དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་ལྷག་པའི་སྨོན་ལམ་ཐེམ་སྐས་མ་བཞུགས་སོ། །

ན་མོ་མཉྫུ་ཤྲཱིགྷོ་ཥྰ་ཡ། 

དཀོན་མཆོག་གསུམ་ལ་ཕྱག་འཚལ་ལོ། །

ཐུགས་རྗེའི་བདག་ཉིད་བླ་མ་དང་། །

དཀོན་མཆོག་གསུམ་དང་ཡི་དམ་ལྷ། །

ལྷ་ཡི་དྲང་སྲོང་མངོན་ཤེས་ཅན། །

ལྷག་པའི་སྨོན་ལམ་འགྲུབ་པར་ཤོག །

མིར་གྱུར་ཡུལ་དབུས་སྐྱེས་པ་དང་། །

དབང་བོ་ཚང་ཞིང་གནས་ལ་དད། །

དེ་བཞིན་ལས་མཐའ་མ་ལོག་པའི། །

རང་འབྱོར་ལྔ་དང་ལྡན་པར་ཤོག །

སངས་རྒྱས་བྱོན་དང་དམ་ཆོས་གསུངས། །

བསྟན་པ་གནས་དང་དེ་རྗེས་འཇུག །

གཞན་ཕྱིར་རྟག་ཏུ་སྙིང་བརྩེ་བའི། །

གཞན་འབྱོར་ལྔ་དང་ལྡན་པར་ཤོག །

དམྱལ་བ་ཡི་དྭགས་དུད་འགྲོ་དང་། །

ཚེ་རིང་ཀླ་ཀློ་ལོག་ལྟ་དང་། །

སངས་རྒྱས་ཀྱིས་སྟོང་ལྐུག་པ་སྟེ། །

མི་ཁོམ་བརྒྱད་ལས་ཐར་བར་ཤོག །

དད་པ་དང་ནི་གཏོང་བ་དང་། །

ཐོས་དང་ཚུལ་ཁྲིམས་བླ་ན་མེད། །

ཁྲེལ་ཡོད་ངོ་ཚ་ཤེས་པ་དང་། །

འཕགས་ནོར་བདུན་དང་ལྡན་པར་ཤོག །

སྡེ་སྣོད་གསུམ་དང་རྒྱུད་སྡེ་བཞི། །

འཆད་རྩོད་འཁྲུལ་བ་མི་མངའ་བའི། །

ཐུགས་རྗེའི་རྒྱུན་ཆད་མེད་པ་དང་། །

བླ་མ་རྣམས་དང་མཇལ་བར་ཤོག །

དུས་གསུམ་སོ་ཐར་བྱང་སེམས་དང་། །

རིག་འཛིན་སྔགས་ཀྱི་བསླབ་བྱ་རྣམས། །

ཇི་ལྟར་མནོས་བཞིན་བསྲུངས་པ་དང་། །

གོང་ནས་གོང་དུ་འཕེལ་བར་ཤོག །

གསལ་སྟོང་དབྱེར་མེད་རྟོགས་པ་དང་། །

སྣང་སྟོང་ཟུང་དུ་འཇུག་པ་དང་། །

བདེ་སྟོང་བླ་ན་མེད་པ་དང་། །

སྒྲིབ་གཉིས་བག་ཆགས་དག་པར་ཤོག །

འདོད་པ་ཆུང་ཞིང་ཆོག་ཤེས་དང་། །

བྱང་ཆུབ་སེམས་དང་ལྡན་པ་ཡིས། །

ལོག་པའི་འཚོ་བ་ཀུན་སྤངས་ནས། །

ཆོས་ཀྱི་འཚོ་བས་འཚོ་བར་ཤོག །

གང་ཞིག་དགྲ་བཅོམ་ཕ་མ་གསོད། །

མཐུན་པའི་དགེ་འདུན་དབྱེན་བྱེད་ཅིང་། །

དེ་བཞིན་གཤེགས་པའི་སྐུ་ཁྲག་འབྱིན། །

མཚམས་མེད་ལྔ་ལས་ཐར་བར་ཤོག །

མཆོད་རྟེན་བཤིག་དང་བྱང་སེམས་གསོད། །

དགེ་སློང་མ་རྣམས་སུན་འབྱིན་ཅིང་། །

སློབ་དཔོན་གསོད་ཅིང་ཆོས་ནོར་རྐུ། །

ཉེ་བ་ལྔ་ལས་ཐར་བར་ཤོག །

གསོད་རྐུ་རྫུན་དང་འདོད་ལོག་སྤྱོད། །

ཕྲ་མ་ཚིག་རྩུབ་ངག་འཁྱལ་སྨྲ། །

བརྣབ་སེམས་གནོད་སེམས་ལོག་ལྟ་སོགས། །

མི་དགེ་བཅུ་ལས་ཐར་བར་ཤོག །

མནར་མེད་རབ་ཚ་ཚ་བ་དང་། །

ངུ་འབོད་ཆེ་དང་ངུ་འབོད་ཆུང་། །

