ཇོ་བོ་རྗེའི་བསྟོད་པ་སུམ་ཅུ་བ།
འབྲོམ་སྟོན་པ་རྒྱལ་བའི་འབྱུང་གནས།
ཨོཾ་བདེ་ལེགས་སུ་གྱུར་ཅིག
ཕུན་སུམ་ཚོགས་པ་བྷཾ་ག་ལ་ཡི་ཡུལ།།
ཆོ་རིགས་བཙུན་པ་ཟ་ཧོར་རྒྱལ་པོའི་རིགས།།
བྱང་ཆུབ་སེམས་དཔའ་ཞི་འཚོ་འཁྲུངས་པའི་རྒྱུད།།
མར་མེ་མཛད་པའི་ཞབས་ལ་གསོལ་བ་འདེབས།།
ཡབ་དང་ཡུམ་ལ་སྲི་ཞུ་མཁས་ཤིང་གུས།།
གཟུགས་མཛེས་ཡིད་འོང་ཤེས་རབ་སྙིང་རྩེར་ལྡན།།
དུལ་ཞིང་རྒྱུད་འཇམ་ཐབས་མཁས་སྙིང་སྟོབས་ཆེ།།
མར་མེ་མཛད་པའི་ཞབས་ལ་གསོལ་བ་འདེབས།།
འཇིག་རྟེན་ལུགས་ཀྱི་བསྟན་བཅོས་ཐམས་ཅད་དང་།།
བཟོ་དང་གསོ་བ་སྒྱུ་རྩལ་སྣ་ཚོགས་དང་།།
རིག་བྱེད་ཀུན་ལ་མཁས་ཤིང་མཁྱེན་པ་རྒྱས།།
མར་མེ་མཛད་པའི་ཞབས་ལ་གསོལ་བ་འདེབས།།
འདོད་པའི་ཡོན་ཏན་རྣམས་ལ་མ་ཆགས་ཤིང་།།
རྒྱལ་སྲིད་འབྱོར་བ་ཕུན་ཚོགས་སྤངས་ནས་ནི།།
དགེ་འདུན་ཕལ་ཆེན་སྡེ་བའི་དགེ་སློང་མཛད།།
དཔལ་ལྡན་ཨ་ཏི་ཤ་ལ་གསོལ་བ་འདེབས།།
འདུལ་བའི་སྡེ་སྣོད་སྡེ་བཞི་ལེགས་གསུངས་པའི།།
བདེ་བར་གཤེགས་པའི་བསླབ་པ་བཅས་པ་ལ།།
ཉེས་པའི་སྐྱོན་གྱིས་མ་གོས་རྣམ་པར་དག
།
དཔལ་ལྡན་ཨ་ཏི་ཤ་ལ་གསོལ་བ་འདེབས།།
ཡོངས་སུ་འཛིན་པའི་མཁས་པ་མང་བསྟེན་ཅིང་།།
སྡེ་སྣོད་གསུམ་དང་སྒྲ་དང་ཚད་མ་དང་།།
མན་ངག་ཀུན་ལ་མཁས་ཤིང་མཁྱེན་པ་རྒྱས།།
དཔལ་ལྡན་ཨ་ཏི་ཤ་ལ་གསོལ་བ་འདེབས།།
གསེར་གླིང་རྒྱལ་པོ་ས་སྐྱོང་བླ་མ་ལས།།
བྱང་ཆུབ་སེམས་ཀྱི་བདུད་རྩིའི་སྨན་བླངས་ནས།།
འགྲོ་བ་ཀུན་ལ་ཕན་པར་མཛད་པ་ཡི།།
དཔལ་ལྡན་ཨ་ཏི་ཤ་ལ་གསོལ་བ་འདེབས།།
སེམས་ཅན་ཕོངས་ཤིང་ཤུན་ཏུ་སྡུག་བསྔལ་བ།།
རབ་ཏུ་མང་ལ་སྙིང་ནས་བརྩེ་བ་ཡིས།།
འཇིག་རྟེན་ལྷ་དང་ལྷ་མིན་བཅས་པ་ཡི།།
སྐྱོབ་པ་ཡབ་གཅིག་པུ་ལ་གསོལ་བ་འདེབས།།
གྲུབ་པ་བརྙེས་པའི་བླ་མ་དམ་པ་ལས།།
ཡི་དམ་ལྷ་ཡི་མངོན་རྟགས་ལུང་མནོས་ནས།།
རྩེ་གཅིག་སྒྲུབ་པ་སྙིང་བོར་མཛད་པ་ཡིས།།
ལུང་བསྟན་ཐོབ་པར་གྱུར་ལ་གསོལ་བ་འདེབས།།
གདུལ་བྱ་བོད་དུ་ཡོད་པར་དགོངས་ནས་ནི།།
ཁ་བ་ཅན་གྱི་ལྗོངས་སུ་བྱོན་ནས་ཀྱང་།།
སྡེ་བ་མི་ཆེན་རྣམས་ཀྱི་བླ་མ་མཛད།།
མཆོད་ཅིང་བཀུར་འོས་ཁྱོད་ལ་གསོལ་བ་འདེབས།།
