རྗེ་ཙོང་ཁ་བས་མཛད།

བསླབ་གསུམ་རྒྱན་དང་ཐོས་པའི་ཕ་རོལ་སོན།།
སྟོང་གསུམ་ཁྱབ་པའི་གྲངས་ལྡན་འགྲོ་བའི་མགོན།།
སྐུ་གསུམ་མངོན་མཛད་བླ་མའི་ཞབས་པད་ལ།།
སྒོ་གསུམ་གུས་པའི་ཡིད་ཀྱིས་ཕྱག་འཚལ་ལོ།།
སྐུ་ཉིད་ཕུལ་བྱུང་ལུས་སྟོབས་རྒྱས་པ་ལ།།
བསླབ་གསུམ་རྣམ་དག་གསེར་གྱི་དྲ་བས་གཡོགས།།
སྐུ་བཞིའི་མཆེ་བ་རབ་དཀར་ཤིན་ཏུ་བརྟན།།
སྐུ་ལྔའི་བདག་ཉིད་ཐུབ་དབང་ལག་ལྡན་རྒྱལ།།
དལ་འབྱོར་ཐོབ་ཀྱང་དལ་བའི་སྐབས་མེད་ཅིང་།།
བདེ་འགྲོར་སྐྱེས་ཀྱང་བདེ་བས་དབེན་པར་གྱུར།།
ཆོས་ལ་མོས་ཀྱང་ཆོས་དོན་རྟོགས་པ་མེད།།
བློ་གྲོས་དམན་ཡང་བློ་བཟང་ཞེས་བཏགས་པའི།།
རྒྱལ་ཁམས་པ་ཁྱོད་རང་གི་བསྐུལ་ཚིག་ལ།།
མ་གཡེངས་རྣ་བའི་དབང་ཤེས་ལེགས་གཏད་དེ།།
ལུང་དང་རིགས་པས་ལེགས་པར་བརྟགས་བྱས་ནས།།
འདིར་སྨྲས་དོན་རྣམས་ཉམས་སུ་བླང་བར་རིགས།།
ཁྱོད་ཀྱིས་སྔོན་ཡང་དུག་གསུམ་ལ་སྤྱད་པས།།
ཐོག་མ་མེད་ནས་ཐ་མ་ད་ཡི་བར།།
མ་རིག་ཁྲོད་འདིར་བགྲང་ལས་འདས་པ་འཁོར།།
བཟོད་གླགས་མེད་པའི་སྡུག་བསྔལ་སྣ་ཚོགས་མྱོང་།།
ད་དུང་འདི་ལ་སྤྱད་པར་བྱས་ན་ནི།།
སླར་ཡང་ངན་སོང་གསུམ་ལས་འགྲོ་ས་མེད།།
ཀྱི་ཧུད་ངན་འགྲོའི་སྡུག་བསྔལ་བཟོད་གྱུར་ཏམ།།
ཀྱེ་མའོ་དེ་རྒྱུ་དེང་ནས་སྤང་བར་རིགས།།
ཞེས་སྨྲས་པ་དང་། ཁོ་ན་རེ།

