༄༅། །སྟོན་པ་ཤཱཀྱ་ཐུབ་པ་ལ་བསྟོད་པ་བྱིན་རླབས་ཉེར་འཇུག

 ༄༅།།སྐབས་གསུམ་པ་དང་དབང་བོའི་དགྲ། །

དྲི་ཟ་གདེངས་ཅན་གྲུབ་པའི་གཙོ།།

ཀུན་གྱི་གཙུག་རྒྱན་ནོར་བུ་ཡིས།།

གང་གི་ཞབས་པད་མཛེས་བྱས་པ།།

གསེར་འོད་འཁྱུག་པའི་དཔལ་གྱིས་བརྗིད་པའི་སྐུ།།

དྲི་ཟའི་དབྱངས་ཀྱིས་བསྒྲུན་དུ་མེད་པའི་གསུང་།།

ཉི་མ་བྱེ་བའི་མདངས་ལས་གསལ་བའི་ཐུགས།།

མཐའ་ཡས་འགྲོ་བའི་འདྲེན་མཆོག་ཤཱཀྱའི་ཏོག།

དག་པའི་མཁའ་ལ་ཤར་བའི་གཟའ་སྐར་རྣམས།།

ཆུ་གཏེར་དབུས་ན་ཡོངས་སུ་གསལ་བ་བཞིན།།

དང་བའི་ཡིད་མཚོར་ཁྱོད་ཀྱི་ཡོན་ཏན་གྱི།།

གཟུགས་བརྙན་མ་འདྲེས་གསལ་བར་རབ་བཀོད་ནས།།

ཟླ་ཟེར་ཕོག་པའི་ཆུ་སྐྱེས་གཞོན་ནུ་བཞིན།།

ལག་པའི་སོར་མོ་སྙིང་གའི་ངོས་སུ་ཟུམ།  །

རྩེ་གཅིག་ཡིད་ཀྱིས་ཁྱོད་སྐུར་མངོན་ཕྱོགས་ཏེ།།

ཅུང་ཟད་བསྟོད་ལ་ཐུགས་རྗེ་ཅན་ཁྱོད་དགོངས།  །

སྐར་མའི་ཚོགས་ཀྱིས་མཁའ་ལ་ཟླ་བ་བཞིན།  །

རྒྱལ་སྲས་དཔའ་བོ་རྣམས་ཀྱིས་ཀུན་ནས་བསྐོར།།

བ་ལང་ཁྱུ་ཡི་ཐོག་མར་ཁྱུ་མཆོག་བཞིན།།

དགྲ་བཅོམ་འཁོར་གྱི་ཚོགས་ཀྱིས་མདུན་དུ་བདར།།

ནམ་མཁའི་ཁྱོན་ཀུན་འགེངས་པའི་འོད་ཟེར་གྱི།།

དྲ་བ་སྟོང་གིས་ཡོངས་སུ་དཀྲིགས་པའི་སྐུ།།

ནམ་མཁའི་ལམ་ནས་ཆོ་འཕྲུལ་དུ་མ་ཡིས།།

ངང་བའི་རྒྱལ་པོ་བཞིན་དུ་ལྡིང་ཞིང་གཤེགས།།

དེ་ཚེ་རིང་ནས་བསྐྲུན་པའི་བཟང་བོའི་ལས།།

ཡོངས་སུ་སད་པའི་ལྷ་མི་སྟོང་ཕྲག་བརྒྱ།།

ཁྱོད་ཞལ་མཐོང་བའི་མོད་ལ་མི་བསྲུན་ཡིད།།

ཉེས་བརྒྱའི་འཆིང་བ་ཀུན་ནས་ལྷོད་པར་གྱུར།།

དཔའ་བོ་ཁྱོད་ཀྱིས་བྱང་ཆུབ་ཤིང་དྲུང་དུ།།

མཁྱེན་བརྩེའི་དཔུང་གིས་ཡིད་སྲུབས་བདག་པོའི་སྡེ།།

མ་ལུས་ཟིལ་གྱིས་གནོན་པར་མཛད་པ་ནི།།

དྲག་པོའི་རླུང་དང་ཉེ་བའི་སྤྲིན་ནག་བཞིན།  །

མདའ་མཚོན་གོ་ཆ་མ་བཟུང་བར།།

རང་ཉིད་གཅིག་པུས་བྱེ་བའི་བདུད།།

མ་ལུས་ཕམ་མཛད་གཡུལ་གྱི་ལས།  །

