​ས་སྐྱ་ལེགས་བཤད་ལས་རབ་བྱེད་བཞི་བ་སྤེལ་མ་བརྟག་པ་བཞུགས་སོ།།
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 11 ཚེས 16 རེས་གཟའ་སྤེན་པ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» རྩོམ་རིག» བཅད་རྩོམ། »​ས་སྐྱ་ལེགས་བཤད་ལས་རབ་བྱེད་བཞི་བ་སྤེལ་མ་བརྟག་པ་བཞུགས་སོ།།
​ས་སྐྱ་ལེགས་བཤད་ལས་རབ་བྱེད་བཞི་བ་སྤེལ་མ་བརྟག་པ་བཞུགས་སོ།།
རྩོམ་སྒྲིག་པ།  འབའ་སྣང་གྲོལ། སྤེལ་དུས 2016-09-21ལྟ་ཀློག (1473)རྩོམ་ཁུངས: ངེད་དྲ་བ།པར་འདེབ།


ས་སྐྱ་ལེགས་བཤད་ལས་རབ་བྱེད་བཞི་བ་སྤེལ་མ་བརྟག་པ་བཞུགས་སོ།།

                                

དམན་པ་ལོངས་སྤྱོད་ཆེ་ན་ཡང་།།

རིགས་ལྡན་རྒུད་པས་ཟིལ་གྱིས་གནོན།།
བཀྲེས་པ་སྟག་གི་ངར་སྒྲ་ཡིས།།
སྤྲེའུ་ཤིང་གི་རྩེ་ལས་ལྷུང་།།

བླུན་པོའི་ཡོནཏན་ཁར་འབྱིན་ཏེ།།
མཁས་པའི་ཡོན་ཏན་ཁོང་དུ་སྦེད།།
སོག་མ་ཆུ་ཡི་སྟེང་དུ་འཕྱོ།།
ནོར་བུ་སྟེང་དུ་བཞག་ཀྱང་འབྱིང་།།

ཡོན་ཏན་ཆུང་རྣམས་ང་རྒྱལ་ཆེ།།
མཁས་པར་གྱུར་ན་དུལ་བར་གནས།།
ཆུ་ཕྲན་རྟག་ཏུ་ཀུ་ཅོ་ཆེ།།
རྒྱ་མཚོ་ཀུ་ཅོ་ཀ་ལ་སྒྲོག།

སྐྱེ་བོ་དམན་རྣམས་དམན་པ་ལ།།
ཁྱད་གསོད་བྱེད་ཀྱིས་དམ་པས་མིན།།
སེང་གེས་ཝ་ཚོགས་ལེགས་སྐྱོང་སྟེ།།
ཝ་ཉིད་ཝ་ཡི་རིགས་ལ་སྡང་།།

དམ་པ་ཁྲོས་ཀྱང་བཏུད་ན་ཞི།།
དམན་རྣམས་བཏུད་ན་ལྷག་པར་རེངས།།
གསེར་དངུལ་སྲ་ཡང་བཞུ་ནུས་ཀྱི།།
ཁྱི་ལུད་བཞུས་ན་དྲི་ངན་འབྱུང་།།

མཁས་ལ་ཡོན་ཏན་ཀུན་ལྡན་ཏེ།།
བླུན་པོ་ལ་སྐྱོན་འབའ་ཞིག་ཡིན།།
རིན་པོ་ཆེ་ལས་དགོས་དགུ་འབྱུང་།།
སྦྲུལ་གདུག་ལས་ནི་ཉེས་ཀུན་བསྐྱེད།།

སྡིག་སྤྱོད་ནགས་ན་གནས་ཀྱང་ཉམས།།
དམ་པ་གྲོང་ན་གནས་ཀྱང་དུལ།།
ནགས་ཀྱི་གཅན་གཟན་ཁྲོ་བ་དང་།།
རྟ་མཆོག་གྲོང་གནས་དུལ་བར་མཐོང་།།

སྐྱེས་མཆོག་རང་གི་སྐྱོན་ལ་ལྟ།།
སྐྱེ་བོ་ངན་པ་གཞན་སྐྱོན་འཚོལ།།
རྨ་བྱ་རང་གི་ལུས་ལ་རྟོག།
སྲིན་བྱ་གཞན་ལ་ལྟས་ངན་གཏོད།།

