ན་གཞོན་སྒྱུ་རྩལ་བ་རྭ་རྒྱ་རྟ་མགྲིན་སྐྱབས་དང་ཨ་རིག་བསྟན་སྐྱོང་གཉིས་ཀྱི་མཚར་གཏམ་གད་མོའི་རིག་རྩལ་ཆེད་ཚོགས།

     སྤྱི་ལོ་༢༠༡༦ལོའི་ཟླ་༦པའི་ཚེས་༢༦ཉིན་གངས་ལྗོངས་ཤེས་རིག་ནོར་བུའི་སློབ་གླིང་དང་རྩྭ་ཐང་བུ་མོའི་སློབ་གྲྭ།  རྨ་ཀླུང་དམངས་སྲོལ་སྒྱུ་རྩལ་ཚོགས་པ་བཅས་ཀྱིས་གཙོ་སྒྲུབ་དང་ཡུལ་ཤུལ་རེ་བའི་ཚོང་ཁྲོམ་ཚད་ཡོད་མཐུན་གཉེར་ཁང་གི་རྒྱབ་སྐྱོར་དང་ཐུགས་ཁུར་ལ་བརྟེན་ཏེ་ན་གཞོན་སྒྱུ་རྩལ་བ་རྭ་རྒྱ་རྟ་མགྲིན་སྐྱབས་དང་ཨ་རིག་བསྟན་སྐྱོང་གཉིས་ཀྱིས་ཕུགས་བསམ་གྱི་རྡོ་རིང་ཞེས་པའི་མཚར་གཏམ་གད་མོའི་རིག་རྩལ་ཆེད་ཚོགས་ཤིག་མགོ་ལོག་ཁུལ་ཐོག་ཏུ་འཚོགས་ཤིང་། ཆེད་ཚོགས་འདིར་བཞད་གར་དང་ཁ་ཤགས་སོགས་གཙོ་བྱས་ཏེ་སློབ་གླིང་གཉིས་ཀའི་སྒྱུ་རྩལ་ལ་དགའ་བ་སྐོར་ཞིག་དང་ཕྱོགས་སོ་སོ་ནས་ཕེབས་པའི་གདན་ཞུའི་གླུ་བ་རྨ་གླིང་ལྷུན་གྲུབ་དང་ཨ་རིག་གུ་རུ།  ངག་བསྟན།  ཁ་བ་དོན་གྲུབ།  ཆོས་ཉིད་རྒྱ་མཚོ།  སྦྲ་ནག་བྱང་ཆུབ།  བསྟན་པ། བསྟན་འཛིན་ཚེ་རིང་།  རྟ་མགྲིན་སྐྱབས་སོགས་དང་།  གླུ་མ་འཕྲིན་ལས་མཚོ།  ལས་དབང་ལྷ་མོ།  མགོན་པོ་མཚོ། དར་མ།  ཚེ་རིང་སྒྲོལ་མ་བཅས་ཀྱིས་གླུ་དང་རྡུང་ལེན་སོགས་རིག་རྩལ་གྱ་ནོམ་པ་ཞིག་གྲ་སྒྲིག་བྱས་པས།   རྒྱ་ཆེའི་གཟིགས་མོ་བ་ཡོངས་ཀྱིས་དགའ་བསུ་ཆེན་པོ་ཐོབ་ཡོད།

   བཀའ་དྲིན་ཆེ་བའི་དགེ་རྒན་རྣམས་ཡུལ་དངོས་སུ་ཕེབས་ཏེ་སློབ་མ་རང་གི་དགའ་ཕྱོགས་དང་ཕུགས་བསམ་ལ་མཐའ་གཅིག་ཏུ་རྒྱབ་སྐྱོར་དང་ཁོ་ཚོའི་མི་ཚེའི་ལམ་བུ་འོད་སྟོང་འབར་བ་ཞིག་ཏུ་འགྱུར་བར་སྨོན་པ་རུམ་གང་བཏེགས་ནས་ཕེབས་ཡོད་པའི་ཟུར་ཞིག

