བོད་ཀྱི་རྡུང་ལེན་པ་བདུད་བྷེ་ལགས་རྗེས་དྲན་རྩོམ་ཡིག
  ༄༅། །ངེད་དྲ་བར་ཕེབས་པར་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 10 ཚེས 19 རེས་གཟའ་སྤེན་པ་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། འདི་ནས་ང་དང་གླེང་མོལ་བྱ།
གཙོ་ངོས།
སློབ་གསོ།
ཆོས་ལུགས།
ཀུན་འདུས།
རྩོམ་རིག
དམངས་སྲོལ།
རྒྱུན་ཤེས།
ལོ་རྒྱུས།
མི་སྣ།
ཐོན་མི།
སྐད་འཇོག་ས།
ཕྱོགས་སྟོན། གཙོ་ངོས།» མི་སྣ།» བོད་ཀྱི་དེང་རབས་མི་སྣ། »བོད་ཀྱི་རྡུང་ལེན་པ་བདུད་བྷེ་ལགས་རྗེས་དྲན་རྩོམ་ཡིག
བོད་ཀྱི་རྡུང་ལེན་པ་བདུད་བྷེ་ལགས་རྗེས་དྲན་རྩོམ་ཡིག
རྩོམ་སྒྲིག་པ།  ཨ་བུ་འབྲོང་། སྤེལ་དུས 2016-03-03ལྟ་ཀློག (4754)རྩོམ་ཁུངས: ངེད་དྲ་བ།པར་འདེབ།

བོད་མི་རིགས་ཀྱིས་ནམ་ཡང་བརྗེད་དུ་མེད་པའི་དབྱངས་ཀྱི་རྡོ་རིང་།

     སྤྱི་ལོ་༢༠༡༦ལོའི་ཟླ་༢པའི་ཚེས་༢༧ཉིན་ནི་ང་ཚོས་དུས་ནམ་ཡང་བརྗེད་པར་མི་འོས་ཏེ་དེ་ནི་བོད་ཀྱི་རྡུང་ལེན་སྒྱུ་རྩལ་བ་ཆེན་མོ་གངས་ལྗོངས་ཁུ་བྱུག་སྔོན་མོ་མཆོག་དགོངས་པ་རྫོགས་པའི་ཉིན་མོ་ཡིན། དེ་ནི་བོད་གངས་རིའི་ལྗོངས་ཀྱི་ཁེར་རྐྱང་གི་གཞས་པ་དམ་པ་ཁྲོ་ཁོའི་བདུད་འདུལ་རྡོ་རྗེ་མཆོག་མི་ཡུལ་འདི་དང་གཏན་དུ་བྲལ་བའི་ཉིན་མོ་ཡིན། དེ་ནི་བོད་གངས་ཅན་གྱི་གླུ་གར་རིག་གནས་ལ་བསམ་དུ་མེད་པའི་གྱོང་གུད་ཐེབས་པའི་ཉིན་མོ་ཡིན།

  ད་ནས་བཟུང་ཉི་མ་འདི་སླེབས་དུས་ང་ཚོས་ཅི་ཞིག་བྱའམ། ང་ཚོས་ཇི་ལྟར་བྱས་ཏེ་ཁོང་གིས་བོད་མི་རིགས་ཀྱི་སྣོད་བཅུད་ཡོད་ཚད་ལ་བཅངས་པའི་ལྷག་བསམ་དང་རེ་བ། བརྩེ་སེམས་དང་དད་མོས་སོགས་དྲན་པར་བྱ་འོས། འདི་ནི་བོད་མི་ཡོད་ཚད་དང་ལྷག་ཏུ་བོད་ཀྱིགཞས་པ་གཞས་མ་རྣམས་ཀྱིས་བསམ་བློ་གཏང་དགོས་པའི་གནས་ཤིག་གོ །
  གཤམ་དུ་ངེད་ཀྱི་དྲ་བས་ཁོང་ཉིད་ཀྱིས་བོད་ཀྱི་གླུ་གར་རིག་གནས་ལ་བཞག་པའི་བྱས་རྗེས་རྗེས་སུ་དྲན་ཕྱིར་རྩོམ་ལུས་མི་འདྲ་བ་གསུམ་གྱི་ལམ་ནས་བྲིས་པའི་མྱ་ངན་ཞུ་ཚིག་ཙམ་གསུམ་དགོད་པར་བྱའོ། །