ཁྱོད་ལས་གཞན་པ་སུ་ཡིས་ཤེས།།

དེ་ལྟར་ཁྱོད་ཀྱི་བྱམས་པའི་མེས།།

འདོད་ལྷའི་སྙིང་ནི་རབ་གདུངས་ཀྱང་།  །

བརྩེ་བའི་གཏེར་ཁྱོད་ལུས་ཅན་ལ།  །

རིས་སུ་ཆད་པར་གྱུར་པ་མེད།།

ཁྱོད་ནི་འགྲོ་བའི་དོན་གྱི་སླད།།

ཅུང་ཟད་ཙམ་ཡང་མི་ངལ་ཞིང་།།

འགྲོ་བ་རྣམས་ཀྱང་ཁྱོད་ཀྱི་ནི།།

ཡོན་ཏན་བརྗོད་ལ་ངལ་མ་གྱུར།།

རྒྱ་མཚོའི་ཀློང་ལྟར་རབ་ཏུ་ཟབ་པའི་ཐུགས།།

ལྷ་ཡི་རྔ་བཞིན་ལེགས་པར་འདོམས་པའི་གསུང་།།

ལྷུན་པོའི་སྤོ་ལྟར་མངོན་པར་འཕགས་པའི་སྐུ།།

མཐོང་ཐོས་དྲན་པས་དོན་ལྡན་མཛད་པ་ཁྱོད།།

འཇིག་རྟེན་ཀུན་གྱི་སེམས་ཅན་ཐམས་ཅད་ཀྱིས།  །

དུས་གཅིག་ཉིད་དུ་ཐེ་ཚོམ་དོན་ཞུས་ཀྱང་།།

དེ་དག་རེ་རེའི་མདུན་དུའང་དེ་སྙེད་ཀྱི།།

སྐུ་དང་གསུང་གི་བཀོད་པ་དུས་གཅིག་ཏུ།།

མཛད་པ་མཛད་ཀྱང་རྟོག་པ་ཉེར་ཞི་བ།  །

ཁྱོད་ཀྱི་སྐུ་གསུང་ཐུགས་ཀྱི་གསང་བ་ཡི།།

ཚུལ་འདི་རྒྱལ་སྲས་རང་རྒྱལ་ཉན་ཐོས་ཀྱིས།།

ཇི་ཙམ་བརྟགས་ཀྱང་བློ་ཡི་ཡུལ་མིན་ན།།

ཚངས་དང་དབང་བོ་སོགས་ཀྱིས་སྨོས་ཅི་འཚལ།།

མཁའ་ལྡིང་དབང་བོ་མཁའ་ལ་བགྲོད་བགྲོད་ནས།།

ནམ་ཞིག་རང་སྟོབས་བྲི་བས་ལྡོག་འགྱུར་གྱི།།

ནམ་མཁའ་ཟད་པས་ལྡོག་པར་མི་འགྱུར་བཞིན།།

ཁྱོད་ཀྱི་ཡོན་ཏན་བརྗོད་པའང་དེ་ལྟར་ལགས།།

གཤོག་རྩལ་རབ་ཏུ་རྫོགས་པའི་མཁའ་ལྡིང་གིས།།

བགྲོད་པའི་ལམ་དུ་བྱེའུས་རྩོལ་བ་ལྟར།།

སྟོབས་བཅུ་མངའ་བ་གང་དུ་གཤེགས་པ་ཡི།།

ལམ་མཆོག་དེར་ནི་འཇུག་པར་འདོད་པ་བདག།

གནས་ལུགས་དོན་ལ་ལྟ་བའི་བློ་མིག་ཉམས།།

ངེས་འབྱུང་བྱང་ཆུབ་སེམས་ཀྱི་འབྱོར་བས་དབུལ།།

སྟོབས་ལྡན་ཉོན་མོངས་དགྲ་བོས་རྒྱུན་དུགཙེས།།

བདག་འཛིན་གཅོང་རོང་ཟབ་མོའི་སྦུབས་སུ་ལྷུང་།།

འདི་འདྲའི་ཉམ་ཐག་གནས་སུ་གྱུར་ལགས་པ།  །

བརྩེ་ཆེན་ཁྱེད་ཀྱིས་ཡལ་བར་འདོར་ལགས་ན།  །

དམན་པ་རྣམས་ལ་ཆེས་ཆེར་བརྩེ་བའི་མགོན།།

ཁྱོད་ལས་གཞན་པ་གང་ལ་སྐྱབས་སུ་གཟུང་།།

