སྙིང་ཁོང་གི་སྐད་ཆ་ཚན་པ་བཅུ།

ང་རང་གྲུབ་ཙམ་གྱི་སྐད་ཅིག་དེ་ཉིད་ནས་ད་ལྟའི་བར། ཁྱོད་དང་སྐད་ཅིག་ཕྱེད་ཙམ་ཡང་འབྲལ་མ་མྱོང་མོད། འོན་ཀྱང་ཁྱོད་ལ་དངོས་གནས་ཁྲེལ་དང་ངོ་ཚ། སྙིང་རྗེ་ཟེར་བ་ཞིག་མི་འདུག  ཁྱོད་ཀྱི་མྱུར་མགྱོགས་ཆེ་བའི་ལྕག་ཚན་དེས་རང་དབུགས་གཅིག་གིས་རྒ་བའི་ཕྱོགས་དེར་འདེད་བཞིན་ཡོད་པར་མ་ཟད། བདེ་སྐྱིད་ཀྱི་དགའ་ཚལ་མྱུལ་དུས་ཁྱོད་སྐད་ཅིག་གིས་ཡལ་ནས་འགྲོ་ཡང། སྐྱོ་གདུང་དང་སྡུག་བསྔལ་གྱི་གཤོང་ན་འགྱེལ་དུས། ཁྱོད་གོམ་པ་གང་ཡང་བསྐལ་བར་སྣང་དུ་འཇུག་པ་འདི་ཅི་ཞིག་ཡིན།

རྒྱང་སྒྲོག་དང་བརྙན་འཕྲིན།  དཔེ་དེབ་དང་སྒྲ་ཐག་སོགས་ལས་ངས་ཁྱེད་རྣམ་པའི་སྙན་པ་ཐོས། ངས་ཐོས་པ་ནི་ཁྱེད་རྣམ་པས་རྟག་ཏུ་གླེང་བའི་བོད་རིགས་ཀྱི་ལ་རྒྱ་དང་ཤ་ཞེན་ཡིན། དེའི་ཕྱིར་ངའི་སེམས་པའི་རྡོ་རིང་ངོས་ལ་ཟབ་མོར་བརྐོས་ཟིན་པའི་དགའ་ཞེན་དེ། དྲི་མེད་ཀྱི་དུང་བ་མཚོན་པའི་ཁ་བཏགས་དཀར་བོ་ཞིག་ཏུ་རིང་མོ་ནས་གྲུབ་ཡོད། འོན་ཀྱང་རང་རང་གི་གཤིས་ཀ་དབང་བཙན་པས། དེས་ནམ་ཡང་ང་རང་སྙན་གྲགས་ཅན་ཚོ་ལ་ངོ་བསྟོད་བྱེད་དུ་འགྲོར་མི་སྟེར། དེའི་ཕྱིར་ངས་ཁྱེད་རང་རྣམ་པ་ཆེད་དུ་བཙལ་མ་མྱོང་མོད། ལས་དབང་ཞིག་གམ་སྟབས་ལེགས་ཤིག་གིས། ངས་ཁྱེད་རྣམ་པ་ཉེ་ས་ནས་མཐོང་སོང་། ཀྱེ་ཧུད། ངས་ཁྱེད་ཚོ་ཐག་རིང་ནས་ཐོས་པ་ཙམ་ལས་ཉེ་སར་མ་མཐོང་ན་ཅི་མ་རུང་། ང་ཁྱེད་ཚོ་ལ་དངོས་གནས་རེ་བ་ཆད་སོང་། དོན་དངོས་སུ་ལ་རྒྱ་མེད། གཤིས་རྒྱུད་ངན། ཁ་ཚིག་རྩུབ། ཆང་དྲི་དང་དུད་དྲི་ལས་རིགས་ཞེན་གྱི་དྲི་མ་རིང་དུ་དོར་ཚར་འདུག ཐ་ན་བོད་སྐད་གཙང་སང་བ་ཞིག་ཀྱང་བཤད་ཀིན་མི་འདུག 

 ༼༧༽ འགལ་བ།

ཐ་དད་ཅིང་གཞི་མཐུན་མི་སྲིད་པ་འགལ་བའི་མཚན་ཉིད་ཅེས་པའི་ཚིག་ཙམ་ལའང་ཀུན་ནས་རྨོངས་ཤིང་འཐོམས་པའི་ཁ་བ་རི་བའི་ན་གཞོན་འགའ་ཞིག  འགལ་བའི་མཚན་གཞི་འཚོལ་བར་འབད་ཁུལ་བྱས་ཀྱང་། འགལ་འབྲེལ་གྱི་དོན་ལ་གོ་བ་མ་ཆགས་པས། རང་དང་རང་གི་མེས་པོས་བཞག་པའི་ཤེས་རིག་གཉིས་འགལ་བ་ལྟག་སྤྲོད་ཀྱི་མཚན་གཞིར་སྨྲའོ།། ངང་ཚུལ་འདིས་ནི། འགལ་བའི་དོན་མི་ཤེས་པ་ཁོ་ཚོའི་སྙིང་ལ་མི་རིགས་འདི་འགལ་བར་བྱའོ་སྙམ་པའི་འགལ་བའི་བྱེད་ལས་དེ་ཡར་ལྡན་དུ་ཞུགས་ཡོད་པ་མཚོན་ནམ་སྙམ་མོ།།

ནམ་ཡང་ཆ་མི་མཉམ་པའི་འཇིག་རྟེན་འདི་ནས། འདྲ་མཉམ་གྱི་ཐོབ་ཐང་ལ་རྩོལ་བའང་། སྐབས་འགར་བལྟས་ན་གླེན་རྟགས་ལྟ་བུར་སྣང་ངོ་།།སྔོན་ཆད་ངས་ཁྲིམས་ལུགས་ནི་བཙན་པོའི་མགོ་གནོན་དང་། གཉོམ་ཆུང་གི་རྒྱབ་སྐྱོར་དུ་བཟུང་ཞིང་། ཁྲིམས་ལུགས་ཡོད་ན་བཙན་གཉོམ་ཡོད་མི་སྲིད་བསམ་མྱོང་མོད། འོན་ཀྱང་ད་གཟོད་བསམ་ཚུལ་དེ་ནི་གླེན་རྟགས་སུ་ཚོར། འདྲ་མཉམ་ཞེས་པ་སྐད་ཆའི་བཤད་ཚུལ་ཞིག་དང་། བཙན་གཉོམ་ཤོར་བ་དོན་གྱི་གནས་སྟངས་ཤིག་ཡིན་པའང་ད་གཟོད་ཤེས་སོང་།  ལྟོས་དང་། དཔོན་པོ་ཁྲིམས་དང་འགལ་མི་སྲིད་ལ། འབངས་མི་ཁྲིམས་ཀྱི་རྒྱ་ལས་མི་ཐར་བའི་གསང་བ་འདིས་ཅི་ཞིག་མཚོན།  ཀྱེ་མ་ཇི་འདྲའི་སྐྱོ་བ་ལ་ཨང་། དཔོན་པོ་ཁྲིམས་དང་འགལ་ན་ཁྲིམས་ལ་སྐྱོན་འཛུག་ཆོག་མོད། འབངས་མིས་ཁྲིམས་ལུགས་བཤད་ན་འདུག་ས་ཁྲིམས་ཁང་ཡིན་པ་ཅི་ལ་ཐུག

རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ།  མགར་ཉི་ཟེར། བན་ཤུལ་འཇམ་དབྱངས། ཨ་བུ་འབྲོང་།