 བོད་ཀྱི་རྡུང་ལེན་སྒྱུ་རྩལ་དང་བདུད་བྷེ་གླེང་ཚུལ། 

              གྱི་ལིང་འཇིགས་མེད།

 ད་ལྟ་བདུད་བྷེ་ཞེས་གླེང་ན་དེ་ནི་རྡུང་ལེན་སྒྱུ་རྩལ་དང་ཐད་ཀར་འབྲེལ་བ་ཟབ་པའི་བརྡ་ཆད་ཅིག་ཏུ་གྱུར་ཡོད། དེ་བས་ང་ཚོས་སྒྱུ་རྩལ་མི་སྣ་འདིས་ཚེའི་འདུ་བྱེད་བཏང་བ་ནི་རྡུང་ལེན་སྒྱུ་རྩལ་གྱི་ངོས་ནས་གྱོང་གུད་ཞིག་ཏུ་ངོས་འཛིན་མི་བྱེད་ཐབས་མེད་དུ་གྱུར་ཡོད་ལ། དུས་མཚུངས་སུ་༼曼陀林༽རྨ་ཐུང་ལེན་༼འདི་ནི་ངས་བབ་ཅོལ་དུ་སྒྲ་སྒྱུར་བྱས་པ་ཡིན།༽རོལ་ཆས་དང་བོད་ཀྱི་རོལ་ཆས་རིག་གནས་བར་གྱི་འབྲེལ་བའི་གནད་དོན་ལའང་བསམ་བློ་ཞིག་མི་གཏོང་ག་མེད་ཡིན།    

 མང་བོ་ཞིག་གི་སེམས་སུ་ང་ཚོའི་བོད་ཀྱི་རྡུང་ལེན་རོལ་ཆས་ནི་ངེས་པར་དུ་མངའ་རིས་སྒྲ་སྙན་ཡིན་འོས་ལ་རྨ་ཐུང་ལེན་ནི་མི་རིགས་གཞན་གྱི་རོལ་ཆས་ཡིན་པས་མི་ལེགས་ཟེར་ཞིང་། མདོ་སྨད་ནས་རྡུང་ལེན་འགྲན་ཚོགས་འགའི་སྐབས་སུའང་རོལ་ཆས་ཀྱི་ཐད་ནས་ངེས་པར་དུ་མངའ་རིས་སྒྲ་སྙན་འཛིན་དགོས་པའི་ཆ་རྐྱེན་འདོན་གྱིན་འདུག 

 ཆ་རྐྱེན་འདི་ནི་ཅུང་ཚད་ལས་བརྒལ་བ་ཞིག་དང་། རྡུང་ལེན་པ་གྲགས་ཅན་བདུད་བྷེ་ལགས་ཀྱི་ཐུན་མོང་མ་ཡིན་པའི་སྒྱུ་རྩལ་ལ་དང་ལེན་མི་བྱེད་པའི་རྣམ་འགྱུར་སྟོན་སྟངས་ཤིག་རེད། དེ་བས་བདུད་བྷེའི་རྡུང་ལེན་སྒྱུ་རྩལ་གྱི་ཆ་ནས་འདས་པོ་ཁོང་ལ་རྗེས་དྲན་དང་མྱ་ངན་ཞུ་ན་ངེས་པར་དུ་ཁོང་གི་རོལ་ཆས་འདི་གནད་དོན་གཙོ་བོ་ཞིག་ཏུ་བཟུང་ནས་གླེང་འོས་པར་སྙམ།     