དམ་པ་དུལ་བས་རང་གཞན་སྐྱོང་།།
ངན་པ་རེངས་པས་རང་གཞན་སྡུག། 
འབྲས་ལྡན་ཤིང་གིས་རང་གཞན་སྲུང་།།
ཤིང་སྐམ་རེངས་པས་རང་གཞན་སྲེག

འབྱོར་བའི་དུས་ན་ཐམས་ཅད་གཉེན།།
གལ་ཏེ་རྒུད་ན་ཀུན་ཀྱང་དགྲ།།
རིན་ཆེན་གླིང་དུ་རིང་ནས་འདུ།།
མཚོ་བསྐམས་པ་ན་སུ་ཡང་སྤོང་།།

བླུན་པོ་འབྱོར་བ་ཐོབ་ན་བདེ།།
སྐྱེས་མཆོག་ཐམས་ཅད་བྱིན་ན་བདེ།།
མཛེ་ཅན་ཕྲུགས་ན་བདེ་བར་འཛིན།།
མཁས་པ་མཛེ་ལ་འཇིགས་པར་ལྟ།།

ཆེ་ལ་གནོད་བྱེད་གྲོགས་སུ་འགྱུར།།
དམན་ལ་གནོད་བྱེད་གནོད་པར་འགྱུར།།
ནགས་མེ་རླུང་གིས་སྤར་མོད་ཀྱི།།
དེ་ཡིས་སྒྲོན་མེ་ཆུང་ངུ་གསོད།།

འདི་བཤེས་འདི་ནི་དགྲ་བོ་ཞེས།།
བློ་གྲོས་ཆུང་རྣམས་སོ་སོར་འབྱེད།།
བློ་ཆེན་ཀུན་ལ་བྱམས་པ་ལ།།
ཕན་བྱེད་གང་ཡིན་ངེས་པ་མེད།།

ཡོན་ཏན་ལྡན་པ་ཡོན་ཏན་ལ།།
དགའ་ཡི་ཡོན་ཏན་མེད་རྣམས་མིན།།
སྦྲང་རྩི་འཛིན་པ་མེ་ཏོག་ལ།།
དགའ་ཡི་ཤ་སྦྲང་དེ་ལྟ་མིན།།

མཁས་པ་མཁས་པའི་གྲོང་ན་མཛེས།།
བླུན་པོས་མཁས་པ་ཇི་ལྟར་གོ།
ཙན་དན་གསེར་བས་རིན་ཆེ་བ།།
བླུན་པོས་སོལ་བར་བྱས་ལ་ལྟོས།།

མཁས་པ་རང་གིས་དཔྱོད་ཤེས་ཀྱི།།
བླུན་པོ་གྲགས་པའི་རྗེས་སུ་འབྲང་།།
ཁྱི་རྒན་ཀུ་ཅོ་འདོན་པ་ན།།
རྒྱུ་མཚན་མེད་པར་གཞན་དག་རྒྱུག།

མཁས་པ་ཤིན་ཏུ་རྒུད་ན་ཡང་།།
ལེགས་བཤད་གཏམ་གྱིས་གཞན་དགའ་བྱེད།།
བླུན་པོ་འབྱོར་བར་འགྱུར་ཆེ་ཡང་།།
རྩོད་པ་ཁོ་ནས་རང་གཞན་སྲེག།

ཁ་ཅིག་སྨྲ་བས་གྲུབ་པར་བརྩི།།
ལ་ལ་མི་སྨྲ་དོན་ལ་འབད།།
ཁྱི་རྒན་དགྲ་ལ་ཁུས་འདེབས་ཏེ།།
ཆུ་སྐྱར་བྱི་ལ་སྒྲ་མེད་འཇབ།།

དམ་པ་རྒོད་ཡང་ཕན་པ་སྒྲུབ།།
སྐྱེ་བོ་ངན་པ་མཛའ་ཡང་གནོད།།
ལྷ་རྣམས་ཁྲོ་བས་སེམས་ཅན་སྲུང་།།
གཤིན་རྗེ་འཛུམ་ཡང་ཕ་རོལ་གསོད།།

སྐྱེ་བོ་དམ་པ་རིན་ཆེན་བཞིན།།
རྣམ་པ་ཀུན་ཏུ་འགྱུར་ལྡོག་མེད།།
སྐྱེ་བོ་ངན་པ་སྲུང་མདའ་བཞིན།།
ཅུང་ཟད་ཙམ་གྱིས་མཐོ་དམའ་བྱེད།།

