བྱམས་ལྡན་ཨ་མ་དྲན་པའི་སྐྱོ་གླུ་སྙིང་གི་རྦ་རླབས།         

 ཨ་མའི་དུས་ཆེན་ལ་ཕུལ་བའི་ལེགས་སྐྱེས།

རྒྱལ་ཀུན་འཕྲིན་ལས་གཅིག་བསྡུས་རྒྱལ་བའི་ཡུམ། །

ཨ་མ་རྗེ་བཙུན་སྒྲོལ་མར་གསོལ་འདེབས་ན། །

དྲིན་ལྡན་མ་ལོའི་དྲིན་ལན་བཟོ་བའི་ཕྱིར། ། 

བུ་ངའི་བསྟན་འགྲོའི་དོན་ཆེན་འགྲུབ་པར་མཛོད། །

གང་དང་གང་ཚེ་ཅི་དང་ཅི་བསྒྲུབ་ཀྱང་། ། 

གལ་ཏེ་རང་སེམས་ཕྲ་མོ་ནང་བཀུག་ན། །

དྲིན་ཅན་ཨ་མའི་དྲིན་ལན་དྲན་འཛིན་དུ། ། 

ཤར་བའི་མོད་ལ་དྲན་གདུང་རྦ་རླབས་གཡོ། ། 

ལུས་ཀྱི་སྤྱོད་ལམ་བཟའ་བཏུང་རོལ་ཚུལ་སོགས། ། 

ཐམས་ཅད་བུ་ཡི་ཕན་བདེ་གཙོར་བཟུང་སྟེ། ། 

ཟླ་དགུ་ཞག་བཅུ་མངལ་ནས་ལེགས་བསྐྱངས་པས། ། 

མ་ཁྱོད་དང་བོར་དྲིན་ཆེ་སྙིང་ནས་དྲན། །

བཙའ་བའི་དུས་སུའང་མ་ཁྱོད་ཤ་རུས་ཀུན། །

འཐོར་སོང་སྙམ་པའི་མི་བཟད་ན་ཟུག་གིས། ། 

ཀུན་ནས་མནར་ཡང་བུ་ལ་བརྩེ་སེམས་ཀྱིས། ། 

སྤྲོ་དགའི་འཛུམ་ཞལ་མ་ཉམས་མ་ཁྱོད་དྲན། །

དེ་ནས་ཉམ་ཐག་སྤུ་སེར་ཟེང་ངེ་ཞིག །

ཤ་ཡི་དྲོད་ལ་བཅར་ཞིང་སོར་བཅུའི་རྩེར། །

གཡེངས་ཞིང་ནུ་ཞོས་གསོས་ཏེ་མི་གཙང་ཀུན། །

ཁ་དང་ལག་པས་ཕྱེས་པའི་མ་ཁྱོད་དྲན། ། 

ཚ་གྲང་བཀྲེས་སྐོམ་བྱུང་ཚེ་ངུ་ཙམ་ལས། ། 

རང་དོན་ཅི་ཡང་མི་ནུས་ཨ་མ་ཡི། ། 

བྱམས་བརྩེ་མེད་ན་བུ་ང་ཇི་ལྟར་གསོན། ། 

དྲིན་ལྡན་མ་ལོའི་དྲིན་ལན་སྙིང་ནས་དྲན། ། 

བཀྲེས་དང་སྐོམ་པའི་དུས་སུ་བཟའ་བཏུང་དང་། ། 

འཁྱགས་ཚེ་གོས་དང་ཕོངས་དུས་གཅེས་པའི་ནོར། ། 

ཡོད་རྒུ་ཕངས་མེད་གཏོང་བའི་ཨ་མའི་དྲིན། ། 

དྲན་ན་དེང་ཡང་སྐྱོ་བའི་རྦ་རླབས་འཕྱུར། །

སྡིག་སྡུག་གཏམ་ངན་བསྲེས་ཀྱིན་འབད་པའི་ནོར། ། 

བུ་དང་བུ་མོར་འཕྲོད་ན་སྙིང་ནས་དགའ། །

