས་མི་ཕན་དགེ་སྦྱོར་རེམ།།

ཞྭ་གོས་མལ་སྟན་ཡོ་བྱད་ཐམས་ཅད་དང་།།

ཟ་འཐུང་གང་བྱས་བུ་ལོན་ཅན་ཡིན་པས།།

འ་འུར་ངང་ལ་འདི་སྣང་ནུབ་པའི་ཚེ།།

ཡ་རེ་ངའོ་ཕྱི་མར་རྣམ་སྨིན་ལྕི།།

ར་དང་ལུག་བཞིན་ཟས་ཕྱིར་ང་མི་གསོད།།

ལ་ལ་བཞིན་དུ་ཚ་གྲང་བཀྲེས་སྐོམ་མེད།།

ཤ་སོགས་གང་བྱིན་ཟོས་ཏེ་ཉལ་ན་ཆོག  །

ས་འདིར་གནས་སྐབས་ང་ལས་སྐྱིད་པ་མེད།།

ཧ་མ་གོ་ཡང་ཆོས་སྒྲ་མང་ཐོས་ཕྱིར།།

ཨ་ལེ་ཨོ་ལེ་རྟེན་བཟང་ཐོབ་ཀྱང་སྲིད། །ཅེས་ཟེར་བས་ཧ་ཁུ་ན་རེ།

ཧྭ་ངན་ཧྭ་རྩོག་འདི་ཡིས་ཅི་ཞིག་ཟེར།།

སྔ་མ་ལྟ་ཅི་ཚེ་འདིའི་ཨ་མ་ཡང་།།

མི་ཤེས་རྒོལ་བའི་མཚང་ངན་ཁྱོད་ཀྱིས་བསྟན།།

ཟ་རྒྱུ་རྙེད་ཚེ་རྩེ་གྲོགས་ལ་ཡང་འཚེ།།

ཡོད་དུས་མི་ཟ་མེད་དུས་མུག་འཚོལ་བྱེད།།

ཧྭ་ངན་ཁྱོད་ལ་ཅིའི་ཕྱིར་བརྡུང་མི་ཆོག།  ཅེས་སྨྲས་པས་ཧཱ་པ་ཕྱིར་ཅུང་ཟད་བཀྱེད་དེ།

ཧེ་ཧེ་དེ་འདྲ་མ་གསུངས་བགྲེས་པོ་ལགས།།

ཐུགས་རྒྱལ་མ་བཞེངས་ཐུགས་བསམ་ཡག་པོ་བཞེས།།

ང་ཚོ་སེམས་ཅན་དག་ལ་མ་བརྟེན་པའི།།

ཁྱེད་ཚོའི་ཟས་གོས་ཡོ་བྱད་གང་ནས་བྱུང་།།

དེ་ཙམ་མ་ཟད་དུས་གསུམ་སངས་རྒྱས་རྣམས།།

ང་ཚོ་སེམས་ཅན་དག་ལ་བརྟེན་ནས་འཁྲུངས།།

སེམས་ཅན་མེད་ན་བྱམས་དང་སྙིང་རྗེ་དང་།།

རིན་ཆེན་སེམས་མཆོག་སུ་ཡི་དོན་དུ་བསྐྱེད།།

རྒྱལ་སྲས་སྤྱོད་པ་རྒྱ་མཚོ་ཇི་ལྟར་སྤྱད།།

ཟབ་རྒྱས་ཆོས་ཀྱི་འཁོར་ལོ་སུ་ལ་བསྐོར།།

སངས་རྒྱས་ཆོས་ཀུན་སེམས་ཅན་ལ་བརྟེན་པས།།

སེམས་ཅན་མེད་ན་སངས་རྒྱས་གཞི་མ་གྲུབ།།

དེ་ཕྱིར་རྒྱལ་དང་སེམས་ཅན་ལ་བརྟེན་ནས།།

འབྲས་བུ་སངས་རྒྱས་ཆོས་འགྲུབ་འདྲ་བར་གསུངས།།

ང་ཚོ་སེམས་ཅན་ལེགས་བྱས་ཚོགས་ཀྱི་ཞིང་།།

གང་བཟང་གང་གཉན་ཡིན་པ་མཁྱེན་པ་མཛོད།།

ཅེས་ཟེར་བས་ཨ་ཁུ་ཧ་ལས་པ་ལྟར་གྱུར་ཏེ།

ཨ་མ་ཧཱ་པ་ཁྱོད་ཀྱིས་ཆོས་ཤེས་སམ།།