བློ་མཐུན་རིང་ན་གནས་ཀྱང་ཕན།།
མི་མཐུན་ཉེ་ན་ལྷག་པར་འབྲལ།།
འདམ་སྐྱེས་འདམ་གྱིས་མི་གོས་ལ།།
དེ་ཉིད་ཉི་མས་རྟག་ཏུ་སྐྱོང་།།

ཇི་སྲིད་ངོ་ཚ་ཡོད་གྱུར་བ།།
དེ་སྲིད་ཡོན་ཏན་རྒྱན་གྱི་མཆོག།
ངོ་ཚ་བརྒལ་ན་ཡོན་ཏན་ཉིད།།
ཕྱོགས་སུ་བྱས་ཏེ་གཏམ་ངན་འཕེེལ།།

དམ་པ་མ་བཅོལ་ལེགས་པར་སྟོན།།
དམན་ལ་དྲིས་ཀྱང་ལོག་པར་ཤོད།།
རྒྱལ་བའི་སྲས་ལ་བརྙས་ཀྱང་བརྩེ།།
འཆི་བདག་མཆོད་ཀྱང་གསོད་པ་ཡིན།།

གཅིག་ལ་ཕན་པར་འགྱུར་བ་ཡི།།
བྱ་བ་གཞན་ལ་གནོད་པ་སྲིད།།
ཟླ་བ་ཤར་ན་ཀུ་མུད་ད།།
ཁ་འབྱེད་འགྱུར་གྱི་པདྨ་ཟུམ།།

ཉེས་པ་ལས་ཀྱང་དོན་གྲུབ་པ།།
བྱུང་ཡང་མཁས་རྣམས་ག་ལ་སྨོན།།
ལེགས་པར་བསྒྲུབས་ཀྱང་སྐྱོན་སྲིད་མོད།།
དེ་ལ་མཁས་རྣམས་ཁྲེལ་བ་མེད།།

རྙེད་པ་ལ་ལ་རྙེད་པ་སྟེ།།
རྙེད་པ་ལ་ལ་དགྲ་བོ་ཡིན།།
རྒོད་མ་མངལ་ལྡན་ནོར་འཕེལ་ལ།།
དྲེའུ་མོ་སྦྲུམ་མ་འཆི་བ་རྙེད།།

 དམ་པ་དབྱེ་དཀའ་འདུམ་སླ་སྟེ།།
དམན་པ་དབྱེ་སླ་འདུམ་པ་དཀའ།།
ལྗོན་ཤིང་དང་ནི་སོལ་བ་ཡི།།
བཅད་དང་སྦྱོར་བའི་ཁྱད་པར་ལྟོོས།།

ཉམ་ཆུང་གྱུར་ཀྱང་ཟོན་བྱས་ན།།
ཆེན་པོ་ཡིས་ཀྱང་གཞོམ་པར་དཀའ།།
ཆེན་པོ་ཡིན་ཀྱང་བག་ཕེབས་ན།།
ཉམ་ཆུང་རྣམས་ཀྱིས་བརླགས་པ་མང་།།

ནོར་གྱིས་འབྱོར་ན་སྟོབས་ཀྱང་འཕེལ།།
ནོར་མེད་པ་ལ་སྟོབས་ཀྱང་འབྲི།།
བྱི་བ་དབྱིག་ལྡན་ནོར་ཕྲོགས་པས།།
རྐུ་བའི་ནུས་པ་ཉམས་ཞེས་ཐོས།།

མི་གང་བསོད་ནམས་ལ་སྤྱོད་པ།།
བཏང་ཡང་ལོངས་སྤྱོད་ཆར་བཞིན་འབབ།།
བསོད་ནམས་མེད་པའི་ལོངས་སྤྱོད་དེ།།
བསགས་ཀྱང་སུ་ཡིས་ཟ་བར་སོམས།།

དམ་པ་རེ་ཞིག་རྒུད་གྱུར་ཀྱང་།།
ཟླ་བ་བཞིན་དུ་ཡར་ངོ་འབྱུང་།།
དམན་ལ་ལན་གཅིག་རྒུད་འགྱུར་ན།།
མར་མེ་བཞིན་དུ་མནལ་བར་འགྱུར།།

ཤེས་ལྡན་དགྲ་ལ་མིག་བསྲིངས་པས།།
ཐ་མར་དགྲ་བོ་དབང་དུ་འདུ།།
དྲོད་ཆུང་དགྲ་ལ་དབང་བྱས་པས།།
དཀའ་བ་རྒྱུན་མི་འཆད་པ་ཐོབ།།

