༄༅།།རྫ་དཔལ་སྤྲུལ་གྱིས་མཛད་པའི་ཞལ་གདམས།
སྐྱིད་ན་མི་དགའ་སྡུག་ན་དགའ། །
སྐྱིད་ན་ཉོན་མོངས་དུག་ལྔ་འབར། །
སྡུག་ན་སྔོན་བསག་ལས་ངན་འཛད། །
སྡུག་བསྔལ་བླ་མའི་ཐུགས་རྗེ་ཡིན། །
བསྟོད་ན་མི་དགའ་སྨད་ན་དགའ།།
བསྟོད་ན་ང་རྒྱལ་ཁེངས་སེམས་ཆེ། །
སྨད་ན་རང་སྐྱོན་ཐེར་ལ་འབུད། །
མི་ཁ་ལྷ་ཡི་ཕ་འབབ་ཡིན། །
མཐོ་ན་མི་དགའ་དམའ་ན་དགའ། །
མཐོ་ན་ཕྲག་དོག་ང་རྒྱལ་སྐྱེ། །
དམའ་ན་བག་ཡངས་དགེ་སྦྱོར་འཕེལ། །
དམན་ས་གོང་མའི་གདན་ས་ཡིན། །
འབྱོར་ན་མི་དགའ་རྒུད་ན་དགའ། །
འབྱོར་ན་གསོག་སྲུང་སྡུག་བསྔལ་ཆེ། །
རྒུད་ན་དཀའ་སྤྱད་ལྷ་ཆོས་འགྲུབ། །
སྤྲང་ལུས་ཆོས་པའི་གཏད་སོ་ཡིན། །
བྱིན་ན་མི་དགའ་འཕྲོག་ན་དགའ།།
བྱིན་ན་ལན་ཆགས་ཁུར་པོ་འཕེལ།།
འཕྲོག་ན་ཚེ་རབས་བུ་ལོན་སོད།།
ཆོག་ཤེས་འཕགས་པའི་སྤྱི་ནོར་ཡིན།།
གཉེན་ལ་མི་དགའ་དགྲ་ལ་དགའ།།
གཉེན་གྱིས་ཐར་ལམ་བར་དུ་གཅོད།།
དགྲ་བོ་བཟོད་པའི་ཡུལ་དུ་བྱེད།།
རོ་སྙོམས་ཉམས་ལེན་གནད་འགག་ཡིན།།
ཆོས་བཞིན་མཛད་ན་དེ་འདྲ་དགོས།།
བློ་ཐག་ཆོད་ན་དེ་འདྲ་དགོས། །
རི་ཁྲོད་འཛིན་ན་དེ་འདྲ་དགོས།།
རྒྱལ་ཁམས་འགྲིམས་ན་དེ་འདྲ་དགོས།།
རྩོམ་ཡིག་མཁོ་སྤྲོད་པ། གསར་འགོད་པ་རླུང་གཤོག་ཅན།
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། འབའ་སྣང་གྲོལ། ཨ་བུ་འབྲོང་།
| 
青公网安备 63262102000011号