ཤེས་ན་ད་དུང་སེམས་ལ་འཛིན་རྒྱུའི་ཆོས།།

ཟབ་མོ་ཉུང་འདུས་ཚིག་གསུམ་གསུང་བར་མཛོད།།

གསུངས་ཤིག་གསུངས་ཤིག་དོན་གྲུབ་དགེ་བའི་བཤེས།།

ཞེས་སྨྲས་པས་ཧཱ་པ་ན་རེ།

ལེགས་སོ་ལེགས་སོ་གནས་བརྟན་རིན་པོ་ཆེ།།

ཆོས་ལ་དོན་གཉེར་བྱེད་པ་ངོ་མཚར་ཆེ།།

ཆོས་དང་མཐུན་ན་ང་འདྲས་སྨྲས་པ་ཡང་།།

མཁས་པ་རྣམས་ཀྱིས་ཉམས་སུ་བླང་བྱ་ཡིན།།

ཟླ་མེད་སྟོན་པ་ཐུགས་རྗེ་ཅན་དེ་ཡིས།།

དགེ་སློང་གང་དག་འཆི་བའི་དུས་ཀྱི་ཚེ། །

འདི་ལ་མ་ཆགས་གཞན་ལ་བྱམས་པ་དང་།།

འཁོན་དོར་བཤགས་སྡོམ་ཉེས་པར་འགྱོད་པའི་སེམས།།

དགེ་ལ་ཡི་རང་ཕ་རོལ་འཇིགས་པ་མེད།།

འདུས་བྱས་ཐམས་ཅད་མི་རྟག་སྡུག་བསྔལ་ཞིང་།།

ཆོས་རྣམས་བདག་མེད་མྱང་འདས་ཞི་བའོ་ཞེས།།

འདུ་ཤེས་བཅུ་གཅིག་མངོན་དུ་བྱའོ་གསུངས།།

ད་ལྟ་མ་གོམས་འཆི་ཁར་དྲན་དཀའ་ཞིང་།།

རྒྱུན་དུ་གོམས་ན་ཅུང་ཟད་སླ་ཚོད་རེད།།

དེ་ཙམ་མ་གཏོགས་ང་ཡིས་བཤད་མི་ཤེས།།

ཤེས་པར་འདོད་ན་བཀའ་བསྟན་གཞུང་ལ་ལྟོས།།

བལྟས་པས་མི་ཆོག་ཡང་ཡང་སེམས་སྟེང་དུ།།

དུ་མར་བསྐོར་ཞིང་གོམས་འདྲིས་བྱས་ན་དགེ།།

ཞེས་སྨྲས་པས་ཨ་ཁུ་དགའ་སྟེ།

ལེགས་སོ་ལེགས་སོ་དོན་གྲུབ་ལགས།།

ཁྱོད་ཀྱིས་གང་བཤད་སངས་རྒྱས་གསུངས།།

ཁྱོད་ཀྱིས་ང་ལ་གོ་ཆེན་བཅད།།

ཁྱོད་ཀྱིས་དགེ་བའི་བསྐུལ་མ་བྱས།།

ཁྱོད་ཀྱིས་གསུངས་བཞིན་ཉམས་ལེན་བྱེད།།

ཁྱོད་ཀྱང་བདག་གིས་བྱམས་པས་སྐྱོང་།།

ཞེས་གསུངས་པས་ཧཱ་པ་དོན་གྲུབ་དགའ་སྟེ་མགོ་ཡུག་ཡུག་བྱེད་ཅིང་ཨ་བོའུ་ཨ་བོའུ་ཞེས་ཟུག་བཞིན་བརྒྱུགས་ཏེ་སོང་ངོ་།།

དེ་ལྟར་ཉམས་ལ་དཔགས་པའི་ཚིག  །སེམས་ཀྱི་འཆར་སྒོ་ཐོལ་བྱུང་དུ། །སྨྲ་བའཇ་ཀྱལ་ཀ་བྱེད་པ་པོ།།དབྱངས་ཅན་སྙེམས་པའི་བློ་གྲོས་སོ།། ཨོཾ་སཱ་སྟི།

<<བོད་ཀྱི་དུས་རབས་རིམ་བྱུང་གི་རྩོམ་ཡིག་གཅེས་བསྡུས>>ལས་བདམས་ཏེ་སེར་སྐོར་འཇམ་ཚེས་ཕབས།