ཁྲིམས་རྩ་དོན་གཉིས་ལྷུན་འགྲུབ།
གུང་ཐང་བསྟན་པའི་དབང་ཕྱུག
བླ་མ་འཇམ་དབྱངས་རྗེ་བཙུན་བློ་བཟང་གྲགས།
།
ཡི་དམ་ཀུན་འདུས་འཕགས་མ་ཏཱ་རེ་ཡུམ།
།
བསྒྲུབས་བསྒྲུབས་བསྟེན་པའི་སྲུང་མ་ལ་སོགས་པ། །
བསླུ་མེད་བདེན་བྱིན་དམ་པས་ཡུན་དུ་སྐྱོངས།
།
ཀུན་ལ་ལྷག་བསམ་དཀར་བའི་དགེ་སྦྱོང་ང་།
།
གཙུག་ཏུ་བཀུར་ཏེ་ཞབས་གཡོག་བསྒྲུབ་འདོད་ཚོ།
།
ཆོས་སྲིད་ཟུང་དུ་འབྲེལ་བའི་ལམ་བཟང་འདིར།
།
འབད་པས་བསྒྲིམས་ཏེ་བརྩོན་པས་བགྲོད་པར་རིགས།
།
བསྲུང་བྱའི་ཁྱད་པར་རྩ་བ་གསུམ་པོ་ནི།
།
རང་སེམས་མི་འགྱུར་བསམ་པ་བཟང་དང་ཅིག
།
ཕྱི་ནང་གཉིས་ཀར་ལག་པ་བརྟན་དང་གཉིས།
།
ནང་གཏམ་གཞན་ལ་མི་བཤད་རྩ་བ་གསུམ།
།
དང་བོའི་ཡན་ལག་མངོན་ལྐོག་མེད་པ་དང་།
།
ཉེ་རིང་མེད་པར་རྒྱུ་འབྲས་ཚུལ་བཞིན་བྱེད།
།
ཀུན་ལ་བྱམས་བརྩེའི་ངང་གི་ཚིག་འཇམ་དང་།
།
འཁོན་འཛིང་མི་བྱེད་སུ་ལ་རོགས་རམ་བྱེད།
།
གཉིས་པའི་ཡན་ལག་གྲོགས་ངན་བསྟེན་མི་བྱ།
།
གཞན་རྒྱུར་མི་རྔམ་གཞུང་རྒྱུར་གཅེས་སྤྲས་བྱ།
།
ཆུད་ཟོས་མེད་པར་ན་བཟའ་མཛེས་པར་གྱོན།
།
གཞན་གྱིས་གཡར་བཅོལ་ཏན་ཏན་བྱས་ནས་སྤྲོད།
།
གསུམ་པའི་ཡན་ལག་ཕུང་ཁ་མཁའ་རྫུན་དང་།
།
ཕན་ཚུན་ཕྲག་དོག་ང་རྒྱལ་སེམས་མགོ་ནོན།
།
རྒྱུན་དུ་བླ་བཙག་རྐང་འདྲེན་གཏན་མི་བྱ།
།
ནང་ལ་ཕན་ཚུན་བརྩེ་དུང་སྤུན་ཟླ་ལྟར།
།
དེ་བཞིན་རྩ་བ་གསུམ་པོ་རེ་རེ་ལ།
།
ཡན་ལག་ཆུང་བ་བཞི་བཞི་ཕྱེ་བ་ཡི།
།
རྩ་བ་གསུམ་དང་ཡན་ལག་བཅུ་གཉིས་པོ།
།
སྲུང་བའི་སྤུན་ཟླ་སུ་ཡིན་སྙིང་གི་གྲོགས།
།
དེ་ཕྱིར་རྒན་པ་རྣམས་ཀྱིས་དོ་དམ་བྱེད།
།
གཞོན་པ་རྣམས་ཀྱིས་འབད་པ་དང་བླང་མཛོད།
།
དེ་ལྟར་ཚུལ་བཞིན་སྒྲུབ་པ་སུ་ཡིན་རྣམས།
།
དེང་ནས་བཟུང་སྟེ་སྐྱེ་བའི་འཕྲེང་རྒྱུད་དུ།
།
ཁོ་བོར་མི་འབྲལ་བཤེས་གཉེན་དམ་པས་སྐྱོངས།
།
རིམ་གཉིས་ལམ་གྱི་སྙིང་བོ་ལ་བརྟེན་ནས།
།
ཕྲ་རགས་འཁོར་བའི་རྒྱ་མཚོ་ལས་བརྒལ་ཏེ།
།
ལྷན་ཅིག་རྒྱལ་བ་གཅིག་ལ་འཚང་རྒྱ་སྨོན། །
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། བན་ཤུལ་འཇམ་དབྱངས། འབའ་སྣང་གྲོལ།
|