བསྡུས་འཇོམས་ཐིག་ནག་ཡང་སོས་ཏེ། །

ཚ་དམྱལ་བརྒྱད་ལས་ཐར་བར་ཤོག །

ཆུ་བུར་ཅན་དང་ཆུ་བུར་བརྡོལ། །

སོ་ཐམ་ཨ་ཆུ་ཀྱི་ཧུད་དང་། །

ཨུཏྤལ་པདྨ་ལྟར་གས་ཏེ། །

གྲང་དམྱལ་བརྒྱད་ལས་ཐར་བར་ཤོག །

ཉི་ཚེ་ཉེ་འཁོར་རོ་མྱག་འདམ། །

མི་གཙང་འདམ་དང་མེད་དམུར་འོབ། །

ཆུ་བོ་རབས་མེད་ཤལ་མ་ལིའི། །

དེ་དག་གནས་ལས་ཐར་བར་ཤོག །

ཕྱི་སྒྲིབ་ཅན་དང་ནང་སྒྲིབ་ཅན། །

ཟས་སྐོམ་གཉིས་ཀའི་སྒྲིབ་པ་ཅན། །

མེ་ལྕེ་འཁོར་ལོ་ཅན་ལ་སོགས། །

ཡི་དྭགས་གནས་ལས་ཐར་བར་ཤོག །

བྱིང་ན་གནས་དང་ཁ་འཐོར་དང་། །

གླེན་ལྐུག་གཅིག་ལ་གཅིག་ཟ་དང་། །

གསོད་སྤྱོད་བཀོལ་བརྡུང་བྱེད་པ་སྟེ། །

དུད་འགྲོའི་གནས་ལས་ཐར་བར་ཤོག །

ལྷ་ལ་འཕོ་དང་ལྟུང་བ་དང་། །

ལྷ་མ་ཡིན་ལ་འཐབ་རྩོད་དང་། །

མི་ལ་སྐྱེ་རྒ་ན་འཆི་སོགས། །

སྡུག་བསྔལ་ཀུན་ལས་ཐར་བར་ཤོག །

འཇམ་པའི་དབྱངས་ཀྱི་ཤེས་རབ་དང་། །

སྤྱན་རས་གཟིགས་ཀྱི་ཐུགས་རྗེ་དང་། །

ཕྱག་ན་རྡོ་རྗེའི་མཐུ་སྟོབས་ཀྱིས། །

བདེ་བ་ཅན་དུ་སྐྱེ་བར་ཤོག །

ཤཱ་རིའི་བུ་ཡི་བསླབ་པ་དང་། །

མོའུ་གལ་བུ་ཡི་རྫུ་འཕྲུལ་དང་། །

ཀུན་དགའ་བོ་ཡི་ཐོས་པ་ཡིས། །

བདེ་བ་ཅན་དུ་སྐྱེ་བར་ཤོག །

ཀླུ་སྒྲུབ་སྙིང་པོའི་མཁྱེན་པ་དང་། །

ས་ར་ཧ་ཡི་རྟོགས་པ་དང་། །

འབི་ར་ཝ་ཡི་ནུས་མཐུ་ཡིས། །

བདེ་བ་ཅན་དུ་སྐྱེ་བར་ཤོག །

དཀོན་མཆོག་གསུམ་གྱི་བདེན་པ་དང་། །

སངས་རྒྱས་བྱང་ཆུབ་བྱིན་རླབས་དང་། །

ཚོགས་གཉིས་ཡོངས་རྫོགས་མངའ་ཐང་དང་། །

ཆོས་ཉིད་བདེན་པས་འགྲུབ་པར་ཤོག །

དགེ་བའི་རྟ་ལ་རབ་ཞོན་ནས། །

སྨོན་ལམ་སྲབ་ཀྱིས་ཁ་ལོ་བསྒྱུར། །

བརྩོན་འགྲུས་ལྕག་གིས་མྱུར་བསྐུལ་ནས། །

ཐར་བའི་གླིང་དུ་བགྲོད་པར་ཤོག །

སྤངས་རྟོགས་མཐར་ཕྱིན་སངས་རྒྱས་དང་། །

ལུང་དང་རྟོགས་པའི་དམ་པའི་ཆོས། །

ས་བཅུ་བྱང་སེམས་དགེ་འདུན་ཏེ། །

དཀོན་མཆོག་གསུམ་གྱི་བཀྲ་ཤིས་ཤོག །

ཅེས་པ་འདི་ཡང་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་ལྷག་པའི་སྨོན་ལམ་ཐེམ་སྐས་མ་འདི་ཉིན་རེ་བཞིན་དུ་མ་ཆད་པར་བཏོན་ན་བསྐལ་བ་སྟོང་གི་སྡིག་སྒྲིབ་བག་ཆགས་ཐམས་ཅད་བྱང་ཞིང་དག་ནས་མྱུར་དུ་མངོན་པར་རྫོགས་པར་སངས་རྒྱས་ཀྱི་ས་ལ་བཀོད་པར་ཐེ་ཚོམ་མེད་དོ། །  ། །བཀྲ་ཤིས་པར་གྱུར་ཅིག །