འོ་ན་དེར་མི་སྐྱེ་བའི་ཐབས་ཅི་ཡོད།།   དེ་ཡི་སྡུག་བསྔལ་ཡང་ཇི་ཙམ།  སྡུག་བསྔལ་དེ་ཉམས་སུ་མྱོང་བའི་རྒྱུ་ཅི།  ཞེས་པའི་ལན་སྨྲས་པ།
ངན་འགྲོའི་གནས་སུ་མི་སྐྱེའི་ཐབས་དག་ནི།།
བཤད་ཀྱིས་ལེགས་པར་ཉོན་དང་རྒྱལ་ཁམས་པ།།
འཕྲལ་ཕུགས་ཀུན་ཏུ་མི་བསླུར་ངེས་གྱུར་པའི།།
སྐྱབས་གནས་དཀོན་མཆོག་གསུམ་ལ་སྐྱབས་སུ་སོང་།།
སེམས་ཅན་འདི་དག་ཐོག་མ་མེད་ནས་བདག །
དྲིན་གྱིས་བསྐྱངས་པའི་མ་མ་དྲིན་ཅན་ཡིན།།
དེ་སླད་མ་རྒན་དེ་དག་བྱང་ཆུབ་ལ།།
འགོད་པའི་ཕྱིར་དུ་བྱང་ཆུབ་མཆོག་སེམས་སྐྱེད།།
བཀའ་དང་བསྟན་བཅོས་ཇི་སྙེད་གསུངས་དེ་ཡི།།
དགོངས་དོན་ཡོངས་འཛིན་བཟང་བོས་བསྟན་དོན་ལ།།
དབེན་པའི་གནས་སུ་གྲོགས་མེད་གཅིག་པུ་རུ།།
གཡེང་བ་སྤངས་ཏེ་རྩེ་གཅིག་གནས་པར་བྱ།།
རྗེས་ཀྱི་སྐབས་སུ་དགེ་དེས་མཚོན་པ་ཡིས།།
འཁོར་འདས་གཉིས་ཀྱིས་བསྡུས་པའི་དགེ་རྩ་རྣམས།།
མཁའ་མཉམ་མ་རྒན་རྣམས་ཀྱི་དོན་དུ་ནི།།
འཁོར་གསུམ་དག་པའི་ཐབས་ཤེས་གཉིས་ལྡན་གྱིས།།
སྒྲོ་སྐུར་མཚན་མའི་ཚོགས་རྣམས་སྤངས་བྱས་ནས།།
སྟོབས་བཅུ་མངའ་བའི་ས་དེར་བསྔོ་བར་བྱ།།
གང་དུ་གནས་ན་དུག་གསུམ་ལ་སོགས་པའི།།
ཉོན་མོངས་ཚོགས་རྣམས་ཡར་ངོའི་ཟླ་བཞིན་འཕེལ།།
དཀར་ཕྱོགས་ཐོ་རངས་རྒྱུ་སྐར་ལྟར་འགྲིབ་པའི།།
གནས་ངན་མྱུར་དུ་སྤོང་དང་རྒྱལ་ཁམས་པ།།
སྣ་ཚོགས་འདམ་སྐྱེས་དཔག་མེད་གཅལ་དུ་བཀྲམ།།
རྐང་དྲུག་ལྡན་རྣམས་དགའ་བའི་གླུ་ལེན་ཞིང་།།
སྙན་པའི་དར་དིར་སྒྲོག་པར་བྱེད་པ་ཡི།།
དབེན་གནས་དམ་པ་སྟེན་དང་རྒྱལ་ཁམས་པ།།
ཚིག་ཙམ་ཤེས་ཀྱང་དོན་ལ་བློ་མ་ཕྱོགས།།
སྡོན་བརྩོན་རྣམས་ལ་སྡང་ཤུགས་མནར་སེམས་ཅན།།
ཕྱོགས་འཛིན་རླུང་གིས་རྣམ་པར་གཡེངས་གྱུར་པའི།།
བླ་མའི་གཟུགས་བརྙན་སྤོང་དང་རྒྱལ་ཁམས་པ།།
ཡིན་ལུགས་ཁོང་དུ་ཆུད་ཅིང་དབང་བོ་དུལ།།
མཐོང་བ་ཙམ་གྱིས་གཞན་ཡིད་འཕྲོག་པར་བྱེད།།
བསྟེན་པ་ཙམ་གྱིས་དགེ་འཕེལ་སྐྱོན་འགྲིབ་པའི།།
བཤེས་གཉེན་དམ་པ་སྟེན་དང་རྒྱལ་ཁམས་པ།།
དམུ་རྒོད་མ་རུངས་དུག་སྦྲུལ་ཁྲོས་འདྲ་ཞིང་།།
འགྲོགས་པ་ཙམ་གྱིས་རང་གཞན་ཕུང་བར་བྱེད།།
ཐར་བའི་སྲོག་རྩ་གཅོད་པར་བྱེད་པ་ཡི།།
གྲོགས་ངན་མྱུར་དུ་སྤོང་དང་རྒྱལ་ཁམས་པ།།
གཞན་ལ་འཚེ་བས་དབེན་པའི་རི་དྭགས་དང་།།
ཉན་ཤེས་འཁོར་དུ་བདེ་བ་བསྐྱེད་པའི་སྒྲ།།
རྒྱུན་དུ་སྒྲོག་པ་འདབ་བཟང་གཞོན་ནུའི་ཚོགས།།
དེ་འདྲའི་གྲོགས་དག་སྟེན་དང་རྒྱལ་ཁམས་པ།།
དེ་ལྟར་ཇི་སྐད་བསྟན་བཞིན་བྱེད་གྱུར་ན།།
ངན་སོང་གནས་རྣམས་གང་དུའང་མི་སྐྱེ་ཞིང་།།
གནས་སྐབས་མངོན་མཐོ་མཐར་ཐུག་ངེས་ལེགས་ཀྱི།།
གོ་འཕང་ཐོབ་པར་འགྱུར་རོ་རྒྱལ་ཁམས་པ།།
དྲི་བ་དང་བོའི་ལན་རྫོགས་སོ།།

