སྐུ་འབུམ་བྱམས་པ་གླིང་གི་དགུ་གཏོར་ཆེན་མོ།
ཁ་སང་སྟེ་2015ལོའི་ཧར་ཟླ་༡༢་པའི་ཚེས་༢༩ ཉིན་སྐུ་འབུམ་བྱམས་པ་གླིང་གི་དགུ་གཏོར་ཆེན་མོར་མཇལ་དུ་སོང་། སྐུ་འབུམ་དགུ་གཏོར་ཆེན་མོ་ནི་ལོ་ངོ་ཉིས་བརྒྱ་དང་དགུ་བཅུ་གོ་གཅིག་གི་ཡར་སྔོན་ལ་མན་ཇིའི་གོང་མ་ཁྲི་ཐོག་གསུམ་པ་ཡུང་ཀྲིན་གྱི་དམག་དཔོན་ཉན་གུང་ཡེ་ནས་སྣེ་ཁྲིད་བྱས་པའི་ཧྲག་དམག་འབུམ་ཕྲག་མང་བོ་ཤར་ཙོང་ཁའི་ཡུལ་དུ་ཐོན་ནས་མཚོ་སྔོན་དུས་འཁྲུག་ཆེན་མོ་བསླངས་ཏེ་གསེར་ཁོག་དགོན་དང་ཆུ་བཟང་དགོན། སྟོང་སྐོར་དགོན། སྐུ་འབུམ་དགོན་གཙོ་བྱས་པའི་དགོན་པ་ཆེ་ཆུང་གང་མང་ལ་ཆགས་འཇིག་བློ་ཡུལ་ལས་འདས་པ་བཏང་ཞིང་སྨུག་པོ་ལྡོང་གི་རུས་རྒྱུད་མི་དབང་ཟི་ན་རྒྱལ་བོ་གཙོའི་ཡུལ་དཔོན་དང་སྡེ་དཔོན་མང་བོའི་སྐུ་སྲོག་ཤོར་བར་མ་ཟད། སྐུ་འབུམ་དགོན་པའི་ཁྲི་ཟུར་བ་ཆུ་བཟང་བློ་བཟང་བསྟན་པའི་རྒྱལ་མཚན་དང་ཚོགས་ཆེན་ཞལ་ངོ་གཙོ་བྱས་པའི་གྲྭ་བ་སྟོང་ཕྲག་གཅིག་ལ་ཉེ་བའི་སྐེ་བྲགས་པའི་སྐབས་སུ་ཚོགས་ཆེན་དགེ་གཡོག་གཙོ་བྱས་ཏེ་གྲྭ་བ་མང་བོས་དཔལ་རྡོ་རྗེ་འཇིགས་བྱེད་ཀྱི་ཆོ་གའི་སྒོ་ནས་མགོན་ཆོས་ལྔ་ཡི་བསྐང་གསོ་གསུངས་ཏེ་དགྲ་བགེགས་དྲུངས་ནས་འབྱིན་པའི་རིམ་གྲོ་རྨད་དུ་བྱུང་བ་བསྒྲུབས་པ་ནས་བཟུང་རིག་གསར་གྱི་སྐབས་མ་གཏོགས་བར་མ་ཆད་པར་བསྒྲུབས་བཞིན་ཡོད་པས་གཞན་ལས་ལྷག་པའི་བྱིན་རླབས་ཀྱི་ཚན་ཁ་ཡོད། དུས་དེ་ནས་བཟུང་ཟི་ལིང་ཉེ་འཁོར་གྱི་བོད་པ་རྣམས་ལ་བོད་སྐད་བཤད་མི་ཆོག་ཟེར་བའི་ཁྲིམས་སྲོལ་ངན་པའི་རིགས་མང་བོ་ཞིག་གཅིག་རྗེས་གཉིས་མཐུད་དུ་དར་བའི་འགོ་ཚུགས་པ་ཡིན་པས། ང་ཚོས་ཟི་ལིང་ཉེ་འཁོར་གྱི་བོད་མི་བོད་སྐད་མི་ཤེས་མཁན་རྣམས་ལ་དམའ་འབེབས་དང་བརྙས་བཅོས་མི་བྱེད་པར་ཁོ་ཚོའི་ལོ་རྒྱུས་ཀྱི་རྒྱབ་ལྗོངས་དང་ལོ་ངོ་སུམ་བརྒྱ་ལ་ཉེ་བའི་རིང་གི་སྙིང་སྟོབས་དང་བརྩོན་འགྲུས་ལ་མཐོང་ཆེན་དང་གུས་བསྐུར་བྱེད་པར་རེ་སྐུལ་ནན་མོ་བྱས་པ་ཡིན། དེ་དང་དུས་མཚུངས་སུ་ས་ཆ་ལ་ལར་མི་རིགས་གཞན་དང་འགྲོགས་ནས་ལོ་ངོ་བཞི་བཅུ་ལྔ་བཅུ་ཙམ་དང་ཡང་ན་ཉི་ཤུ་ཡས་མས་ནས་ཀྱང་བོད་ཡིག་བོད་སྐད་མི་ཤེས་མཁན་མང་བོ་བྱུང་དང་འབྱུང་བཞིན་ཡོད་པ་དག་ལ་དེ་ནི་མི་རིགས་ཀྱི་ངོ་ཚ་ཡིན་པ་ཤེས་པར་གྱིས་ཞེས་དྲན་སྐུལ་གྱི་བརྡ་འཕྲིན་འདི་སྤེལ་བ་ཡིན། དགེ་རྒན་འཇིགས་མེད་རྒྱལ་མཚན་མཆོག་གི་སྐད་འཕྲིན་ལས་བཤུས།
བསྐང་གསོ་གསུངས་ཏེ་དགྲ་བགེགས་དྲུངས་ནས་འབྱིན་པ།
དད་ལྡན་མང་ཚོགས་རྣམས་མཚར་སྣང་ངང་གསར་འགོད་བྱེད་བཞིན་པ།
དགུ་གཏོར་ཆེན་མོ་འཕེན་པ།
རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། འབའ་སྣང་གྲོལ། ཨ་བུ་འབྲོང་།
|