དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་ལྷག་པའི་སྨོན་ལམ་ཐེམ་སྐས་མ་བཞུགས་སོ།
།
ན་མོ་མཉྫུ་ཤྲཱིགྷོ་ཥྰ་ཡ།
དཀོན་མཆོག་གསུམ་ལ་ཕྱག་འཚལ་ལོ། །
ཐུགས་རྗེའི་བདག་ཉིད་བླ་མ་དང་། །
དཀོན་མཆོག་གསུམ་དང་ཡི་དམ་ལྷ།
།
ལྷ་ཡི་དྲང་སྲོང་མངོན་ཤེས་ཅན། །
ལྷག་པའི་སྨོན་ལམ་འགྲུབ་པར་ཤོག
།
མིར་གྱུར་ཡུལ་དབུས་སྐྱེས་པ་དང་། །
དབང་བོ་ཚང་ཞིང་གནས་ལ་དད།
།
དེ་བཞིན་ལས་མཐའ་མ་ལོག་པའི། །
རང་འབྱོར་ལྔ་དང་ལྡན་པར་ཤོག
།
སངས་རྒྱས་བྱོན་དང་དམ་ཆོས་གསུངས། །
བསྟན་པ་གནས་དང་དེ་རྗེས་འཇུག
།
གཞན་ཕྱིར་རྟག་ཏུ་སྙིང་བརྩེ་བའི། །
གཞན་འབྱོར་ལྔ་དང་ལྡན་པར་ཤོག །
དམྱལ་བ་ཡི་དྭགས་དུད་འགྲོ་དང་།
།
ཚེ་རིང་ཀླ་ཀློ་ལོག་ལྟ་དང་། །
སངས་རྒྱས་ཀྱིས་སྟོང་ལྐུག་པ་སྟེ།
།
མི་ཁོམ་བརྒྱད་ལས་ཐར་བར་ཤོག །
དད་པ་དང་ནི་གཏོང་བ་དང་། །
ཐོས་དང་ཚུལ་ཁྲིམས་བླ་ན་མེད།
།
ཁྲེལ་ཡོད་ངོ་ཚ་ཤེས་པ་དང་། །
འཕགས་ནོར་བདུན་དང་ལྡན་པར་ཤོག
།
སྡེ་སྣོད་གསུམ་དང་རྒྱུད་སྡེ་བཞི། །
འཆད་རྩོད་འཁྲུལ་བ་མི་མངའ་བའི།
།
ཐུགས་རྗེའི་རྒྱུན་ཆད་མེད་པ་དང་། །
བླ་མ་རྣམས་དང་མཇལ་བར་ཤོག
།
དུས་གསུམ་སོ་ཐར་བྱང་སེམས་དང་། །
རིག་འཛིན་སྔགས་ཀྱི་བསླབ་བྱ་རྣམས།
།
ཇི་ལྟར་མནོས་བཞིན་བསྲུངས་པ་དང་། །
གོང་ནས་གོང་དུ་འཕེལ་བར་ཤོག
།
གསལ་སྟོང་དབྱེར་མེད་རྟོགས་པ་དང་། །
སྣང་སྟོང་ཟུང་དུ་འཇུག་པ་དང་།
།
བདེ་སྟོང་བླ་ན་མེད་པ་དང་། །
སྒྲིབ་གཉིས་བག་ཆགས་དག་པར་ཤོག
།
འདོད་པ་ཆུང་ཞིང་ཆོག་ཤེས་དང་། །
བྱང་ཆུབ་སེམས་དང་ལྡན་པ་ཡིས།
།
ལོག་པའི་འཚོ་བ་ཀུན་སྤངས་ནས། །
ཆོས་ཀྱི་འཚོ་བས་འཚོ་བར་ཤོག །
གང་ཞིག་དགྲ་བཅོམ་ཕ་མ་གསོད།
།
མཐུན་པའི་དགེ་འདུན་དབྱེན་བྱེད་ཅིང་། །
དེ་བཞིན་གཤེགས་པའི་སྐུ་ཁྲག་འབྱིན།
།
མཚམས་མེད་ལྔ་ལས་ཐར་བར་ཤོག །
མཆོད་རྟེན་བཤིག་དང་བྱང་སེམས་གསོད།
།
དགེ་སློང་མ་རྣམས་སུན་འབྱིན་ཅིང་། །
སློབ་དཔོན་གསོད་ཅིང་ཆོས་ནོར་རྐུ།
།
ཉེ་བ་ལྔ་ལས་ཐར་བར་ཤོག །
གསོད་རྐུ་རྫུན་དང་འདོད་ལོག་སྤྱོད།
།
ཕྲ་མ་ཚིག་རྩུབ་ངག་འཁྱལ་སྨྲ། །
བརྣབ་སེམས་གནོད་སེམས་ལོག་ལྟ་སོགས།
།
མི་དགེ་བཅུ་ལས་ཐར་བར་ཤོག །
མནར་མེད་རབ་ཚ་ཚ་བ་དང་། །
ངུ་འབོད་ཆེ་དང་ངུ་འབོད་ཆུང་།
།
བསྡུས་འཇོམས་ཐིག་ནག་ཡང་སོས་ཏེ། །