སྙིགས་མ་ལྔ་ཡིས་ཧ་ཅང་སྦགས་པ་ཡི།།

ཞིང་འདི་གཞན་གྱིས་སྤངས་དུས་མགོན་ཁྱོད་ཀྱིས།།

ཡོངས་སུ་བཟུང་སྟེ་རྒྱལ་བ་སྲས་བཅས་ཀྱིས།།

པད་དཀར་ལྟ་བུར་བསྔགས་པའི་དགོས་པའང་ཅི།།

འོན་ཀྱང་ཁྱོད་ཀྱི་འཕྲིན་ལས་གདུལ་བྱ་ལ།།

མ་བརྟགས་བཏང་སྙོམས་ཅུང་ཟད་མི་མངའ་བས།  །

སྐལ་ངན་བདག་གི་ཉེས་པ་ཁོ་ནར་ཟད།།

དེ་ཕྱིར་ཁྱོད་ལ་སྐྱོན་གྱི་སྐབས་མེད་པས།།

དེང་ནས་བྱང་ཆུབ་སྙིང་བོར་བདུད་སྡེ་ལས།།

ཇི་སྲིད་རྒྱལ་བར་མ་གྱུར་དེ་སྲིད་དུ།།

སྐྱེ་ཞིང་སྐྱེ་བར་ཁྱོད་ཀྱིས་རྗེས་བཟུང་ནས།།

གསུང་གི་བདུད་རྩིས་ངོམས་པ་མེད་པར་ཤོག།    །།

 ཅེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།བདེ་བར་གཤེགས་པ།  འཇིག་རྟེན་མཁྱེན་པ།   སྐྱེས་བུ་འདུལ་བའི་ཁ་ལོ་སྒྱུར་པ།བླ་ན་མེད་པ་ལྷ་དང་མི་རྣམས་ཀྱི་སྟོན་པ་ཤཱཀྱ་ཐུབ་པ་ལ་བསྟོད་པ་བྱིན་རླབས་ཉེར་འཇུག་ཅེས་བྱ་བ་འདི་ནི།   སྡེ་སྣོད་འཛིན་པ་འཇམ་དཔལ་རྒྱ་མཚོ་ཞེས་བྱ་བ་རང་གི་སློབ་མས་གསོལ་བ་བཏབ་པའི་དོན་དུ་མང་དུ་ཐོས་པའི་རྒྱལ་ཁམས་པ་བློ་བཟང་གྲགས་པའི་དཔལ་གྱིས་གངས་ཅན་ཁྲོད་ཀྱི་

གངས་རིའི་དབང་བོ་འོ་དེ་གུང་རྒྱལ་གྱི་ལྷ་ཞོལ་དུ་སྦྱར་བའི་ཡི་གེ་པ་ནི་སྡེ་སྣོད་འཛིན་པ་བྷ་དྲ་པཱ་ལའོ།།

༈དེ་བཞིན་གཤེགས་པ་ཁྱེད་སྐུ་ཇི་འདྲ་དང་། །

འཁོར་དང་སྐུ་ཚེའི་ཚད་དང་ཞིང་ཁམས་སོགས།།

ཁྱེད་ཀྱི་མཚན་མཆོག་བཟང་པོ་ཇི་འདྲ་བ།།

དེ་འདྲ་ཁོ་ནར་བདག་སོགས་འགྱུར་བར་ཤོག།

ཁྱེད་ལ་བསྟོད་ཅིང་གསོལ་བ་བཏབ་པའི་མཐུས།།

བདག་སོགས་གང་དུ་གནས་པའི་ས་ཕྱོགས་དེར།།

ནད་དང་དབུལ་ཕོངས་འཐབ་རྩོད་ཞི་བ་དང་།།

ཆོས་དང་བཀྲ་ཤིས་འཕེལ་བར་མཛད་དུ་གསོལ།  །

སྟོན་པ་འཇིག་རྟེན་ཁམས་སུ་བྱོན་པ་དང་།།

བསྟན་པ་ཉི་འོད་བཞིན་དུ་གསལ་བ་དང་།།

བསྟན་འཛིན་བུ་སློབ་བཞིན་དུ་མཐུན་པ་ཡིས།།

བསྟན་པ་ཡུན་རིང་གནས་པའི་བཀྲ་ཤིས་ཤོག།