མཁས་མཆོག་ཁྱོད་སྐུ་བོད་དུ་མ་བྱོན་ན།།
སངས་རྒྱས་བསྟན་པ་ཡོད་པར་གྱུར་ཀྱང་ནི།།
ཟབ་མོའི་དོན་ལ་ཕལ་ཆེར་རྨོངས་གྱུར་པས།།
ལེགས་པར་སྟོན་མཛད་ཁྱོད་ལ་གསོལ་བ་འདེབས།།
བསྟན་བཅོས་སྒྱུར་དང་བསྒྱུར་ཟིན་འཆོས་པ་དང་།།
དེ་ཉིད་འཆད་དང་རང་གིས་རྩོམ་པ་སོགས།།
ཡང་དག་ལམ་ལ་ལེགས་པར་འཁྲིད་མཛད་པའི།།
བསྟན་པ་རྒྱས་མཛད་ཁྱོད་ལ་གསོལ་བ་འདེབས།།
ལྟ་ངན་ལ་ཞེན་ལོག་པའི་ལམ་ལ་ཞུགས།།
བདུད་དང་མུ་སྟེགས་དབང་ཕྱུག་གྲུབ་མཐའ་ངན།།
རིགས་པས་ཚར་བཅད་ཐར་བའི་ལམ་ལ་བཀོད།།
ཐར་འདོད་དེད་དཔོན་ཁྱེད་ལ་གསོལ་བ་འདེབས།།
སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་།།
བསམ་གཏན་ཤེས་རབ་ཕ་རོལ་ཕྱིན་པ་དྲུག
།
སྐྱེ་བ་དུ་མར་ཡང་ཡང་གོམས་པ་ཡིས།།
ཚོགས་གཉིས་ཡོངས་སུ་རྫོགས་ལ་གསོལ་བ་འདེབས།།
མཁོ་བ་སྦྱིན་དང་སྙན་པར་སྨྲ་བ་དང་།།
འཇིག་རྟེན་དོན་མཐུན་གདུལ་བྱའི་དོན་ལ་སྤྱོད།།
བསྡུ་བའི་དངོས་པོ་བཞི་ཡི་དཔལ་འབྱོར་གྱིས།།
གཞན་དོན་ལྷུར་མཛད་ཁྱོད་ལ་གསོལ་བ་འདེབས།།
དད་དང་ཚུལ་ཁྲིམས་ཐོས་དང་གཏོང་བ་དང་།།
ངོ་ཚ་ཤེས་དང་ཁྲེལ་ཡོད་ཤེས་རབ་དང་།།
ནོར་བདུན་དག་གིས་ཕྱུག་པར་གྱུར་བའི་མཛོད།།
ཡོན་ཏན་འབྱུང་གནས་ཁྱོད་ལ་གསོལ་བ་འདེབས།།
སྔོན་ཚེ་སྨོན་ལམ་བཏབ་པའི་སློབ་མ་མཆོག
།
རྒྱལ་བའི་འབྱུང་གནས་རིང་ནས་འོང་བའི་ཚེ།།
ཨུ་བ་སི་ཀ་དེ་རིང་སླེབ་བོ་ཞེས།།
ལྷ་མིག་མངོན་ཤེས་མངའ་ལ་གསོལ་བ་འདེབས།།
མ་ག་ངྷ་ནས་སློབ་མ་གུས་པ་ཡིས།།
སིལ་སྙན་དཀྲོལ་ཞིང་གསོལ་བ་བཏབ་པའི་སྐད།།
བོད་དུ་གནས་ནས་འབྲོམ་ལ་སྦྲན་པ་ཡིས།།
རྣ་བའི་མངོན་ཤེས་མངའ་ལ་གསོལ་བ་འདེབས།།
ལྷ་སར་ལྷ་ཡི་རོལ་མོ་བསྒྲགས་པ་ལས།།
མྱུར་བར་བྱོན་ནས་བར་ཁང་ལྷ་ཚོགས་ལ།།
ཕྱག་རྟེན་ཕུལ་ནས་མཁའ་ལ་བསྐོར་བ་མཛད།།
རྫུལ་འཕྲུལ་མངོན་ཤེས་མངོན་ལ་གསོལ་བ་འདེབས།།
གང་དུ་རྒྱལ་པོས་བཀའ་ཆེམས་གཏེར་དུ་སྦས།།
མཁའ་འགྲོས་གཏེར་ཁ་ཕྱེ་ནས་ཁྱོད་ལ་གཏད།།
ཤཱཀྱ་མུ་ནིའི་འཇའ་ས་ཁྱོད་ཀྱི་དྲིན།།
ཇོ་བོ་བཀའ་དྲིན་ཅན་ལ་གསོལ་བ་འདེབས།།
ས་བདག་ནད་ཀྱིས་ཟིན་པའི་མི་རྣམས་ལ།།
རྟག་པར་ཚེ་འཛིན་བསྲུང་བའི་སྐོར་རྣམས་ཀྱང་།།