ཕུགས་བསམ་གྱི་རྡོ་རིང་ཞེས་པའི་མཚར་གཏམ་གད་མོའི་ཆེད་ཚོགས་ཀྱི་ཡུལ་དངོས།

ཕུགས་བསམ་གྱི་རྡོ་རིང་ཞེས་པའི་མཚར་གཏམ་གད་མོའི་ཆེད་ཚོགས་ཀྱི་ཡུལ་དངོས།

ཡུལ་དངོས་མདོ་འཛིན་པ་གཉིས།

ཕུགས་བསམ་གྱི་རྡོ་རིང་ཞེས་པའི་མཚར་གཏམ་གད་མོའི་ཆེད་ཚོགས་ཀྱི་ཡུལ་དངོས།

ཁ་ཤགས་འཁྲབ་སྟོན་གྱི་ཡུལ་དངོས།

གླུ་དང་རྡུང་ལེན་གྱི་མཆོད་པ།

ཚོགས་རའི་ཡུལ་དངོས་ཀྱི་ཟུར་ཞིག

     ཐེངས་འདིར་རྒྱབ་སྐྱོར་བླ་མེད་གནང་མཁན་དྲིན་ཅན་གྱི་ཕ་མ་དང་གཉེན་ཉེ་དུ་ད་དུང་གངས་ལྗོངས་ཤེས་རིག་ནོར་བུའི་སློབ་གླིང་དང་རྩྭ་ཐང་བུ་མོའི་སློབ་གྲྭ་རྨ་ཀླུང་དམངས་སྲོལ་སྒྱུ་རྩལ་ཚོགས་པ་ཡུལ་ཤུལ་རེ་བའི་ཚོང་ཁྲོམ་ཚད་ཡོད་མཐུན་གཉེར་ཁང་ད་དུང་ཕྱོགས་སོ་སོ་ནས་ཕེབས་པའི་གདན་ཞུའི་གླུ་བ་གླུ་མ་དག་ལ་ལྷག་བསམ་ཟོལ་མེད་ངང་བཀའ་དྲིན་ཆེ་ཞུ་བ་ལགས།

ང་རང་སྒྱུ་རྩལ་ལ་དགའ་བ་ནི་མཚན་སྙན་གྲགས་ལ་དགའ་བ་མ་ཡིན་པར། ང་རང་སྒྱུ་རྩལ་ལ་དགའ་བ་ནི་ཡུལ་སྲོལ་གོམས་གཤིས་ལ་དགའ་བ་ཡིན།

    ད་ལོར་ངེད་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་བཅུ་དགུ་བའི་མཐར་ཕྱིན་སློབ་གྲོགས་རྭ་རྒྱ་རྟ་མགྲིན་སྐྱབས་དང་ཨ་རིག་བསྟན་སྐྱོང་གཉིས་ཀྱིས་སློབ་གླིང་འདི་གའི་ཐུན་མོང་མ་ཡིན་པའི་ཤེས་རིག་འགྲན་གླིང་འདི་ཉིད་བརྗོད་བྱར་བཟུང་ནས་༼ཕུགས་བསམ་གྱི་རྡོ་རིང་༽ཞེས་པའི་མཚར་གཏམ་གད་མོའི་རིག་རྩལ་ཆེད་ཚོགས་ཤིག་མགོ་ལོག་ཁུལ་གནམ་སའི་གླུ་གར་ཁང་དུ་སྤྱི་ཟླ་དྲུག་པའི་ཚེས་ཉེར་དྲུག་ཉིན་མགོ་བཀྲ་ཤིས་ཤིང་མཇུག་དོན་འགྲུབ་པའི་ངང་ཡོངས་སུ་ལེགས་འགྲུབ་བྱུང་བའི་ཡུལ་དངོས།

མཚར་གཏམ་གད་མོའི་རིག་རྩལ་ཆེད་ཚོགས་སྟེང་གི་གདན་ཞུའི་སྐུ་མགྲོན་དང་འཁྲབ་སྟོན་པ་ཡོངས་ཀྱི་མཉམ་པར།