ལྕང་ཞབས་འགྱུར་མེད་ཚེ་དབང་། 


རིག་གཞུང་ཕ་མཐའ་མི་མངོན་བྱང་ཐང་ལ། །

ཨུ་ཚུགས་གོམ་པས་འཇལ་ན་ཨ་ཐང་ཆད། །

བློ་དང་ཐབས་ཀྱི་འཕྲུལ་ལ་བརྟེན་གྱུར་ཏེ། །

དོན་གྱི་གསང་ལ་ཤུགས་ཀྱིས་བགྲོད་ཚུལ་བཤད། །


དེ་ཡང་དཔེ་ཆ་ལྟ་སྟངས་ཀྱི་རྣམ་བཤད་འདི་ལེ་ཚན་དུ་བགོས་ནས་འཆད་པ་ལ།

དང་པོ། ཐོག་མར་དཔེ་ཆ་ལྟ་བ་པོ་རྣམས་ལ་མཐའ་གཉིས་སེལ་བའི་ཆེད་དུ་ཞུ་རྒྱུ།

     དང་པོ་དཔེ་ཆ་ལྟ་ཀློག་ལ་མི་དགའ་བའི་མཐར་ལྷུང་བ་དག་ལ་ཞུ་རྒྱུ། དཔེ་ཆ་ལྟ་བ་ལ་མི་དགའ་བའི་མི་རིགས་དེ་ལ་རེ་བ་གཏན་ནས་མེད་གསུངས། གཉིས་པ་དཔེ་ཆ་ཁོ་ནར་བལྟས་ནས་བསམ་བློ་མེད་པའི་མཐར་ལྷུང་བ་དག་ལ་ཞུ་རྒྱུ། རང་ཉིད་ལ་བསམ་བློ་མེད་བཞིན་དཔེ་ཆ་མང་པོ་ཞིག་ཁོང་དུ་ཆུབ་པའི་མི་དེ་ནི་བོང་བུ་ལ་དཔེ་ཆ་རྒྱབ་གཅིག་བཀལ་བ་དང་འདྲ་གསུངས།