ཚ་དམྱལ་བརྒྱད་ལས་ཐར་བར་ཤོག
།
ཆུ་བུར་ཅན་དང་ཆུ་བུར་བརྡོལ། །
སོ་ཐམ་ཨ་ཆུ་ཀྱི་ཧུད་དང་། །
ཨུཏྤལ་པདྨ་ལྟར་གས་ཏེ།
།
གྲང་དམྱལ་བརྒྱད་ལས་ཐར་བར་ཤོག །
ཉི་ཚེ་ཉེ་འཁོར་རོ་མྱག་འདམ། །
མི་གཙང་འདམ་དང་མེད་དམུར་འོབ།
།
ཆུ་བོ་རབས་མེད་ཤལ་མ་ལིའི། །
དེ་དག་གནས་ལས་ཐར་བར་ཤོག །
ཕྱི་སྒྲིབ་ཅན་དང་ནང་སྒྲིབ་ཅན།
།
ཟས་སྐོམ་གཉིས་ཀའི་སྒྲིབ་པ་ཅན། །
མེ་ལྕེ་འཁོར་ལོ་ཅན་ལ་སོགས། །
ཡི་དྭགས་གནས་ལས་ཐར་བར་ཤོག
།
བྱིང་ན་གནས་དང་ཁ་འཐོར་དང་། །
གླེན་ལྐུག་གཅིག་ལ་གཅིག་ཟ་དང་།
།
གསོད་སྤྱོད་བཀོལ་བརྡུང་བྱེད་པ་སྟེ། །
དུད་འགྲོའི་གནས་ལས་ཐར་བར་ཤོག
།
ལྷ་ལ་འཕོ་དང་ལྟུང་བ་དང་། །
ལྷ་མ་ཡིན་ལ་འཐབ་རྩོད་དང་། །
མི་ལ་སྐྱེ་རྒ་ན་འཆི་སོགས།
།
སྡུག་བསྔལ་ཀུན་ལས་ཐར་བར་ཤོག །
འཇམ་པའི་དབྱངས་ཀྱི་ཤེས་རབ་དང་། །
སྤྱན་རས་གཟིགས་ཀྱི་ཐུགས་རྗེ་དང་།
།
ཕྱག་ན་རྡོ་རྗེའི་མཐུ་སྟོབས་ཀྱིས། །
བདེ་བ་ཅན་དུ་སྐྱེ་བར་ཤོག །
ཤཱ་རིའི་བུ་ཡི་བསླབ་པ་དང་།
།
མོའུ་གལ་བུ་ཡི་རྫུ་འཕྲུལ་དང་། །
ཀུན་དགའ་བོ་ཡི་ཐོས་པ་ཡིས། །
བདེ་བ་ཅན་དུ་སྐྱེ་བར་ཤོག
།
ཀླུ་སྒྲུབ་སྙིང་པོའི་མཁྱེན་པ་དང་། །
ས་ར་ཧ་ཡི་རྟོགས་པ་དང་།
།
འབི་ར་ཝ་ཡི་ནུས་མཐུ་ཡིས། །
བདེ་བ་ཅན་དུ་སྐྱེ་བར་ཤོག
།
དཀོན་མཆོག་གསུམ་གྱི་བདེན་པ་དང་། །
སངས་རྒྱས་བྱང་ཆུབ་བྱིན་རླབས་དང་།
།
ཚོགས་གཉིས་ཡོངས་རྫོགས་མངའ་ཐང་དང་། །
ཆོས་ཉིད་བདེན་པས་འགྲུབ་པར་ཤོག
།
དགེ་བའི་རྟ་ལ་རབ་ཞོན་ནས། །
སྨོན་ལམ་སྲབ་ཀྱིས་ཁ་ལོ་བསྒྱུར།
།
བརྩོན་འགྲུས་ལྕག་གིས་མྱུར་བསྐུལ་ནས། །
ཐར་བའི་གླིང་དུ་བགྲོད་པར་ཤོག
།
སྤངས་རྟོགས་མཐར་ཕྱིན་སངས་རྒྱས་དང་། །
ལུང་དང་རྟོགས་པའི་དམ་པའི་ཆོས།
།
ས་བཅུ་བྱང་སེམས་དགེ་འདུན་ཏེ། །
དཀོན་མཆོག་གསུམ་གྱི་བཀྲ་ཤིས་ཤོག
།
ཅེས་པ་འདི་ཡང་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་ལྷག་པའི་སྨོན་ལམ་ཐེམ་སྐས་མ་འདི་ཉིན་རེ་བཞིན་དུ་མ་ཆད་པར་བཏོན་ན་བསྐལ་བ་སྟོང་གི་སྡིག་སྒྲིབ་བག་ཆགས་ཐམས་ཅད་བྱང་ཞིང་དག་ནས་མྱུར་དུ་མངོན་པར་རྫོགས་པར་སངས་རྒྱས་ཀྱི་ས་ལ་བཀོད་པར་ཐེ་ཚོམ་མེད་དོ།
། ། །བཀྲ་ཤིས་པར་གྱུར་ཅིག །
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། བན་ཤུལ་འཇམ་དབྱངས། འབའ་སྣང་གྲོལ།
|