 དེ་ནས་བདུད་བྷེའི་དབྱངས་རྟ་དང་དེ་ལ་འདྲེས་པའི་བརྩེ་དུང་གླེང་འོས་ལ། དེ་ནི་ཕྱི་རབས་རྡུང་ལེན་པ་དག་གི་སློབ་དེབ་ཏུ་གྲུབ་ཡོད།   ཁོང་གི་སྐད་ངག་དང་གདངས། འགྱུར་ཁུགས་སོགས་ཀྱིས་ཁོང་གི་རྡུང་ལེན་སྒྱུ་རྩལ་གྲུབ་པ་ཡིན་པས་སློབ་སྦྱོང་དང་ཞིབ་འཇུག་གི་གནས་སུ་གྲུབ་ཡོད་ལ། ཁོང་གི་རིན་ཐང་མཚོན་པའི་ཤུལ་བཞག་ཏུའང་གྱུར་ཡོད།    

  དེ་བས་བདུད་བྷེ་དང་བོད་ཀྱི་རྡུང་ལེན་སྒྱུ་རྩལ་གཉིས་ལས་ཐུག་ལམ་ཐུག་གི་ལམ་འགྲོ་བ་ཙམ་གྱི་ཚད་ནས་མ་བཞག་པར་བདུད་བྷེས་རང་གི་གྲུབ་འབྲས་ཀྱི་ཆེད་དུ་ཅི་ཞིག་བློས་བཏང་བ་སོགས་ལོ་རྒྱུས་ཀྱི་རྒྱབ་ལྗོངས་ཟིན་ཐོར་བཀོད་དེ། སྒྱུ་རྩལ་གྱི་ལམ་བུ་འདི་སྔར་ལས་ཇེ་ལེགས་སུ་གཏོང་ཐུབ་ན་བདུད་བྷེ་ནི་ཤི་ཡང་གསོན་པ་ལས་ལྷག་པའི་མཛད་རྗེས་མི་ཡུལ་དུ་མངོན་པ་རེད། 

 དེ་མ་གཏོགས་མང་བོ་ཞིག་གིས་དྲ་ལམ་ནས་སྙན་ངག་རེ་འབྲི་བའམ། ཁོང་གི་འདྲ་པར་འགོད་པ། ད་དུང་ཁོང་གི་རྡུང་ལེན་རེ་དྲ་ལམ་དུ་བཀོད་པ་ཙམ་གྱིས་གནས་སྐབས་ཀྱི་སེམས་ཚོར་ཙམ་མཚོན་པ་ལས་ཁོང་གི་མཛད་རྗེས་གསལ་དུ་གཏོང་མི་ཐུབ་ལ། རིན་ཐང་ནི་དེ་བས་ཀྱང་བསྔོག་མི་ཐུབ་པས། ཁོང་ལ་ཆ་རྒྱུས་ཡོད་པ་དང་། རྡུང་ལེན་སྒྱུ་རྩལ་ལ་འདྲིས་ཆ་ཡོད་པའི་རྡུང་ལེན་པ་དང་ཆེད་ལས་མཁས་པ་ཚང་མས་ཕན་ཚུན་མཉམ་འབྲེལ་གྱིས་བདུད་བྷེ་དང་བོད་ཀྱི་རྡུང་ལེན་སྒྱུ་རྩལ་བར་རྡོ་རིང་གསར་བ་ཞིག་འཛུགས་པར་རེ་འབོད་ཞུས་པ་ཡིན།༼འོན་ཀྱང་ཉིན་འདི་དག་ལ་འདས་པོའི་རྗེས་སུ་དགེ་རྩ་བསྒྲུབས་ཤིང་བསྔོ་སྨོན་རེ་བྱེད་ཐུབ་ན་དེའང་མི་རིགས་འདིའི་གོམས་སྲོལ་ཡིན་ལ་འདས་པོར་ཡང་དེ་ལས་ལྷག་པའི་ཕན་པ་གཞན་མེད་པར་ཧ་ཅང་ལེགས་པར་སྙམ།༽    