བཟོད་དཀའི་ན་བ་འཇིགས་པའི་འཆི་བ་སོགས། ། 

བུ་ལས་རང་ལ་བྱུང་ན་སྙིང་ནས་དགའ། ། 

ངག་གི་སྨྲ་བརྗོད་གོམ་པའི་འགྲོ་སྟངས་དང་། ། 

གྲོགས་དང་འགྲོགས་ལུགས་དགྲ་ལ་ཟོན་ལུགས་སོགས། ། 

འཇིག་རྟེན་མི་ཆོས་རང་གིས་གང་ཤེས་རྣམས། ། 

བསླབ་པས་ཐ་མར་དྲིན་ཆེ་དྲིན་ལན་དྲན། །

གཡོན་ཐལ་ཆེ་བའི་རིག་གསར་འཐོར་རླུང་གིས། ། 

གངས་དཀར་འཛིན་མ་ཀུན་ནས་འདར་ཚེ་ཡང་། ། 

བྱམས་བརྩེ་བཀྲག་མདངས་བཀྲ་བའི་ཀེེེེ་ལ་ཤ། །

མི་འགྱུར་བརྗིད་ཀྱིས་བུ་ལ་བརྟན་པ་བྱིན། །

རང་ཉིད་འབྱུང་བཞི་འཁྲུགས་པའི་ན་ཚ་ཡིས། །

ཇི་ལྟར་གདུང་ཡང་གཞན་ལ་ཕན་པའི་སེམས། ། 

མི་ལྷོད་དམ་པ་ཆོས་ཀྱི་བྱིན་རླབས་བཅུད། །

སྙིང་ལ་སིམ་པས་བུ་ལའང་སྙིང་སྟོབས་བྱིན། །

དེ་ཕྱིར་གཉེན་ཉེ་འཛོམས་དུས་མ་ཁྱོད་དྲན།  །

ཆོས་ཀྱི་དགའ་སྟོན་མྱོང་ཚེ་མ་ཁྱོད་དྲན། །

དགའ་སྐྱོའི་འདེགས་འཇོག་བསྒྱུར་དུས་མ་ཁྱོད་དྲན། ། 

མདོར་ན་སྙིང་གི་གཏིང་ནས་མ་ཁྱོད་དྲན། །

དེ་ཕྱིར་མ་ཁྱོད་དྲན་པའི་གདུང་བ་འདི། ། 

འཇིགས་བྲལ་སྙིང་སྟོབས་གོ་ཆར་ལེགས་བསྒྱུར་ནས། །

བསྟན་འགྲོའི་དོན་ཆེན་བསྒྲུབ་པའི་འདུན་མ་གང་། ། 

མི་འགྱུར་སེམས་བསྐྱེད་མ་ལ་སྐྱེས་སུ་འབུལ། །

ང་ལ་དགའ་ཞིང་བརྩེ་བའི་གཉེན་གྲོགས་ཀུན། །

མ་ལ་དགའ་ཞིང་དྲིན་ལན་འཇལ་འདོད་ན། ། 

ཁྲེལ་དང་ངོ་ཚ་ལྡན་པའི་ཡ་རབས་ཀྱི། །

མི་གཤིས་སྲུངས་དང་དྲིན་ལན་དེ་ཉིད་ཡིན། །

ཞེས་བྱམས་ལྡན་ཨ་མ་དྲན་པའི་སྐྱོ་གླུ་སྙིང་གི་རྦ་རླབས་སུ་བཏགས་པ་འདི་ནི། ཤཱཀྱའི་དགེ་སློང་བཛྲ་ཚུལ་ཁྲིམས་རྒྱ་མཚོར་འབོད་པས། སྤྱི་ལོ་༢༠༡༦ལོའི་ཟླ་༥བའི་ཚེས་༨ཉིན། གཙོས་གྲོང་ཁྱེར་དུ་ཡོད་པའི་སྲིང་མོ་ཆུང་བ་སྐལ་བཟང་མཚོའི་ཁྱིམ་ནས་འཕྲལ་དུ་བྲིས་པའོ། །