འཛམ་གླིང་ཡོངས་སུ་ཚོགས་ཁག་སོ་བཞིས་དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ལ་བློ་དཀར་བྱེད་རྒྱུའི་དམ་བཅས།
པར་འདི་ནི་ཟླ་གཉིས་པའི་ཚེས་དྲུག་ཉིན་པའོ་ཧེ་ཙེ་ནེ་ཁྲ་ནས་བླངས་པའི་འདྲ་པར་ཞིག་ཡིན་པ་དང་། སྐྱེས་པ་ཞིག་གིས་དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ཀྱི་མཚོན་རྟགས་མངོན་ཡོད་པའི་རྩིས་འཁོར་གྱི་བརྙན་རིས་སྔོན་ཡི་གེ་གཏག་བཞིན་པའི་ཚུལ་རེད།
མཉམ་འབྲེལ་རྒྱལ་ཚོགས་ཀྱིས་ཚེས་ལྔ་ཉིན་ཁྱབ་སྒྲོག་བྱས་པའི་སྙན་ཞུ་ལྟར་ན། འཛམ་གླིང་ཡོངས་ཀྱི་ཚོགས་ཁག་སོ་བཞིས་དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ལ་བློ་དཀར་བྱེད་རྒྱུའི་དམ་བཅས་ཡོད་པ་དང་། རྩ་འཛུགས་དེ་འཛམ་གླིང་སྟེང་ཆེས་འབྱོར་ཕྱུག་ལྡན་པའི་འཇིགས་སྐུལ་རྩ་འཛུགས་ཤིག་ཡིན་ལ། རྒྱལ་སྤྱིའི་ཞི་བདེ་དང་བདེ་འཇགས་ལ་སྔ་ན་མེད་པའི་འཇིགས་ཉེན་ཐེབས་བཞིན་ཡོད་ཟེར།
སྙན་ཞུ་དེ་ནི་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཕན་ཅི་ཝུན་གྱིས་བདེ་འཇགས་ལས་འཛིན་ལྷན་ཚོགས་ཀྱི་འབྲེལ་ཡོད་གྲོས་ཆོད་ཀྱི་རེ་བ་ལྟར་ལས་པ་ཡིན་ཞིང་། ཚེས་ལྔ་ཉིན་མཉམ་འབྲེལ་རྒྱལ་ཚོགས་ཀྱི་དྲ་ཚིགས་སྟེང་ཁྱབ་སྒྲོག་བྱས་པ་རེད།
སྙན་ཞུ་ལས་བཤད་རྒྱུར། ལོ་གཉིས་མ་འགོར་བའི་དུས་ཚོད་ནང་། དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ཀྱིས་དབྱི་རག་དང་སི་རི་ཡཱའི་ས་ཁོངས་མང་བོ་བཙན་བཟུང་བྱས་ཤིང་། ཉེ་སྔོན་ད་རུང་ཨ་ཧྥེ་རི་ཁ་ནུབ་མ་དང་བྱང་མ། དབུས་ཤར། ཨེ་ཤ་ཡཱ་ཤར་ལྷོ་ས་ཁུལ་བཅས་ཀྱི་ཤུགས་རྐྱེན་ཁྱབ་ཁོངས་ཇེ་ཆེར་གཏོང་བཞིན་ཡོད། ཉིས་སྟོང་བཅོ་ལྔ་ལོའི་ཟླ་བཅུ་གཉིས་པའི་ཚེས་བཅོ་ལྔ་ཉིན་བསྒྲགས་པ་ལྟར་ན། འཛམ་གླིང་ཡོངས་ཀྱི་ཚོགས་ཁག་སོ་བཞིས་དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ལ་བློ་དཀར་བྱེད་རྒྱུའི་དམ་བཅས་ཡོད་པ་དང་། ཚོད་དཔག་བྱས་ན་ཉིས་སྟོང་བཅུ་དྲུག་ལོར་དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ཀྱི་ཁོངས་སུ་གཏོགས་པའི་རྩ་འཛུགས་ཀྱི་ཁ་གྲངས་མུ་མཐུད་དུ་ཇེ་མང་ལ་འགྲོ་ངེས་རེད་ཟེར།
སྙན་ཞུ་ལས་བལྟས་ན། དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ཀྱིས་རྒྱལ་སྤྱིའི་ཞི་བདེ་དང་བདེ་འཇགས་ལ་སྔ་ན་མེད་པའི་འཇིགས་ཉེན་ཐེབས་སྲིད་པར་འདོད་པ་དང་། རྒྱལ་ཁབ་སོ་སོས་འཇིགས་སྐུལ་རིང་ལུགས་ལ་རོགས་སྐྱོར་བྱེད་པའི་བྱ་སྤྱོད་ལ་ཆམ་ཕབ་གཏོང་བ་དང་། དྲ་རྒྱར་བརྟེན་ནས་མི་སྣ་བསྡུ་བའི་བྱ་སྤྱོད་ལ་ཆམ་ཕབ་བཏང་སྟེ། ཕྱི་རྒྱལ་གྱི་འཇིགས་སྐུལ་རིང་ལུགས་ཀྱི་འཐབ་འཛིང་མི་སྣ་གནས་སྐོར་བྱེད་པར་བཀག་འགོག་བྱེད་པ་དང་། དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ཀྱི་མིང་ཐོགས་ནས་སྤེལ་བའི་འཇིགས་སྐུལ་འཇབ་རྒོལ་ལ་རོགས་རམ་དང་ཇུས་འགོད་བྱེད་པར་བཀག་འགོག་བྱེད་དགོས་པའི་གྲོས་གཞི་བཏོན།
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། འབའ་སྣང་གྲོལ། ཨ་བུ་འབྲོང་།
|