 སྤྱིར་དེ་རིང་གྲོགས་ལྷོ་ཉི་གཞོན་ལགས་ཀྱིས་གུས་པ་ཚོགས་པ་འདིར་ཆེད་དུ་བོས་ཏེ་སྐད་ཆ་རེ་བཤད་དགོས་ཟེར་མོད། འོན་ཀྱང་དངོས་གནས་བྲེལ་བ་ཆེ་ཞིང་སྐད་ཆ་བཤད་པར་སྟབས་མི་བདེ་བས་འདི་ལྟར་རང་གི་དྲན་ཚུལ་འགའ་ཡི་གེར་བྲིས་ཏེ་ཕུལ་བ་ལགས།   

                             ཞེས་ཆུང་དུས་ནས་བདུད་བྷེའི་གླུ་སྐད་ཀྱི་ཁྲོད་ནས་ནར་སོན་པ་གྱི་ལིང་འཇིགས་མེད་ཀྱིས་གནའ་བོའི་གྱི་ཐང་མཁར་ནས་འཕྲལ་དུ་བྲིས།
                                                                                                                         2016-3-2ཉིན་གུང་།

 

སེམས་པ་ངུས་པའི་དབྱངས།              

                            ———རྡུང་ལེན་མཁན་པོ་བདུད་པེ་ལ་མྱ་ངན་ཞུ།                                     

         —རྒོ•ཚེ་རིང་སྐྱབས།

ཉེ་སྔོན་ཞིག་ལ་ཚུར་དགའ་ཡིན་པ་ཐོས། །

མདང་ནུབ་གློ་བུར་གཅིག་པུར་བཞུད་པ་གོ །

བདེན་ནམ་བདེན་ནམ་གཏམ་ངན་འདི་བདེན་ནམ། །

ཤེས་བཞིན་ལྡོག་འདྲི་འདི་ཡིས་རང་སེམས་གསོས། །

 

གནམ་ས་ཕྱེས་པའི་ངག་གི་རྡོ་རིང་ཞིག།།

ཉི་ཟླ་ཁུར་བའི་དབྱངས་ཀྱི་གཤོག་པ་ཞིག།།

སྣོད་བཅུད་སྒུལ་བའི་གླུ་ཡི་རྣལ་འབྱོར་བ། །

བཞུད་པ་སྔ་སོང་བརྩེ་ལྡན་གངས་ཀྱི་བུ། །

 

ཆུང་ནས་འདྲིས་ཤིང་གོམས་པའི་གླུ་སྐད་ཅིག།།

ཚེ་གང་སུན་པ་མེད་པའི་གླུ་སྐད་ཅིག།།

འུ་ཚོའི་རྩེད་ར་རྩེད་རྡོ་དྲན་བྱེད་དང་། །

སྐྱིད་སྡུག་ལོ་ཟླར་དྲན་ཤིང་འཇོག་བྱེད་ཡིན། །

 

བདག་གི་འཚོ་བ་ཁྱེད་ཀྱི་གླུ་སྐད་ཡིན། །

ཁྱེད་ཀྱི་གླུ་སྐད་བདག་གི་འཚོ་བ་ཡིན། །

བདག་ནི་ཁྱེད་ཀྱི་གླུ་ལ་དགའ་བ་དེ། །

མཛད་པ་མཐའ་དང་བྲལ་བའི་ལོངས་སྤྱོད་ཡིན། །

 

ངག་གི་དཔལ་ལ་ཉི་ཟླ་སྐར་གསུམ་ཤར། །

དབྱངས་ཀྱི་བཅུད་ལ་རི་ཆུ་ནགས་གསུམ་འཁོར། །

མི་གཤིས་གཡང་ལ་མར་རྩམ་འོ་དྲི་ཆགས། །

ཁྱེད་རང་བཞུད་པས་གངས་རི་ཁེར་རྐྱང་ཡིན། །

 