ཞེས་དེ་སྐད་སྨྲས་པ་དང་། ཁོ་ཡི་རངས་ཏེ།
འདི་སྐད་དུ།  ཨེ་མ་དེང་ནས་བཟུང་སྟེ་བྱང་ཆུབ་སྙིང་བོའི་བར།།
དཀོན་མཆོག་སྐྱབས་འགྲོ་བྱང་ཆུབ་སེམས་བསྐྱེད་ནས།།
དབེན་པའི་གནས་སུ་བླ་མས་བསྟན་པ་ཡི།།
མན་ངག་ཉམས་བླངས་དགེ་རྩ་བྱང་ཆུབ་བསྔོ།།
ཀྱེ་མའོ་ངན་སོང་གནས་ལས་འཇིགས་པ་ཨང་།།
ཀྱེ་མའོ་ནམ་འཆིའི་ངེས་པ་མི་སྣང་ན།།
ཀྱེ་མའོ་གར་སྐྱེ་ཤེས་པ་མི་སྣང་ན།།
ཀྱེ་མའོ་མི་སྐྱེའི་རང་དབང་མི་སྣང་ན།།
ཀྱི་ཧུད་བླ་ན་མེད་པའི་བླ་མ་དང་།།
ཀྱི་ཧུད་ཡིད་བཞིན་ནོར་འདྲའི་ཡི་དམ་དང་།།
ཀྱི་ཧུད་བསྟན་ལ་གནོད་འཇོམས་བསྟན་སྐྱོང་གིས།།
བདག་དང་མཁའ་མཉམ་འགྲོ་བའི་བདག་འཛིན་འདི།།
གཏན་ནས་ཉེ་བར་བཅོམ་ནས་གཏན་གྱི་སྐྱབས།།
མཐར་ཐུག་ཆོས་སྐུ་ཐོབ་ནས་མཐའ་བྲལ་གྱི།།
གནས་ལུགས་འགྲོ་ལ་སྟོན་ཅིང་གནས་གྱུར་ཅིག །
ཇི་ལྟར་སྨྲས་ལས་ཉེས་སྐྱོན་ཆུ་འཛིན་ཚོགས།།
མཆིས་གང་འཕགས་དང་ཚུ་རོལ་མཁས་རྣམས་ཀྱི།།
ཐུགས་རྗེའི་མགྱོགས་འགྲོས་རབ་ཏུ་བསལ་བྱས་ཏེ།།
བདག་གི་རྣམ་དཔྱོད་ཚ་ཟེར་གསལ་བར་མཛད།།
འདི་ལས་ཐོབ་པའི་རབ་དཀར་དགེ་བ་འདི།།
འདི་དང་ཕྱི་མ་ཀུན་ཏུ་མི་ཟད་གཏེར།།
གཏེར་ཆེན་བུམ་བཞིན་དཔག་ཡས་ཡོན་ཏན་དག །
དག་དང་མ་དག་འགྲོ་ལ་སྩོལ་གྱུར་ཅིག །
ཅེས་རང་ལ་བསྐུལ་བའི་ཚིགས་སུ་བཅད་པ་འཁོར་བ་ལས་སྐྱོ་བའི་གཏམ་ཞེས་བྱ་བ་འདི་མཁས་པ་དུ་མའི་ཞབས་རྡུལ་སྤྱི་བོས་ལེན་པ་རྒྱལ་ཁམས་པ་ཤར་ཙོང་ཁ་བ་བློ་བཟང་གྲགས་པས་གཞན་ལ་ཕྲག་དོག་དང་འགྲན་སེམས་ཀྱིས་མ་ཡིན་པར་རང་ཉིད་ཐར་ལམ་ལ་བསྐུལ་བའི་དོན་དུ་ལྟོས་འགྲོའི་རྒྱུ་སྐར་གྱི་དབང་བོ་མདའི་དཀར་ཕྱོགས་ཀྱི་ཚེས་ལ་མཁས་པ་དུ་མའི་འབྱུང་གནས་ཡུལ་དབུས་ཀྱི་སའི་ཆ་ཆོས་གྲྭ་ཆེན་པོ་བདེ་བ་ཅན་དུ་སྦྱར་བ་རེ་ཞིག་རྫོགས་སོ།།

རྩོམ་ཁུངས།  བསླབ་བྱ་ཉེར་མཁོ་ཕྱོགས་བསྒྲིགས་ཀྱི་དཔེ་དེབ་ལས་བཤུས།

རྩོམ་ཡིག་མཁོ་སྤྲོད་པ། སེང་དཀར།