མཁས་པ་ཤིན་ཏུ་ཉམ་ང་བའི།།
གནས་ལ་འཛུར་ན་དཔའ་རྟགས་ཡིན།།
སེང་གེས་ཁྱུ་མཆོག་གསོད་པའི་ཚེ།།
རྭ་ལ་འཛུར་བ་ག་ལ་སྡར།།

རྣམ་པ་ཀུན་ཏུ་མི་དཔྱོད་པར།།
དགྲ་ལ་མཆོང་བ་བླུན་རྟགས་ཡིན།།
མར་མེའི་འོད་ལ་འའཛིངས་པ་ཡིས།།
སྦྲང་བུ་དཔའ་བར་འགྲོའམ་ཅི།།

ངན་པ་རང་རྟེེན་ཁྱད་པར་འཇོམས།།
དམ་པ་གང་ལ་བརྟེན་པ་སྲུང་།།
སྲིན་བུ་རང་རྟེེན་ཟད་ཟད་ཟ།།
སེང་གེ་རང་གི་ཡུལ་འཁོར་སྲུང་།།

དམན་རྣམས་དགོས་པ་ཆུང་ངུ་གསང་།།
གསང་དགོས་དགོས་པ་མེད་པར་སྨྲ།།
དམ་པ་དགོས་མེད་གསང་མི་འགྱུར།།
གསང་དགོས་སྲོག་ལ་བབས་ཀྱང་སྲུང་།།

དམན་པ་འབྱོར་ན་དྲེགས་རྒྱུ་སྟེ།།
དམ་པ་འབྱོར་ན་དུལ་བའི་རྒྱུ།།
ཝ་སྐྱེས་འགྲངས་ན་དྲེགས་པས་བརྒྱལ།།
སེང་གེ་འགྲངས་ན་བདེ་བར་ཉལ།།

དམ་པ་དང་ནི་དམན་པ་ཡི།།
སྤྱོད་པ་གཉིས་ཀ་གོམས་པའི་ཤུགས།།
བུང་བ་མེ་ཏོག་འཚོལ་བ་དང་།།
ངང་བ་ཆུར་འཇུག་བསླབ་ཅི་དགོས།།

རྒྱལ་ངན་དགྲ་དང་འཕྲད་པ་ན།།
རང་གི་འཁོར་ལ་ཆད་པ་གཅོད།།
དོན་མ་འགྲུབ་པའི་བླུན་པོ་འགའ།།
རང་ཉིད་འགགས་ཏེ་འཆི་ལ་ཡོད།།

ཆོས་རྒྱལ་དགྲ་དང་འཕྲད་པ་ན།།
ལྷག་པར་འཁོར་ལ་བྱམས་པ་སྐྱེ།།
ན་བའི་བུ་ལ་ཁྱད་པར་དུ།།
མ་ནི་གདུང་བ་སྐྱེ་བར་འགྱུར།།

སྐྱེ་བོ་དམ་པ་ངན་པ་དང་།།
འགྲོགས་ན་ངན་པའི་ཤན་དུ་འགྱུར།།
གང་གཱའི་ཆུ་ནི་རབ་ཞིམ་པ།།
རྒྱ་མཚོར་སླེབས་ན་བ་ཚྭར་འགྱུར།།

དམན་པ་སྐྱེ་བོ་མཆོག་བསྟེན་ན།།
སྐྱེ་བོ་དམ་པའི་སྤྱོད་པ་འབྱུང་།།
གླ་རྩི་བྱུགས་པའི་གང་ཟག་ལ།།
གླ་རྩིའི་དྲི་ཞིམ་འབྱུང་ལ་ལྟོས།།

ལྷུན་པོ་ཅིས་ཀྱང་མི་འགུལ་བ།།
དེ་བཞིན་བདག་ཉིད་ཆེན་པོ་བརྟག།
ཤིང་བལ་ཆུང་ངུ་གཡོ་བ་ལྟར།།
དམན་པའི་སྤྱོད་པ་འགྱུར་ལྡོག་ཆེ།།
རྩོམ་ཡིག་ཕབ་བཤུ་བ།  ནག་ཙན་དན།

 


དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། xum1 བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
5925102
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།
网站备案号:青ICP备15000002号 青公网安备 63262102000011号