སྐད་ངག་གང་དེས་ང་ཚོ་བཀྱགས་ནས་ཡོད། །

གདངས་དབྱངས་གང་དེས་ང་ཚོ་སྦྲེལ་ནས་ཡོད། །

སྨྲ་ལྕེ་གང་དེས་ང་ཚོ་བཟུང་ནས་ཡོད། །

བསམས་ཤིང་དྲན་ནོ་འོ་མས་གསོས་བའི་བུ། །

 

དྲོད་འཇམ་ཉི་མ་ཤར་ན་ཁྱེད་རང་དྲན། །

གླུ་ཡི་ནང་ན་དགའ་སྐྱིད་ཉི་འོད་ཡོད། །

བསིལ་འཇམ་ཟླ་བ་ཚེས་ན་ཁྱེད་རང་དྲན། །

དབྱངས་ཀྱི་ཁུགས་ན་སྐྱོ་གདུང་ཟླ་འོད་ཡོད། །

 

གླུ་བ་ཁྱེད་ནི་སེང་གེ་དཀར་མོ་འདྲ། །

ལན་བུ་སུལ་སུལ་གཡུ་རལ་སྔོན་མོ་ཡིན། །

དུས་ཀྱི་གད་རྒྱངས་ལན་གཅིག་བསྒྲགས་པ་དེས། །

སྤོབས་པའི་གངས་རི་གནམ་གྱི་ཀ་བར་བསླངས། །

 

སྣོད་བཅུད་གླུ་ཡིས་བསྟོད་ན་ཁྱེད་འདྲ་མེད། །

བདེ་སྡུག་དབྱངས་སུ་བཀུག་ན་ཁྱེད་འདྲ་མེད། །

ད་ནི་དྲི་ཟའི་གདངས་ཤིག་འགག་པ་ཡིས། །

སྟོད་ཀྱི་གངས་རི་དེ་ཡང་ཤུམ་ཤུམ་ངུ་། །

 

སྐྱེ་འཆི་གཉིས་ཀ་འཁོར་བའི་རང་བཞིན་ཡིན། །

ཆོས་ཉིད་འདི་ལ་ལྡོག་ཏུ་མེད་མོད་ཀྱང་། །

ཕོ་ལོ་ཞེ་དགུ་མ་རྒས་མ་གཞོན་ཡིན། །

འུ་ཅག་རྣམས་ནི་བསྐལ་བ་དམན་པས་སྐྱོ། །

 

་ནི་བཞུད་ཅིག་བཞུད་ཅིག་ཚངས་པའི་སྲས། །

དབྱངས་ཅན་ངག་གི་ལྷ་མོའི་བསུ་བ་ཡོད། །

ཨ་མས་ཁྱེད་ལ་མ་ཎི་ཚར་གཅིག་བགྲངས། །

ངས་ཀྱང་ཁྱེད་ལ་མཆོད་མེ་ཀོང་གཅིག་བསྒྲོན།།

 

རུས་པའི་རྐང་ལ་འཐིམ་པའི་བག་ཆགས་དང་། །

ཁྲག་གི་ནང་ན་རྒྱུ་བའི་གླུ་སྐད་དེར། །

འཆི་བའི་ནང་མོའང་ལན་གཅིག་ཉན་པར་ངེས། །

དེ་ཡང་ཁྱེད་ལ་དད་པའི་མཚོན་བྱེད་ཡིན། །          

 ཞེས་པའི་ཚིགས་བཅད་སྙན་ངག་ཡིན་ནོ་ལོ་འདི་ནི་ད་བར་དུ་གླུ་བ་བདུད་པེའི་གླུ་སྐད་ལ་ཉན་ནས་རང་སེམས་གསོས་མྱོང་བའི།
སའི་གོ་ལའི་མི་སེར་རམ། རྒོ•ཚེ་རིང་སྐྱབས་ཀྱིས་མྱ་ངན་གྱི་ཚུལ་དུ་2016-2-28ཀྱི་ཞོགས་པར་ཤར་མར་བྲིས།

