གངས་ལྗོངས་ཤེས་རིག་ནོར་བུའི་སློབ་གླིང་དུ་དགེ་རྒན་ཆེན་མོ་ཚེ་རིང་དོན་འགྲུབ་ཀྱིས་འཆད་ཁྲིད་གནང་བ།

༢༠༡༦ ལོའི་སྤྱི་ཟླ་༤བའི་ཚེས་༢༣ཉིན། གངས་ལྗོངས་ཤེས་རིག་ནོར་བུའི་སློབ་གླིང་གི་ཐོན་མིའི་རིག་གནས་ཞིབ་འཇུག་ལྟེ་གནས་ཀྱིས་ཆེད་ཞུས་ལྟར་ཀན་སུའུ་ཞིང་ཆེན་ཀན་ལྷོ་ཁུལ་ནང་བསྟན་སློབ་གླིང་གི་དགེ་རྒན་ཆེན་མོ་ཟམ་ཚ་ཚེ་རིང་དོན་གྲུབ་ལགས་དངོས་སུ་ངེད་གངས་ལྗོངས་ཤེས་རིག་ནོར་བུའི་སློབ་གླིང་དུ་ཕེབས་ཤིང་སྔ་དྲོའི་ཆུ་ཚོད་བཅུ་བའི་སྟེང་།  སློབ་གླིང་འདི་ཀའི་གླིང་སྨད་ཀྱི་ཚོགས་ཁང་ཆེན་མོ་རུ་སུམ་རྟགས་གཉིས་དང་འབྲེལ་བའི་སྐོར་གྱི་འཆད་ཁྲིད་དངོས་སུ་འགོ་བརྩམས་ཏེ་ཆུ་ཚོད་གཉིས་ལྷག་གི་རིང་འཆད་ཁྲིད་གནང་བ་དང་།  ཕྱི་དྲོ་ཆུ་ཚོད་གསུམ་པའི་སྟེང་རྒྱལ་ཕྱི་ནང་གི་ཁྲིམས་ལུགས་ཀྱི་འདུ་ཤེས་དང་སྤྱི་དམངས་ཀྱི་འདུ་ཤེས་སོགས་དང་འཕྲོས་ཏེ།   རྒྱལ་ཁབ་གྱི་ཁྲིམས་ལུགས་དང་མ་འགལ་བའི་སྒོ་ནས་ནང་བསམ་བློའི་དཔལ་ཡོན་དང་ཕྱི་དངོས་པོའི་དཔལ་ཡོན་གོང་འཕེལ་གཏོང་ཐབས་སྐོར་གྱི་འཆད་ཁྲིད་གནང་བར་འཛིན་གྲྭ་སོ་སོའི་སློབ་མ་དང་དགེ་རྒན་ལས་བཟོ་བ་བཅས་མི་གྲངས་ཆིག་སྟོང་ལྷག་ཐེངས་འདིའི་འཆད་ཁྲིད་ལ་དངོས་སུ་ཞུགས་པ་རེད།

པར་ལེན་པ་དང་པར་རིས་མཁོ་སྤྲོད་པ། ཚེརིང་དཔལ་འབྱོར།