ཁྱོད་ལས་བྱུང་སྟེ་འགྲོ་བའི་ནད་གསོ་མཛད།།
ཀླུ་སྒྲུབ་གཉིས་པར་གྲགས་ལ་གསོལ་བ་འདེབས།།
སྙེ་ཐང་འོར་དུ་བྱེ་མའི་སྟེང་བཞུགས་ཚེ།།
བརྒྱ་བྱིན་ལ་སོགས་བར་སྣང་ལྷ་རྣམས་ཀྱིས།།
རིན་ཆེན་སྣ་ལྔའི་མེ་ཏོག་ཆར་བ་ཕབ།།
བླ་མ་ལྷ་ཡི་ལྷ་ལ་གསོལ་བ་འདེབས།།
གཡོར་བོ་མཆིམས་ཕུར་བུ་མོས་མགོ་རྒྱན་ཕུལ།།
ཤི་བ་གསན་ནས་དེ་ཡི་སྒྲུབ་སྦྱོང་མཛད།།
རིགས་ཀྱི་བུ་མོ་ལྷ་རུ་སྐྱེས་ཞེས་གསུངས།།
འགྲོ་བའི་འདྲེན་པ་ཁྱོད་ལ་གསོལ་བ་འདེབས།།
ཁོ་བོ་འདི་ནས་དགའ་ལྡན་གནས་སུ་འགྲོ།།
ང་ལ་དད་ཅིང་གུས་པར་བྱེད་པ་རྣམས།།
དགའ་ལྡན་གནས་སུ་མཇལ་བར་འགྱུར་ཞེས་གསུངས།།
མ་འོངས་མངོན་སུམ་གཟིགས་ལ་གསོལ་བ་འདེབས།།
དགའ་ལྡན་གནས་ན་ནམ་མཁའ་དྲི་མ་མེད།།
འཕགས་པའི་ཡུལ་ན་དཱི་བཾ་ཀ་ར་ཞེས།།
ཁ་བ་ཅན་ན་དཔལ་ལྡན་ཨ་ཏི་ཤ།།
ས་སྟེང་གྲགས་པས་ཁྱབ་ལ་གསོལ་བ་འདེབས།།
འབྲོམ་སྟོན་བདག་གིས་རྭ་སྒྲེང་ལྷ་ཁང་བཞེངས།།
འགྲོ་བ་འདྲེན་ཕྱིར་གསོལ་བ་བཏབ་པ་ལས།།
དགའ་ལྡན་གནས་ནས་རབ་གནས་མེ་ཏོག་གཏོར།།
བྱིན་རླབས་དངོས་སུ་ཕབ་ལ་གསོལ་བ་འདེབས།།
ཁྱོད་ཀྱི་ཡོན་ཏན་མཐོང་དང་ཐོས་པ་དང་།།
དང་བའི་ཡིད་ཀྱིས་ལྷང་ལྷང་གསོལ་འདེབས་ན།།
དགའ་ལྡན་གནས་ནས་ཐུགས་རྗེས་གཟིགས་མཛོད་ལ།།
གསོལ་བ་བཏབ་བཞིན་བྱིན་གྱིས་རླབས་ཏུ་གསོལ།།
ད་དུང་ཁ་བ་ཅན་ན་ཁྱོད་ཉིད་ལ།།
དད་ཅིང་རྗེས་སུ་སློབ་མ་མང་མོད་ཀྱི།།
ཐུགས་ལ་དགོངས་ནས་བུ་ལ་མ་བཞིན་དུ།།
བརྩེ་བའི་བདག་གི་བཤེས་གཉེན་མཛད་དུ་གསོལ།།
སྙིགས་དུས་སྐྱེ་བོ་དམུས་ལོང་ལྟ་བུ་རྣམས།།
དམ་མིན་དགེ་བའི་བཤེས་འདྲས་རྗེས་བཟུང་སྟེ།།
འཁོར་བའི་གཅོང་རོང་གནས་ནས་འདྲེན་མེད་རྣམས།།
ཐུགས་རྗེའི་ལྕགས་ཀྱུས་མྱུར་དུ་དྲང་དུ་གསོལ།།
དུས་དང་གནས་སྐབས་དག་ནི་ཐམས་ཅད་དུ།།
དམ་པ་ཁྱོད་ནི་བདག་གི་མགོན་ལགས་ཀྱི།།
མངོན་པར་རྫོགས་པར་མྱུར་དུ་འཚང་རྒྱ་འགྱུར།།
ཐོས་བསམ་སྒོམ་གསུམ་བདག་ལ་སྩལ་དུ་གསོལ།།
།།
རྩོམ་ཡིག་ཕབ་བཤུ་བ་སྐབས་དྲུག་པའི་མཐར་ཕྱིན་སློབ་མ་མེ་ལྕེབས་ཡིན།
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་ཉི་ཟེར། བན་ཤུལ་འཇམ་དབྱངས། ཨ་བུ་འབྲོང་།
|