 སྙན་དབྱངས་ཀྱི་ནམ་མཁའ།

བདུད་བྷེ།      བདུད་འདུལ་རྡོ་རྗེ།     གངས་ལྗོངས་ཀྱི་ཁུ་བྱུག

བོད་ཡུལ་ལུང་པར་བཞད་པའི་མཛེས་པའི་མེ་ཏོག་རྐང་གཅིག

སྦྲ་ནག་དང་ལུག་ཁྱུར་དུངས་པའི་འབྲོག་པ

རྫི་གླུ་སྙན་མོ་སྤང་ལ་མཆེད་པའི་ལོ་རབས

བདུད་བྷེ་ངོ་ཤེས་ཤིང་བདུད་བྷེར་དགའ་བའི་མི་རབས

ང་དང་ཁྱོད་ཀྱི་འཚོ་བ་དང་སེམས་ཁམས་སྐྱོང་རོགས

ཁྱེད་ཀྱི་གླུ་སྐད་ནི་བོད་མིའི་སེམས་དང་རང་བྱུང་ཁམས་ལ་འཐིམ་ཡོད

 

མདང་ནུབ་ཁྱེད་ཉིད་གངས་ཀྱི་ལུང་པ་ནས་བཞུད་སོང་སྐད

ང་དང་ང་འདྲ་བ་ཁྲི་ཕྲག་མང་བོས་ཁྱེད་ལ་མ་ཎི་བགྲང

མཆོད་མེ་སྒྲོན།  སེམས་ཀྱིས་མྱ་ངན་ཞུས།

ཁྱེད་ཀྱིས་བླངས་པའི་རྡུང་ལེན་རེར་ཉན་ཙམ་ཉན་ཙམ་བྱས

ཉན་གྱིན་ཉན་གྱིན་མིག་མཐའ་མཆི་མའི་དགང་ཡོང

མགྲིན་པ་བརྣངས་པར་བྱས་ཡོང

གངས་ལྗོངས་ཀྱི་གླུ་བ

ཁྱེད་རང་གཤེགས་སོང་བས་སེམས་པ་ཕངས་པས་མནར

 

ཁྱེད་ཀྱི་སྙན་དབྱངས་ཀྱི་ནམ་མཁའ་ང་ཚོར་བཞག་ཡོད

ནམ་མཁའ་ཆེན་པོ་དེ་ནམ་ཡང་ང་ཚོར་དབང

ནམ་མཁའ་དེ་ནས་ང་ཚོས་བྱིས་དུས་དྲན་ཆོག

ནམ་མཁའ་དེ་རུ་ང་ཚོས་འཚོ་བ་དྲན་ཆོག

ཆེས་གཉུག་མར་གྲུབ་པའི་སྤང་ཐང་ཆེན་པོ་དྲན་ཆོག

ཨ་ཕའི་རྫི་གླུ་དང་ཨ་མའི་བཞོ་དབྱངས་དྲན་ཆོག

ད་དུང་འབྲོག་སྡེ་ཆེན་པོ་སོགས་མང་པོ་མང་པོ་ཞིག་དྲན་ངེས


འབྲོག་པ་དང་དེའི་འཚོ་བ་ཁྱོད་དང་འབྲལ་ཐབས་མེད

འབྲོག་མོ་དང་དེའི་དགའ་སྐྱོ་ཁྱེད་དང་ལྷན་དུ་ཡོད

ཁྱེད་འབྲོག་པ་དང་བོད་པའི་སེམས་ཀྱི་དཀྱིལ་ན་ཡོད

ཁྱེད་ཀྱི་སྙན་དབྱངས་ཀྱིས་ང་ཚོར་ཅི་ཡང་སྦྱིན་ནུས

ཁྱེད་ནི་བསྐལ་བའི་བར་ནུབ་པ་མེད་པའི་བོད་མིའི་སེམས་ངོགས་ཀྱི་རྡོ་རིང་དེ་ཡིན

ཁྱེད་ནི་མི་རབས་ཤིག་གི་སེམས་ཁམས

ལོ་རབས་ཤིག་གི་དཔའ་བོ

དུས་རབས་ཤིག་གི་སྒྱུ་རྩལ་གྱི་མེས་པོའང་ཡིན

 

ཁྱེད་བཞུད་སོང་ཡང

ཁྱེད་ཀྱི་སྙན་དབྱངས་རེ་རེ་མི་སེམས་སུ་གསོན་པོར་གནས་ཡོད

ཁྱེད་རང་བདེ་བར་བཞུད་རོགས

ལྷ་ཆེན་པོས་ཁྱེད་ལ་ལམ་འཇུག་བྱེད་ངེས

མི་མང་བོས་ཁྱེད་ལ་འབོད་པ་གཏོང་ངེས

ཁྱེད་ནམ་ཡང་ང་ཚོ་དང་མཉམ་དུ་ཡོད

ཁྱེད་རང་བདེ་བ་ཅན་དུ་སྐྱེ་བར་ཤོག

ཨོཾ་མ་ཎི་པདྨེ་ཧཱུྃ།   ཨོཾ་མ་ཎི་པདྨེ་ཧཱུྃ།   ཨོཾ་མ་ཎི་པདྨེ་ཧཱུྃ།

༼ གངས་ལྗོངས་ཀྱི་གླུ་བ་བདུད་བྷེའི་དགོངས་རྫོགས་ལ་བྲིས། ༽                         

 རྨ་ཆུ།  ཞི་དུལ་རྟོགས་སད།                      

  ༢༠༡༦   •   ༢   •   ༢༨ཉིན།


དྲ་རྒྱ་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། འོད་ཟེར་བཟང་བོ། སྦྲ་ནག་འཇིགས་མེད་རྡོ་རྗེ། འབའ་སྣང་གྲོལ། བན་ཤུལ་འཇམ་དབྱངས།
འདྲེན་བཀོལ:
61.4K

  དཔྱད་གཏམ ( 1 )ཡོད།
དཔྱད་གཏམ་སྤེལ་ས།
སྤེལ་མཁན། བཤེར་གྲངས། yvn2 བཤེར་གྲངས་ཁ་སྐོང་བྱོས།ཡིག་འབྲི་བཞི་ལས་མང་མི་རུང་།ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་།ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།      
 
  བོད་ཀྱི་རྡུང་ལེན་པ་བདུད་བྷེ་ལགས་རྗེས་དྲན་རྩོམ་ཡིག   སྤེལ་མཁན།: སྦྲ་སར་ཚེ་རིང་བསམ་འགྲུབ། སྤེལ་དུས:2016/3/5
གངས་ལྗོངས་ཀྱི་ཁུ་བྱུག་སྔོན་མོ་ལགས།  ཁྱེད་ཀྱིས་ཁ་བ་ཅན་གྱི་སྣོད་བཅུད་ལ་བཅངས་པའི་དད་མོས་དང་བརྩེ་སེམས།   ལ་རྒྱ་དང་སྙིང་སྟོབས་རྣམས།  ཁྱེད་ཀྱི་ལྷད་མེད་ཀྱི་གླུ་དབྱངས་རེ་དང་ལྷན་དུ་འཛམ་གླིང་གི་ཡང་རྩེ་འདི་ན་ནུབ་མེད་དུ་འབར་ངེས་ཡིན།🙏🙏🙏
tretinoin corladjunin.org.pe cipro pill
viagra online coupon link free viagra samples coupon
  པར་ངོས1/1 པར་ཡོད།
ལྟ་ཀློག་གྲངས་ཀ
5861461
 
འབྲེལ་གཏུག་བྱ་ཡུལ།    ཁ་པར།  15283703999    E-mail:www.jmjzjy@126.com
པར་དབང་རྭ་རྒྱ་ཤེས་རིག་ནོར་བུའི་སློབ་གླིང་ལ་དབང་།
网站备案号:青ICP备15000002号 青公网安备 63262102000011号